اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
#كانت_من_القانتين
بقلمي السيدة العلوية
الجزء 23
مااعرف الاحساس الي صـار عندي فجاءة كانما عيوني الي غمضتهن كم شهر انفتحن ورجعلي الوعي من جديد ..كلام رياض خلاني شوية اصحى وانتبه لروحي .. محد راح يخسر من هالضياع بس اني .. خسرت ايماني بلحظة من لحظات انكساري ووجعي خسرت اليقين الجان عندي واني اعرف شنو الابتلاء وشنو معناه وشنو أجره .. خسرت الاطمئنان وراحة البال واني الهث صرت مثل ريهام لشهواتي ورغبات جسمي لااكثر ولااقل .. هذا مستواي!! فعلا لو اني الي انحدرت .. هذا اخر مااكدر اوصله لو لا ..كعدت من الصبح ركضت على الغرفة الي نايم بيها رياض ..
اصف وهم يركبون السيارة : باوع هالمرة لو صابت لو خابت ادري جاي اسوي شي ماممكن احد يصدكة او يقتنع بي .. خلي اسوي شي واني متوكل على ربي تبت ومااريد ارجع بعد لدرب التعب والله مليت ادري بلوتي جبيرة وادري الراح يصير مثل طفل مراهق ويريد لعبة اي اكو لعبة لو هي لو ماارجع بعد
رياض: شبيك اصف صدك تحجي !! يعني انته بيوم التريد تستقر تختار وحدة من الهوى والعدم ولو هي لو ماتريد ..شمدريك بيهة تفيدك وتصونك ؟؟
اصف: انت التقرر رياض .. اصبر وراح تشوف بس اخذلي فد كتاب من ابنك
رياض: كتابيش يمعود شنو هالسوالف ماجاي افهمك والله صدك تحجي باباتي اصف ترى احنه شياب يمعود استهدي بالرحمان وامشي نرجع نخلي امك تختار وحدة الك وكافي لعب الاطفال
اصف: ماراح ارد لحدما تشوف بعينك
روح : كعدت بيومهـا من الصبح كالعادة بس ليش احس بالاطمئنان والراحـة .. احس نفسي كانما اني بعرفات ولو عمري ماشفت جبل عرفات ولااعرف يجي يوم وازور حالي حال عبيدك يارب لو تحرمني الضروف .. حسيت ايدي ترتفع واستمريت بدعائي واحلامي وادري عندي رب غني ماراح يرفضلي طلب وهو يدري بحاجتي ويدري بلوعتي وتعبي .. يدري بية انهديت وتعبت وانجرحت واول مرة اتلوع واني اسمع كلمة .. مطلـكـة .. عيب غريب انضاف لقائمة عيوبي .. عيوبي اريد اعيش بهدوء .. عيوبي اريد اوفي .. عيوبي اختي .. عيوبي لقب مادرست حتى اخذه .. لقب اخذته وهم اللي قررو ينطونياه ..ماراح ازعـل وماراح ارجع ابجي .. ماراح توجع وماراح اندم .. واندم علموديـش .. العيب مو بالي بي عيب !! العيب باللي يعيـرك ويذمك ويتعلى عليك كانما هو شي.. صليت وكملت وريكت ابوية وهالمرة اول مرة يوصلني للمكتبة .. راح لشغلة الله يفتحها بوجهة حيل متعبته هاي التكسي يومية تعطل وماجاي يلم اللي يسد حاجتنا بس الف الحمدلله .. اني مومن النوع اليتطلب هواي يادوب يكفي الكهرباء ومسواك البيت كلش كافي والف الحمدلله .. وصلني بابا على الشارع العام ونزلت اتمشى واشتم ريحـة الصبح ريحة الدكاكين القديمة .. ريحة بيهة ذكرى وناس وعالم عاشت وراحت .. اشوف الناس تفتح من الصبح وبدأ الشارع يزدحم بالناس هاي التشتري .. مكتبي جان كدامها محلات مال البسة .. جنت اشوف البنات وهن يضحكن ويروحن ويشترن .. وهالمرة كعدت صافنه ورحت لعالم وتخيلت نفسي اني وقبس وهي تكلي لا هاي متلوكلج واكوللها خلي نجرب هاي .. واخذتني افكار بريئة بس ناسها ماتوا .. احتاج امي حيل .. احتاج حظنها احتاج من اغص واني ابجي الكاها تاخذني لعالم امان بي هي بي .. وبعز صفنتي فززنـي صوت
