القتيلة المدللة

٤

رجعت تميت صلاتي .. 
جاتني امي قالت لي اقيفي برا جمب الباب
بتجيكي بت صغيرة شايله كيس ابري اتناولي منها واديها القروش دي .. قلت ليها بت منو دي ؟ قالت لي بت المرة البشتري منها حتشوفيها حتعرفيها .. قمت عملت زي ما قالت لي واقفه جمب بابنا ، امي جاتني قالت لي لسه م جات ولا شنو ؟ قلت ليها اي هي م بتعرف البيت ؟ 
قالت ناسياهو بس عارفه شارعنا ..
خلاص ماما انتي خشي جواا ، انا بقيف ليها هنا لمن تجي ،، خلاص سمح 
بقيت واقفه ، و اللصقه تعال علي ( ود جيرانا) التقول قادي ليهو خرم بس من يشوفني يجي ناطي ،، قالي :
_ مالك واقفه كدا 
* اجي !! لاحظ ان دا قدام بيتنا ما بيتكم !
_ياخ والله اسف انا ما قصدي بس قصدتا لو دايرة حاجه من الدكان بقدر اناولك ليها 
*اففففف داا شنوووو دا 
_شنو ؟؟
*شنو شنو ما شامي يعني ، ريحه السجاير دي جاية منك ! في نهار رمضان !!!!
_يازولة قولي بسم الله سجاير شنو انا صايم يا بتنا .. 
*طيب تمام انا مادايرة حاجه شكراا 
_اذا بضايقك تاني ما بجي جمبك 
*اسي انا قلت ليك بتضايقني ،، كدي زح لي كدااا .... انتي اسراء !؟
هاكي دي القروش .. شكرا ليكي سروية لكن مالو نفسك دا قايم كداا ؟ 
قالت لي جيت مشي مسافه كنت جاريه عشان احصل ناس في الحله الوراا ،، قلت ليها صايمة انتي ؟ قالت لي ايوة طبعااا ، قلت ليها سمح مالك مالابسة طرحه ؟ 
قالت لي انا لسع صغيرة ،، قلت ليها سمح خشي غسلي وشك بي موية باردة واقعدي شويه من الشمس دي و بعداك اصلي ، سمح ؟ قالت لي سمح .... و طبعا صاحبكم واقف يعاين ، سقتا البت ودخلتها .. 
وديتا المغسله ، مسكينه حفيانه و شكلها حالتها حاله يا حليلا ،، جات ردينا ،، قالت لي دي شنو ؟ 
قلت ليها زي ما شايفه مالك ؟ ( لوت قدوما وفاتت ) ،، قلت ليها اسراء خليني اديكي كبايه عصير انتي لسع سغيرة علي الصيام ، الليله افطري و بكرة صومي عشان انتي عندك مشوار ، اتفقنا ؟ ّ
قالت لي عصير شنو ؟ قلت ليها انتي دايرة عصير شنو ؟ قالت لي اي حاجه هه
حليت ليها تانكي و اديتو ليهاا ، و عندي سفنجة جديده ، جيت اديتها ليها قلت ليها حتكون كبيرة لكن اوعي تملصيها فاهمه ، عشان الواطه حارة وبعدين رجليك بتجرحو اتفقنا ؟؟ قالت لي اتفقنا ياخ فرحت فرح
سقتها لحد باب الشارع طلعتها لمن فاتت ، و صاحبكم دا واقف .. 
( لازم تركزو علي كل صغير و كبير خصوصاً شخصيات القصه لان كل شخصية ليها دور ، عايزة تحدي و نتحاور بذكاء واستنتاج مقنع اعتبرو تحليل لشخصك المتواضع .. ) .. 
م قدرت امسك نفسي ،،
قلت ليهو انت كان داير حاجه وريني بس ما تقيف كدا ، وقفتك دي ما صح و بابا كان جا لقاك واقف كدا ما بخليك ، قالي #ايوة_داير ،، قلت  ليهو داير شنو ؟ قالي دايرك انتي .. 
برقت فيهو عيوني و بقيت ماسكة الباب و بعاين فيهوو ،، دخلت و قفلت الباب ،
حرف ما اتكلمتو معاهو .. لحد هنا كان الوضع تمام لا شيئ يُزكر .. جا زمن الفطور والدوشة حقتو ، انتهينا منو .. بعد الفطور جات رودي ل بابا قالت ليهو بابا القروش الاديتني ليها وقعت مني م لقيتا في الشنطة معليش تديني تاني ؟ ،، قاليها عيوني ليك انا ، عاينت لعيونها ديل حُمر ، حمار كدا اصلو ماعادي ،، دخل يدو ف جيب جلابيتو واداها ال200 ج .. 
عاين لي( انه بيدينا مع بعض والمرة دي ادا رودي براها ) ، ابتسمت ليهو = عادي يا بابا ..

فاتو يومين علي الحال ، يومياً رودي بتشيل قروش من بابا بحجه جديده ولأنو ما حارمنا من حاجة م بيتردد نهائي في حتة القروش دي .. في يوم بعد صلينا التراويح
جيت مارة بي جمب غرفتا سمعت صوت مجروش كدا زي كتمة النفس و البكية البراحه ديك احساس زول خاتي يدو علي خشمو عشان صوتو ما يظهر و الصوت يروح و يرجع تاني كأن رودي بتبكي .. 
فتحت الباب طوالي قامت ناطه و ماسكة ليها دفتر في يدها ،، قالت لي مالك خلعتيني ؟ قلت ليها بس انا ما عملت حاجه تخلعك ، قالت لي ما تخبطي ، قلت ليها معليش طيب ، وجيت قعدت جمبها ،
قلت ليها عيونك حمرة ، قالت لي اي دعكتهم شديد، قلت ليها امممممم مالك بتبكي !
اترددت و اتنفضت كداا ، قالت لي ابكي ليه شافعه انا عشان ابكي ! ... 

(في جانب تاني )
_ انا مرارتي وااااحدة عليك الله يا هشام ما تفقعها لي حلفتك 
*يمة بسم الله ليه بتقولي كداا
_شنو اللي ليه بقول كدا ياولدي يا ولدي انا اذا كنت بكورك و بتجلم و بشاكلكم انت واخوك ، داا عشان عايزة مصلحتكم ، نفسي اشوف كل واحد شايل نفسو انا ما دايرة حاجه منكم ، بس شيلو نفسكم ، وانا دايراك تعرس الليله قبل بكرة يا هشام ..
*يمة طيب لمن دايراني اعرس انا بس داير البت دي 
_ياولدي ماف داعي نحرج نفسنا ساي 
براك شايغ وضعهم ، ديل بيتهم من برا ساي يفتح النفس و هما وين وانحنا وين ، اسي كان سمعت كلامي من البدايه وتميت قرايتك واشتغلت بشهادتك اسي كان تمشي تطلبا من ابوها وعينك قوية..
_امي تاني بتدخلي المواضيع في بعض ، انا من بكرة بنزل بفتش لي شغل و اوعدك اتغير و اكون ولدك البتحلمي بيهو ..
*بتمني اشوف اليوم داا قبل ربك ياخد امانته ..
_بعد خرف ان شاءالله يا ست الكل ..يلا انا طالع مشوار وجاي
*طيب ... 

في جانبنا .. 
لدينا انا تمام م تزني علي تاني , طيب ..)
قلت ليها جداً .. و قفلت الباب و طلعت علي كدا .. 
طلعت برا ، ماما ماسكة ليها كباية حليب ، قامت قالت لي لدينا لؤي وينو ؟ّ
قلت ليها في الصالون مع بابا كانو بيحضرو ، قالت لي انا اسي جايه من الصالون لا ابوكي لا اخوكي ، قلت ليها خلاص بس بكون في غرفتو يا بابا طلع و ساقو معاهو .. 
كدي لحظة يا ماما ، الليله النور النور البرا دا منو ؟؟ 
قالت لي قبل اجيكي كان طافي 
معناتو ابوكي برا بعافر فيهو ، و بعدين الككوبس دا بايظ مية مرة قلت ليكم يولع ويطفي براه .. 
قلت ليها اممم ، مشيت بالشباك تاوقتا ، بس م بقدر بشوف الباب كويس لانو موازي الشباك بقدر اشوف باب السور .. 
عاينت ما فهمت حاجه ، و اللمبة تاني طفت
و سمعت صوت ( انننننننننننن) كدا ، و تاني اتكرر اللي هو البكا بس صوت انننننن .. 
اتلفت وراي اقول لامي سامعه الصوت دا 
م لقيتا .. جريت اتجاه الصوت ، زي المجنونة متبعه الصوت كأنه صوت لؤي
بقيت بس جارية و مهلوسه لمن بضرب راسي بيديني الاتنين بقول دا هوس بسم الله بسم الله و لقيت نفسي بكورك يا لؤي .. 
لمن وصلت غرفتو ..
وضلام و لؤي مستحيل يضلم نور غرفتو 
( لؤي عمره 12 سنة) 
بس الصوت قريب مني شديد 
ولعت النور بقيت بفتش ، يا لؤي انت وين
و صوت اصلو م بعيد مني ..
عاينت يساري في التربيزة البنقعد نقرا فيها
عاينت تحت لقيتو قاعد تحتها و مكنكش في نفسو و بيرجف و ننننن صوتو ..
لؤي اطلع ، لوي مالك ،، لؤي عاين لي انا لولو حبيبتك ، امرق امرق من تحت حبيبي فالح جيب يدك ..
بقا يأشر لي علي الشباك حقو و دموعو تزيد 
عاينت لقيت الستارة مواربه للشباك زي الكان فاتح وهو اصلا م بيفتحو ، قلت ليهو امرق وبعدين وريني مالك 
بس بقا يقول لي جاني جاني ، جا علي جا علي كان داير يقتلني ، و يبكي ، يقول لي شفتا الزول بي سكين ...

استككانة👻~
#القتيلة_المدللة | يتبع .........