كعدت على الكاع برة الغرفة بعدما قفلتها زين عليهم .. وطلعت اني وامي وابويـة الي مشدوهين مثلي وابوية راح سند امي بفراشها لان خفنا لا يصير بيها شي واحس بنظرات ابوية تتوسلني انه اهدأ لخاطر امي .هو منين اجيب الهدوء لو منين اجيب القوة واني صرت علج بحلوك الناس من ورى هاي الماتسوى .. اريد انتبه على حالي واركز شوية .. حسرة وراها حسرة واخر شي قررت اتصل على اهل ريهام اتصل على خالي ..
اصف: السلام عليكم .. شلونك خالي
الخال: ياهلة ومية هلة شلونك حبيبي صحتك شلونها .. لاتسألون لاتمرون ليش هيج وحتى هاي مرتك كلما اسألها تكول مشغول
اصف: خالي اريدك تجي لبيتنا هسة لان عندي مشكلة واترجاك خالي محد يدري ابد ابد وخصوصاً النسوان ماريد لغوة زايدة
اخذتني صفنتي ومغمض عيوني مثل الما يريد يشوف او يتذكر شي لكن ماانتبهت انه كلما اغمضهن تجيني الصور لكدامي تجرني وتجرحني.. ولكيت عيوني تدمع ولكيت الشلال لاول مرة ينزل من عيوني اغمض اكثر واكثر مااريد احد يلمحهن لدموعي اني الرجال الصلب كسرتني بخيانتها ..تسوي الزين وتزرع زين ويجيك واحد يغدر بيك بالضهر وبأي طريقة بأبشع طريقة ... شلون اكدر اكتم صرختي جاي تكطعني وبس اكور ايدي واضرب بالكاع لعل وعسى اكدر اهدا .. ليش وشنو السبب .. من تحس نفسك ماقدمت غير بس الحب والاحسان ويجيك بكل سهولة يكولك اسف غلطة وصارت .. من تحس البرود بكلمات الاسف وهو ذابحك .. اريد شي استر بي قلبي واحجبة عن الي شفته بغرفتي اريد ارتاح وكانما هاليوم مامر بحياتي ..تكولون الرجال صلب !! وشنو يعني اذا مر بهيج موقف !!
