#مابعد_الخطيئة
الجزء التاسع
Nada hs
adaena7 واتباد
اخذت المي وهدى ورايه بيدها صينيه الجاي .. خالد مثل الي منتظر فرصه حتى يحجي.. عيونه مانزلت مني.. امي تسولف ويا سوالف عااديه..
من سمعته غير نبره صوته وكال:خاله.. اريد احجي وياج انتي ومنتهى بموضوع!
امي:خير يمه؟ خوفتني..
خالد:لالا كل خير.. لاا تخافين.. حجية تعرفين اخويه وليد؟ وتعرفين هو شنو؟
امي:يا فدوة ونذر.. وليد ابو وكفات الحلوة..
خالد:كاتل نفسه يريد ناسبج حجية..
امي:ههههه ع نهاوي؟
خالد:اي.. ليش عدكم بنات غيرهه ههه..
اسمع حجيهم واني ع نار.. نوب امي باوعتلي صفح وهي تضحك..
بقيت اباوعلهه بنظرة جامدة ومركزه بيهه.. مثل الي ديكولها..مااريد...
امي:والله ياوليدي تعرف اني مابيدي شي.. ومااجبر وحده ولا ادخل بيهن.. حته باجر عكبة من اموت مايلومني ويعاتبني.. اريدهن هن يختارن ويتحملن اختيارهن..
باوعلي خالد:منتهى .. سمعتي مو؟
دنكت وهزيت راسي بأي..
خالد:وهسه شنو؟
هدى:احم.. منتهى؟
-ماادري.. انطوني مجال افكر..
خالد:هاي هيه براحتج.. شعنده خل ينتظر..
هدى:اي
متحملت اكثر.. عفتهم ورحت للغرفه.. نار وشابه بنص صدري.. مااكدر اكعد ولاارتاح.. اروح وارجع بالغرفه ماادري شسوي واخلص من سالفه الخطبه.. اني ماصدكت علي كال حبيبتي يطلعلي وليد صفح!
كعدت بالكاع.. كافي تعبت والله تعبت... اني شنو الخلاني هيج اصير..
ليش ماعرفت وليد وتقدملي بغير ظرف.. ليش عفت الناس كلها ورحت ع المتزوج.. ااااااه..
صبت دموعي.. مو اختبار هذا صار انتقام.. يارب ارحمني دخيلك..
ابجي سكته.. دخلت هدى..
هدى:هااا؟! خير ياطير؟ بعدج ابشرج ماتتزوجين وظلي بعقلج هذا!
-فدوة هدى.. اني اختج.. فدوة كوليلي شسوي وارتاح..
كلتها واني الوب من الحرگة ..
هدى:والله بيدج.. قبلي بوليد وينسيج علي والف مثل علي..
من جابت اسمه انملت عيني دمع.. كمت مااشوفهه لهدى كدامي..
خفضت صوتي اترجاهه واشرت ع گلبي:مااكدر.. هدى مااكدر... افهميني!
هدى:شسوي يعني؟ قرارج بيدج وانتي اختاري..
رفعت راسي للسكف.. احس الدمع وصل لرگبتي انعصرت عصر من الوجع البگلبي:اااه رب ارحمني..
هدى:كافي.. روحي غسلي لا تشوفج امي هيج..
درت وجهي ممهتمه الها وكعدت ع جربايه.. طلعت وخلتني.. علي لمساتك بعدهه بيه.. عيونك متروح من بالي..
بدون مااسيطر ع نفسي اخذت التلفون ودزيت(هلاووو)
تأخر يله جاوبني:ياهلا وغلا..
دموعي تصب وبنفس الوقت فرحانه داشوف حروفه..
(شلونك.. مشتاقه)
(زين.. اني همين)
(علي)
(عيوني؟)
(احبك)
(ههههههه طفلتي المجنونه )
بعد مجاوبته.. بقيت فرحانه احس بنفسي مسويه فد شي عظيم..
مرت ايام.. بينا بس مراسلات.. ومرات بالليل اتصالات.. كان يحجيلي عن شغله وعن كل شي .. اله زوجته ابد مجاب طاريهه.. وحتى من اسأل يكلي عوفج منها .. حسدتها ع مكانتهه بگلبه.. هو صح يحاجيني وتطلع منه مرات حبيبتي وروحي.. بس احس اني مجرد تقضيه وقت.. وهو فعلا هيج بس جيب الي يقنع گلبي.. احجي ويا وماادري ع يا لحظة يعوفني ..
ومره من المرات اتصلت بالليل بوقت متأخر.. حوالي 12 او 1
هو ماكان يفتح خط عليه.. يرفض ويرجع يتصل.. بس هل مره لا انفتح الخط..
صوت مريه.. بس سمعتهه احس گلبي وكع.. كالت:الو؟ منو؟
سمعت صوت علي صاح:منو؟
نوب كبل انكطع الخط.. محجيت شي.. ومااعرف شنو مثبت اسمي يمه..
بس بقيت بنار.. اتصل لو لا.. ليش هي فتحت خط؟ معقوله شكت؟
بقيت كاعده ومنتظره وقت يمر وارجع اتصل.. متوتره وروحي تريد تطلع..
اهتز التلفون بيدي.. كبل فتحت خط بس ماحجيت..
علي:الو..
اخذت نفس:الو..
علي:ووجع! شبيج تخبلتي؟ انتي شنو من بشر؟
-مدااكدر انام! اريد اسمع صوتك!
علي:ايييييه لا تكفرينا هسه!
خفضت صوتي حيل.. صبت دموعي وبقيت ساكته.. هو بس يرزل.. شهگت شهگه احسها شگت صدري وطلعت:كافي! انهي هل مهزله عاد! مدااتحمل هيج!
علي:وشتردين عيني خانم؟!
-اتزوجني..
علي:هههههههههههههههههههههاي...
احس نفسي فقدت من سمعته هيج يضحك.. عبالك شي دينشلع مني يبدي برجليه وصل حد راسي.. لزمت التلفون وركعته بالكاع..
خلص مااتحمل هيج.. مو حياة هاي.. لا اني بسما ولا اني بگاع..
طلعت من الغرفه امشي وابجي.. ممهتمه حتى اذا امي سمعت.. كافي الحرب النفسيه الي دتصير بيه .. وصلت باب المطبخ طلعت برا اشتميت هوى.. كانت الدنيا بارده حيل.. كمت الم بنفسي كوه حتى ادفه..
بقت ضحكته تتردد بأذني.. عبالك ديكلي انتي شنو واتزوجج.. شطت وصارت اعصابي نار.. فتت جوه.. خلص اموت نفسي وارتاح..
رحت لعلاكه الادويه مال امي.. تاخذ مال ضغط وبالعلاكه فاليوم همين..
بديت ابلع واني ابجي فاقده.. كمت افتر بالبيت مادري وين اروح ووين انطي وجهي.. رجليه بدت تثگل وعيوني كوه افتحهه.. منا اني باجيه طن دموع ومنا الدوة الاخذته بده ياخذ مفعول..
كنت مااعرف نفسي شسوي.. جسمي يشتغل بصفحه والي اريده بصفحه..
رجعت للغرفه.. شكلت التلفون.. اتشغل همزين..
دزيت مسج لعلي...(راح اموت وروحي برگبتك) كوه كملت المسج..
بده جسمي كله يثگل وگلبي ينبض بطيء كلش ونوب النبضه احسها تزرف صدري ع كد ماقويه..
مشيت خطوات.. اتذكر طلعت باب الغرفه وبعد ماحسيت ع شي..
كنت احس نفسي متت.. ظلام بظلام.. امشي بظلمه.. اسمع صوت بس مااعرف منو ولااعرف شنو يحجون.. اريد افتح عيني ماكدر..
راسي صار اثكل من جبل .. اريد التفت اريد اشيل راسي مااكدر..
فتحت عيني.. ضوه قوي اذه عيوني.. باوعت امي بصفي مدنكه وعباتهه مغطيه نص وجهه.. ركزت اكثر.. دتبجي..
غمضت عيني حيل.. مامتت.. ليش مااخذت عمري يارب..
امي:نهاوي.. يمه بنيتي.. يمه شبيج.. يمه شجاج هيج تسوين؟!
باوع عليهه بيأس وبقيت ساكته..
كامت تبجي وتغطي وجهه مني.. اريد اشيل ايدي وامسح دموعهه ماكدرت..
درت وجهي منهه وهمين صبت دموعي..
وصلتني للموت ياعلي.. بعد وين تريد توصلني..
اسمع صوت نورس: ها صحت؟
امي:اي..
اجت نورس كبالي:تخبلتي انتي؟ ولج شلون هيج تسوين! لوما امي ملحكتج شجان صار بماما!
بقيت اباوع بوجهه.. مااكدر احجي .. واصلا شنو احجي وشكول..
مرت ساعات واني بالفراش.. امي ونورس كل شوي يتاهمسن.. واني كل عقلي يم علي.. اجه الطبيب مادري الممرض.. كال تكدرون اطلعوهه..
طلعت من المستشفى دنيا ظهر مادري صبح.. زوج نورس منتظرنا..
صعدني بالسياره.. يحجون واني بالي مو يمهم.. زوج نورس يعاتبني ليش هيج وبعدج شابه ومن هل حجي.. طنشت وبقيت صافنه ع الشباك..
وصلنا البيت الساعه 3 الظهر.. واني ع اساس انتحرت ب2 هههه ضحكت بيأس ..مامتت بسبع ارواح..
خلتني امي بالصاله.. وراحت للمطبخ.. نورس بقت يمي هي وبتهه .. نوب راحت ورا امي.. صفنت ع الكاشي.. صوت ضحكته من ضحك ميروح من بالي.. انملت عيوني دموع..
رجعت نورس:هاا؟ رجعنا؟ شبيج بس فهميني!
مسحت دموعي ودنكت..
امي:يمه نورس.. ازيد ملوحه حته يلزم كلبهه؟
نورس:جايه اني اسوي تعالي ارتاحي مامه..
رحت جبت التلفون من الغرفه.. عبالي الكه داز شي .. ملكيت واصلا مالازم انتظر هيج شي منه.. صفنت خلص لازم اني انهي هل شي بيدي .. مايريدني مو كوه هي.. صار سنتين ونص اني اركض ورا .. شحصلت منه غير الاحتقار والذل.. كافي اريد اخلي حد..
قطعت تفكيري نورس جايبه صينيه متروسه اكل.. اني اصلا تلعب نفسي..
كوه جبروني ع الاكل.. كملت ورحت غسلت.. دوخه فضيعه سيطرت عليه لحد ماغفيت.. عبالك مو غفوه غيبوبه..
كعدت دنيا ليل.. الساعه 10 .. نورس بعدها يمنه.. شذى وهدى همين جايات.. من طلعت من الغرفه كلهه تباوعلي.. اجن عليه بوسني..
احس نفسي مكسوره كدامهن.. فشلانه ومهزومه..
ياريت عاد لو صدك ميته..
كعدنه سوه.. الكل تسولف .. بس اني ساكته.. حسيت السوالف كلهه علمودي لان يردون يطلعوني من الحاله الاني بيهه.. شويه وسحبتني هدى للغرفه..
سدت الباب وكعدت يمي..
هدى:حياتي.. شبيج احجيلي خل افهم شكو؟ لج تخبلت من امي كالت الي!
-مابيه شي.. بس اريد اموت واخلص..
هدى:ليش هيج تحجين.. شنو الصار؟ ع وليد؟ مو اله تقبلين!
-لا مو من وليد.. اني هيج ماردت روحي..
هدى:بس احنا نريدج! منتهى! انتي مو صغيره وتسوين هيج بينا! لا سامح الله لوما امي فازه ولاكيتج شجان صار؟ كافي تصرفين بدلع! انتي كبرتي بعد!
-هدى عوفيني.. اريد انام..
هدى:براحتج .. بس فكري بكلامي.. واذا عندج شي احجيلي اسمعج!
-ماعندي شي..
عافتني وطلعت.. تمددت ع فراشي وتغطيت.. خليت اديه جوه وجهي اثنينهن.. وبلشت عيوني تصب..مااريد احد يعرف الي بداخلي.. ماريد احجي كلبي ديتكطع ومحد يدري بيه.. روحي دتطلع واشتهي الموت بس مايجي...بقيت ابجي واحجي وحدي.. لحد ماغفيت..
صحيت ماادري شكد الوقت.. غرفتي ظلمه .. مااندل نفسي وين نايمه.. راسي وين رجليه وين.. احاول اتذكر حتى امشي..
تلمست عرفت اني ع جربايتي ونفس نومتي مثل كل مره.. بس كنت دايخه ومسطوره.. كمت من مكاني عطشانه وريكي يابس.. فتحت ضوه غرفتي..
طلعت شربت مي.. باوعت بغرفه امي نورس باقيه يمنا ونايمات هي وبتها..
هه.. يخافون لا انتحر مره لخ..
دخلت الغرفه ماكو نوم بعيني.. اخذت التلفون بيدي.. رحت ع لعبه بالجهاز..
واصلا مو علمود اللعبه منتظره بلكت مسج او اتصال..
ايست .. طلع الضوه واني افلفس بالتلفون.. شمرته ع صفحه ونمت..
ويومين ع هل حال.. جدولي كله مخربط.. لا اني نايمه بوقت نوم العالم ولا اني كاعده مثل البشر.. علي اتصل مرتين ومجاوبت..
كنت مستقويه واكول ماارد ماارد.. وهو ماكلف نفسه اكثر من اتصالين وبس.. نورس من اطمئنت بعد مااكدر انتحر يله عافتنه وراحت.. واجه الدور لهدى.. تجي يمنا بالنهار لحد 11 او اكثر يله تروح من يمنا..
وهي لو ما خالد ميقبل كان نامت يمنا..
وصار كل وحده من خواتي عليهه يومين تنام يمنه.. كنت احس تصير اجتماعات بينهن وبين مامه.. بس مغلسه مااريد اعرف ع شنو اصلا..
اسبوع كامل من بعد محاولتي للانتحار خواتي ممفاركاتنا.. تروح وحده تجي الثانيه.. وع هل موال..
بعدهه لا رجع الوضع طبيعي .. بس اني وماما.. والاتصالات ماتسكت من يمهن.. يخافن لا احاول مره لخ.. بس امي صارت مثل ظل اليه.. واكثر من مره اروح انام يمهه.. حتى لا يبقى كلبهه مشلوع عليه..
تقصدت اخلص وقت هوايه ويه ماما.. منها اريحها ومنها اتجنب الوحدة..
الغرفه كرهتهه كلش.. يمكن صارت بيه حاله نفسيه.. مو يمكن اكيد..
بس ساكته واكره الغرفه والبيت يخنكني خنك وقت الليل ..
كاعدين اني وامي بالصاله.. نباوع تلفزيون.. والصوبه بنص وحيل مقربه عليها.. اباوع للنار التطلع منها واكول ياريت احترك واموت..
اسمع تلفوني اهتز.. هو كبالي ع الكاع.. كبل خليته صامت بدون هز..
المتصل هو علي.. توترت امي كاعده.. واني عود مقرره بعد مااحجي ويا وصدك نويتهه.. اكثر من مرة اتصل..رفضت ودزيت مسج.. (امي يمي)
بعد مااتصل..
ساعه وفوك واني انتظر ماما تنام.. بعد مااتحمل.. اريد اسمع صوته.. انعل ابو الوعود الي وعدت نفسي بيهه.. واخيرا راحت ماما للغرفه.. وصتني انام من وقت ومااسهر..
سويت نفسي دااتفرج تلفزيون لفتره.. لحد مانامت امي..
دخلت الغرفه.. مشتاقه كد رحمة الله.. مشتاقة كد الضيم والعذاب الخليتني بي ياعلي.. رمشت وسديت..
وره شويه اتصل.. جاوبت..
علي:مساء الورد.. حبيبتي؟ الو؟؟ منتهى؟
-ها؟
علي:هااا؟ شبيج؟
-شبيه؟ شنو الي مابيه كول احسن..
علي:ليش متردين من اتصل؟
-هه.. كافي علي.. تعبانه..
علي:وشنو الي اسوي ويريحج؟
-الموت.. بس هو يريحني..
علي:تخبلتي؟ شنو شبيج احجيلي؟!
-اني بشر.. احس واتوجع .. بس عتبي ع الي مايحس بيه..
علي:راح اجيج.. اطلعي فتحي الباب..
-ها؟
علي:جايج للبيت.. اريد افهم شبيج ومن شنو تعبانه!
ملحكت ارد.. بعدني مصدومه صدك راح يسويهه ويجي.. انكطع الخط..
اروح وارجع.. فكرة تجي وتروح.. ليش كل مااحاول انسى واطلع من الاني بي يرجع يدمر كل شي بيه.. شلون اشوفه؟ وشنو اكوله؟ اشكيله منه لو عليه؟ افكر واهتز التلفون.. جاوبت..
علي:اني بالباب.. افتحي ..
طلعت ع طروف اصابعي.. مخبل سواهه واجه.. فتحت الباب شفتهه يروح ويرجع يم بابنه.. من شافني التفت للشارع يمنه يسره .. اني همين باوعت ماكو احد.. وسيارته همين ماكو.. دخل..
وكف كبالي.. احسه شي حلم.. الاتوجع منه ايام وليالي وسنين وابجي ع فراكه هياته كبالي.. احساس بالعجز.. عاجزه انطق واحجي.. عاجزه احرك اي طرف بيه.. عاجزه اعاتب واتعب..
مااحس اله لزم راسي بأيد وحده وخلاني ع صدره.. اخذ نفس طويل.. وذب حسره.. ماحسيت بي.. ولا اهتميت.. شي ويجي متأخر وبعد معاناة يصير ماله طعم..
همس:شبيج حبيبي؟ ها؟..
-مابيه.. عوفني ارتاح منك..
حاولت ابتعد.. ضمني اله اكثر وضحك..
علي:لج منتهى.. احبج..
حتى من طلعت منه.. مالها قيمة احسها.. مااهتزيت ولا تحرك بيه شي.. احسها طلعت كفيان شر..
لزم وجهي بأثنين ادي وباسني.. من خدودي من عيوني من حلكي.. بديت ارتخي ويا.. بس مالازم استسلم.. دفعته شويه..
علي:لالا.. ليش هيج ويايه..
-الي سويته بيه شيسمونه؟
علي:منو موجود هسه ابيتكم؟
-بس امي..
علي:خل نفوت جوه.. كافي ثلجنا هنا!
ترددت.. بس عيونه تطلب واني مااكدر ارفض.. لزمت ايده وجريته ورايه..
ااشرله ميطلع صوت.. وصلنا ع صاله.. همسلي وين غرفتج؟
اشرت بيدي.. جر ايدي وفتح الباب ع كيف.. ترددت وسحبت ايدي.. شد عليهه اكثر ودخلني ويا..
-ليش اله هنا؟ انت المن جاي؟
حضني وكال:اشوفج لان مشتاقلج..
-انت مو كنت تكرهني؟
علي:منو كال..؟
-انت!
علي:هههههه لا مااكرهج.. احبج.. احبج!
بده يعلي بصوته.. خليت ايدي ع حلكه حته يسكت.. غمض عيونه بيطىء وبوس اصابعي الي ع حلكه..
-كافي تسوي بيه هيج!
علي:ممسوي شي اني؟
-مدااتحمل!
علي:واني همين..
-لعد روح..
علي:لا.. مشبعان منج..
فتح شعري.. بده يمشط بي بأصابعه.. كل جسمي يكز من يلزمني واخدر..
همس يم اذني:احجيلي شبيج..؟
فقدت السيطره ع نفسي.. مغمضه عيوني ومااحس بنفسي شحجي.. حجيتله عن الانتحار .. خله ادي ع وجهي ومسح دموعي..
علي:اششش.. لاتبجين..
فقدت بين اديه.. حوطت ركبته بأثنين اديه.. صح مااوصل طوله بس كوه جلبت نفسي بي.. رفعني اله اكثر.. شالني بأديه اثنينهن.. كعدني ع ميز تواليت.. صفنت بعيونه.. بس كوه فاتحه عيوني اني..
يباوعلي مبتسم:هاا؟ اروح؟
هزيت راسي بلا.. طفى التبلام .. صارت الغرفه ظلام .. مااسمع بس صوت انفاسه السريعه.. قرب يمي.. اريد قربه وخايفه بنفس الوقت وماكو مجال ابعده او احجي.. تلمس وجهي بأدي.. خله اصبعه ع شفتي..
النفس طلع مني متقطع.. بي شهكات واهات..
همس هاا؟ شبيج حبيبي.؟
بسته من ركبته.. متحملت قربه مني لهدرجه.. اله شوي يغمى عليه..
حضنته حيل.. مااتركتله مجال يبتعد عني.. باسني من كل مكان بوجهي وركبتي.. اديه تصعد وتنزل ع ظهري.. ضعفت كلش.. بعدت التشيرت اللابسه من كتفه وبسته حيل.. كان يريد يبعدني ويكلي لا تعوفين اثر بس ماابتعدت.. وماوخرت اله لمن ريحت كلبي وعفت اثر..
يتبع..
يسعد مساكم.. طبعا قريت هوايه تعليقات انو القصه تبث ع فساد وتحرض ووو.. هوايه حجي الصراحة مزعج.. بس هذا واقعنا والقصه ماجبتها من جيبي تلث ارباع الي مذكور هو صار فعلا.. قصة وصلتني وكتبتهه.. والي تكول فساد ومافساد اني متأكدة هاي نفسهه تابعت العشق الممنوع ودقات قلب وغيره وغيره من المسلسلات الي كلها قايمه ع الحرام ومشاهد جريئة لابعد حد .. بعدين اريد افهم ليش تحكمون قبل لا تعرفون نهاية منتهى شنو؟ .. وهوايه همين علقن وكالن اسلوب ممل وماكو احداث..
الي ميعجبهه لاتقره.. اني من اكتب بالتفصيل اكو غايه.. غايتي اوصل الفكرة شلون كانت عايشه وشلون راح تعيش بالبارتات الجايه..
واحب اشكر كل الي يعلقون بتعليقات ايجابيه الي بصرف النظر عن ذمهم لمنتهى او حجيهم عنها..
ولو طولت عليكم.. بس لازم اوضح.. كملوهه واحكمو..
ومتابعه ممتعه..
