Mga Tula ni Makata O.

Ako Si Makata O

Ako si Makata O, tapat at totoo

Inyong katoto, kaaway ng liko.

Ako'y isang makata, makatao.

Maglilingkod ng buong puso

Mga tula ko'y handog ko sa inyo

Sa mabuti, ito'y isang musiko

Ngunit, sa masama, ito'y bato.

Na tatama sa kaibuturan ng buto.

Kaya mga kaibigan, humanda kayo

Magandang balita, hatid ko sa inyo

Masamang gawain, isisiwalat ko

Lahat kayo'y magtatamasa nito.

Inyong lingkod, di man dakilang guro

Ngunit, ang puso't kalooban ay ginto

Mga inaapi ay ipagtatanggol ko

Mga mapang-api naman, yari kayo.

Kaya, hanggang may isang Makata O.

Sa inyong paaralan, sa inyong grupo

Di titigil sa pagsulat ng mga liriko

Aking imumulat ang mga mata ninyo.

Ang mga maling gawain, kakalabanin ko

Mabubuting tao, papuri ay matatamo

Hayaan lamang ninyo na gawin ko ito

Para po ito sa kabutihan ng Gotamco.

Wala kang magagawa kung ayaw mo

Kung sa panulat ko'y puso mo'y dumugo

Ang pagbabago lang naman ang nais ko

Pasalamat ka na lang, pagkat may tulad ko.