كانت من القانتين

واصبحتي لـي !

#كانت_من_القانتين

بقلمي السيدة العلوية

الجزء 23

اصف: طلعت واني من صدمتي ماكدرت انطق باي كلمة المفروض حالي حال كل النس اروح لاهلهـا واطلبهـا بس شايف من تحس نفسك معيوب وبيك شيء راح يخلي الناس تنفر منك وانت مقتنع كلش زين انه اي شيء بالدنيا ماممكن يعيب الانسان الا انه هو ينحدر باخلاقه ساعتها نكول هذا نقص بي ومعيوب لكن ادري واعرف هي عمرها زغيـر واني وان كنت رجال ومجتمعنا يكول عني الرجال مايعيبه شي لكن الضرف المريت بي مو هين لازم اطرحه كدامها ولازم انطيها حق التفكير بس من عرفت انه هي ..مطلقـة !! ليش وليش وشصار بيها واني اريد وحدة ارتاح وياها اتاريني راح اجيب لنفسي دوخة راس .. اني مقتنع انه هي مابيهة اي عيب والطلاق مو عيب ابد كلمن وضروفه وحالته والجاي اشوفه عنها جاي يخليني احترمهـا ..وبيني وبينكم حسيت بانجذاب قوي تجاهها .. كلامهـا وهدوئهـا وخجلها الواضح مو تمثيل لان اعرف مامعقوله شيباتي برااسي وتالي عمري هم اخطأ بالتميز لا .. روح .. جانت فعلا روح شفافة وترفة وانسانه احس بيها راح تكون ملاذ بالنسبة الي بس !! شلون ..

روح: اي مطلقة شبي استغرب !! حقة مسكين يريد وحدة مومطلقة يريد بنت ماعرفها واحد قبلة .. بس ترى اني عذراء.. واذا ياروح انتي عذراء .. هو والناس مصدكين باللقب مامصدكين بالي بداخلج من بياض ونقاء .. يريد يرضي غروره وقناعاته ومايريد يصدك . بس والله اني موذنبي .. صارت الصراحة عيب ولازم البني ادم يبطلها !! غلطتي لان كتله اني مطلقة هرب .. من حقه يهرب .. النور من شدة وضوحه محد يريد يفتح عيونه بي وكلها تغمض من يمر .. وهج يسحر العيون ويخليها تغمض من شدة جماله ..مثلي مثل المشت على ساحل بحر طويل زز ذراته ناعمة هشة رملية موحقيقية تخطو بي خطواتك وتحس بالبرودة تمشي بجسمك مثل الكهرباء البسيطة تحرك ذرات كيانك وتشوف من بعيد خيط احمر .. وتمد ايدك تريد تلزمة وتتحد سوية وفجر سعادتك وهو يبتعد منك وتكوم من عز انسجامك وهيامك وانته مصمم تريد توصل لهذا الخيط وتشوفه يبتعد عنك بس بداخلك عربة شايل بيهة روحك .. عربة فراشها ثقتك بنفسك واحلامك الحلو مثل طعم العسل وبحلك مليان مرارة وتعب وعمدانها صوت يردد بمسامعك اااااااااي استمر اني وياك اني قلبك ونبضك وهناك وبعز فرحتك تتهدم وتحس كلشي من حولك تهدم .. جنت بعدني بدلة العرس من انشمرت من البلكونه وجنت بين الصدمة والاقتناع حالة ماراح يفهمني بيهة احد واني مشمورة بالمستشفى واريد استوعب الصـار .. وهم الي عين بعد واحلم واكول تمني ياروح .. شأتمنى .. الولد ماكال شي بس من تمر الايام وتعدي على جيته ايام وساعات وهو ماكو احس مثل الي فقد الامل بالسعادة مرة ثانية ولازم ارجع احكم البيبان واغلقة عدل خاف يدخل ريح من الحزن لقلبي ليش هو قلبي بطل حزن ..