كانت من القانتين

يوم عرسـي

شهـر كريم ومبارك عليكم جميعـا .. اسأل الله بحق الصلاة على محمد وال محمد ان يجعله شهر طاعات وبركات وزوال لكل هم وغم وقبول للاعمـال

#كانت_من_القانتين

بقلمي السيدة العلوية

الجزء 24

الام: حجي ابو امير بلازحمة عليك اريد الولد يدخل يلبس مرته الحلقة والنيشان ..

أصف : المفروض .. اكون مستجمع رباطة جأشي وسيطرتي والمفروض قبلها كانت على ذمتي امراءة قبلها .. والمفروض رافقت هاي وسولفت وية هاي والمفروض تغزلت وزركشت مسامع كل بنية بكلام ممزوج بعسل وحب وعاطفـة والمفروض دكيت بسامير الحان غزلي بقلب كل وحدة عرفتها لكن من سمعت الشيخ يكمل العقـد .. اني ماااعرف ياطاقـة حب وانفتحت بداخلي لهاي المخلوقـة .. طاقتة عجيبة سرت بداخلي مثل القشعريرة الي تجيك من تلفحك نسمة باردة منعشة رطبة وغضـة وانت بعز الصف الحار .. نسمة عطرهـا فاح بداخل كل شي بروحي وبجسدي .. امشي والعرق ينزل مني بس لحظة هاي مو جسمي المتعرق بس هاي روحي الخجلانه .. روحي الذايبة بعالم مثل الي جاي يمشي على المي .. لا المي يأذيه ولا هو يريد يترك نعومة قطرات المي وهي تلامسة وتريد ترفعه اكثر واكثر .. جنت مثل الي بعالم الاطفال يتخيلوه واحد يمشي على غيوم .. اليسمعني يكول الخطوات من مكان كعدتي لحد الغرفة الي هي بيهة كانما مشوار وكيلومترات حتى كل هاي الاحاسيس اجتني واخذتني بواهس طفل توه تعلم يناغـي ..وصلت والي اشوفة بس رجلية .. وينك يااصف الوكح والملاعب والشقي .. وينك يابوسوالف غزل وحب وهي ليلة وتعدي .. وينك !! يمعودة اهدي ياروحي وينج عني يمعودة تعاي قويني اشو حالي حال الغشيم .. واثاريني عرفت مصدر قوتج يا{روح } عرفتي ربكتي وخفقان قلبي الي من انحط اسمج باسمي وعرفت الاندهاش والرهبة واني واكف كدامج .. اثاريهـا هيبة الحلال .. اثاريها طعم حلو بي عفـة وكرامة .. اثاريها نغمات طربتني بس ماحرفتني .. اثاريها سوالف عذرية الماسمعتها منج ومااكدر اتجرأ انطقها يمج بس حسيت بيهة واكيد .. اووووف يااصف .. شبيك ارفع عيونك شوف عروستك .. مااكدر احس روحي متهيب ومااكدر ارفع نضري اكثر من طرف بس ياطرف .. اللون ابيض هذا الي لابسته !!

روح : دكات قلبي مسموعة اكيد .. طبول واكيد الكل سمعها .. بس لحظة محد كاعد يمي بس امه الي اول ماكالت خلي يدخل لزمت ايدهـا مثل التريد احد يهدأ من عواصف حيائهـا وخجلهـا .. حسيت بعيون امه تراقبني بذهول وتراقب حركاتي الغير مسيطر عليها .. مااعرف كمية افكار وسوالف اجت بدماغي ..واحس روحي مبتسة بس موبالشكل والوجه لكن احسها روحي المبتسمة ومثل الي يلاكي غايب عنه من سنين .. الجسد واكف ومستقر بمكانه لكن الروح فزت وشردت مني مثل نجمة ضوية ركضتله وحاوطته بذراعهـا ..ولكيت نفسي استحاليـت وصرت قمر ونورت بس من يوم الي هل هلاله وصار {رجلـي } دققت النظر لروحي مستغربتها ومستغربة لوكاحتها وجرأتها .. تعالي وين ركضتيلة ياروحي .. يمعودة بالله عليج تعالي طمني جسمي الجاي يرتعش وهو يدخل حتى يكعد يمي تعالي عوفيه والا اكولج .. ارفعي عيونج ياروحي خاف عيوني ماتكدر ترمش وتنرفع كدامه انتي كوليلي .. اسمر .. ابيض .. حلو .. شلونه .. ملامحه شلونها .. يلة ياروحي شبيج اخذتج الصفنة تعالي سولفيلي عنه .. جنت لابسـة فستان عندي قديم كلش الخامة مالته بيضة وبي ورود زغيرةخضرة لونها .. هاديء الفستان جان وحجابي بنفس اللون هم ابيض همزين هاي البقالي من ريحة المدرسة .. حجاب ابيض ... وبالبداية خجلت حيل وقبل لايدخل كمت