#مابعد_الخطيئة
الجزء الرابع
Nada hs
واتباد adaena7
مرت ايام.. استلمت النتيجة الحمد لله ناجحه.. وصرت ثالث..الي كتلتي قهر من رحت استلم عبالي راح اشوف استاذ علي بس ماكو .. مشفته..
وره فتره رجعت هدى من السفر.. وامي كالت نروحلهه لبيتهم.. ماردت اروح.. مالي خلك وليد.. بس شسوي مااكدر احجي لامي..
خابرنه عليهه.. وصلو للبيت.. رحنه وبطريقنه اخذنه هديه بسيطه..
اول مادخلنا المطبخ طلع وليد بوجهي.. اني شلون الي مزاج منا.. سلم علينه وطلع.. لاكتنه ام خالد.. نوب جنتهه مرت عصام.. شويه ونزلت هدى تركض ع الدرج.. حضنت امي .. نوب اني.. خطيه عوزهه بس ماتبجي
قدمولنا عصاير وكيك.. نوب اجه خالد سلم ع امي وعليه.. بقه يضحك ع هدى يكول خبلتني هناك بس تبجي عليكم..
هدى:معليج بي مامه.. مابجيت بس هيج ادمع.
خالد:هههه تره صورتج وانتي تبجين..
ام خالد:ههههه كافي جنكم فاره وبزون.. والله ياام نورس ماتدرين شكد وحشه عليهم..
امي:لعد اني شكول..
بقن يسولفن .. اني صافنه وافكر بعلي.. لحد ماجرتني هدى من ايدي.. اخذتني ع غرفتهه..
هدى:تعالي احجيلي شنو سالفتج ولج! حته خالتي انتبهت عليج بس تتصفنين! احجيلي لا تضمين!
-ماكو شي.. بس تعبانه..
هدى:بس؟ يعني ماكو شي؟؟
-اي..
هدى:راح اسوي نفسي صدكتج.. تعالي شوفي..
فتحت جنطه صغيره.. كالت:هاي كلها الج.. بس انتظري اني من اجيكم اجيبهه.. استحي هسه انطيج اياهه..
-حياتي شكرا..
هدى:بس لو تحجيلي وتريحين كلبي! اكيد واكعه بالحب مو؟
خنكتني عبره وكوه كلت لا..
هدى:هم كذبتي.. بس ميخالف مااريد اضغط عليج.. شوكت ماحبيتي احجيلي
بقينه نسولف عن سفرهم وشوفتني الصور الماخذيهه..
شويه وصاحونه امي تريدنا..
امي:يله مامه.. نسيتن نفسجن شنو؟
ام خالد:خليهن خيات وماشايفات بعضهن..
امي:تجين ويانه هداوي..
ام خالد:ع بختج.. خليهه ترتاح ونريد نشوفهه. لالا حته خالد مايقبل..
امي:يله هي هم بنيتج.. بكيفج ياام عصام..
ام خالد:كل الهلا بيجن.. نورتن البيت..
امي:الله يسلمج بعد گلبي.. عساهه دوم افراحكم ..
وصلنه للباب.. كان وليد يم سيارته.. مرتكي عليهه ويلعب بالتلفون.. من شافته امه صاحت..:لولو.. مامه وصلهم .. خالد يمه خطار..
وليد:بعيني ماما.. يدللون..
اووف لا راجعه مشي ولا ارجع ويا.. سلم ع امي والطريق كله بس يباوعلي
خزرته ردت ولا كأنه.. وصلنه.. كبل كمز كدام امي فتح الها الباب..
شكد كرهته وكرهت تصرفاته.. شبي هذا..
دخلنه للبيت وهو بعده واكف صخونه.. ركعت الباب بوجهه حيل..
دخلت بدلت.. كعدت اباوع تلفزيون..امي سوت عشه علمود.. كالت ضعفانه ومتغيره حيل لازم تاكلين.. ماتدري السبب شنو.. عبالهه مااكل..
متدري هذا كله من القهر.. اخ كون اوصل لعلي.. اسمع بس صوته..
ومرت ايام.. اجتنه هدى وجايبه وياهه الجنطه مالتي.. جايبتلي كومه ملابس وعطر ومكياج.. يعني اصلا مااشتري بعد ويه بدايه السنه..
وهمين جايبه لنورس وشذى.. بس مو بكد الي جابته اليه..
بقت يمنه يوم كامل.. وع اساس تبات.. بس خالد خبصها خبص بالتلفون .. يكلها ولج مااكدر انام وانتي مو بالغرفه.. لحد ماتنازلت وراحت ههه..
ومرت الايام.. واني نفس التفكير.. لا نسيت ولا تناسيت..عبالي العطله تهدي بالي شوي.. بس ماصارت عطله عليه .. كلهه بجي وحركان كلب وقهر....
وصار وقت الدوام.. مشتاقه حيل.. لكل شي مشتاقه..
للدوام للكليه لعلي.. اوف ياعلي.. يمكن اذا اشوفه انسى نفسي واحجيله كل الي بداخلي..احجيله ضيم العطله الخلصتهه ..
رحت اول يوم.. عدد طلاب كلش قليل.. ومو مهم الطلاب.. عندي علي يعني الكل.. افتريت.. ماشفته.. ايست من شوفته..
رحت اشوف الجدول بلوحة الاعلانات..
عدنه ماده ياخذنه واحد اسمه علي! معقوله علي نفسه؟ اله شوي اجه يغمى عليه من الفرحة.. بس هم خايفه لا يطلع مو علي نفسه..
داريد التفت وامشي .. مااشوف بس علي كبالي. احس گلبي انعصر من شفته.. فات بسرعه.. عبالك ميشوفني.. شافني وغلس..
اخ اخ.. ماتسوه ربع الضيم الشفته بالعطله.. هيج تعبر كأنك ماتعرفني..
ماكو ذاك الدوام اول يوم.. استلمت كتاب ورجعت..
من كد مابقيت افكر بالموقف الصار.. راسي راد يطك من الالم.. اخذت براسيتول مفاد.. رحت بسكوت اخذت فاليوم من امي .. نمت مادريت بشي
تمنيت انام مااكعد.. صدك دعيتها ع نفسي .. بس ماصارت
كعدت دنيا ليل.. هدى يمنه.. كاعدات هي وامي بالصاله.. بوست هدى وسلمت عليهه.. هي بقت تنتظر مني احجيلهه.. بس مكدرت.. شصعبها عندي اذا حجيت.. لليل راحت ..
امي دخلت نامت.. اني بقيت سهرانه ع فلم.. شبعت بجي علي..
مانمت لوجه الصبح.. بقيت نايمه بالصاله بيومهه..
كعدتني امي.. كلت الها مااروح اليوم.. اصلا ماكو دوام..
كمت لغرفتي كملت نومتي.. مااريد اكعد لهاي الدنيا .. مابيهه بس وجع..
للظهر كعدت.. وحشه وضوجة.. امي نايمه.. تغديت.. وكعدت ارسم..
من كد الضوجة بدعت بالرسم..
خابرتني شهد.. شلونج ماشلونج.. ليش ممداومه..
-والله تعبانه.. وهو اصلا ماكو محاضرات..انتي البارحه ماكو شو؟
شهد:اي مداومت..لج لااا.. اخذنه.. ومتصدكين منو..
-منو؟
شهد:استاذ علي.. ياخذنه عقود..
-ها؟
شهد:اييي.. وكال لان انتو طلابي دفعه العام خوش طلاب اصريت اخذكم السنه..
-هيج كال؟
شهد:اي.. يكول افضل دفعه انتو..
-هههه اي اي .. الله اعلم هل سنه شراح يبدع بينا..
شهد:بس شفتي العام صدك قرينه ونجحنه..
-اي.. بيهه وجهة نظر..
شهد:هسه باجر اداومين؟
-عدنه عقود؟
شهد:اي.. ثاني محاضره..
-اي ماشي اداوم..
شهد:اوكي حبي. ترا انطانه تحضير.. اطلعي ع الماده خاف باجر يسأل..
-اوكي..
بقيت افر بأذاني.. شلون راح اقره.. وشلون اركز .. يارب اذا مترهم طلعه من گلبي.. كافي تعبت منه.. اريد ارجع لحياتي قبل..
..بالليل حضرت احلى ماعندي من ملابس.. ودخلت سبحت.. قريت شويه حته اصير شاطره وابرز نفسي كدامه..
كعدت الصبح .. تريكت وبدلت.. خليت مكياج.. شوي اطوخ من كل مره..
باوعت لنفسي بالمرايه.. شبيه حتى اني مو بعينه؟ شنو الي ناقصني؟
اجه الخط طلعتله ورحت.. امشي ع كيفي.. شفته نزل من سيارته..
باوعلي ودار وجهه .. وكمل طريقه..
اول محاضره ضربتهه.. كعدت بالنادي اشرب جاي واشوي ارخي اعصابي قبل محاضرته.. صار الوقت.. دخلت المحاضره.. عين ع الباب وعين ع الساعه..
ماادري شوكت خملت وشوكت دخل.. شلت راسي شفته ع المنصه.. يمه متت من شفت عيونه. اتمنى اكمز ابوسهن..
طبعا كعدت اول ستيج.. حته اكون قريبه منه.. اريد اشبع عيوني بي..
بده يشرح.. واني عقل مابقى راسي.. ولك كل شي بيك ينحب.. شلون كرهتك بالبدايه مادري.. شلون خليت هدى تجي وتعاتبك مادري..
اباوع لايده لابس حلقه هلسنه؟! متت من شفتهه باصبعه.. شفته عينه طرفت ع رجلي. اثناء ماهو يشرح..باوعت ع رجلي.. كانت تهتز.. اي انقهرت وتوترت.. كله منك ليش تباوع.. هيج اهمك..
مادري شبسرعه خلصت المحاضره وطلع.. وبس اني حسيتهه كصيره..
البقيه كلهم كامو يحجون شنو ياخذ الوقت كله هم نريد نرتاح ..
لو ياخذ عمري هم مااكول ولا احجي..
ومرت ايام.. هلسنه محوله اول ستيج.. حته كبال عيوني.. اقره ويا يوم بيومه.. ردت اجذب انتباهه بكل صوره بس مكدرت.. الظاهر مرته ماخذه كل گلبه.. لبست اشكال الملابس كدامه مااهتم.. مكيجت لحد ماكال الله بس وهم مااهتم.. قريت وصرت شاطره وهم نفس اسلوبه ويايه وويه الكل..
بكل مره اتمنى اطم نفسي واني عايشه.. اتقدم علي خطوه يرجعني الف..
ومرت ايام.. هدى طلعت حامل.. فرحنالهه.. بس اني حتى بفرحتي اكو نقص.. مامرتاحهه.. مااتطلع صدك فرحتي..
من صارت حامل زوجهه كالها بعد ممنوع تسوقين لمن تجيبين يله.. فصار هو يوصلها لدوامهه.. كالت تعلمي دوره سياقه حته انطيج السياره بين مااجيب احسن ماباقيه طابكه كبالي ممستفاده منهه.. وهم عيالهه ماشاء الله معايزين لسيارتهه..
عاد اني صدك بلشت دوره تعليم.. شهرين ضبطتهه... طلعتلي هدى اجازه..
وصرت اروح وارجع بسياره هدى.. احسن من دوخه الخط..
شوكت مااحب اروح وشوكت مااحب اطلع..
اول يوم رحت بالسياره.. مرتبكه وخايفه..
شفت سياره استاذ علي طابكه.. اجيت وحشرتهه بصف سيارته..
نزلت كلي ثقه.. عبالك مسويه فد انجاز.. ههه شنو هل غباء والعقل ياربي
انتظرت محاضرته ع نار احر من الجمر..
واخيرا صار وقتهه.. كاعد كبالي.. وعيوني بعيونه.. يشوفني ويغلس..
ومرت ايام ع هل حاله.. يشوفني ويغلس..
وبيوم من الايام.. مثل كل مره متعوده اله اخلي سيارتي بصف سيارته..
احس بأمان من هيج اسوي..
طلع هو.. اني همين كبل اخذت كتبي وطلعت ورا.. هو صعد.. واني همين..
نزلت جامتي وهو همين.. التفت صدفه.. شافني عوج حاجبه مثل الي ممصدك.. سويت نفسي مااشوف.. بس بداخلي ميته علي وع نظرته..
حرك كدامي.. اني سويت نفسي عود منتظره شوي يله احرك.. شو هذا من شافني شخطها شخط كبالي وطلع..
عاد اني كبل صعدت عندي.. لازم الحكه واشوف وين بيته.. صدك لحكته.. عود احاول اخفي نفسي.. بس مااعتقد عود ماشافني؟ لا 80% شافني..
ورا ورا لحد ماوصل بيته.. اني براس الركن واراقب..
دخل للبيت.. وبعد ماطلع.. باوعت ع بيته زين.. بيت كبير.. واكو سياره همين طابكه بالباب.. مااعتقد وحدهم هو وزوجته كاعدين بي..
فضولي وصل حده.. نزلت يم محل قريب.. اخذت بطل مي..
كان ولد شاب كاعد بالمحل..
-بلا زحمه عليك.. بيت استاذ علي وين؟
اشرلي ع نفس البيت الي دخل بي..
-كاعد وحده؟
لالا هو واهله.. بيت ابو علي معروفين.. هو الكبير..
-ها؟
اي.. محتاجه شي ؟ تريدن اوصلج اله؟
-لا شكرا بس هيج ردت اعرف..
احس ابو المحل مااقتنع بكلامي وخاف مني.. وهاي اذا ماراح يحجي لعلي صدك.. مهتيمت.. اني اصلا اريد يشك واريد يعرف.. لان بعد مااتحمل.. اخر همي مرته وبنته.. المهم هو يعرف .. لو شنو يصير لازم اوصله..
رجعت للسياره.. شغلتها ورحت للبيت.. لكيت شذى يمنه..
يتغدن هي وماما.. من شفتهن جعت.. نزلت وياهن .. اكلت بواهس.. عبالك مسويه فد شي من عرفت بيته وين..
كملت ودخلت نمت.. كعدت كبل للدراسه. لازم ادرس..
سويت كوب كهوة .. رتبت الهوسه وبلشت اقره.. لليل بقيت ادرس..
كله علمود عيونك يابعد عيوني..
ويوم والثاني.. نفس الروتين.. بس صرت اشوف بنظرته من يطرفلي انه يعرف شي.. اي اكيد عرف اني لحكته وسألت عنهم..
عادي اهم شي ارضي نفسي.. وشنو يفكر خل يفكر..
بس مابدر منه شي ابد.. بحيث طكت روحي منه كلش.. لو حايط هم كان اهتز بي شي واتحرك.. صرت ادور اي حجة حته اشوفه واحجي ويا وحدنه.. مارهمت.. اكثر من مره مارهمت.. فشفت احسن شي ابدي اغيب.
ومن تصير غيابات هوايه اروحله واكله كنت مريضه..
وصدك سويت هل خطه.. شكو يوم عدنه محاضرته ماداومت اصلا.. وهيج لمن تراكمت الغيابات.. داومت..
من دخل علينه حسيت تفاجىء بوجودي.. بس مااهتم .. ولا سأل ليش ممداومه.. عكس بقيه الاستاذه سألوني ليش ممداومه وحجيتلهم مريضه.. اله هو.. يمكن لو اموت كدامه ميهتم..
كملت محاضرات.. الممرات قليل بيهه طلاب.. رحت لغرفته.. دكيت الباب
صاح ادخل..
دخلت.. بس شنو رعشه بكل جسمي من اشوفه..
علي:ها منتهى؟
-استاذ.. عندي غيابات هوايه..
علي:شنو عذرج؟
-كنت مريضه!
علي:عندج شي يثبت؟ رقود؟ وصفه طبيه؟
-لا استاذ.. كنت مريضه مكدرت اداوم.
رفع حاجبه وكال هاا.. ودنك.. حسيته افتهمها بغير شي.. انه مريضه بالشهريه هههه.. ميخالف خل شيفكر يفكر..
-استاذ؟
علي:نعم؟
-الماده الفاتنني هوايه.. ترجع تشرحهه؟
علي:لا طبعا.. لان ماده هوايه ونتأخر اذا اعيد..
-زين استاذ فد اني عيدلي اياهن؟
علي:اسف مااكدر.. مو مسؤوليتي اذا ماحضرتي..
ايست منه قافل.. تشكرت منه وطلعت..
ذبيت حسره.. شلون اجيبك شلون؟ بس ميخالف مو صعبه.. اجيبك اجيبك..
لو تبعد عني لسابع سما.. طلعت للبيت.. نفس الروتين.. الي تغير هو تفكيري.. شلون اخلي يفكر بيه.. ماكو غير اله اعترف اله.. احجيله كلشي..
واشوف شنو رده فعله..
صح هيج فكرت.. بس كان تفكير سطحي كلش ومال مراهقات..
وبديت اخطط ع هل اساس.. بس مكدرت.. بكل مره اكول اليوم احجيله افشل واستحي..
امتحنت كورس اول.. شوي احسن من العام.. كنت ادرس.. وتعودت صرت اعرف شنو الماده المهمه وشنو المو مهمه..
عطلنه العطله ربيعيه.. هدى يمنه العطله كلهه.. لان حامل وشوي تعبانه من الحمل.. فبقت يمنه.. تونست وهي يمنه بالعطله.. ماصار ذاك الفراغ عندي.. وحته ماكو فرصه ابجي .. اخاف انكشف.. كضيتهه اخطط..
دوامنه ايام.. وهو نفس الوضع.. مااهتزت بي شعره.. واني عيوني كافيات فاضحتني..
وره ايام.. صادف عيد المعلم..لكيتهه فرصه.. ادزله هديه واكتب فد عباره حلوه وياهه.. وصدك من طلعت من الدوام.. توجهت لمحل الساعات.. اختاريت ساعه ماركه .. وجبت عطر ماركه همين..
غلفوهن اليه.. وطلبت بطاقه اكتب بيهه.. اخذتهن ورحت..
طول الطريق افكر شنو اكتب.. بس وصلت فتحت اللاب وبحثت بالكوكل ع عبارت حب مؤثره.. طلعتلي اشكال الوان.. اختاريت وحدهه.. كتبتهه ع ورقه عاديه اول شي.. حته اشوف خطي حلو لو لا.. نوب ثبتتهه ع بطاقه وخليت اسمي جوه..
خليتهن بعلاكتهن وضميتهن...
ممصدكه شوكت اداوم وانطيهن اله.. اليوم صار شطوله.. واخيرا ليل..
سبحت ونمت.
كعدت من الصبح كلي نشاط وحيويه.. تريكت.. وبدلت وطلعت..
بدت محاضرات.. وماكدرت تنطي الهديه.. اخر شي شسويت..
شفته ع غير شعبه عنده محاضره.. رحت للغرفه مالته.. مقفوله.. يبوو.. عود كلت ادخلهه للغرفه وبعدين يشوفهه..
ايست من هل فكره.. رحت يم سيارته.. خليت الهديه ع البنيد.. وثبتت خيط العلاكه بماسحه السياره..
حركت السياره وانتظرت لحد مايطلع.. انتظرت هوايه وقت.. بس كله يهون لعيونه.. طلع واخيرا.. باوع للعلاكه.. يمكن خاف بيهه شي عباله..
شالهه واخيرا.. يسسس. انتبهت ع نفسي.. هههه شدسوين ثوله!
اخذهه خلاهه بالسياره وشغل وراح..
رحت اني فرحانه وطايره فرح.. اباوع للساعه .. اي وصل هسه.. اكيد فتحهه.. اخخ اتمنى اشوف وجهك وانت تفتحهه.. واخيرا راح تعرف شنو الي بگلبي.. مو بس حب.. لا عشق وهيام..
تأملت كلش من خليت الهديه.. داومت ثاني يوم.. مبتهجة.. كل الي اشوفه اسلم علي.. صار وقت محاضرته..
من دخل كان كلش عبوس.. يدنك ويشيل راسه شويه يباوعلي بنكد..
من شفته هيج .. صرت ادنك مااباوع.. حسيت الهديه مسويه مشكله عنده..
فكرت انه اخذهه للبيت وذب البطاقه بس زوجته ماقبلت عليهه..
بقيت انتظر لحد ماخلص المحاضره.. كال تكدرون تتفضلون..
اول مره يسويهه.. تطلع الطلاب وهو بعده كاعد.. بقيت اني كاعده.. حسيت يريد يحجي ويايه.. فرغت القاعه.. كال تعالي للغرفه..
شال الكتاب والاوراق وراح..
گلبي صار طبل.. يمه.. صدك يعني راح يكلي احبج.. يعني راح اسمعهه.. اه يمكن يغمى عليه اذا صدك.. رحت للحمامات.. عدلت نفسي.. مشيت والف فكره ابالي.. بس ماخايفه.. دكيت الباب.. صاح بنتر وعصبيه .. ادخللل!
فتحت الباب.. اخذت نفس ودخلت..
يتبع..
