#ﻷني_احببت.tt
》》》البارت17《《《
تعال لخاطر الله وخليني ارتاح*
من زمان ما شافتك عيني*
ولك هم تشتاقلي بالغربه مرات*
لو ناسي الذي بينك وبيني*
لو تدري الدمع ما فارق العين ولا قلبي بغيابك مل ونيني*
مشتاق إني إلك... وداعتك مشتاق إني إلك *
ولك قلبي محتام هاي الأرض ما توسع حنيني *
يا همي وعذابي وحركت الروح *
كضيت ويا الحزن أجمل سنيني *
هم عود إني أشوفك وأكعد وياك ؟*
وك أبوس تراب جدمك من تجيني*
اسؤ ايام حياتي مرت عليه بعد فراق سلطان ..
ضيّ ولدت بالمستشفى ونور اخذ اجازة من الدوام والفرحه كانت ماواسعته وشيرين هم فرحانه بالولد الجديد سماه نور ... زين
ضيّ بقت ببيت اهلها بعد الولاده
واضطريت اروح اساعدها واخذلها مسواك اني ونور وشيرين
بداخلي غصه وماحاسه باي فرحه
رغم ما المفروض افرح لفرحه نور وكوني صرت عمه والطفل زين دبدوب وابيض يجنن
ضمياء كانت نظراتها حزينه وتتهرب مني
حسيت بيها تعرف شي استغليت انشغال نور وشيرين ببيتهم واخذتها لبيتنه بحجه ابدل ملابسي
وصلنه لبيتنه دخلتها كوه ماقبلت
ضمياء احجيلي اي شي عرفتي عن سلطان
ناديه ماكو شئ بدلي بسرعة حتى نرجع
ضمياء اني صديقتج ولاتنسين انتي السبب .. انتي اللي عرفتيني بي ..
شنو !
اني شكو !
اني كتلج عشكي ؟
وبعدين من شوكت انتي عشكتي لسلطان !
ضمياء لاتعاتبيني دا اموت بكل ليله الف موته ...
ارحميني
شفتها تحسرت وكعدت بالصالة
كعدت يمها
انطيني رقم سعد هسه اخابره وافتهم منه
ماشي ناديه اني ح دك الرقم وانتي حاجي يفهمج احسن
حسيت بيها تعرف شي بس متكول
حجيت وياه كتله سعد اني ناديه واريد اعرف وين سلطان
حجالي عنه وياريت ماحجالي
ياريتني بقيت غافله وماعرفت الحقيقه
ضمياء كانت مقهورة عليه وهدأتني
لزمتني الرجفه بعظامي
مااكدر أبجي ولا اصرخ ولا أتحرك من مكاني
ضمياء كالت ناديه إذا رجع نور وشافج هيج شلون
كومي غسلي وجهج وأهدي
لطمت على وجهي
صرخت بضمياء
انتي تدرين ؟
ارتبكت وتلعثمت بالكلام
بقيت الطم واملخ بنفسي
وضمياء لازمه ايديه وكلما تحضنني ادفعها واصرخ
بقيت اهمس سلطاني حبيبي
سلطاني حبيبي ...
واغمى عليه ماادري شصار بيه ماحسيت غير ضمياء ترش مي ببوجهي وتكلي عزة العزاج ناديه كومي لاتسوين هيج
ودتني لغرفتي وراحت خابرت اهلها كالت الهم احنا باقين هنا للعصر ونجي
رجعت جابتلي مي
بعدني ارجف
لزمت ايدها .. ضمياء كليلي فدوة ميت
لو عدل ؟
اذا ميت وديني لقبره اتمرغل بترابه وأودعه
واذا عدل اروح ادور عليه !
ولج ناديه الحكومه سفرتهم وين تتدورين عليه لاتصيرين مجنونه وتتدمرين حياتج وحياة اهلج وانوب انتوا هم تتسفرون
انسيه وعيشي حياتج
ولج ضمياء مااكدر رجعت املخ بنفسي واصرخ
ضمياء خلت مخده على وجهي ولج اسكتي ناديه فضحتينه
خنكت نفسي بالمخده وصرخت وصرخت وصرخت لحد ما بعد مااكدر اتنفس
ضمياء بقت تبجي وحضنتني
ناديه شوفيني كدامج لعبت لعب ويه سعد
لمجرد ما عرفته يخونني عفته وماشتري بفلس هسه وبس اتعرف على غيرة لو تجيني قسمه زواج اعيش حياتي
ضمياء ياريته خانني
ياريت كشفت خيانته ولا مصيره المجهول هذا
شلون تسفر ؟
واهله ؟
ناديه سمعت والده وعمه انقتلوا واهله كلم تسفروا لايران بحجه انهم حزب معارض
سلطان عمره 16 سنه لو كان بالغ كان هم انقتل
سديت حلكها .. اششش ... لاتكوليها ..
اسكتي ... كافي ماريد اسمع ولا اعرف اي شي روحي ..
روحي رجعي كليلهم ناديه تعبانه ونامت
ناديه مااعوفج انتي بحاله هستريه لا تروحين تنتحرين لو تسوين شي بنفسج
لاتخافين عليه ..
مااسوي شي
تلفلفت بشرشف وحضنت المخده وغمضت عيوني اريد ارتاح
راسي ح ينفجر ..
ماريد افكر باي شي ..
ماادري شصار بعدين من التشويش اللي ببالي ..
مرت الايام ..
نور مشغول بطفله وبضيّ
بس شيرين خطيه حست بيه شي
مااكدر اكوم من السرير
صخنت وبطني توجعني جوعانه وماكلت شي
لليل رجع نور شافني كومني جسمي راخي مابيه اتحرك مااكدر
شالني وصعدني بتكسي وشيرين بقت تبجي كلها روحي لبيت اهل ضيّ لاتطلعين الا نرجع
دخلوني بالطوارئ ومااعرف شصار ماحاسه بأي شيء
بس اشوف الدنيا بيضه
واصوات هوايه ممفهومه
بقيت كم يوم بالمستشفى على أساس عندي حصوة بالكلى ومرض تيفوئيد
صار بيه لان حرارتي كلش مرتفعه مانزلت حتى بالابر
شدولي مغذي وكانونه وعلاج وتحاليل وناظور
...
طلعت من المستشفى بقيت بسريري متحركت بس دموعي تجري
شيرين كاسرة خاطري وماعندي احد غيرها ولا تسوة ادمر نفسي وصحتي علمود حب مصيره مجهول ...
احاول اكون قويه علمودها وبس ...
يتبع....
