اني كل ذكرياتي وية المستشفى ذكريات مؤلمة ومزعجة .شكم مرة متت ورحت... اول شوفتي الها من فقدت ابوية بحظني وفارق الحياة .. وبعدها من اخذت قطعة من قلبي وخليتها بثلاجة الموتى ورجعت بس رجعت بشنو ..بضهر مكسور والم وحسرة وعار راح يلازمني للابد .. واخرهـا من فاركتني شريكة عمري وروحي .. ام البنات العزيزة الماسمعتني بيوم الا كل طيب .. شلون جانت تتحمل كل الهم الي جنا بي .. واخر شي هم ركضت بيهة للمستشفى .. وهسـة روح ..
روح الي كسرتها بغضبي .. ام القلب الصافي المثل قلب طفل مايعرف بس ينطي .. هاي روحتي ورويحتي .. هاي بنيتي وسندي .. كسرتها من جبرتها .. خفت لاهم مثل قبس تركض للغريب وتتركني بوصمة الم وعار .. المشكلة هي قوية ادري بيها بنتي واعرفها وعدها حكمة اخذتها من أمهـا ماتفقد اعصابها بسهولة على الامور الغبية وحتى من تصير الامور صعبة وتشتد وتخوف تحاول تلكة الف حل حتى تعدي بنفسها لبر الامان
اني شبية صدكتهم من كالو بنتي ماتختلف .. مثلها مثل قبس !! لا والله ها روح تختلف !! تختلف .. هاي الضوة الدافيء الي بعائلتي .. هاي الهدوء والسكينة والراحة الموجودة بيتي .. وكالعادة من تريد تشي يصير صعب عليك .. الطريق شطوله للمستشفى ..
