Lipstick Lullaby

Chapter Twenty Five

May ngiting umukit sa mga labi ko habang pinagmamasdan ang mga gamit ni baby na katatapos ko lang ayusin dito sa kwarto. May mga damit na siya, lampin, at kung anu-ano pang pwede niyang kailanganin. Pinagtulungan din ni Migs at Ninang na buuin kahapon yun exchanging table ni baby at sabi ni Migs bibilhan daw siya ni Lola at Lolo niya ng crib.

"Ang ganda-ganda talaga ng mga gamit ni baby, puro mamahalin. Samantalang dati si Cosme nasa lumang duyan lang." Natatawang sabi ni Yuka habang tinutulungan ako magsalansan ng mga damit ni baby. "Saka, Ate, natatandaan mo mukhang basahan na yung mga damit niya kasi yun yung mga damit na ginamit natin noong baby pa tayo. Ang swerte-swerte talaga ni baby."

"Buti na lang mabait ang tatay nitong si baby at hindi tayo pinabayaan." Nakangiting sabi ko.

"Gusto ko din makahanap ng katulad ni Kuya Migs, Ate. Okay lang kahit maging kabit ako o pangit yung lalaki kahit nga DOM papatulan ko, basta mayaman. Gusto kong mabili lahat ng damit na mamahalin, lahat ng gamit, lahat ng bagong gadgets. Gusto kong magtravel sa iba't-ibang bansa." Nangingislap pa ang mga matang sabi ni Yuka habang nangangarap ang gaga. Halos kita ko na nga ang peso sign sa mga mata niya.

"Hoy! Ano'ng pinagsasabi mo d'yan?" Hinapas ko ng slight ang likod ng ulo niya. "Mag-aral kang mabuti para magawa mo yung mga yun. Hindi yung kung anu-anong iniisip mo. Pinag-aaral ka na nga ng Kuya Migs mo sa magandang eskwelahan tapos ang pangarap mo lang makahanap ng DOM? Pag ikaw narinig ni Ninang, nako!"

"Ate, hindi naman lahat ng nakakatapos, yumayaman. Eh di sana marami nang mayaman dito sa Pilipinas. Kailangan kong maging practical. Maganda naman ako, pwede kong gamitin ang ganda ko katulad ng ginawa mo. Di ba, Ate?" Ngumisi siya.

Lalong nalukot ang mukha ko sa inis. "Eh di sana hindi ka na nag-aral. Sana pumasok ka na lang sa cabaret at naging katulad namin ni Mammy!"

"Ayaw ko nga! Ang babaho ng mga lalaki doon saka mga hampas-lupa din yun." Sumimangot siya. "Baka sa bagong school ko makahanap ako ng mayaman na boyfriend!"

"Tumigil ka nga sa kagaganyan mo. Hindi ka pa mayaman, matapobre ka na. Don't speak too last baka sa hampas-lupang sinasabi mo ka din mapunta. Nako, pag ikaw nabuntis bago ka nakapagtapos kakalbuhin ka namin nina Mammy at Ninang, Yuka. Hindi ako nagbibiro." Banta ko sa kanya.

Ibubuka pa lang ni Yuka ang bibig niya para magsalita nang marinig namin bumukas ang pinto at pumasok ang ulo ni Ninang mula doon.

"Nandyan na ang tatay ng anak mo, hinihintay ka sa baba." Sabi ni Ninang.

Napalundag ako mula sa kinauupuan ko at agad na kumaripas palabas ng kwarto.

"Huminahon ka nga, Saskia. Huwag kang atat kay Migs. Baka nakakalimutan mo, buntis ka. Baka maalog ang utak niyang batang dinala mo at matulad sa inyong mag-ina." Sabi ng malditang bakla.

Nagmamadaling bumaba ako sa hagdan at nakita si Migs na nakaupo sa salas. Lumingon siya sa akin at binigyan ako ng isang matamis na ngiti. Mas matamis pa sa kariokang palagi niyang dinadala sa akin. 

"Migs..." Kunwaring gulat na sabi ko. "Nandito ka na pala. Kagagaling mo lang sa trabaho?"

Hindi naman na bago na bumibisita si Migs para kumustahin si baby. Halos araw-araw nga siyang pumapasyal dito. Ang sarap-sarap magmahal ni Migs... syempre, para kay baby yung pagmamahal na 'yun. Nasa tiyan ko pa lang ang anak niya, kasing laki pa nga lang siguro ito ng bubwit, paano pa kaya pag labas ni baby?

"Hey." Malawak ang ngiting sabi niya bago lumapit sa akin. Awtomatiko naman bumaba ang kamay niya sa tiyan ko. "Kumusta ang baby natin?"

"Okay lang naman si baby." Sagot ko.