بعت النذل واشتريتك ،،،للكاتبه ام رحيل ...ع م

💕💖. ،بعت النذل واشتريتك بارت 21

للكاتبه ام رحيل ...ع م

بعد ان حچه صيهود وريم واسماء. السالفه كله للشيخ سلمان... وهو مدنگ راسه حتى راد اعگاله يوگع بلگاع.. وگمشه صيهود لخوه. ...
-لا يخوي يصيهود لا تكمشه خليه يوگع للگاع.. لن احنه جانين عدنه حيه بلبيت تلدغ بولادنه وبناتنه
وعايفيه... لا ....وچماله ننطيه اكل ونحترمه ومسويه شيخه علينه... خليه يوگع يخوي خليه...
-لا يشيخ سلمان هذا مو وكته لا تندم ولا تتحسف
الفات فات... المهم شنو الحل هسه وشلون تصلح الي انعوج...
-يا ست اسماء ماادري شگلچ ...اني مستحي چدامج
ساعدتي بتنه انتي والمهندس شاهين وحافضتي على سمعتنه...
-يخوي يسلمان اسماء موش غريبه راح تصير من عدنه وبينه....
-هااا يخوي من شوگت... هاي... ما صارلك يومين من عفتنه...
-اي يخوي الگلوب اذا توالفت ابلحضه تنجمع
واذا تخالفت لو تعيش العمر كله سوه ما تتوالف
-صدگت يصيهود.. صدگت

-يخوي يسلمان... يشيخ.... الحگنه يشيخ
-الله ينعلك يحمادي... گام گلبي يرچف من يسمع
صوتك.... هااا يحمادي.. اشبيك شجاك اتصيح... شصار... شجايتنه من بليه...
-المهندس يخوي چاي وچايب اوياه چيش وتفگ وهاي السياره ام البوري الطويل.... راح يحرکون الهور يخوي...الحگ.. النه.. چايك چيش ودمبابات.. تسوي دوم.... دوم.. والله يخوي الچهال كله تصيح.. على هاي ام البوري... دمبابات...... دمبابات...
-زين. يحمادي.. زين... عرفناه دبابات شنهي الحرب صارت ابگصبات البردي.. اهنا عدنه..
-فوتي يريم انتي واسماء لم خواتچ...
-حاضر يخوي..
-گوم يصيهود صيح اسوادي والحگنه...
-حاظر يشيخ...
طلع الشيخ سلمان وحمادي ويلحگه سوادي وصيهود
يتلگون شاهين والشرطه والچيش الجاي وياه ابنص
الهور....
-السلام عليكم يشيخ سلمان...
-هله وكل الهله ببن عمنه مهندس شاهين چن غيبتك ماطولت علينه بس گلنالك عاود النه بس مو ويه چيش وشرطه يشاهين...
-تعذرني يشيخ ...بس صيهود الجبرني على هذا الشي
اجه وحط السچين على ارگاب نسوان اثنين واخذهن من بيتي وهنه ابحماي.. وانت خير العارفين
بصول العرب يشيخ... والي يمس وحده منهن اخلي ماي الهور ايصير دم... وتسبح بي الزلم...
-على هونك يشاهين... وحده بتنه. والثانيه خطيبة ابنه صيهود...
-هذا الحچي ما يوكل خبز يشيخ اريد انشوفهن ونحچي وياهن... وناخذهن ويانه...
-زين تفضلو... تفضل يحضرة الضابط انشاله ماكو شي والسالفه سوء فهم وبس...
دخل الضابط وشاهين للمضيف... وسولف الشيخ وصيهود على كل الي صار وانهم صار عدهم علم بلي سواه نوماس والشرطه راح تاخذ منه حگ ريم والحجيه مرت حجي صافي ...وبعد ما اتضح للضابط والشرطه ان ماكو اي خطر على ريم واسماء
بعد ما حجه وياهن واكدن اله انهن ابخير وابنص اهلهن
انسحبت القوه الي چتي ويه شاهين وشكر شاهين الضابط، وقائد الشرطه..الي اچت وياه..
-ها يشاهين يبن عمنه چن عرفنه سبب چيتك گبل ..
موش تدور اهلك وگرايبك...
-والله يشيخ اني ما چنت ادري ولا اعرف عنكم شي بس التشابه الي شفته بين اسمي واسم جد ريم هو الفتح عيني حتى اسئل... وما چذب عليك يشيخ لو ما ريم ما چنت سئلت... ولا عرفتكم ...
-يسلمان... گاعد ويه ذوله الذبو اخوك بلسجن وتضحك وتتقشمر وياهم... وهاي ريم الرديه گله امين احبلت... ونوماس عاگر ما يخلف... واني توني طلعت السالفه علمود ابني ما تطيح كرامته... البت الچابته موش بتنه هاي بت المهندس... وليش انتضرت ثلث تشهر ليش ما چابته ساعة الولدته
-اتقي الله يضالمة.. يحيه نهبتيه لبنچ وشوهتي سمعته گدام اهل الهور.. وابنچ راد يگتله. .وكتل مره. بريه ماله ذنب غير انه عرفت مره وصخه مثلچ...
والله... الچ ...بس اليوم اتشيلين غراضچ من هذا البيت
وترحين اتگعدين ابيتنه الي بطرف الهور لوحدچ مالچ طبه اعلينه بعد اليوم...
-اني اريد ولدي وياي ومااگعد...الك ابهل البيت..
-ابنچ نوماس بلسجن يحكموه على كتله للحجيه مرت حجي صافي.. والچان عافته ريمه ومااشتكت عليه وتهمته ابمحاولة كتله.. وما حاكموه بعد ازود واعدموه يطلعلچ. بعد عشرين.. ثلاثين سنه واخذيه اذا انتي عدله الذاك الوگت
وابنچ نوماس موش عاگر اختج ام ماجده ربچ بلاچ ابكيدهن مثل ما بليتي اختچ ام ريم.. ودبرن المكيده
واخذن تحليل ولد اخوها جاسم ومرته مريم وبدلن التحاليل وطلع ابنچ العاكر وبته التخلف... وهي ماجده العاكر موش نوماس... تعال يجاسم فوت وگله لام نوماس شلون من سولفت للدكتور سمير
على الي طلبته ام ماجده منك حتى اتزوجك خيريه
ودخل جاسم مدنگ وبهذا الوگت دخل الدكتور سمير
لمن سمع باخبار صيهود وريم واسماء وروحة شاهين ويه الشرطه وراهم للهور... اجه هو هم وراهم...
-هله دكتور الله جابك حتى اتصير شاهد على الحچي
سولفنه اشگالك جاسم...
-يشيخ سلمان. لمن سولفتلنه ساميه على ماجده وانه
مااتخلف لان البنات عدهن اسرار ابيناتهن ولن ماجده عده حاله اتصير عد النسوان تمنعهن من الخلفه ومن چانت ابنيه هي تعرف ابحالته.. قررنا اني وشاهين انسوي خطه نكشف بيه السالفه بعد ما شكينه ابتغيير تحاليل نوماس وماجده..
رحت الجاسم واخذنه ابرة . عاديه ما اتاثر على اي شخص يضربه حتى لو ما يشكي من شي
وگلناله احنه حمله تلقيح لكل رجال ما عده خلفه ممكن هاي الابره اتسوي عده طفل... بس لازم ايكون متأكد من روحه ميه بالميه.. واذا ظربه وهو كلشي ما بيه راح تتعرض حياته للخطر.. وطلبنه تقاريره حتى نتأكد وطلع النه التقارير... وگلناله اكو واحد اسمه نوماس هم مثل حالتك راح انروح انظربه ابره مثلك
وهنا جاسم ارتعش وحسينه ابخوفه وگال واذا الواحد ايخلف اويضربه شيصير بيه... فگناله راح ايصير عده شلل ابنفس الوقت الي يضرب الابره
وهنا گال لا تضربون نوماس لن هو يخلف وكلشي ما بيه.. وادور سولفنه جاسم السالفه كله.. خاف لا ينشل نوماس واطيح السالفه ابرگبته...
-،تعال يجاسم كلام الدكتور سمير صحيح
-،اي يشيخ صحيح واني خفت على نوماس وگلتلهم بسالفة التحاليل الطلبته مني ام ماجده
-روح يجاسم لا بارك الله بيك روح استغفر ربك عملتك انت وام ماجده وماجده ماتت ابسببه روح بريه ورادت اتموت ريم بعد ..لو ما المهندس شاهين انقذه .من الموت..
وانتي يماجده ترحين البيت ابوچ وامچ منا لمن يطلع نوماس من الحبس... لا تظلين ابيتي... لوتردين ترحين اتعيشين ويه خالتچ الشيخه وتحوچكن دسايسچ سوه ..والله يچفينه شرچن...
وانتي يريم حرة نفسچ والچ كل الحگ تشتكين على نوماس مثل ما اشتكه حجي صافي ومحد ايلومچ
-لا يريمه ابوس رجلج يخاله لا تشتكين عليه هذا رجلچ وابو بنتچ... لا تخليهم يعدموه.. لا يخاله
-ها هسه يخيه صار ابو بته موش بت المهندس وابنچ عاگر ومايخلف... عرفتي معزة البزر اشلون ولمن اخذتي مني بتي وحرمتيني اشوف فرحة عرسه
وغططتي راسي وراس بناتي بلعار وانت ساكته وزفيتي بت اختج لنوماس چدام الهور وبتي زفتيه بلظلمه والفضيحه اني امه وابد لا سامحچ ولا اتنازل عن حگه بلسواه نوماس بيه.. وبي وبناتي.. يشيخه الباطل والمكايد...
-ليش يام فرحه موش احنه خوات..

-خوتچ مردنهاش يل بيه منه.
وهبطتي حتى الراس وعارچ لبسنه
خوتي اني وياچ موش ابمحنه
امگارب امحبات عبالي چنه
سنچ ضحك وياي وخبثچ گتلنه

انه رايحه يشخ او حگي، وحگ بتي، من هاي المره وابنه انه اريده منك... واشهد يشيخ اني امه لريم
واني بس الي احكم اب امر بتي بعد، اليوم محد يحكم علينه... يشاهين يمه
-ولا تهونين يخاله... امري... ياام فرحه...
-اشهد يشيخ اني انطيت ريم للمهندس شاهين عطيه ما وراه جزيه...
-وانه يخاله قبلته زوجه الي واشيله بعيوني،
-چا يخاله بعد ثلث تيام عرسكم اهنا بلهوره.. ومن رخصة الشيخ سلمان..
-مرخوصه يمرت عمي وكلامچ يمشي على الجميع..
لنچ خوش حرمه ما تطلع منچ العايزه..

للكاتبه ام رحيل ...ع م
.