القتيلة المدللة

12

_قالت لي باب شنو ؟
*الباب الورا، دا عادي ممكن مع المحاوله يتفتح بس ردينا ما بتفتح شباكها دا ..
_وحدة وحدة يا لدينا و انا كلمتك التفكير في اللحظة دي ما حيجيب نتيجة
*ركزي معاي عشوشه ، ولا اقول ليكي تعالي معاي.....قومي قومي ....
عايني .............. دا شنو دا ؟
_ انتي الدا شنو يا لدينا عايني الباب مردوم بي وراهو حاجات وريني كيف بس زول من برا يقدر يفتح باب زي دا ..
*لالالا يا ردينا ، الباب دا فعلاً مقفول بالسنين وعشان كدا بيصعب فتحه ، بس الحاجات دي كانت مافي انحنا عندنا مكان المخزن بي برا بابا عاملو...
_طيب رايك شنو ان انا من جيت عندكم شايفه الحاجات دي مختوته و شفت خاله نعمة ختت عليها حاجات بس م ركزت معاها كتير .. اسمعيني يا لدينا بس ، والله التفكير اسي غير حيتعبك ما حتستفيدي حاجه و ابتديتي تتخيلي حاجات من عندك و دا عمرو ما حيوصلك لنقطة ..
اسي خلينا نركز مع ردينا و اهلك المساكين ديل...
*طيب ليه بابا ما حاول يجي يسألنا عن الحصل و تفاصيل اليوم دا ، و حققو معاهو بس ما عارفه قال شنو للضابط ، يا عشه انا منتهيه انا غصباً عني بلقى مخي دا شغال م داير يقيف من التفكير و مليون سؤال في بالي ، انتي فكري فيها انحنا موجودين في البيت و يحصل كداا و انحنا ما نجيب خبر الشي الوقع وعمل صوت كدا داا شنو ؟؟
_ طيب بما انك مُصرة نتناقش يا لدينا ...
انتي اسي لقيتي شنو مشيتي بيت ناس هشام ؟؟
*تتزكري الساعه الاشتريتا من محل جمب المشغل حق ماما ؟
_ ايوة الساعه السوداء
*لا ما السوداء يا عشه ركزي ، السوداء دي التانيه انحنا ما شلناها ، شلنا الزرقاء ، انتي العجبتك السوداء وانا صممت وشلت دي
_ ايوة ايوة صح كلامك ..
*طيب تتزكري شكل الساعه ؟
_يعني طشاش
*معناتو ما حتتزكري شكل المينا من جوا ..
_انتي مش صورتيها ؟
*ايوة ايوة وووي راحت من بالي كيف ، قومي قومي معاي نفتش تلفوني ، ولا اقوليكي رني رني علي بسرعه ..
_ لدينا ، روقي بسم الله
*ياخ قومي عليكي الله قومي
_انتي اسي بتبكي مالك ياخ
*انا تعبانة والله و كاتمة جواي عشان ما اضعف دي ردينا عارفه يعني شنو ردينا ، دي المن فتحت عيوني علي الدنيا كانت اختي الصغيرة المعاي في كل لحظة ، فصلتني عنها سنتين بس ، مستحيل اخليها و لا اخلي حقها يروح هدر والله اجيبو بالباقي من عمري ..
_اسمعيني ، علاقه الساعه شنو ؟
*المينا من جوا فيها زي خرز ازرق زئبقي حول الشوكتين ، و لقيت خرزتين منهم في غرفة ردينا ، انتي متخيلة ان الانسان الوحيد الحبيتو يطلع قاتل اختي و المحرق روحي ان مختفي احساس انه هارب يا عشه والله احساس حار اختي من جهة و وهو من جهه وانا النار مولعه فيني ..
_ راسي شطب ، هو حيستفيد شنو لمن يحاول يقتل اخت حبيبته ، ولا الهدف شنو ، وهو قدامنا علق الستاير و طلع ، لكن شوفي يا لدينا للمرة الدنيا م تخلي مشاعرك تدفعك و الغضب يضيع حق اختك ، حتي لو دا دليل واضح ضد هشام استخدميهو بذكاء ، شوفي ردة فعلو قبل تواجهيي سوري في الكلمة دي وانا عارفه انها مكروهه بس اتعاملي ( بخباثة) . و كلامي دا في حالة لو ان فعلا الخرز ديل طلعو حقات الساعه ..
*اعوز بالله من الخباثة صفة سيئة مكروهه ما تقوليها تاني ، بس قولي اتعامل بدهاء ، وفعلا كلامك صح , ان الله مع الصابرين ، انا لي حق والحق يعود بأذن الله ..
_قومي نفتش تلفونك ...