بعت النذل واشتريتك ،،،للكاتبه ام رحيل ...ع م

💔بعت النذل واشتريتك بارت 7

للكاتبه ام رحيل ...ع م
-ها يخوتي لگيتوها
-لاوالله يخوي يسلمان ما لگيناها وماجده اتگول
طلعت وي حرمه. ما تعرفها ورجال ملثم.... ماادري يخوي شنهي السالفه....
-الله كريم يخوي يصيهود ..روح يخوي انت وسوادي ما ارتاحيتوا..... من البارحه واليوم ادورون نامولكم ساعه حتى نتحظر للعرس الناس چايتنه ولازم ما انبين شي...
-چا يخوي واني شلون ريمه ماهيه
-يخوي يصيهود انت ازلمه وسبع هذا الهور ولازم تضبط نفسك وماتنسيك اخوتك واليوم فرحتهم وهمه مالهم ذنب بلصار خليهم ايفرحون وانت يخوي الله كريم گادر ربك يضهر الحگ
-يله يخوي روح ارتاح وره العرس انروح اندور عليه والله كريم
-ذهب صيهود الى غرفته والحزن والهم على وجهه
والافکار تجول في رأسه....
اما سوادي سار وراء صيهود وكله حزن على اخيه الذي لم يتهنى بعرسه وعلى زوجته فرحه وحزنها على اختها ريمه.. التى لااحد يعرف شيء عنها
اما نوماس فقد ذهب مهرولا الى امه
-ها يمه نوماس اشلونك شصار
-شصار يمه دورت اوياهم ابكل مچان او چن مااعرف شي بس ييمه هاي ماجده امنين چابت سالفة الحرمه والرچال الملثم چا احنه ما طلعنه ويه ريمه من البيت.. بديعه هي الي راحتله اوطلعت وياها... اشلون عرفت وانطت اوصافنه...
-ييمه ينوماس ماجده چنه شافتنه ويه ريمه يم الگنطره... وانت لازم تتزوجه اليوم ويه اخوك حمادي
-بس ييمه اشلون اوريمه موش هي صارت مرتي شلون اخذ ماجده...
-ولك يااغبر الزلم تتزوچ على عدد اصابيعها واني موش نفذتلك الردته.. اوشكو لا تزوچت اثنين هم تبعد الشبه عنك اوهم تسكت حلگ ماجده الچان شافت شي او ما شافت وحچيها بلضنه اوگلها انتي لا تحچين هيچ انتي تشوهين سمعت بت عمي او سكتها ولا تخليها تحچي يمچن احد يسمع سوالفها
ويدور. ويعرف السالفه...
-يمه چا. شلون اخذ ريمه وماجده واخوي صيهود ولا وحده خطيه يمه خلي صيهود ياخذ ماجده
-ولك انت مخبل شنهي هي دشداشه وتطيه لخوك لو هي عروسك ومسمايه الك ...دبطل... دبطل واتزوج ماجده واسكت لا ينفظح امرك وامري ونروح بحلوگ الفشگ
-هاه لالا. اخذ ماجده وشعلي بصيهود.... وريمه اشلون اليوم ما اروح الهه شلون اتضل وحدهه
-والك اشعليه يمها الحجيه وحجي صافي.... وهو يوم واحد والصبح اتگول لگيت شغل بعلوة السمچ وتروح تشتغل ويه الحجي وتروح عليها الضهر وتضل يوم يومين...
-شگول وين چنت
-گول اروح احمل سمچ ويه الحجي من السماچه بلاهوار الداير مدايرنه وانوديها لبغداد انبيعها على سفاطين السمچ... وبهيج اتضل يم ريمه شگد ما تگدر
-خوش سالفه.وخوش فكره.يشيخة الشيخات والهور
كله ياام نوماس...
- يله تحضر للعرس الزفه جايه..
-على امرچ ياشيخه.... ذهب نوماس الى حمادي ليتحضر ويلبس اهدوم العرس هو وحمادي
-ها يحمادي خلصت لبس لو بعدك
-چا وشتريد مني انت خليت بيها عرس العرس بس الك ينوماس
-ليش يحمادي چا انت موش تعرس وياي
-اي... اي.عروس وادموعه اصب على اختها. واخوي صيهود ضلت عيونه تبچي وانت عيونك تضحك.. چا موش انت ما چنت اتريد ماجده
وخنگتني بلهوره لمن سمعت ريمه لخوي صيهود
وگلت... اکتل واصلخ والا ريمه.. چا شو من ضاعت ريمه... رضيت بماجده...
-چا يحمادي لمن سئلت امي گالت هي رادت صيهود
چا شنهي هي گوه... والله اليعلم بحاله.. وين صارت
عدله لو ميته....
-ها ...ها بس بلاعيمك انفخت عليه. واعيونك طلعن
من مچانهن والزباد يتطاير من حلگك چنه مطر المربعانيه ..وتگلي امي اسعلتهاو چاشنهي هي گوه ..چا ينوماس.. لمن تصير الچاموسه ما عدها
گرون.. وذيله يوكف هيچ.👆 مثل الگصب اگولن
نوماس بري من سالفة ريمه...
-ول.. ول.. يلخايس تريد تتهمني بذنب الهامله والله ان ما صميت حلگك لخنگك واعرس لوحدي
-ايوهو يهل الهور اسمعوا... نوماس ايريد النسوان.كلهن.... ايوهو... ايوهو.. يهل هور
-والك اسگت لا ارمل ريحانه گبل ما تاخذها وايصيرن وحده شردت اوحده اترملت
-اصخام وچهك ينوماس النذل.... وهرب حمادي مهرولا الى خارج الغرفه الى جانب اخوته الشيخ سلمان وسوادي وصيهود في وسط زفة العرس بينما نوماس
يرگض وراه والشرار طاير من عيونه....
-ها شمالك نوماس يله يخوي الزلم واگفه والزفه لازم تمشي للعروس يله يخوي
-هاه. اي.. اي. ياشيخ سلمان... وسارت الزفه الى بيت ريحانه💔👰 .....وماجده.💖👰.
...... ....... .......
-ولچ يمه ساميه وين لابسه وطالعه
-چا غير للعرس البيت ال سلمان .....
-يع وانتي من كل عقلچ چا هي ريمه موش صديجتچ اولسه ما لگوها وشعدچ بعد رايحه للعرس
-بلچي لگوها وهسه اشوفها عروس وبلزفه
-ها چا شنهي هي التنهزم ترجع وحدها لو وليانها يدوروها.. ويردوها. بس يساميه اضنهم ييمه لگوها
وذبحوها وذبوها بلهور ياكلها السمچ... وگالو ما لگيناها.. چا شلون چاي يعرسون اذا ما لگوها....
-يمه.... ريمه ما انهزمت ريمه صاحبتي وسرها عندي
واعرف المن تحب..
-ولچ المن تحب ما تگولين..
-يمه ريمه تحب نوماس واهو يحبه وخطبها وبعد عن عرسه يوم هيچ تختفي ... تنهزم مثل ما تگولين ليش
ديريها ابعقلچ يمه انت ام ساميه موش تگولين اريدچ اصيرين امحاميه هاي وصية ابوي گبل ما يموت وصاچ عليه... چا شلون ترديني اصدگ هذا الحچي
-لا ما اصدگ اذا الحچي مثل ما تگولين ماگو سبب علمود تشرد...
-ها يمه موش گتلچ السالفه بيه سر ولازم احله...
-هههه چا موش هسه يساميه لمن تصيرين امحاميه.
وعود دوري وبحبشي هيچ وهيچ.. هههه..... يله انروح للعرس بس گلشي لا تگولين ولا تنطين حچي
وگولي ادري بيه اتحب ابن عمه وتريده....
-اي يمه ادري هسه مو وكت الحچي منا لمن اعرف السالفه...
-يله... يله... امشينه...
ذهبت ساميه وامها للعرس وساميه تتمنى تلگه ريمه
عروس وگاعده ونوماس يفوت يشيل البرگع عن وجهه ويحبه ابگصته وتگوم وياه... چا مو هذا حلم ريمه الچانت اسولفه اني وياها
فاتت ساميه وامه البيت ال سلمان ولا چن عرس بيه
النسوان گاعده وتستحي اتصفچ لو تهلهل لن ريحانه
عروس وادموعها على خدوده وفرحه اخته هم الدموع امغورره بعيونه وتمسح بيهه كل شويه
وام فرحه گاعده وايده على خدها ماتعرف تبجي
لوتضحك شتگل للنسوان اليسئلنها... وفجئه عيلت هلاهل ام نوماس وعيلت هلاهل النسوان وياها
-يله يمه اچوي ...گالت ام نوماس للنسوان حتى يطبون اولادها کلمن يگوم عروسه...
-يع يمه شوفي اني اعيوني تسورب لو جاي اشوف صدگ...
-شنهي شبيچ يساميه..
-يمه اشو نوماس يگوم ابماجده چا موش هو خطيب ريمه وماجده لصيهود.. چا شو تبادل. صار بلزلم عود
ليش
-اني اشمدريني ولچ يساميه چا غير ريمه لنوماس
شو عگلي تخربط ولج يمه ارد اسعل ام نوماس
-بلخير والتمام لحمادي ونوماس يام نوماس
-يهله يام ساميه يوم التفرحين بساميه وتشوفين چهاله..
-يطول عمرچ يام نوماس بس چن ماعرف شنهو السالفه.. موش نوماس خطيب ريمه وماجده لصيهود
اشوفن نوماس اخذ ماجده وصيهود ماگو...
-لا يداده انت فاهمه غلط نوماس لماجده وصيهود لريمه...
-چا شو ساميه گالتلي ريمه تريد نوماس ونوماس يريدها... وهو تگدم الهه وخطبه
-يع يداده شنهي هذا الحچي چا هوه ابكيف ساميه
لو ابكيف ريمه السالفه ابكيف نوماس المن يريد ...چا من هيچ احنه مالگيناها ما گلتينه السالفه يساميه من زمان حتى انعرف ليش انهزمت...