#ﻷني_احببت.tt
》》》البارت13《《《
..علاقتي بسلطان صارت مثل علاقه الشهيق والزفير متلازمين وواحد مكمل الخ
أحبه حب مينوصف
عشقته وصار سلطان قلبي
علاقتنا سريه ومحد يعرف بيهه
بعد اللقاء الاخير بيننا بدت تصير بيننا خلافات وزعل بس نتراضى بسرعه ويبّين علينا الشوق واللهفه من نتلاكه ونتعاتب ونتوج حبنا ببوسات وأحضان ...
بنفس اليوم بعد ما رجعت من الغده ويه سلطان جبت وياي غده لشيرين بكيس
تفاجأت نور وضيّ مارجعوا من الصبح ! خفت صاير شئ وياهم
ووصيت شيرين منا ورايح تعتمد على نفسها لأن ح اطلع هواي واعوفها
بعد ما وعدت سلطاني كل يوم نلتقي بنفس المطعم كان قريب على الإعدادية اللي ح داوم بيها
علمتها شلون تتصرف ومن ترجع من المدرسه نعوف باب المطبخ مردود حتى تدخل منه
للعصر اجه نور وضيّ من دخلوا شفت ضيّ كوة تتحرك وتتميع صعدها لفوك ونزل حضنني وكان فرحان خفت من تصرفه حته ماسألني وين كنتي لو ليش طلعتي الصبح !
كلي ناديه ح تصيرين عمه
صدك فرحت وشيرين ركضت باسته لنور شعور حلو من يصير عدنه طفل بالبيت رغم ما كنت اتمنى تنفضح ضيّ وتنكشف بس كلت يمكن يكون هالحمل هدايه الها وتنصلح
...
طلب مني نور اهتم زيادة بضيّ
واذا صار شي بغيابه اتصل بأمها واختها يجون يمها
شفت الفرحه اللي بعيون نور لأنه ح يصير أب متنوصف
بعد اليوم ماشفتها لضيّ ولااحتكيت بيها شيرين تصعدلها الاكل واني متعوده على شغل البيت وشيرين بدت شويه شويه تساعدني وتتعلم
ثاني يوم رحت ملهوفه للدوام باعتبار طالبه بالاعداديه ومتواعده ويه حبيبي بعد الدوام بالمطعم
اخذت شيرين لمدرستها بصف الثاني ابتدائي وعلمتها منين ترجع وتنتظرني بالبيت احتمال أتأخر ..
اول يوم ثكيل وممل بالدوام
أعد ساعات حتى يخلص واروح لحبيبي أشوفه
كنت لابسه قميص ابيض وصدريه رصاصي وشعري لافته بس من طلعت فتحته وطلعت كحل من الجنطه خليت وشوي باودر وعطر ورحت انتظرته
تأخر !
طلبت بس عصير وبقيت للساعه بال 2 تأخر عليه سلطان
ضجت وتحلفت بي ما أجي بعد
رجعت بسرعه صعدت سيارات ركاب ذبتني رأس شارعنه ورجعت كلش ضايجه ومقهورة شلون فشلني سلطان
شفت سياره قريبه على بيتنه لزمت قلبي متت خوف لايكون صاير شي لشيرين !
تقربت نزل الجامه هذا الشاب اللي إجه خطبني !
دريد !
كلي شلونج ناديه
كتله شنو حضرتك شتسوي هنا !
اجيت اشوفج
لا بربك !
تشوفني لو تشوف حبيبت القلب
شفت لونه انخطف
فتح باب السياره ونزل
وكف ببوجهي وحجه بصوت ناصي
انتي شنو ششايفه نفسج !
هسه اسحلج من شعرج أمسح بيج الكاع
نزعت حذاءي وكتله هسه اصرخ والم عليك الجيران واسويلك بلاغ بالشرطة ياسافل يبن ال ....
اكو كم واحد من الجيران شافوني اصرخ اجوي باتجاههي وهذا دريد صعد بسيارته وراح انهزم غضب الله عليه
بقوا الولد جيرانه يصيحون وراه
نزلت حذاءي لبستها وتشكرت منهم كتلهم هذا كان يتحارش بيه
رجعت دخلت للبيت شيرين ماكو بالصاله شمرت جنطتي وصعدت لضيّ فوك دفرت الباب لكيتها تبجي
نزّت
وجهه صار اصفر وارتبكت
شنو ست ضيّ احجيلي بلكي اساعدج لوتريدين تحجين كدام نور
شنو قصدج ناديه شتريدني احجي !
احجيلي عن دودي حبيب القلب
لطمت على ووجهه
انتي منين تعرفين !!
اجت يمي سدت حلكي
سكتي ناديه سكتي لخاطر ربج
وخرت ايدها ودفعتها
اسمعيني ضيّ اني اعرف كلشي واعرف ليش جبتي وردتيني اتزوجه حتى تبقين قريبه منه وتكملين التمثيليه
كعدت على سريرها وظلت تبجي وتملخ بنفسها
هددتها افضحها كتلها هسه الجيران شافوا ومن يجي نور اشهدهم ضده
جرت ايدي ابوس ايدج ناديه ستري عليه لخاطر الطفل اللي ببطني فدوة
هه ... ومنو يكول هذا ابنه لنور !!
رجعت تلطم وتبجي
بقيت اهددها وكتلها ابقى اراقبج واذا نكرتي اشهد ولد الجيران اللي شافوه بالباب
عفتها ونزلت
ظليت محتاره شسوي هسه
نور كان فرحان لأن ح يصير أب
وهاي الملعونه مااعرف شلون اتصرف وياها هسة افضحها لو اسكت لحد مالله يهديها لو تنكشف وحدها ماريد اصير سبب بتعاسه نور
ربي دخيلك احتاريت بيمن افكر
سلطان اللي ماادري وينه ليش مااجه للموعد !
طبخت غده على السريع وكملت شغل البيت ضيّ بقت فوك مالها عين تنزل وتواجهني بعد ماكشفتها
ونور بالدوام بس من خابر ماحجيت شي وطمنته على ضيّ كتله نايمه
ترددت اخابر سلطان خفت تسمعني ضيّ وتلزم عليه لزمه
كلت بلكي باجر يجي
ثاني يوم وصيت شيرين اذا يجي احد غريب تنتبه وتخابر نور تكله وصلتها لمدرستها ورحت صعدت سيارة وصلت كبال الإعدادية قلبي يرف على سلطان موتني كأنما مفاركته سنه مو يوم اتلفت وادور عليه بلكي يجي
طلعت من الدوام لكيته واكف كنت مشتاقتله بس تدللت عليه وبينت نفسي زعلانه
شافني ابتسم واشرلي طلع كدامي لحكته
فدوة لطوله ولجسمه وهيبته يجنن لو عيونه الصفر اللي تتدوخ وتسطر سطر
..
دخل المطعم وكعد بمكان معزول مخلين للعوائل خانات كعدت مغندبه جرني وحضنني وبقه يبوس بيه
وخر سلطان ماا ... زعلانه عليك
بقه ينافت ناديه والله مشتاق عذبتيني
دفعته كذاب دخل الصانع طلبنه اكل وعصاير سجلهم وراح يجيبهم
رجع شبكني
سلطان تفضحنه هيج اتدنى شويه
تنحنح واتدنى
احجيلي ليش ماجيت البارحه لل 2 منتظرتك
صدكيني عندي ضروف
لزم ايدي
ناديه مو دائما اكدر اجي لازم نتفق على حل
وشنو الحل بالله !
نصه صوته نتزوج بالسر ...
يتبع....
