القتيلة المدللة

١٣

لمن تكون انسان عندك اهداف محددة في الحياه ، نمط وجدول اتأقلمتا عليهو من قمتا لقيتو قدامك ، تاكل ، تشرب ، تنوم، واهمها تشوف اهلك بخير ، وتمشي ليهم واحد واحد وهما نايمين بس عشان تطمن انهم بخير وابسط مُنية ليك تشوف نفسهم دا طالع و نازل ، كلكم بتعملو كدا انا متأكدة .. 
الدايرة ارصلو ليكم انا كأنسانه بسيطه دي كانت طموحي اقرا وانجح و اكون جمب اهلي ، بس في لحظة حياتي انقلبت بقت قاسية ، ما حأقول انفرض علي وضع لان الحيحصل من هنا لقدام دا ما فرض .......

_وقفت في مكاني زي الطقتني كهربة ، قفلت العلبة و رجعت غرفتي .. قعدت في السرير لملمت الحاجات الكانت في الشنطة ، رجعتهم مكانهم ، و فتحت العلبة تاني ختيت فيها الخرز و رجعتها الشنطة ... 
راقده بعاين للسقف لحد الساعه 11 بليل لا اتكلمت مع زول و لا طلعت براا ، الا لمن سمعت صوت الباب و عرفت ان بابا جاا ..
طلعت سلمتو عليهو ، امي جات طالعه ، قلت ليها عشه وين ؟ 
قالت لي نايمة في غرفة ردينا .. و لؤي معقول نايم لحد الوقت دا كلوو !!!!! 
امي قالت لي بابا ، في جديد بخصوص ردينا ،، قالينا وضعها زي ما هوو ، قالت ليهو نسفرا برا ،، قاليها تفتكري ما فكرت في الحاجه دي ؟ الدكتور قال حالياً مافي فايده و مافي فرق الا يمكن بس من ناحية جمالية للمستشفي او اجهزة احدث لكن صحياً عملو ليها كل المقدور عليه ...
قلت ليهو بابا دايرة اسألك بخصوص التحقيق اللي اتعمل ، حيعملو فيهو شنو ؟ 
قالي حيتقفل لحد ما نشوف حالة اختك ، وغير كداا حيتقيد سرقه والحصل ليها دا ناتج عن الدفاع عن النفس ...
قلت ليهو تمام ، انتو ما اكلتو حاجة عايشين علي الموية ، الحاصل دا م ليهو علاقه بالاكل ، كلنا علي لحم بطنا ، انا حعمل عشاء بسيط نتعشى و بعداك نشوف البيحصل .. 
فعلاا .. مشيت عملت العشاء ، وانا صمت و هدوء ما عادي ، لحد ما خلصنا و لملمت العده ، رجعت الغرفه لقيت عشه جات رقدت عندي ، ما اتكلمت معاها و حاولت تتكلم معاي كتير كنت ساكته و ما برد عليهاا ..
لحد ما بابا خبط لينا الباب ، قالينا نمتو ؟
عظه قالت ليهو تعال يا عمو صاحين اتفضل ادخل ،،
دخل ، و اداني كيس ،، عاينت ليهو بمعني دا شنو ؟؟ قالي تلفونك !
قمت علي حيلي ، قلت ليهو تلفوني بيعمل شنو هنا ، من الصباح قالبين عليهو البيت ما لاقنو .. قال :
ما لقيتيهو لانو اصلا مافي في البيت ، تلفونك دا لقوه في الاسعاف في جيب البجامة حقت ردينا .. قلت ليهو وردينا متين شالت تلفوني ، صراحه شي غريب و ما قادرة اتزكز الحته دي ، بس اكيد كان في الغرفه ، بس شالتو من غير اذني م حصل
لو دايرة تمسكل لي نفسها بتستأذن مني ..
قالي انا عندي قعده معاكي بكرة بأذن الله ، بس اسي الناس تاخد راحتهاا وربنا بيفرجا ، قلت ليهو ان شاءالله ..
شلت التلفون طلعتو من الكيس ، لقيتو مقفول و شاشتو مخدشه ،، فتحتو ، جاتني كمية رسايل محاولات اتصال من هشام
.. زبطت المنبه ،و نمت لأني محتاجة النوم .. 

المنبه رن .... 
قمتا استحميت وصليت الفاتني ، ولبست اسكيرت و بلوزة عاديه ولفيت طرحتي و شلت شنطتي و طلعت .. 
كانت 9 ، لقيت ماما و بابا صاحين وعشه بتعمل ليهم شاي .. قلت ل بابا انا طالعه مشوار ..
قالي مشواااااارررر !!
انتي يا لدينا !! قلت ليهو ايوة اناا يا بابا 
قالي وين ماشه حأوصلك .. قلت ليهو انت حتمشي معاي م عشان توصلني بس عشان محتاجة موافقتك .. قالي علي شنو ؟
قلت ليهو اشرب الشاي و يلاا حتعرف كل حاجه ..
فعلا شرب الشاي ، و طلعناا ،، اها وانا طالعه شفت منو ؟؟
اااي شفت هشام واقف برا جمب بابهم ..
ولا رفعت عيني فيهو ، ركبنا العربيه واتحركنا، بابا قالي ايام العيد دي المحلات كلها قافلة ، قلت ليهو حتي القسم ؟ 
قالي القسم لشنو ؟ قلت ليهو انا دايرة امشي قالي انا قايلك ماشة المستشفى ..
قلت ليهو انا المستشفى ما حأمشي ابداً الا اصل لهدفي ... 
وقف العربيه ، قالي كيف يعني ما تمشي تشوفي اختك ، قلت ليهو بابا دا قراري انا ماحأمشي اشوف اختي في نص الاجهزة رجل في السرير و رجل في القبر ، قالي دا ضعف منك اختك محتاجه لينا كلنا ..ّ
قلت ليهو وانا ما حأقصر من اختي ، انا محتاجة ابقي قوية الفترة دي انا لمن بمشي اشوفها بالحالة دي قاعده اضعف و بغضب و غضبي بخليني اتصرف بهمجية ، ارجوك يا بابا المرة دي بس خليني اعمل الدايراهو زي ما طوالي بتخلينا نسوي الدايرنو ، ارجووك ،، قالي طيب القسم ليه ؟ 
قلت ليهو في ناس كانت في اليوم دا مفروض يستدعوهم و يستجوبوهم ما بينفع بلاغ الشروع في القتل يتعلق لحين ردينا تصحا ، دي حاجة في علم الغيب ، تصحا متين ونكون واقعين يا بابا لو لا قدر الله حصلت ليها حاجه معني كدا الملف حيتقفل علي كدااا ... و دا شي لو علي جثتي ما حأسمح بيهو يحصل .. 
م رد علي ، دور العربيه و مشاا .. فعلا وصلنا القسم ،، ما فهمنا اي شي الضابط الحقق معانا اثناء الحادث كان نازل اجازة عيد و قال ما حينزل علي القسم دا ، تم تحويلو من هنا بعد تلاته يوم حينزل في قسم في منطقه تانية

، قلت ليهو انا جايه دايرة افتح الملف تاني حق اختي ،، قالي رقم البلاغ كم ؟
عاينت لي بابا ، طوالي ملاهو الرقم ... 
اتصل علي زول و كلموو ، اظن قاليهو دي جريمة سرقة والملف دا اتقفل .. قاليهو عيد كلامك تاني و فتح الاسبيكر .. قالي دا بلاغ م حنقدر نعمل فيهو حاجه و انحنا م كنا موجودين اثناء الحادث و كلامم كتير بيدل علي اني اقفل خشمي و امشي ... 

قلت ليهو انا ما حأسكت ، دوركم تحققو مع كل صغير و كبير كان موجود اثناء الحادث ، و دي ما جريمة سرقة ، انا عندي شكوك حولين زول معين ، انا حأجدد البلاغ و دا من حقي و من حقي تقومو بي واجبكم .. 
قالي تعالي يوم السبت .. قلت ليهو جدااا اصلاً حأجي ،، ( اليوم دا كان الخميس ) ، رجعنا البيت بابا وصلني ، قبل ندخل البيت قلت ليهو بابا ، الحصل دا يا ريت ماف زول يعرف بيهو حتي امي ، قالي ليه يعني ؟ قلت ليهو انا ما عندي ثقه في زول الله اعلم العمل كدا قريب ولا غريب ، بس لانه لو عرف بالشي الحنسويهو حيحاول يوشوشنا و ما حنوصل لحاجه .. قالي لمن ارجع نتم كلامنا ، ، قلت ليهو عديلة ، ودخل ساق ماما ، مشو المستشفى لي ردينا ،، جاتني عشه قالت لي وين مشيتي ؟
قلت ليها مشوار صغير مع بابا ، انا جعانه اكلتو شنو ؟ ( تمويه) 
قالت لي سندوتشات خلينا ليكي جوة ،، قالت لي مالك قافله ضلفتك بالمفتاح ؟
قلت ليها كنتي دايرة حاجه ؟ قالت لي ايوة عايزة بجامه ، قلت ليها انتي عندك لكن ،، قالت لي حقاتك سمحات ، قلت ليها طيب بطلع ليكي وحدة ،، رجعت قالت لي يعني ما حتوريني كنتو وين ؟ 
قلت ليها مشوار مع بابا ي عشوشة ، مشوار تبع شغلو ، اخترنا نقشه معينه للاصيص عشان العرض
، قالت لي يعني خلاص نسيتي موضوع اختك ورجعتو لحياتكم الطبيعيه في يومين ؟ قلت ليها قدر الله وماشاءفعل ، ربنا يقوما بالسلامة ... قالت لي امين و مشت .. 

فقدت لؤي اخوي .. قلت من امس م جا علينا ، ياربي قام فطر و قعد معاهم لمن انا كنت برا ولا شنو .. 
مشيت علي غرفتوو ، ما لقيتوّ
لقيت الكمبيوتر فاتح علي لعبه زي العاب البلي ستيشن ، قلتا ي ربي بكون دخل الحمام 
بعد دايرة امشي رجعت مسكت الماوس حق الكمبيوتر ، لقيت اللعبه عبارة عن قتل و دم ، لاحظت ان في صفحتين مفتوحات تحت وحدة زي Not book, مكتوب فيها كلام كتير شديد ، جريت الكرسي و قعدت اقراا ، اتخذلو لقيتو عامل دراسة جدول لمشروع احلامه ، دا غير المصطلحات المستخدمة انا ما بقدر استوعباا ، بالجد احترت ممكن يكون بالعقلية دي ،، 
فتحت الصفحة التالته .. لقيت مقطع من فلم فاتح ، فيهو نفس الورق و الرسايل البتوصل في الظرف بكذا طريقه ........ّ اللي بيستخدما المجرم للتهديد ....

استككانة 😢~

#القتيلة_المدللة | يتبع ......