#ﻷني_احببت.tt
》》》البارت27《《《
بعد مايمر الانسان بلحظات مرض وتعب جسدي يكون بحاجه لقضاء أكثر وقت ممكن ويه العائلة ..
رجعنه بليل للسليمانيه وراغب وصلني وراح لبيتهم
مرت الايام وفرحتي بشيرين متنوصف لأنها دوامت بكليه الطب
تعب السنين
وثمرة جهود وتضحيات
شيرين ح تكون "دكتورة شيرين" وتتخصص باللي يعجبها ويناسبها ..
اخذتها لارقى المحلات والمولات و اشتريتلها ملابس جديده وكل اللي تحتاجه وبديت اجهز لزواجي اللي تقرر موعدة بعد ما اكمل العلاج الشهر الجاي بلكي اشوف تحسن وأكمل حياتي ويه راغب
كنت خايفه من الزواج كلش مااعرف إذا كان إحساسي بسبب صدمة زواجي الفاشل من إياد
ممعقوله راغب يكون مثله !
مستحيل ..
اصلا راغب رجل بكل معنى الكلمه وشهم وتحملني أكثر من ثلاث سنين وبيننا عشّرة حلوة وذكريات بزعل وصلح وعتاب وفرح
وتقريبا تحركت مشاعري تجاههه
رجعنه لحياتنه الطبيعيه الكل مشغول والعام الدراسي هذا حافل وأحس بتفائل راغب اخذني اختارينه غرفه اخشاب جديدة وبدّل القديمه وبده يلحّظ ببيته واشترى أثاث جديد
تطورت اجهزة الموبايل اشترينه اجهزة جديدة وراغب تعود يتصل بيه اذا مو كل ساعه كل ساعتين
اشتريت لشيرين حاسبه كمبيوتر تدرس بيها وتنزّل بحوث وشغلات خاصه بدراستها واختصاصها
وكانت تحجيلي عن كلشي يصير وياهه بدقه واكو ولد ملزكلها معجب اسمه صلاح
هيه تتذمر منه وضايجه ومعاجبها
بس كنت اتوقع ح يصير شئ بينهم بالمستقبل لأن كل علاقه حب تبدي بالتذمر وعدم المبالاة والمشاحنات وشيرين مميزة والف من يتمناها
بعد كم يوم ضيّ اخذت جهالها وطلعت لأهلها تزور والدها مريض العصر وبقيت اني وشيرين نسوي كيك بالفرن وندردش باشياء وسوالف الجامعه ..
شيرين كالت ناديه تدرين .. أجانه أستاذ يجنن من إيران آيه من الجمال والبنات خربانات عليه ويتمنن يرقمنه
ولج يرقمنه شنو !
هاي شبيج ناديه ينطنه رقمهن يعني ويسون علاقه وياه
هااا .. ايي عادي يمعوده شبعانيين الأساتذة بالطالبات الرخيصات
لا وداعتج ناديه كلش رزن ومامهتم لأي طالبه وعيونه اويلي على عيونه
صفر تتدوخ تسطر سطر ..
ولا حواجبه تجنن ..
والبنات صافنات ببوجهه ومن يطلع من القاعه يغنن أغنيه ... "الهوى سلطان الهوى سلطان" ...
... اثناء كلامها لشيرين لفتت انتباهي
كلامها هذا أني رددته قبل أكثر من 12
سنه ..
دخلت الكيكه بالفرن ودا أسده
أيي وشسمه هذا ابو عيون الصفر والحواجب الحلوة
.. أسمه دكتور سلطان عبد الرحيم
شهكت وطبكت باب الفرن على أيدي احتركت بالنار وصرخت ... اااي ...
ركضت شيرين إسم الله عليج ناديه حبيبتي تأذيتي !!
بقيت أرجف لا ... لا مابيه شي جيبيلي دوه من الكاونتر
راحت شيرين تجيب علاج الحروق أني مامتألمه ولاحاسه بالحرق أحس قلبي انضرب بسيف أختنكت طلعت للحديقه فتحت دكم قميصي وبقيت اتنفس حييل
إجت شيرين لفت أيدي ودخلتني
الجو بارد كان
كعدت على الكرسي وعيوني أنملت دموع مسحتهن خفت تنتبهلي شيرين
خافت عليه وجابتلي عصير
أسفه ناديه اني السبب دوختج بالكلام
لا حبيبتي ما الج علاقه اني تعبت المفروض اتمدد بالسرير راقبي انتي الفرن واني رايحه لغرفتي
بس ماوصلت للغرفة لزمت راسي افتر ..
سلطان عبد الرحيم ... !
ياربي ...
سلطان عبد الرحيم ... !
هذا أسمه اللي بالملازم والاسئلة
... نفسه هوه ... معقولة ... !!!
مستحيل ...
لزمت صدري قلبي احسه ح يطلع من مكانه
عصره بظهري أجتني متت من الألم زحفت زحف للسرير
دك موبايلي بعيد على الشحن ماكدرت أوصل
صرخت من الألم و كوه أتنفس
إجت شيرين تركض أشرتلها على الموبايل كتلها هذا راغب ردي كليله اخذت علاج ونامت
ردت شيرين واخذته منها غلقته
تمددت وبقت شيرين خايفه
ناديه خليني اخذج للمستشفى
مابيه شي انتي كملي الفرن وتعالي يمي خلي باب الغرفه مفتوح
ماشي ناديه هسه بالعجل مااتاخر
بلحظه ..انعاد شريط ذكرياتي ..
لمست شفايفي اللي محد باسهن غيره
لو كلامه وانفاسه وسوالفه ..
سلطاني حبيبي ..
يالله ... 12 سنه ياظالم
حضنت المخده وماحاسه بألم أيدي اللي تجوت وصارت حمره
بس حاسه بألم قلبي اللي تجوه الف جويه برحيل سلطان وفراقه ..
شيرين جابتلي كيك بالماعون وجاي تجتّني وبدت توكلني ناديه خليني اخابر ضيّ ترجع واخذج للمستشفى فدوة قلقتيني
مابيه شي حبيبتي شويه تعبت من وكفت بالمطبخ انتي كملي كلامج
كلامي عن شنو ؟
شبيج عن الدكتور سلطان
هااا .. لاهيج .. مو مهم
انتي ارتاحي هسه ناديه بعدين احجيلج
لا شيرين كملي شنو سالفته هذا متزوج عنده اقارب هنا وبديت آكل وسويت نفسي ممهتمه
ناديه بصراحه البنات جابن معلومات عنه احسن من المخابرات نفسها ..
بقت شيرين تحجيلي واني كل كلمه تنزل على قلبي مثل السيف وتقطع بي
سلطان راجع قبل شهر دا يقدم محاضرات بالتشريح بالجامعه
المحاضرة ساعه مو اكثر باليوم
وبعدها يروح
ومأجر شقه بفندق قريب على الجامعه
وأهله مقيمين بإيران من سنه ال 91 متسفرين ويه التبعيه والمعارضين للحزب وبعد معلومه يريد يبيع أملاك اهله هنا ويحولها فلوس لهناك
وعرفت من شيرين المحاضرة باجر ساعه بالعشرة الصبح ..
بعد هالكلام اللي سمعته انمسحت ذاكرتي من كلشي وبقت بس ذكريات سلطان ...سلطان عشق الصبا والحب الأول ...
بقيت افكر شلون يربي شسوي !
أروح لا ما أروح
شلون لعد ..
لازم أروح والتقي بي واشوفه ...
لازم اروح واشوفه ... لازم ..
...
يتبع ...
