دخلت منى غرفتها وبحثت في حقيبتها عن ورقه وجدتها وكتبت الارقام التي بها على الهاتف...رن الهاتف الجرس الأول...ثم الثاني ففصلت الخط ...وهي تحدث نفسها....
(شنو الخلاني أضرب ليه؟ حيعمل شنو يعني؟ هو ما ولي أمرها وأكيد ما ح يقدر يأثر عليها)
رن هاتفها...نظرت للشاشه..إنه رقم نوري !! لعنت نفسها على حماقتها... لماذا هاتفته؟؟
نوري: الو...الوووو.
منى: الو..
نوري: ح تصدقي لو قولت ليك حسيت انك انت المتصلة!
منى: انا منو!
نوري: منى أكيد...
منى:.....
نوري: ماتستغربي..ماعندي بنات بتصلو علي ...وحسيت بس ،لما قولتي الو اتأكدت...
منى:......
نوري: اكيد ما متصلة تونسيني علشان كدا.. إتفضلي ماتسكتي...
منى: ماعارفة اقول شنو...لكن ماقادرة أتدخل في موضوع إحسان، وماقادرة أكلم زول،، وخايفاها تضيع...قولت اكلمك يمكن توريني حل😢
نوري: والله إلا هي من نفسها تقرر إنها تائبة لله ...ودا مابيحصل بالمشاكل...إنت حاولي هديها بس وأقري قران جنبها..وصلي جنبها ...واحكي قصص توبة لبنات إنحرفوا قبل كدا...المهم كلام ذي دا يخليها تنتبه لروحها وتخاف من عمايلها
منى: طيب تمام ، شكراً ليك م اكون ازعجتك...
نوري: ولو في الخدمة دائماً😊
منى: تسلم
هدأت قليلاً بعد مكالمة نوري هذه ودون أن تعلم السبب وجدت نفسها تبتسم...قررت أن تتصل على محمد لتكلم أهلها وتطمئن عليهم...
محمد:الو...
منى: السلام عليكم...ازيك..
محمد: خليني أودي التلفون بيتكم وارجعي كلميهم!
منى: مالك مابترد علي السلام!؟ لو اتصالي في تلفونك بزعجك ما بتصل تاني ...بشوف اي رقم في الحلة بتصل فيه...
محمد: انت عارفه روحك بتسوي في شنو...وماتكتري معاي الكلام...
منى: لا اله الا الله محمد رسول الله،،محمد انت بتدور تجنني ؟ مالك في شنو؟؟؟
محمد: الكلام فيك كتر شديد في الحلة..
منى: كلا شنو آ آ محمد!؟ انت بقيت تصدق كلامن ينقال فيني؟؟؟
محمد:.......
منى: دا اتا حالتك؟؟ قولي بقولوا في شنو؟؟؟؟
محمد: هاك عمي إسماعيل...
تحدثت مع أهلها جميعهم...وكان قلبهم يتقطع تريد أن تعرف ماذا يحكي عنها أهل قريتها من خلف ظهرها...واتتها فكرة...أخذت هاتفها واتصلت على محاسن..
أنت تقرأ
شر النفوس ولا الزمن
Narrativa generale📝 بقلم: هبه محمد أصبحنا نعاني الكثير من المشاكل في عصرنا هذا وكل شخص يرى أن هنالك سبب في تلك المشاكل، بعضهم يعزوها إلى العولمة، وبعضهم الى الظروف، والبعض الآخر يرى أن الجامعات والدراسة هما السبب، لكن كلهم يتفقون في أن الجيل الحالي فاسد ولا يصلح لشئ...
