للكاتبه ام رحيل ...ع م
-صباحچ خير حجيه..
-هله ابريحة ريسان چا اني عبالي چنت احلم بيچ يحورية الهور.. چنج صدگ... وين هذا اشوهين اول مره يصيدله صيده عدله.. كل مره لو يصيد ابو الزمير لو ابو اسليان.. لو ام العيعو ... هل المره صابت وياه..الشبچه.
-ها بيبي اشلون صبحتي اليوم
-اشبيه يبيبي. رجعت خمسين سنه لوره بس اخخخخ. ..هاي ام العيعو تدعي عليه ما اريده بعد
خلي ريحة ريسان اوياي.... اگلك ريسان..
-ها بيبي
-انت مو ردت حديده حمره امكان هاي حديدتك السوده العيونه ما تضوي زين. وتگح.وتعطس من تمشي
-اي بيبي واشگد قنعتچ وبوست اديچ بل الليل اتگليلي
ميخالف اشتريه الك والصبح اتگليلي يبيبي ماعندي
افلوس اخذهن ريسان وياه.ومشه....
-زين هسه انطيك تشتري اثنين حدايد ..حمره وصفره يوميه اتعوعي ابوحده .عو..عو.. وتروح بيه للشغل...
-صدك بيبي چن. الخير گام يهل وياچ يريم... بيبي الليل بعده ما اچه کلش... بعيد. يله ابسرعه انطيني
افلوس ابسرعه... انطيني ابسرعه هسه اروح اشتريهن.... لالالا اشتري بس حمره الطمع مو زين... ها. ..اروح اجيب الصندوگ....
-ظظظظظظظ.. شنهي السانك منشار چا هي شفط
نتكاتب ونتبايع وشهود وادور اسلمك الفلوس
-هاي بيبيتي خبرة تسعين سنه... شاهين.. اثلاثين سنه ايغلبچ...لا صايره ولا دايره.
بيبي.. انتي مو تگلين مالي وحلالي گله الك..يشاهين.
-اي بس مو هسه
-بيبي لعد اشوكت..
- لمن يچي عزرول اويسحلني گوه
واذا صحتك وما اجيت اتعاوني على عزرول
گلبي يخشن عليك واحط الفلوس واگلهن بسنوني مثل الفاره... وماخليلك فلس.
-چا وذهباتچ وذهبات امي شلون تاكليهن....
-لا...لا...لا... الذهبات اطيهن الريحة ريسان...
-هله... هله.. هنيالچ يريم ابيوم واحد اخذتي الذهبات كله... واني من عمري عشرين سنه اريد تشتريلي سياره وما محصل شي...
-لا والله يمهندس والله كلشي مااريد وكلشي ما اخذ
لاتخاف...
-ريم... تره اردچ للهور..
-ليش يمهندس شاهين والله مااخذ شي والله.
-واني اگلچ اذا بيبيتي الاميره النائمه انطتچ الذهبات
ابسرعه الگفيهن.. گبل ما اتموعهن ابگدر الضغط ..لو اتوزعهن لفات الطلاب المدارس واني وياچ بلنص
و امسحلج الهور كله من الخريطه...
-هاااا. خوفتني يمهندس صدگت راح اتردني للهور
.......
-وانت ابكيفك اترد ريحة ريسان للهور.. شوف اطيك تشتري حديدتين... بس اشتري منك ريحة ريسان ونكتب ورقه وشهود اثنين... واتصير الي اتنام وياي
بلغرفه.. حلالي.. شتكول وانطيك تشتري حديده حمره وحديده صفره... ها يشوهين...
-ها شتگولين ريم اتقبلين ابيعچ البيبي... ههههههه... ههههههه. ريم شو اصوفرتي... ههههههه
-لا ما اصوفرت عليمن قابل اني بطه... بشه.. وتبيعني البيبيتك حته تاكلني
- ههههه لا انتي غزاله اغلى من البطه والبشه بس بيبي هم ماابيعج ريحة ريسان.. واتنطر عزرول ههههه هههه
وخرج شاهين الى عمله تاركا ريم مع بيبيته حاضنه ريم وتمسح ابشعره وتشتم بيه مثل الام الفاگده ابنه
وتوه لگته.... وريم امسبطه امورهه وساكته بين الفرحانه الهاي المحبه وبين الخايفه من اخبالات البيبي....
.. ...... ....... ......
-شلونك شاهين
-هله بدكتور الفلته يگلون الصديق وكت الضيچ
-لا والله صادفت اجازتي... وانت هاي يا ضيچ شنو قابل البنيه من كرايبك...
-وشمدريك مو من گرايبي
-لا يمعود الله يبعدك عن هيچ اشكول
-سمير تره انت چاي اتهيني والصداقه مالتك ادوسه
ابرجليه..
-يمعود شاهين شلقصه اني اسف ما ادري تعنيلك
-شو اكلك طلعت گرايب بيبيتي يعني گرايبي وانت
فلتت گبل ما تعرف قصته... اتگلي، هيچ اشكولات
-اعذرني شاهين ما ادري سولفلي شنو قصته
واخذ شاهين يسولف قصة ريم اونوماس وما مر بيهه من احداث اومصايب ...الى يوم الگاه بلهور اوجابه والباقي انت تعرفه...
-زين اوقرابته منك انت اتاكدت منه
-هاي السالفه بيبيتي چانت تحچيلي عليه.. اتگول جدي ريسان من اهل الهور لمن ماتت امه عمره خمس طعش سنه عاف الهوره واچه اهنا اشتغل عد جدي ابو بيبيتي ابمحلاته مال البهارات بلشواكه
وجدي شجعه ايجيب نقل من مدرسته بلهوره ويكمل ابغداد چان بلثالث متوسط.. وبعدين جدي كمل ودخل كلية الهندسة الزراعية واتخرج وجدي ابو بيبيتي ماعده بس بيبيتي گام زوجه الهه... واهنا بعد ما ادري اصار الابو جدي ريسان العايش بلهوره..
-بس انت اتكول جدك ريسان جواد محمد ماعده لا اخ ولا اخت
امين اجت ريم بت عم ابوك...
-لازم اروح للهور واتأكد ...اذا ابو جدي ريسان والي هو جواد هم اتزوج بعد ما ماتت مرته وبعد ما اتعارك وياه جدي ريسان وعاف جدي الهور... وعنده اولاد لو لا.. واريدك اتروح وياي لان اثنين مايثيرون الشك خاصه لومهندس او وياه دكتور.. واحد يفحص الناس او واحد يفحص ماي الهور... ههههههه هه
-هااااا خوش ضاملك ضمه الصديقك ما عولت اشرد من الهور والبگ اتريد اترجعنه..
-كلهه يوم يومين او نرجع شبيك تره اگطع الاجايز عليك مو اني مدير الموقع...
-على العمال والموظفين مو على الاطباء
-عليكم كلكم... ههه
-بدت شيلت الخشم والتكبر على ربعك
-ابكيفك واذا رحت وياي راح اوافقلك على السلفه
واخليك تشتري السياره الحمره گبلي... ها شگلت..
-اشگلت.. بيه سلفه وسياره. وحمره... حتى لا اتريد
اخنگ بيبيتك اخنگه..
-حتى اخلي مرتك تترمل گبل ما تتزوجه.. وايتم جهالك گبل ما ينولدون...
-يابه.. يابه.. شنو هل الحب العذري البيبيتك..
-سمير هاي مو بيبيتي هاي امي الربتني حتى من چانت امي عدله چنت كل وگتي يمه من اني ازغير
الهذا اليوم...
-هاي اشبيك اشاقه وياك ..اصلن الحچيه حبابه
وبس اروح واگله حجيه اريد تشتريلي حديده حمره
راح تشتريلي گبلك...
-اي الا.. اتگله ..اني حجي ريسان اجيتچ يحچيه فطومه.. وتنام على گلبك وتخنگك... هههههه...ههههه هاهاهوهو.... يبويه گلبي... ضحكتني اهواي تاليه توگع ابوحده مثل بيبيتي..
-علواه... ياريت... واشمرك من الصبح من باب البيت..
- هاي.. هاي. ياقشمر اتريد اتموته وتگش افليساته ولك عزرول مايگدر عليه...
-وهذا منو عزرول..
-ههههه....هههههه ولك عزرايين ادلعه بيبيتي اتصيحله.. عزرول...
-دخيلك ربي.. لاعيني .... اروح وياك للهور او وافقلي على السلفه واشتري السياره احسن من بيبيتك
رفيچت عزرول..
-زين يجدي باچر امر عليك الصبح وانروح
-لا جدك ولا اعرفك... يمهندس شاهين خلي بيبيتك
على گلبك...
-هاي ..هاي ..عبالك بيبيتي بايره راح انوقع العقود
ودخلته باچر على ريحة ريسان. ههههههه. هههه
-تعال.. تعال.. اوگف... شنو... منو. ريحة ريسان هذا
-حبيب بيبيتي الجديد... يله مع السلامه ...الباچر
🖐🖐🖐🖐🖐🖐🖐🖐🖐🖐🖐
أنت تقرأ
بعت النذل واشتريتك ،،،للكاتبه ام رحيل ...ع م
ChickLitفتاة قرويه تعيش في الاهوار ،تحب ابن عمها الصغير ويحبها ابن عمها الكبير يريد الكبير الزواج بها فلا تستطيع الرفض ويخطفها ابن عمها الصغير. ،،،فتضطر الى،،،،، الهرب معه في ليلة عرسها ،،،،وتبدء معاناتها مع النذل للكاتبه ام رحيل ...ع م
