#ﻷني_احببت.tt
》》》البارت25《《《
شكد صعب إحساس الخيانه ..
يمكن الموت اهون وأرحم ..
تذكرت ضمياء من خانها سعد كالتلي ناديه لو ميت ولا خاينني ..
بعد الصدمه اللي مااعرف شكد رقمها من الصدمات اللي تعرضت الها بحياتي البائسه بقيت معتكفه بغرفتي مااريد اشوف أحد ولا اتكلم بالموضوع
محد عرف شنو سبب عزلتي وزعلي من راغب
أكثر من مرة إجه للبيت ورفضت اشوفه
حتى زين توسللي اطلع وأتغده لو اتعشه وياهم لأن عمو راغب موجود ويريد يشوفني رفضت وماتنازلت
اصلا ماريد أعاين ببوجهه ولا اريد أسمع اعتذاره بعد اللي شفته بعيني
شيرين كانت تجيبلي اكل للغرفة وهيه الوحيدة اللي عرفت بالسالفه
وحست بيه
نور طلب مني توضيح رفضت كتله سوء تفاهم وبس احصل فرصه الغي الخطوبه ماريده ..
مارست حياتي بشكل طبيعي رحت المشغل وعندي مراجعه للطبيب اروح بتكسي وارجع ماالتقيت براغب هالفتره ومن يجي للبيت ارفض أشوفه نهائيا ..
بعد اسبوع كعدت متأخرة وطلعت من غرفتي شيرين بالدوام اشتميت ريحه طيبه ضيّ دا تطبخ كتلها شنو هذا ضي دجاج ومحاشي
ناديه اليوم راغب معزوم عدنه ويه ابو وامه
كملي وتعالي ساعديني فدوة
شنو !!
وجهالج وين !
برة دايلعبهم راغب طوبه بالحديقه
ضيّ اني داخله للحمام وبعدها طالعه افتهمتي !
لحكتني ولج ناديه حرام عليج خبلتينه كلنا .. نصت صوتها .. الولد شاريج وميت عليج بعد شتريدين يعني ؟
ضيّ روحي للاكل لا يحترك
عفتها ورحت سبحت وبدلت ومكياج وعطر مااعرف يمكن اريد أبين له اني ممهتمه اله ومتهمني خيانته ..
طلعت برة شافني لحكني وصاحني
نااااديه ...
فتحت الباب وطلعت لزم ايدي ناديه لحظه جريت أيدي
نعم .. شعدك !
بروح ابوج انطيني فرصه
دخلي البيت نتفاهم عيب منا ناس
لابالله !!
وانته والعيب شنو ؟
شتعرف عن العيب !
دخيلج ناديه والله دا تعذبيني هيج
عفته ورحت بقه ملاحكني
راغب روح لاتلحكني
درت وجهي دا اكولك روح ارجع
اسمعيني ناديه عندي كلام بس خليني اكوله وبعدها سوي اللي يعجبج ممكن ترجعين وياي ..
ارجوج ...
اففف ..
رجعت دخلت للبيت زين وياسمين يهوسون هييي رجع عمو راغب
دخلنه للصاله بعدنه واكفين
ضيّ بقت تعاين علينه من المطبخ
كتله تفضل شعدك
ناديه صارلنه أكثر من 3 سنوات مخطوبين واني حبيتج وتمنيت تكونين زوجتي وام لاطفالي
يمكن قصرت وياج بفلوس وذهب ومطاعم وسفرات واعترف
كنتي قنوعه ومامتبطرة نهائيا
بس أني رجال .. دا تفهمين شنو يعني أني رجال ؟
صرخ ببوجهي ننززني
شنو اللي يريده الرجال من خطيبته وزوجته بالمستقبل كولي ؟
عفته ودخلت للغرفه جبت الحلقه لان كنت نازعتها من اصبعي فتحت كفه وحطيتها بي
اعتذر منك ياحضره الرجال اني مافيدك
غمض عيونه وصم ايده
تركته ورحت بس تألمت ..
حسيت بغصه ورغبه اصرخ ..
طلعت بسرعه أجرت تكسي مااعرف وين اريد اروح كتله لأي مكان بس حرك فتحت الجامه واتنفست بقوه
محتاجه هوة نظيف
بس .. بس يادنيا خلصيني كافي ...
تعده ابو التكسي على مكان منتجع قريب الجبل تذكرت سلطان كان يجيبني لهنا الله ...شكد حلوة ايامك يسلطان حبيبي وشكد شفت ضيم بعدك
كتله لابو التكسي نزلني هنا حاسبته ونزلت
الله ... حلو المكان والهوه بارد ومنعش بقيت ساعات ذكريات تنعاد ببالي تحسسني بشوق وحرقه بصدري ..
تمنيت ابقى بعد
بس جعت وبردت واني طالعه من الصبح بلا آكل
رحت اشتريت لفه وعصير وبقيت للغروب حبيت اشوف المنظر من الجبال شلون ح يكون صدك حلو تمنيت عندي كاميرا واصور المنظر
بعدها رجعت لكيت البيت هوسه صاير وشيرين تبجي ركضت حضنتني وتبوس بيه
نور زمخ بيه وين كنتي !
راغب كان موجود بس شافني استأذن وراح طلع
وزين وياسمين مبين عليهم باجيين خطيه
كتلهم ... آسفه .. عن أذنكم اريد ارتاح
دخلت لغرفتي ولحكتني شيرين
ناديه ليش هيج تسوين هبطتينه كلنه تخبلنه عليج
أسفه حبيبتي كنت محتاجه ابقى وحدي
نور دخل يصرخ عليه
اسمعي ناديه كتلج من البداية اذا متريدين راغب عوفي ولاتخلين الولد معلك بلا زواج ومنا ورايح اشتريلج موبايل خاص وين ماترحين تخلين عدنه خبر بمكانج افتهمتي ؟
هزيت برأسي أي ومارديت حسيت بيهم صدك خافوا عليه لان تأخرت وحقهم من يحاسبوني وإني غلطت بتأخيري
تمددت شيرين نزعتني الحذاء وساعدتني بتبديل ملابسي وأجت حضنتني
دخلت ضيّ
ناديه تدرين شصار وراج !
ماريد اعرف ضيّ اسكتي فدوه خليني ارتاح
شيرين كالت ناديه اني اكره كل الزلم كل رجال قذر وميستحق الارتباط
ابتسمت لا شيرين لاتكوّنين هالفكره يمكن حضج احسن من حضي وتلكين الرجال المناسب
اذا رجال صدك اريده يصير مثل نور الدين شوفي شلون يعشق ضيّ ومدللها
ضيّ كالت ... لا عيني نور الدين رجال من صدك لأن أني ممقصره وياه وممخليته محتاج يعاين على غيري
كمت من مكاني شنو تقصدين ضيّ ؟
هزت بيدها واشرت عليه
دشوفي حالج مريضه وعايشه على الدكاتره والأدوية موزين من رجال مثل راغب ملزم بيج وباقي عليج ؟
شيرين كامت وصاحت بيها ضيّ شنو هالكلام عيب عليج
سدت الباب وراحت
وكأنما صفعتني صفعه نبهتّني وصحتّني من غفله ..
صدك اني قضيت فترة خطوبتي كلها من راغب بعيده وتعبانه وانشغلت عنه بمرضي وبمراجعه الدكاترة
بقيت قلقه مكدرت أنام ..
شيرين بقت تخفف عني وتواسيني ..اصلا شيرين الوحيدة اللي اعتبرها مصدر سعادة وحب بحياتي ..
ومرت الأيام ..
امتحنت شيرين وطلعت معدل عالي وفرحت بيها فرحه العمر سجلت على كليه الطب بالسليمانيه واني بقيت على حالي نسبة التلف عندي عاليه وحده من كلاتي لازم استئصال والثانيه تعبانه
رغم تقدم الطب ودخلت اجهزة وعلاج بالليزر بس كان غالي والعلاج اللي دا أخذه مجرد مسكنات ومهدئات
نور آخذ اجازة وعلى اساس يأخذني لمدينة الطب ببغداد بلكي هناك احصل نتيجه ..
جاب لكل وحده مننا جهاز موبايل جديد وشريحه وكارت رصيد علمننه عليه وشلون ندخل الرصيد والارقام كلش حلو وفد شئ جديد بقينه طول الليل اني وشيرين نلعب لعبه الحيه اللي تاكل وتتطول نتسابق منو تخسر قبل تاكل ضربه زينه بالمخده
شكد حلوه الحياة وبسيطه ياريت لو تكمل بصحتي وعافيتي مااعرف بأي وقت تتوقف الكلى عن العمل وافارق حياتي
...
ثاني يوم اتفقنه اني ونور الصبح نطلع لبغداد
يتبع
