القتيلة المدللة

١٥

الرساله دي خلتني فاقدة التركيز و فاقده المنطق ، اي للحظات فاتت انا شكيت في لؤي ، بس لؤي دا م عندو اي اهداف لكدا وعقلو سليم ودي اختو البتلعب معاهو الالعاب البيحبها مستحيل ، 

طيب الرسل لي دااا منوو ؟؟ 

بابا قالي انا ما مرتاح .. ماما قالت ليهو في شي استجد وانت داسي ؟ 

قالينا انتو ما مستغربين من حاجه ؟

قلت ليهو خير !! قالي ، هشام يجيب ليكي سلسل بي ياتو صفه ؟ و عرفتي كيف ان الخرز دا تبع ساعتو ؟ 

قلت ليهو بابا ، قبل تسألني انا كنت حأحكي ليك و ما اتكلمت بالقوة دي الا لاني واثقه من نفسي ، ،، ماما قالت لي ممكن تجاوبي طوالي ! انا ليه ما خطر في بالي كدااا ؟

جاوبي ، قلت ليها ماما هشام دا كان داير يجي يتقدم لي في العيد و نسبة لظروفو الماديه الشبه سيئة انا رفضتا ، و انا عارفه اني غلطت في اني اتواصلت معاهو من غير علمكم بس والله الفترة كانت قليله شديد ،

والساعه دي انا جبتها ليهو هديه .. 

و بتمني تسامحوني و انا بالجد اول مرة اتواصل فيها مع راجل ، انا ما قلقانه من ردة فعل ماما م استهوان بيها بس لاني عارفه انها متفهممة اكتر ، و خايفه من ردة فعلك انت يا بابا .... قالي انا ما حأعقب اسي لينا كلام برانا يا لدينا .. 

كمان في حاجه تاني شاغله بالي و ما مرتاح ، ماما قالت ليهو مالك انت الليله قصتك شنو ؟

قاليها الولد دا وين اهلو ؟

و ليه حسيت انه متستر او ساكت ، م حاول يدافع عن نفسو استسلم ، الجلسه ما تمت ساعه ، ليه كان بالاستسلام دا حتى م حاول يهرب او يتدسى ، بالجد الوضع محير علي رغم انه متهم واتحبس بس في شي م قادر استوعبو .. 

شردتا في كلام بابا ، عاينت لي عشوشه راكبه جمبي ، منططة عيونا و ما نطقت حرف ..

قلت لي ماما ، انتي عارفه وين بيت خالتو آمنة ؟؟ 

قالت لي بري بس حسب وصفها هي ساكنه في تالت حي مننا جمب ال (..)..

قلت ليها ممكن نمشي ليهم اسي ؟؟ 

بابا قالي انا حأوصلكم المستشفى و حأمشي اشوف حال شغلي الواقف دا و برسليكم معتز يجي يرجعكم ، مافي طريقه نمشي ليها ، و بعدين ماشه ليها عندك معاها شنو ؟؟

قلت ليهو بابا ، في حاجة انا ما قلتها رغم اني متزكراها بس ما اهتميت بيها شديد ، ماما قالت لي ردينا انتي عارفه ان مقدماتك دي بتحرق الروح ؟ يا بتي اتكلمي عديل ، ارمي درابتك دي من غير مقدمات ..

قلت ليها اسفه ، بس يوم الحادث انا لقيت اسراء بت خاله آمنة متدسيه ورا باب غرفة ردينا ، و مافي زول شافا غيري انا وعشوشه، و م كنت متحكمة في عقلي لانو الوقت داك عربية الاسعاف كانت برا وحتمشي ، طلعت و سبتها نع لمة الجيران ديك ..