#مابعد_الخطيئة
السابع عشر
Nada hs
adaena7 واتباد
خابرت نورس.. متحملت حجيت الهه.. اعرف هو شي تافه.. دخل يضحك ومعرفت شبي وخلاف بسيط خلاه يعوف البيت ويطلع.. بس بعد مااكدر اخفي اكثر.. كنت اشكي واشكي .. ...
ختمتها نورس:وهسه شسويلج يعني؟
-شسويلي؟
نورس:اي قابل اني الكتلت نفسي عليه؟ هذا الردتي وهذا نصيبج! مابيدي شي اني! اروح اتعارك ويا؟ لو اعاتبه اكوله ليش هيج ويه منتهى؟! اصحي وعوفي علي ع صفحة هسه.. ابنج اهم من هذا كله..
-نورس علي عده شي وضامه عني..
نورس:استغفر الله! واني شمدريني ياعيني! خلي كل هذا الحجي ع صفحة.. اهتمي بنفسج وابنج.. شتتوقعين من اخذتي متزوج؟ يكابلج ويكعد..؟ مثل ماانتي محتاجته هم همين محتاجته..
-كافي.. دتزيديها عليه ترا؟ خل اكمل شغلي..
نورس:اي اي .. شردي انتي اليحجي الحقيقه وياج ماتردي..
-لا بس عندي شغل..
نورس:ديله كملي شغلج وهمين طمنيني ع صوفي..
-اوكي.. مع السلامة..
شمرت التلفون ع صفحة.. صفنت وخنگتني عبره.. ايييه صارت الناس تعيرني.. واستاهل.. ليش كل السويته الك ضيعته..
لليل.. اجه علي.. ثگلت وجهي عليه.. داسوي عشا.. وهو كاعد يم مصطفى ويشتغل ع اللاب..
بيني وبين نفسي اكول هسه يجي ويصالحني.. هسه يجي.. كل مااشوفه يتحرك اكول اي راح يجي يحاجيني.. كملت عشا وداصب..
مااحس اله اديه اثنينهن حوطني.. روحي شاغت.. غمضت عيني وشديت ع ايده.. اي هذا علي الاحبه.. همس يم اذني..:عاشت ايدج..
انداريت عليه..بسته.. عبالك اول مره نلتقي..
ابتسم بوجهي.. اموت بضحكتك.. عيوني هي الي حجتله..
كعدنه ناكل.. عيوني مانزلت منه.. بس هو مو ذاك الاهتمام بيه.. شويه وبجى صوفي.. وشويه شويه صار يعيط ويختنك..
تخبلت.. شايلته واروح وارجع.. شسوي.. حتى نسيت شسوي.. سوه الجهاز.. مي مقطر وابره ..
اخذه مني.. خلاه ع الجهاز.. يصرخ ويبعد بوجهه.. كوه لزمناه.. شوي شوي كام يستنشق.. هده.. شلته من ابوه وبقيت افتر بي.. حتى جسمي مااحس بي.. ايدي مجروحه ومااعرف بيش انجرحت وشوكت.. كعدت وخليت بحظني ونيمته... صفنت بي وهو نايم..
ذبيت نفس ووياه حسرة كلش كبيرة... اخخ شوكت اعيش مرتاحه..
يمه فدوة ارضي عني .. اكيد نايمه بكبرج ومامرتاحه بسببي..
علي:ها نام؟
-اي..
علي:راسلت جماعه اليه.. كالو اكو خوش مستشفى بالهند..
-اييي يالله!
علي:راسلتهم ع موقعهم ومنتظر الرد..
-ليش ماكلتلي؟ زين سألت عنهم؟ خاف مو خوش اطباء؟
علي:شبيج اهدي.. ننتظر ردهم ونشوف..
باوعت ع مصطفى.. حبيبي عركان ونفسه يصعد وينزل بسرعه..
يارب من عمري ع عمره.. اخذ روحي وانطيها اله..
العشا بقه ع حطته.. بس علي اكل شويه.. رحت غسلت المواعين ورتبت المطبخ.. دخلت حمام وتكشخت وتعطرت..
عيون علي تباوعلي بخطف.. نيمت مصطفى.. ورحت يمه..
مددت بصفه.. دار وجه عليه .. مخلي ايده جوه راسه ويباوعلي..
بعد شعري عن وجهي صفن بعيوني وكال بهدوء:اني مااستاهلج..
حركت ايدي ع وجهه.. :حبيبي انت ونظر عيني..
بقى ساكت.. بالجذب مارجعلي حجايه.. انلسع كلبي.. ليش يكلي مااستاهلج.. وليش هل صفنة الطويله بعيوني..
-ليش هيج تكول؟
علي:هيج.. انسي.. تعالي..
سحبني اله.. بس مااعرف شكو.. احسه ضايج اومقهور من شي..
سكتت وعديتها.. مااريد نرجع نتخارب من سالفه صغيره..
كعدت بالليل لصوفي.. اباوعلهم اثنينهم يمي.. ربي لاتحرمني منهم..
ثاني يوم علي راح يم بان.. اجت شذى يمي..
جهالهه وكحين واخاف ع صوفي منهم فمابقت هوايه..
بالليل خابرني علي..
علي:ها.. شلونكم .. مصطفى شلونه..
-الحمد لله ع الله.. ا
علي:اكلج .. بعد هاي هي ان شاء الله ناخذه للهند.. بس افيز ناخذه..
-صدددك! يعني مصطفى راح يطيب..
علي:ان شاء الله.. بس صوريلي التقارير والاشعه وكل شي حتى الوصفات ودزيهن..
-ماشي ماشي..
كطعت التلفون وركضت اصور الي رادهن.. دزيتهن اله..
ياحبيبي راح اطيب وراح تكبر واذكركك شكد تعبتني..
بجيت فرح ونفاذ صبر.. عبالك يكلولي راح يصير رجال مشورب بهل العمليه مو بس يطيب...
وبديت انتظر.. فيزا وجواز وحجوازات المستشفى...
علي استعان بجماعه اله سهولو اله الاجراءات.. بظرف اسبوع كملنا.. جوازات وفيز...
بييوم روحتنا.. كلهه اجت لبيتنا.. خواتي اهل علي.. حتى بان اجت..
اني امشي وماادري بنفسي مخبوصة
جهزو اغراضنه خواتي.. علي راد جاي وسوتله اشواق..
ميته قلق.. حتى جسمي مثلج. شايله مصطفى وافتر بي..
وخواتي كل شوي وحده تسألني نخلي فلان شغله نعيف هذيج..
كعدو علي واخوانه شربو جاي وسولفو شويه..
علي:يله منتهى.. جاهزين؟
-هسه بس دقيقه..
رحت للغرفه.. لبست رداء وشال مال طلعه غير الي لابسته..
خواتي كلهن بالغرفه يمي..
نورس:منتهى خليج قويه مثل مااعرفج.. كل شي يصير خليج قويه..
هزيت راسي وسكتت.. اذا احجي كلمة يمكن ابجي..
هدى:كله جاهز؟
شذى:اي.
هدى:تأكدي خاف ينسون الجوازات لو شي مهم..
نورس:لالا كلهن اني حطيتهن بيدي..
كملت لبس..انطتني نورس صوفي.. كانت شايلته.. عيوني خايفه وتباوع للكل.. اتمنى اخذ الكل ويايه.. اخاف من اكون وحدي..
بان دخلت للغرفه:ها كملتي؟
اي اجيت..
طلعت امشي خطوات.. عبالك راح اروح وماارجع.. علي بوس ملاك وحسن.. وبان همين سلمت علي وباوسته.. مااهتميت اصلا مو بحال هيج شي.. الخوف البداخلي عماني اشوف شي..
طلعنا من الباب .. التفتت ع خواتي عيونهن مغوركه..
-ادعولنا...
كلها صاحت فد صوت.. حتى مافهمت شكالو.
طلعت حاضنه وليدي ومااعرف اذا راح ارجع بي لولا..
وصلنا مهيمن للمطار.. انتظرناعلما صار وقت طيارتته..
طول مااحنه بالطياره عيني ع مصطفى.. لونه صاير ازرك اكثر..
ونفسه سريع كلش.. خفت حيل.. خفت لايموت بيدي بالطياره..
علي كل شوي يشد ع ايدي ويكلي ع كيفج اهدي..
وصلنا ع نيودلهي.. كبل رحنا للمستشفى..
دورنا الطبيب الي متفق ويا علي..
دخلنا عليه.. راوينا الفحوصات الي مسويهن بالعراق.. كال كلهن ينعادن..
وبأسرع وقت حتى وشوف شنو نسوي..
وبلشو بي بالمستشفى.. اشعه وتحاليل ..
جسمه صغير.. حرام هيج تسوون بي.. ابر وتحاليل.. وهو بس نايم فاقد..
كملو وانطونيا.. حضنته حيل..
علي:شبيج منتهى؟! مااعرفج هيج اني؟!
-علي هذا ابني.. طلبته وحصلته كوه! ابني هذا!
طلعت التحاليل والاشعه. اخذناهن للطبيب.. نص كلامه فهمته والنص الخ لا.. حتى علي كال مفهمت كل كلامه..
الي فهمه منه انه مستحيل يسدون الفتحه بالقسطره.. وكال انو احنا كلش متأخرين وساكتين عنه.. وخلال يومين يسوي العمليه..
وماحدد نسبة لنجاحهه.. بس كال سهله..
اخذو مني.. مكدرت اشوف شنو يسوون بي..رحت ع صفحة بس اسمع عياطه واخلي اديه ع اذاني مااريد اسمع.. دخلت ورا ما كملو.. صونده بخشمه.. ومغدي بأيده..صدره متروس وايرات مااعرف شنو.. صوت نبضه يطلع بجهاز..
ياروحي.. اخذو كلبي وخلو اله..
مرت الساعات.. وهو بس ع الاجهزه ونايم.. مكابلته وكاعده اني..
عيني مانشفت. اشوفه وانمرد مرد.. كان بحضني واشم ريحته.. هسه مااكدر حته الزمه من كد الوايرات والشغلات المخليهه عليه..
ممرضين وممرضات كل شوي يجون يشوفو..
وعلي احسه مقهور وميكدر يطلع البداخله..
مرن يومين صوفي كله ع هاي الاجهزه..
وصار وقت العمليه.. روحي رادت تطلع بذاك اليوم..
اتمنى انام واكعد الكيهم مخلصين وصوفي صاحي وبحضني..
مااعرف شلون مر الوقت .. جمر بنص گلبي ..اروح وارجع أصفك اي بايد ...
طلع الطبيب.. حجه ويه علي.. اني من الرهبه نسيت حتى الانكليزي ..
راح الطبيب وعيوني تسأل بعلي قبل لساني..
ذب نفس طويل ..ابتسم وكال:نجحت الحمد لله..
البجي البجيته فلش صدري.. حتى صوتي راح.. علي يريد يسكتني مااكدر..
الرايح والراجع يشوفني.. بلغونا انهم نقلو للعنايه.. ومنكدر ندخل اله..
والي فهمنا من الطبيب كان فتحتين بالقلب مو بس وحده.. الثانية صغيرة..ووقت ضيعنا هيج.. كان المفروض من البدايه نسويهه اله وماننتظر كل هل وقت ع خالي..
تلفون علي صامت.. طول العمليه.. ورا ماطلع الطبيب وطمنه عنه فتحه ولكه كومه اتصالات.. جاوبهم.. نوب خواتي همين اتصلن..
اريد احجي وياهن مااكدر خلصتهه بس بجي.. وهنه همين ملتمات يم نورس ويبجن ع صوتي..
نذور نذرت.. ذبايح وقربان.. كل لحظة تمر انذر شي شكل..
جاب علي اكل.. بس مالي نفس.. اريد اشوف ابني هو اليشبع روحي بس..
شفناه من وره الجام.. مكدرت ادخل.. ممبين منه شي. كله اجهزه وصوندات ونايم حبيبي .. تكطعت عليه تكطع.. ممتحمله شباك يفصلنا..
وخرني علي كوه. بس ممرتاحه لعلي ابد.. من ساعه الي طلع بيهه الطبيب وهو بس يروح ويرجع يحوس.. اكله شكو يكلي ماكو شي..
خفت ع مصطفى.. رحت كباله صرت ..
-عليك الله.. كولي الدكتور كالك شي ع مصطفى؟ احجي لا تضم عليه !
علي:شبيج تخبلتي شنو؟ مو شفتي وكلج العمليه ناجحه !
-لعد شبيك ؟!
علي:مابيه شي.. بس تعبان ومااكدر اعوفج واروح للفندق.
-روح ارتاح وتعالي ..
علي:لا مااكدر اتركج..
-روح داكلك.. ماعليه شي واصلا مصطفى باقي هنا ميطلعو..
علي:ماشي.. اي شي اتصلي عليه.. ثبتي رقمي مو؟
-اي.. بس مو تنساني فد مره ومتجي؟!
علي:لا بس انام كم ساعه واجيج..
-ماشي..
راح يرتاح.. حسب ماكال.. واني مناطره اروح وارجع..
ساعات مرت.. مليت واني وحدي وانتظر ابني بفارغ الصبر..
رحت يم الشباك.. دنيا ليل.. حديقه المستشفى كلش كبيره.. ناس هوايه.. صفنت عليهم هذا رايح هذا راجع..
مليت ورجعت كعدت.. اجه علي..
شكله تعبان ومو مال واحد كان نايم..
-ها حبيبي..
علي:ها؟ صار شي ؟
-لا بس الممرضين ديفوتوله..
علي:خوش..تعالي ننزل جوه اكليلج شي..
-لا مااشتهي..
علي:منتهىىى! يله كدامي مو عايزج انتي همين توكعين عليه!
نزلنا.. كعد كبالي وهو بعالم ثاني.. لو بس اعرف شكو.. كلبي انزرف .. اكيد صوفي بي شي وميكلي..
بديت اكل وهو بس يتأفأف.. يكلب بتلفونه لو يهز برجله ويباوع داير مدايره.. بقيت ساكته مااريد اسأل..
كال راح اجيب جاي اليه ..اجيبلج كلت له لا.. كام وبقه تلفونه ع الطاوله..
بده يلمض.. درته عليه.. اتصال من رقم من العراق.. كل ظني احد من اهله او اهلي.. فتحت خط قبل لااحجي صوت بنيه غريب عاط:يعني مراح ترجع مو؟ اذا متجي اليوم انساني علي!متحجييييي!! علي!!!
سمعت الصوت.. احس جسمي ثلج.. ايدي رجفت.. منو هاي.. اقنع بنفسي اكول ها خاف اشواق..لا هاي بان.. لالا يجوز خواتي.. اريد اي شي اصدك بي حتى لى كذب.. باوعتله داير وجهه عني..
شمرت الجهاز لمكانه ودنكت.. جسمي كله كام يرجف..
رجع بيده جاي.. مااكدر اباوع بوجهه..
مردت احجي لان اذا حجيت تصير مشكلة ماتحلها حتى الشرطة..
رجعنا للطابق.. روحي تريد تطلع من علي.. عرفت شبي.. عرفت ليش ضايج وبس يفتر.. عرفت ليش عافني وراح..
اروح وارجع اباوعله بحقد.. هو ممهتم يمكن عباله علمود مصطفى..
صدري اختنك.. مكدرت اتحمل اكثر.. عفته ورحت مسافه عنه..
رجعت لنفس مكاني الوكفت بي.. ليش هيج يسوي بيه.. ليش هيج يجازيني.. تخوني ياعلي ليش.. شكد عانيت وشكد خسرت وتألمت تاليهه هيج..
ومنو هاي الي تخابره ومن شوكت علاقته بيهه..
الف سؤال يدور براسي..
مرت ايام.. واني ع هل حال عايشه بنار ماتطفى.. مصطفى شوي وضعه احسن.. وسمحولنا نشوفه.. بس مانقلو ع غرفه.. كالو وضعه ممستقر فلازم يبقى تحت مراقبه افضل..
احس علي كوه باقي يمنه ع اعصابه.. كان مأجر بفندق.. يروح ويرجع..
ومرات يوديني اني ويرجع لمصطفى بالمستشفى.. بس بيوم اصريت اني ارجع ويا ويبقى يمي..
دخلنا.. وكفت كباله..
-علي.. اذا ممتحمل تبقى ارجع!
علي:شكو شبيج؟
كلت باستهزاء:لا مابيه شي.. بس اشوفك كلش مال وطالعه روحك وانت يمنا!
علي:ليش هيج تحجين؟
-مااعرف والله اسأل نفسك؟!
علي:اووه بديتي تخربطين..
دار وجهه وراح للحمام.. عطت ورا اشرد اشرد عبالك مااعرف!
عبالك اني غشيمه! بس اريد اعرف ليش تخوني! بس فهمني ليشششش!
طلع باوعلي:منو كالج هل حجي؟
-هه منو كالي؟ حسيت بس كلت لا مااصدك احساسي.. علي ميسويهه ويايه.. هه اثاري طلعت عوبه من صدكتك ومشيت وراك!
علي:شبيج شبيج! لا تتخبلين هنا!
عطت بي ودموعي تصب:شلون مااتخبل! هااااا! لك خسرت كل شي علمودك! خسرت روحي وامي ووظيفتي وكل شي حلو! ليش؟ بس حتى اكون يمك! تجي انت تخوني؟
علي:دتخربطين ماكو هيج حجي..هذا الي قره براسج حاقد علينا!
عليت صوتي حيل:لعد منو الي اتصلت! منو الي تهدد اذا مترجع تنساهه!
خزرني واجه لزم ذراعي لواهه:وانتي منو سمحلج تجاوبين؟
-اخ.. عوف ايدي.. اه.. حقي وغصبا عليك وعليهه افتح خط وانعل الخلفوها! انت الي ماتصير لغيري! مو كافي متحمله بان التافهه!
مااحس اله طراك وع وجهي:انتي تجاوزتي حدودج هوايه!
ولك وتصربني! وعلمود منوووو! وكعت للكاع وبديت ادك والطم.. اصيح واحجي واعاتب وهو ولا مهتم.. قفل الغرفه ودخل للحمام والمفتاح ويا..
سبح وبدل ونام.. واني اون واصرخ وهو ولايمه..
اخخ اخخ.. لو بس اعرفهه منو اله اهجم بيت ابوهه.. هذا علي.. يعني روحي مااعوفه الهه.. اني بان وع اعصابي وياهه واتحمل..
بس علاقه وتلفون؟ لالا..
زين شنو ديحجي وياهه.. ديكولها حبيبتي مثل ماكان يكولها الي.. ديگلهت مشتاق مثل ماكان يكولي.. دتنام ع صوته.. ديشوفهه..
احس مخي راد يطك.. نوب بغربه ومصطفى وحده بالمستشفى.. وحضرته نام وشبع نوم يله كال كومي نروح..
امشي ورا وبكل خطوه احقد علي اكثر.. بحياتي ماكرهته.. ولا حقدت علي غير اول ماعرفته.. بس هسه لا نار وتغلي عليه..
كون اكطعه واوزع لحمة للچلاب .. وصلت بيه دعيت عليه يموت ومايعرف غيري ولا يحب غيري..
وصلنا للمستشفى .. يتصرف عاي ولا كانه واني كل نظره انطيهه اله اتمنى اشلعه من الكاع..
مرت ايام واحنه هناك.. مصطفى هواي احسن.. طلعو ع غرفه.. ويرضع عادي بس ادويه ينطو ومغذيات .. احسه حتى لونه صار طبيعي.. بس حبيبي اثر الابر والكانونات باقي ازر باديه ورجليه من كل مكان حتى من رگبته مخلين.. نفسه شوي احسن..
الدكتور كلش طمني عن حالته.. كال انها شغله كلش عاديه والالاف الاطفال هيج بس الخلل احنا تأخرنا هوايه .. ومو بينا الخلل.. بالاطباء الي راجعت يمهم.. هم الي ماطلو بدون فايده...
علي يروح ويرجع للمسشتفى.. مااحجي ويا.. يكررعليه السؤال ومااريد علي.. واكثر من مره يكلي لوما مكان عام كان عرفت شلون اأدبج واخليج تردين عدل... خواتي ع تواصل مستمر ويايه.. كل مره اريد احجيلهن ع علي ومااكدر .. اخاف وافشل..
حاربت سنين.. وسنين من عمري ضاعت.. وامي ضاعت مني.. تاليهه يبيعني برخص ..
وانته باچر..
وخوفي من باچر ومابي انته..
وخوفي من ضحكة عصافير الصبح تنباگ سكته...
(لمظفر النواب)
تندمت.. وحيل تندمت .. ع حبه.. وع اليوم العرفته.. وع اليوم الي اعترفت اله.. وع كل لحظه خلصتهه بس افكر بي وابجي عليه.. ع اليوم الي دخلته بنص بيتنه وخليت اهلي ورا ظهري.. بس حتى ارضي عني ويبقى ويايه وقت اطول..
شكد غصات وشكد وجعات عافلي.. من يوم العرفته اذا اريد احسب ايامي الحلوة ويا مااتتعدى سنه او اقل بهواي..
هه يمكن الوكت دار.. وصرت اني بان.. وهذيج منتهى..
شكد تألمت.. صدك حسيت بيه.. وعرفت شنو عاشت ومرت..
شنو حجت وشنو توسلت بعلي.. صرت اتخيلهه .. تبجي وتتوسل.. تتعارك وتعاتب بي.. كل مااتذكر اتمنى اطمهه لنفسي.. ماجبت الراحة لروحي..
جبت بس تعب.. وكله من اديه..
شربت من نفس الكاس مثل مايكولون.. بس مايوكفني شي.. لو اخر يوم بعمري راح ادافع عن علي.. صح نزل من عيني هواي ويمكن الحب مو نفسه ذاك الاولي.. بس مااتنازل عنه بهاي السهوله .. شفت المر يله تزوجته.. وبعديش.. بعد خسارتي لكل شي..
يتبع..
يسعد مساكم... بارت مستعجل ومن وقت شوي😁
تعويضا عن الايام السابقه..
واعتذر منكم ع التأخير الصار ..
