شر النفوس ولا الزمن

الجزء 19

وقع إسماعيل مغشياً عليه، وعلت أصوات حسن ومحمد مما جعل نفيسة ومنى واخوتها يهرعون إليهم،، كان محمد يحاول أن يوقظ عمه، هرولت منى وعادت بكوب من الماء وأخذت ترشه به، واحضرت والدتها بصلة، ووضعتها علي انف إسماعيل، احضر محمد كوب ماء الا أنه لم يستفيق الا بعد جهد..

منى: والله يابا الكلام دا كلو كضب، انا بتك وانت ربيتني تربية حلال وبتعب ضراعك وعرق جبينك ، ماتصدق كلام ناس الحلة😭

كان والدها ينظر إليها والدموع تنهمر من عينيه..

منى: اتكلم معاي يابا ، سكتتك دي حارقة قلبي، قولي انا واثق منك، قولي عافي منك💔

حسن: نحن كلنا واثقين منك يا بتي، لكن لازم الموضوع يتحسم..

منى: يتحسم كيفن!؟ قولي؟ نسكت الخشامة والشُمات(الشمتانين) كيف؟

حسن: نعقد ليك انت ومحمد ولدي ، وبكدا الموضوع بهمد شوية..

منى: وقرايتي يا عمي؟ وكدي الناس بسكتوا؟؟؟ لا والله..

نفيسه ودموعها تنهمر: ذي مابقولوا الجات من السماء بتحملها الواطة، والسيدة عائشة رضي الله عنها اتهموها، ودا إبتلاء يابتي اصبري عليه.. وكتري من حسبي الله ونعم الوكيل 😭

تعلقت العيون الدامعة باسماعيل عندما تحدث بصوت مرتجف، ونفرت دمعه يتيمة من عينه اليمني على خده، مسحتها منى بيدها : منى يا بتي، انا واثق فيك وعافي منك.. وود عمك هدأ قدامك لو موافقة عليه قولي، ولو ما موافقة مافي زول بغصبك،، وكان خايفة من كلام ناس الحلة انا سكينتي دي(ولمس بيده الجفير الذي يربطه على ذراعه) بقص بيها لسان اي زول يقول فيك كلمة...

منى: الله يخليك يا ابوي..

قاطعها محمد موجهاً كلامه لعمه: مايحصل غير الفي خاطركم يا عمي، والبرشكم بالموية انا برشوا بالدم، وكان بتسمحوا لي عندي كلمتين مع منى نقولهن ونرجع ليكم باتفاقنا😶

خرجا من الغرفة وجلسا في ظل جدار الحوش على مرأى منهم لكن لا يسمعونهم طلب منها محمد ان تجلس على (العنقريب)

محمد: منى انا عارفك ما بتدوريني، لكن وافقي ، نسوي خطوبة بس ونقوليهم لحد ماتخلص قرايتها ،، ولما تخلص قرايتك الله يفرجها.. وماتخافي انا مابغصبك علي،، انا كمان بشوفك ذي اخواتي ..

في هذه اللحظة حضرت السرة.. جلست معهم واخبرت منى أنها سمعت بكل ما يقال عن منى إلا أنها لم تشأ أن تذيد همومها..

السرة: منى ياختي، خليها علي الله، وهدا محمد أخوي قدامك الدايراهو بسوي ليك... لكن كلام الناس ما بنتهي، انت كملي قرايتك الفيه خير ربنا بسويه😊

*

عاد الجميع إلى الدراسة بعد إجازة بسيطة في عدد ايامها وكثيرة المصائب التي حدثت بها...التقت منى وتبيان ...