القتيلة المدللة

٢

سهمت كدا بعاين جهة الشباك شفت زي ظلال ( ضل) زول ، و دايماً اللمبة القدام بابنا دي مضلمة وفي حالة انها محروقه ، يومياً بابا بيركب لمبة و الساعه 11، بالضبط اللمبة تطفي و نلقا المفتاح دا محروق عديل ،، نجيب الكهربجي يقعد يعافر بالساعات و يشغلا و تاني زي ما قلت ليكم بتحرق ،، طبعا خشت جواي رهبة كدا شعر جسمي دا قام شوك شوك ، م عارفه ليه خفت مع اني دايماً عامله فيها ابو عرام ( ادعاء الرجولة ) .. 
عمو احمد قالي مالك واقفه كدا زي العليكي ذنب ، اتفضلي اقعدي ي بتي انحنا ما غرباء ،، طبعا م سمعتو لاني مسهمة ، الا بابا قالي ردينا عمك بتكلم معاك ، لمن قمت ناطه ، قلت ليهو ااها معليش شفت لي كديس براا خفتا ، مهند قعد يضحك .. 
امي جات داخله بصينيه كاسترد ، ماشة كدا قبضتني قالت لي انتي مش طلبتي هدا عملتو ليكي بالبسكويت ، اقعدي اكلي مع الناس ،، ( عارفاني حأمشي اتدفس ف الاوضه تاني ما بمرق الا للسحور ) .. المهم 
قعدتاا .. و حاسه بتوتر كداا ..
و مهند دا يشيل و يعاين فيني ، لمن العشا دا اذن ، حتي قالو بيمشو للتراويح ما صدقتا طوالي جريت الغرفه .. 

___ السلام عليكم ..
أنا شخصية رقم #2 ، اسمي لدينا ،، ااي انا اخت ردينا ،، و ردينا اختي الصغيرة ، عمرها 19 سنة ، رغم انها اصغر مني بس البشوفنا بفتكرني انا الاصغر ، و الفرق بينا سنتين ، يعني انا عمري 21 سنة .. انا وهي بنقرا في نفس الجامعه ، اللي هي جامعه الخرطوم ، هي برلومة ، دخلت متأخرة بسنه لانو جابت مجموع صغير وربتت و عادت السنه و دخلت اداب ، اما انا بدرس حقوق ، و بحبه شديد و بحب قرايتي وبحب جامعتي ، لدرجة اني بعامل كتب القانون علي انها حاجه قيمة كأنها فرد من افراد اسرتي او اصحابي شديد ، وكمان لمن انتهي من السنة بحتفظ بالكتب مستحيل اتخلا عنهاا .. 
نجي لشخصيتي ، انا انسانه كتومة و هاديه لدرجة لو قاعده جمبك ممكن تنسي وجودي ، تصدقو لو قلت ليكم انا لحد الان بلبس علي ذوق امي ، عكس البنات ، عمري ما شلت حواجبي عمري ما ختيت روج ، عمري ما امتلكت علبة مكياج ، عمري م لبست فستان ، انسانه بسيطه لدرجة الغرابه، عندي بنت خالتي اسمها عائشة هي صحبتي الوحيده عايشه في بلدة اسمها النويلة اكيد بتعرفوها لان ابوها اصلا من هناك و جات الخرطوم للجامعه وللاسف قاعده في داخليه ، كدي خليكم من عشوشة دي اسي ،، اهااا يلا انا عكس ردينا اختي ، ردينا اختي شاقه الحجر
مكياج و لبس وموضه و طلعات وصحبات و مكالمات ... م حصل قلت ليها شي و سمعت كلامي بتتصرف بطيش و تهور ،، بس كمان طيبه وفرايحيه و عاقله شديد بعد مرات ، لدرجة بتقعد تناقش امي وابوي في مواضيع حياتنا و بيمشو برايها عسكي انا اللي م عندي شخصيه و ضعيفه ..... 
مشيت الغرفه لي ردينا ، لقيتا بتتكلم تلفون ، قلت ليهاا ، اقفلي دايراكي في موضوع . قالت لي ما فاضيه اسي بعد اخلص بناديكي ، قلت ليها م حتخلصي انتي كل يوم علي الحال داا ، و طلعت خليتاا .. 
طبعا قدرتو تستنجو انو ايامنا دي #رمضان
اخر كم يوم في رمضان ، ربنا يبلغنا ليهو تاني تامين ولامين ي رب العالمين .. 
طلعت وجريت الباب ، م عندي ونيس غير المطبخ ، والعده والنضافه ، رغم انه كانت عندنا خدامة لكن امي مشتا لانو انا بشتغل اكتر منها ما بعرف اقعد ،، 
المهم ، قعدت اغسل العده ونضفت المطبخ ، و دخلت اتوضيت و جيت فرشت مصلايتي في البرنده ، و قعدت اصلي ، خلصتا وبقيت بدعي و بسبح ، الشباك قصادي ، حسيت بحركة عتيرة كداا ، قمت جارية علي الشباك بعاين وقلبي دا بيدق لمن عروق يدي برزت ، بس امي جاتني قالت لي مالك مصاقرة الشباك ، قمتا ناطه نطة ، قالت لي بسم الله يا بت قلبك دا مالو بقا خفيف كدااا ..
قلت ليها مافي حاجه ، بس ابوي الليله ما حاول ينور اللمبه دي ياخ ، والقدامنا ديل تقولي زومبي ولا فارق معاهم نور ولا ضلام ،، قالت لي لدينا ، الليله مالك اول مرة تعلي صوتك كدااا ، قلت ليها اسفه بس حسيت بحركة وترتني وضلام ياخ .. ج
قالت لي طيب صليتي ؟ ،، قلت ليها ايوة !
واختك ؟ 
ما بعرفا والله ... طيب

(في جانب تاني ) 
_اسمع، يا عمك انت البيت دااك منو ساكن فيهو ؟
*سامع بيهم لكن ما حصل ما شفت زول منهم غير ابوهم اظن
_يا زووول عندهم مزز ، مزز انا تاني كل يوم بكون مزروع هناا 
*بالله ، طواالي يا مان 
_ ابراهوما وين الليله ؟
*24 ساعه نايم يا طافش ما بنشوفو الا في صينيه الفطور (بقلم/سحر سمير)
***صوت من جواااا البيت ..
انت يا هشام ما خجلان من روحك يا ولدي الصلاة شغاله وانت واقف لي قدام الباب اختشي ياخ حرام عليكم عزبتوني ياخ ، الدنيا رمضان صيامكم دا بمش كيفن لكن ، اسوي شنو انا ربنا بسألني منكم .. 
_يمة كنت ماشي لكن اقاموها بصلي في البيت اسي ..
*لاحول ولاقوة الا بالله ، ربنا يهديكم 
اخوك وين ؟ 
_ما بعرفو والله يا امي .. 

اما في جانبي انا لدينا ..( حقول( لولو) في باقي الاحداث عشان تشابه الاسماء بيني وبين ردينا ( رودي) ) ...
بابا جا ، قعدنا نقرا شوية ، واتفرجنا

 
قالي ارح معاي نجيب باسطة و لبن مقنن ، قلت ليهو طوالي .. 
جريت لبست عبايتي ، وجيتو ، قالي شوفي رودي اختك ، قلت ليهو شافتني لمن كنت بلبس وسالتني وريتا قالت ما دايرة تمشي ،ّ
قالي يلا طيب .. 
بابا طلع قدامي يدور العربيه ، وانا وقفت اطلع لي 'لمؤاخذه' شبشب من الجزامة جمب الباب ،، لبستا و طلعت .. انحنا قدام بابنا في سور موازي للبيت زي ممر حديقه صغيرة شديذ يعني كلها اصيص و زرع حق بابا ، يعني من الشباك الشارع بكون قريب المهم
حسيت ان في زول واقف في الزاوية زي لابت كداا ، والبيت الورانا خاتين لمبة حمرا ، فاا عاكسه الضل ،، بس الشي المحيرني انه فوراً بيختفي لمن شكيت في نظري .. 
بابا ضرب لي بوري ، مشيت علي العربيه ،، لمحت لي ولدين في البيت القدامنا 
و في واحد فيهم من ...... وفككيت الصرخخة ...........

استككانة🐒~

#القتيلة_المدلله | يتبع .......