القتيلة المدللة

9

ساهله انك تكون ناجح في حاجات غيرك فاشل فيها ، سهل انك تجيب القروش وتعول اسرتك بغض النظر عن طريقة الدخل ، سهل انك تبني علاقات في مجتمعك و تكون انسان ناجح شديد ، سهل جدااا انك تكون بشخصيه محترمة جداً و انت في الحقيقه ولا شي ،،
سهل تكون الحاجات دي كلها ،، بس اسهل حاجه هي صعبه عليك ،، اللي هي كونك تكون ( بني آدم ) ..
لمن تكون منعدم الانسانية و بتمارس صفات الحيوان و انت ربنا كرمك بالعقل ، انت هنا لازم تاخد وقفه بينك و بين نفسك ، لازم ترجع لربنا ، لمن تكون واصل مرحلة انك تستشعر مراقبة ربنا ليك ، صدقني حتكون انسان و م مهم تكون ناجح زي الما مفروض تسعى لأنك تبقي #انسان و م ترتكب الحماقات .....

انتو عارفين ان يوم الوقفه دا فعلا كان يوم وقفه ، فعلا انا وقفتا فيهو وقفه ذهول وصمت وخوف وتوتر و هلع و كمية احاسيس انا كان قعدتا باقي عمري دا كلو عشان اوصلا ليكم ما حأقدر .. اكعب احساس هو انك تحس روحك عاجز ...
ختو نفسكم مكاني ، انا جيت ولقيت اختي بالمنظر دا قدام عيوني مرمية ، صدقوني الطبيب البضيع عمرو كله في قراية الطب بيقدر ينقذ الغرباء بس لمن زول من اهلو يتأذي بيضعف زي الما درس طب في حياتو ،، انا كنت ضعيفه شديد ،، اللي هو حته مني في اسوأ منظر انا ممكن اشوفو في حياتي ، اموت ولا اعيش اللحظة دي ..
بس بقيت بصرخ و بكورك ، وانا واقفه عند الباب ما قادرة ادخل ، عشوشه جات جاريه و الولد البيضرب بوهيه جا جاري ، وخالتو آمنه ، انما لؤي جا آخر واحد و بخطوات ثابته ، لا بكا لا كورك ،،
جات عشوشة داخله و بقت تزكر الله و جرت علي ردينا قلت ليها لا ما تهبشيها ، اتصلي اتصلي بأمي ولا الاسعاف اتصرفي اتصرفي يا عسه انقذي لي اختي امانه عليكي حلفتك م دايراها تضيع مني كان ضاعت انا السبب انا حألوم نفسي والله ما بقدر اعيش مستحيل ، انا بطربق في الكلام وهي اتصلت والجيران كلهم اتكبو فينا ، الناس بتعزي فيني اتخيلو ، جيرانا ، بكلموني كأنها ماتت ، بقيت بخبط و برزع في اي حاجه قدامي بقيت بكورك و دخلت بي حاله ما بتتوصف ، كأني لي مية سنة محصورة داخل اوجاع في كل الاتجاهات ،،
جات الاسعاف رفعوها ، رقدوها علي بطنا وانا ما عارفه ليه لحد اسي ،، بس في زول كان مختفي في اللحظات دي ،،
لمن دخلت غرفه رودينا عشان احصل الاسعاف شلتا بطاقتا م عارفه ليه بس قلتا حتفيد ، و لمن رديت الباب و جمبي عشوش عشان البس لي عبايه ، لقينا الشخصيه المفقودة ورا الباب .........

( في جانب تاني )

*يمة تتزكري قروش الصندوق القلتي ضاعت منك ؟
_ ضميرك وجعك يا ولد بطني !
* لا حول ولا قوة الا بالله
*امي انا ما شلتا قروشك دي ولا بعرف انتي داساهم وين
_طيب بتسالني منهم ليه ؟
*لانو معاي مبلغ و كنت داير اديكي ليهو تسدي بيهو لمن ربنا يفرجا
_ وانت دبرت المبلغ كيف وشوفة عيوني لا شغل لا مشغله ، كان بتشتغل في احلامك ما بعرف
*امي انتي الكلام معاك بقى صعب شديد والله ، المهم ربنا فرجهااا
_اممممممم طيب معاك كم ؟
*انتي دايرة كم ؟؟
_دايراهم مليون ، 7500 دين ، والباقي محتاجة ليهو .
*بس كدا ؟
بديكي مليون ونص اهااا ..
_مليون و نص ! انت رجعت لأمورك ديك تاني ولا كيف
*امي ممكن تثقي فيني شويه
_ انا عارفه انك عواطلي اثق فيك كيف بس وريني
*انا ما دايرك تخشي في مشاكل يا امي مع الناس ، و دي م قروش نفر ولا اتنين
_اديني ليهم ....