كانت من القانتين

اشعر بالخوف

 #كانت_من_القانتين

بقلمي السيدة العلوية

الجزء 14

اتوقع اني هسة بداخلكم تكولون عني انسانه سلبية وانهزامية !! اتوقع تكولون ليش روح ماترفض !! وليش روح ماتكدر تسوي شي وتنقذ نفسها وليش هيج جاي تتصرف كدام مشاكلهـا ..

اذا كان عندكم هيج تساؤلات وهيج فكرة عني لاااااا ارجوكم اسمعوني وافهموني .. يعني شمتوقعين من وحدة عمرها ماوصل للعشرين تتصرف !! اكو ناس تكول الماعنده كبير يشتريلة كبير .. اني كل قرارات حياتي جنت مسلمتها لاهلي .. لان ماعندي طموح اغلى من انه اكمل دراستي واطور نفسي وهالشي اني جنت واثقة انه اراح يصير ,, يعني بصراحة لاتكولون انتي كلش على نياتج اي صح لى نياتي ماجنت افكر بالموت ولا بالسواد ولا بالسوء .. اليأذيني اكول هسة ينتبه ويجي يعتذر موهيج المفروض يصير .. اكول الي جانت تغثني او تبكيني هسة تفهم وتكول لا اني اسفة روح . خلي نكول عايشة بمدينه فاضلة بس هالمدينة بس بعقلي !! يعني الضاهر الحياة مو بس امي وابوية واختي الي جنت متوقع اختي من الناس الطيبين !! لا روح لاااااااا .. اختج طيبة بس انجرفت .. اهوووووو هم راح ارجع واحجي عن قبس مليت اريد انسى هالجرح وهالشرخ .. اي يعني جنت عايشة بمدينه حلوة ومتوقعة كل سكانها ناس تخاف الله وناس تريد رضى الله ونور بنور .. السماء زركة والبحر بلون عيون امي صافي والاشجار والعصافير الحلوة الجنت اسمعها من الصبح والاحلام الحلوة الواسعة بوسع المحيط .. هيج اني جنت !!

شمدريني اكو خفافيش .. ماجنت ادري صدكو ماجنت ادري .. صدكو جنت بعيون تضحك امشي وكلي ثقة وتفاؤل .. مسلمة قرارات حياتي لاهلي غير هم اكثر ناس تهتم لامري !! اي غير هم المفروض يحموني ويسندوني ..

دخلت لغرفتي واني كلي احباط وقلق من مجهول .. مجهول اسمه الزواج .. جنت طفلة يمعودين وبصدرية المدرسة توني والله .. احلامي بدلة بيضاء البسها واني مطمئنة وواثقة من الخطوة الي راح اخطيها والي اسمها الزواج .. جنت اريد احلام ومنتضرة رجل يحميني .. شخص قلبة ابيض ونشوف الدنيا اني وياه بالالوان متروسة ..ماركضت مثل قبس .. جنت مطمئنة واكول ياروح منتعتي نفسج من الحرام اكيد ربك راح يوهبلك الحلال .. اطمئني ..