#ﻷني_احببت.tt
》》》البارت5《《《
من كثر ماحبيت الفت انتباهه للولد سلطان وتأثرت بكلامها لضمياء دخلت بعد المحاضرات على السريع للمغاسل بالمدرسة وغسلت وجهي وبللت ايدي ومسحت شعري ورخيت القراصه وشديت الحزام ضب على جسمي ورفعت ردان القميص طبكتها وطلعت
جمعت الاوراق بالجنطه وحضنتها ومشيت ببطء شفت ضمياء راحت ويه سعد صاحبها وبقت تعاين عليه الملعونه شلون تتصرف بهيج جراءة واني الخوف سوة رجفه بعظامي ونعقد لساني ..
تلفتت يمنه يسرة ماهو الولد وصلت للمكان اللي انصدمت بي البارحه
وكفت طلعت ورقه كلت اكتب رقم تلفوني واكتب اسمي ترددت
خفت توكع بيد ابن حرام لو يصير شئ عكس
رجعت القلم والورقه بالجنطه شلت راسي نزيت !
ابتسملي فديته كأنما ملاك نازل من السمه
تنحنح وكلي مساء الخير
عضيت شفه وابتسمت
اشرلي بيده حركات الصم البكم كلي انتي خرسه !
صدك ضحكني
رفع حواجبه مستغرب
ياويلي يجنن بس اني صدك خبله اللي نسيت نفسي وضحكت هيج وبصوتي الخشن خرعته للولد بس شفته الحمد لله باقي ما راح
بعده صافن ببوجهي يمكن انصدم !
تنحنحت ..
اخذت نفس قوي وتشجعت اتكلم ..
كتله اسفه سلطان اني ناديه واشكرك على اهتمامك وعلى الملازم والاسئله
محجيت وياك لان خجلت من صوتي مبحوح وماعندي تجربه سابقه مع الشباب
انتبهت الولد عينه على حلكي وبس خلصت كلام ابتسم اكثر
توتر ماادري شنو بباله
كلي بعد التلعثم والتلكؤ
لا لا ماكو داعي تشكريني ناديه اسمج حلو وانتي أحلى
واني بصراحة معجب وميهمني .....
صوتج ...
اقصد ممكن .... اني .... احب نتواصل وانتي براحتج بعد
اقترب مني وهمس
ممكن نلتقي بمكان خاص
شميت ريحته تجنن
رجعت خطوة لورة وهزيت برأسي أي..
اشرتله أخابرك
غمزلي واشرلي على ورقه وقلم
فتحت جنطتي وكتبت رقمه وكانت نظراته بلهفه أكثر من قبل
حبيت كلشي بي واللي شدّني اله اكثر انة مااهتم لخشونه صوتي ولا استهزء بيه وانما بقيت بنظره أنثى وطلب يلتقي وياي بمكان لوحدنه
تركته ورجعت للبيت وانتظرت وقت مناسب اكدر اخابره حفظت الرقم
نور الدين كالعاده ياخذها لضيّ ويطلعون يتنزهون وشيرين تنام من وقت بليل
خابرته تأخر يالله رد استغربت
سلمت عرفني وبقينه تقريبا اكثر من ساعه نتعرف ونسولف وعرفت عنه كلشي
وحيد لاهله وحالتهم الماديه زينه
لان والده طبيب بالمستشفى ووالدته دكتوره بالجامعه وعمه مسؤول كبير
وهو يطمح يدخل كلية الطب ويكمل مسيرتهم
وو ... وماعنده صديقات بس ماصدكته
وحجيتله مختصر قليل من حياتي
اتفقنه نتلاكه باجر بمكان ويعزمني رفضت لأن شيرين شلون اعوفها توسللي ماقنعت وعدته بعد الامتحانات ادبرها
مرت الايام والتهيت عن ضيّ وتجاهلتها لان مااعرف شلون افضحها واشوف علاقتها بنور كلش طبيعه بالعكس اشوفهم منسجمين وعشاق ماكو مثلهم وبمجرد ما يروح نور للدوام ترجع لسوالفها وتطلع بأي وقت براحتها وتخابر ومتهتم لوجودنه اني وشيرين ..
..
بقيت اشوفه لسلطان كل يوم من بعيد يوكفلي يم شارعنه لو مرات يم المدرسة وبيننا سلام ونظرات ومرات يصافحني ويلزم ايدي برقه وكلامه كلش حلو ورقيق وبالبيت اخابره كل يوم
يظل يتشاقه وياي ويكلي شلونك ابو ندى بمزح ماازعل منه بالعكس أحس نفسي كنت تايهه قبله ومن تعرفت عليه لكيت نصي الثاني
يفهمني ويواسيني ويخفف عني
اكثر شي يشجعني للدراسه
مرات يحرجني يكلي شلابسه لو شدا تسوين أتهرب من الجواب واغير الموضوع يبقى يشتم ويكلي عبالي هسه دا احجي ويه صاحبي وتاليها وياج !
مااعرف احجي سوالف المياعه والدلع ومن يضوج ويزعل اعوفه وحده يرضى ميكدر يطوّل بالزعل بس يبين عليه من يزعل يظل يتحسر ويتنهد وينخطف لونه وبعدها يتراضى وحده ...
وبقينه على الحال ....
استافاديت هواي من الاسئله والملازم وكنت دائما اشكره حتى ركزت بيهم لأن من عنده وبيهم أحلى ذكريات منه ..
لحد ماخلصت الامتحانات وكانت جدا صعبه بسبب الحر والجهد والسهر وخوفي من الأسئلة وتفكيري مشوش بسوالف سلطان اللي مجنني وخلاني عشقته وولهانه بحبه وغرامه اصلا مااكدر انام بسببه اتذكر كل تفاصيل لقاءاتنا لحظه بلحظه واسمع أغاني واغمض
اتخيل نفسي وياه لو من أسمع اغنيه جورج وسوف '''الهوى سلطان على القلوب الهوى سلطان '''
ياويلي صدك سلطان بكل شئ وملكني وحبيته حب صادق بس كنت خايفه من العواقب ومن نتيجه هالعلاقه وخاصه اني اعرف نفسي من أحب ماعندي حظ وماتنصفني الدنيا وتمشي وياي عكس ..
بديت اهتم يشكلي وبشعري والبس تراجي من شيرين وخليت كذله حتى اكون ملفته للنظر واعجبه لسلطان
...
ورة ما خلصت الامتحانات صعدت لغرفة نور الدين وطلبت منه احجي وياه
بموضوع وأكيد ضيّ متخليني انفرد بي بقت حاضنته لنور وتسوي حركات حتى تبقى وتسمع كلامي وياه
كتله نور حبيبي اريد اخذ شيرين ونطلع
لان عطله وشيرين خطيه ما طلعت انتظرتني علما اكمل إمتحانات
واني وعدتها ..
كلي اخاف عليج متتطلعين وحدج ماممكن ومستحيل
اني اخذكم وقت ماافرغ
كان يعاين على ضيّ من يتكلم معاي
ضجت ماكدرت ارد
كتله ماشي حبيبي اني انتظرك ونزلت من غرفته كلش ضايجه
شلون هسه التقي بسلطان وعدته نطلع سوة وشيرين خطيه
هسة هاي ضمياء مو دا تطلع وتواعد ليش اني هيج مااكدر اتحرك الا بأذن ..
بقيت متردده اخباره لسلطان خفت يسمعني نور لو ضيّ واني كتله لاتخابر انته الا اني أخابرك
من راح نور للدوام رحت لضيّ كتلها ليش مخليتي نور يأخذنه ونطلع !
ضحكت وهزت بيدها
وإني شنو من يجي اخوج عاتبي
كنت واكفه اجت يمي دفعتني وراحت لفوك ..
.. مجبورة اتحمل ومااعرف شلون اخلص منها لو شلون اتعامل وياهه ..
مرت الايام وبقيت ميته قهر لاطّلعنّا نور ولا اني اللي خابرت سلطان ولا كدرت اطلع
قضيناها تلفزيون وبالحديقه ومرات بالسطح نصعد العصريات ننرش السطح ونلعب اضطر ألعب ويه شيرين بكل الالعاب حتى لاتضوج وتحس بفراغ
لحد بيوم العصر يمكن بعد اسبوع من نهايه الامتحانات
اجت ضمياء للسطح تركض وتنافت
ولج ناديه وينج !
يعني ويني مدا تشوفين بعينج مقضيتها ألعب ويه شيرين لاطلعه ولاونسه
شاورتني بهمس امشي وياي معليج بضيّ
شنو وين !!
امشي بدلي ملابسج وامشي
نزلت بدلت ملابسي وملابس شيرين وضيّ تعاين صفح علينه كالت باستهزاء مو تتأخرن
طلعنا وضمياء عاصرة ايدي وتجرّ بيه مستعجله
سيارة واكفه براس الشارع صعدنه واني كلش خايفه
انتبهت السايق سعد !
كعدت يمه ضمياء واني وشيرين ورة
بقت تغمزلي وحضنت سعد من متنه وفرحانه
خفت من تصرفها الجرئ هذا
وين ح تأخذني
وتندمت لأن اخذت شيرين وياي
مشت السياره مسافه وكفت ونزلوا منها ضمياء وسعد ...
...يتبع..
