كانت من القانتين

جئتك مجروحـة

#كانت_من_القانتين

بقلمي السيدة العلوية

القصة حقيقية كأغلب قصصي 

الجزء 1

{وَلا تَيْأَسُوا مِنْ رَوْحِ اللَّهِ إِنَّهُ لا يَيْئَسُ مِنْ رَوْحِ اللَّهِ إِلا الْقَوْمُ الْكَافِرُونَ}

اني ابقى اني ماراح يتغير بية شي .. الامل ينكسر مرة ينولد الف امل والف حلم .. وهاي عيوني الكالو عنها وكحة وحقيرة وبائسة وماتفهم لا راح تبقى .. مااكول شسوى زماني .. ومااكول بس ردت ابقى والله مثل مانولدت .. باحلام ورديـة اركض واريد احققها مثلي مثل كل بنت .. التيار جرفني لبر ماجنت متوقعته وماجنت اريد امشي بي بس لازم امشي بي ....

انسى يامولاي ياعباس .. ادري والله صعبة اسولفلك واشكيلك واهضمك بوجعي .. ادريك راح تنقهر .. ادريك راح تتوجع لوجعي .. اهدأ مولاي اني زعلانه صح ومقهورة وادري جيتي بيها هموم وجبال من النياح بس مااريد اضيف لسهم عينك هم فوك همك ..

تريدني اتسلح بس بيمن ؟؟ احسك جاي تحاجيني من بعيد .. احسك جاي تكول اني الحمايـة ؟؟ والنعـم والله منك ياعزيز مولاتي زينب .. بس اني ضعفت حيل .. وخايفة من هالطريق الي بديته .. ذكركم ينعشني ويريح خاطري واتمنى اكعد هواي يمكم يامولاي بس تدري بالحال ..

بلحظة دعيت واشتكيت وحلفتك بغيرتك على المظلومة زينب .. سامحني بس وحك ياضوه عيوني وجعوني وقهروني .. لوتدري الالم شخلا بصحتي .. جنت بس اريد ارتاح وحكك .. جنت بس اريد اطمئن .. وماجنت ادري بلواي راح تستمر .. ماجنت ادري مااتت كل احلامي لان اني ماعرفت اتصرف مثلهم واتصنع .. وبيوم الي ردت اتصنع يانور عيوني كرهت روحي واشمئزيت منها .. كمت مااعرف روحي ...

صرت غريبة عن نفسي وحكك .. لوني مختلف وروحي فقدتها .. ومااعرف اذا اوكفت كبالكم ترضون بية لو لا .. خلوني بكتلة سواد وحقد ووجع وكره .. هذا ماجنت اريد لروحي .. جنت قلب طفل .. جنت اللون ابيض .. احتلوني وخلوني مدينه من السواد وهدموني ..

خجلاني حيل منك حيل .. مستحية ودنكت راسي منك .. صلاتي وين وايماني وين !! يمكم بس اصير ضعيفة لانكم مصدر قوتي وانتو ياغوالي حزام ضهري .. عود اسمحلي اجيك لاتخليني ابتعد اترجاج .. خليني قريبة عنك اترجاك ..

جنت كاعدة يم الشباك المقدس بمسافة الله مااجملها من كعدة ترد الروح .. كعدة تعدل روحي كلها .. عمري ال20 والله يروح فدوة لهاي الكعدة والمكان هذا ..

اخذت كتاب القرأن الكريم وقريت سورة وكملت وحسيت براحة كبيرة كانما ربي نزل السكينه لقلبي .. بعدين اخذت كتاب الزيارة وقرأت وارتاح قلبي اكثر واكثر .. كمت صليت واكثرت وبعدين حان موعد صلاة ..

بعدين كمت اصلي ومن فرغت .. رحت ادور على المكان الي اتفقت بي وية ابوية واخوية الزغير نلتقي ..

امير{اخوية الي صف 2 ابتدائي } : روح ... روح احنا هناااااااااااا ..

روح: جنت واكفة اتلفت وخايفة لان بعدها جهة الزلم مامخلصين صلاتهم .. واحنه لان صلاتنا قصـر خلصت من وكت ..

اني {روح}.. قلب مرهف جدا وحساسة حيل لدرجة انه شكد الكلمات الجارحة لو جانت حتى لو بصيغة مزاح تجرحني وتخليني افكر بيها الف مرة .. مااعرف هالحساسية منين نولدت بس مرات تؤلمني كلشي ... عمري 20 سنه .. من سكنه بغداد .. خلصت سادس ادبي وكعدت ماكملت لضروف عائلية تجيكم السالفـة .. محجبة وبالبداية جان حجابي كلش مخربط .. يعني ساعة ايدي نصها طالع وساعة الكحل تارس نص عيوني ههههههههههه عفية لاتعيبون علية الواحد لازم يعترف .. اي لازم اعترف لعد حسبالكم كلش صحيحة اني .. لا عندي هفوات بحياتي .. بس بعدين نسولف عنها .. بس مو بأخلاقـي لاتفكرون لبعيد..

ملامحي الخارجيـة .. طويلة كانما بطلة من بطلات الالعاب الرياضية وجنت اتمنى اصير فد شخصية مهمة .. بس تاتي الرياح بمالا تشتهي السفن ..قمحية البشرة وعيوني كبيرة .. يقولون جميلة لكن من مدح نفسه ذمها .. اما حالتي الاجتماعيـة فأني .. مطلقـة ..

روح : لعد بابا وين ؟؟

امير: بابا بعده يصلي ..

روح: تعال نكعد نتضرة بينما يكمل !!

امير: اكول جوجو هذا المكان مال منو ؟؟

روح: مال الامال العباس .. اخو الامام الحسين {عليهم السلام }

امير: لعد احنه ماشفنا الحسين ؟؟

روح: هسة من يجي بابا راح نزور ونشوفه .. بس اريدك تصير عاقل وتدير بالك على بابا وموتصير وكح

امير: بس على شرط

روح: شنو يابة يتشرط الافندي

امير: تشترولي أزبري {مثلجات}

روح: هينه .. وهناك واشوف بابا اجه

الاب : هابنتي خلصتي الزيارة .. ارتاحت نفسيتج جوة ؟؟

روح{بانكسار واحس روحي ماريد افارك المكان واحس بروحي بديت اناشغ وابجي بحسرة ووجع } : اي اي بابا

الاب : لعد ليش هالدموع

روح {ماجنت اريد ازود فوك هم والدي هم } : لابابا سلامتك ..بس اني انكسار وامشي .. جسد مقسوم نصين .. عفت روحي يمكم يامولاي .. عفت احزاني وهمومي .. كصدت واريد الامان .. اريد الملاذ ..

الاب : اصعب موقف من تشوف بنتك مكسورة كدامك وتمثل كدامها الصلابة وانته جبل مهدوم لاحيلة ولاقوة ولاسند ولاعمد .. ولامال ولااحد يوكف وياك .. الكل يتركك .. دموع بعيوني تجمعت وكتمتها..

اعزائـي : معادلـة بسيطة / تعليقاتكم تكثر =بارت جديد 

لان مثلما تعرفون كلما رأيت حماسكم يصير عندي حماس للكتابة