#ﻷني_احببت.tt
》》》البارت30《《《
هلت دموع العين عند الوداع*
وبللت بدموعها شوق وحنين"
يا حسافه وقتنا والعمر ضاع*
نجتمع يومين والفرقا سنين"
***
بعد يومين على لقاءي بسلطان تغير كلشي بحياتي
تعبت نفسيا وجسديا
قضيتها سهر وحسرات وألم وببالي أواجه الكل بس ....
آه ... ماعندي الجرأة الكافيه ولا عندي قابليه على الخساره
راغب المسكين صار له ثلاث سنوات منتظرني ...
زاد المرض عليه وفقدت شهيتي للأكل ودائما سارحه بخيالي واتعامل ويه الكل ببرود
مااكدر احجي ولا اكدر اعترف بعلاقتي بسلطان
راغب صار يتضايق مني ويتذمر من اهمالي اله
كل مرة يخابرني لو يشوفني يكللي أني راح أسافر لتركيا ويه الشركه واعوفج
لان يأس مني وزواج ماكو
سلطان صار دازلي أكثر من ثلاثين رساله مسج بالموبايل كل رساله اقراها دموعي تصب وقلبي ينعصر الف عصره من الألم
كلي برسايله ..
"خليني اساعدج وافحصج من جديد
"جيبيلي اوراقج وفحوصاتج اراجعها ..
ومره كلي سوي جواز سفر وخليني اعالجج بإيران لاتبقين على علاجج هذا ميفيد
لو رساله يعاتبني بيها على سنينه اللي ضحى بيها بالغربه وهو بدون زواج وباعتقاده اني تزوجت وعفته ومايدري باللي صار بعده والعذاب اللي عشته بفراقه
... رساله ورة رساله مارديت
مااعرف شرد عليه
آخر شئ كلي ردي بأي كلمه حتى اعرف انتي دا تقرين رسائلي !
رديت ودموعي تصب بكلمتين "احبك سلطان"
يمكن دمرته وعذبته أكثر بهالرساله
بس هو هذا اللي دا أحس بي حبي لسلطان وبس ..
شيرين وضيّ كل مرة يسألنيّ عن سبب اهمالي لراغب وتأجيل الزواج
وحتى نورالدين
كتلهم أني دا اموت ماريده يرتبط بوحده مصيرها تموت
اليوم الثالث انتظرت الكل يطلع للدوام وركضت لضيّ
جريتها من ثوبها تفاجأت
احجي ضيّ زين إبن نور ولا إبن حبيبج دريد ؟
شنوو !!
دفعتني وارتبكت
شدا تكولين ناديه !
بعد كل هالسنين شذكرج !
كنت لازمه خاصرتي واحس بألم يقطع بظهري
اخذت نفس قوي
ضيّ كلشي ماريد منج بس الحقيقه
واوعدج أسد ّ الموضوع نهائيا
اقتربت مني وصارت عصبيه
اسمعي ناديه من يرجع زين من المدرسه ناخذه اني وياج وننروح نسوي تحليل الحمض النووي وتتاكدين انه إبن نور الدين
ويكون بعلمج دريد فد واحد نذل كان يتسلى وياي واستغلني ومن إجه لهنا آخر مرة وصادفتي أنتي بالباب كنت طاردته وبعد الهوسه اللي سويتيها ماشفته ولا التقيت بي وظليت طول هالسنين مخلصه لنور زوجي وابو زين وياسمين
ارتاحيتي هسه !!
صرخت من ألم ظهري وكعدت بالكاع ابجي وأوننّ
ركضت ضيّ لزمتني
أمشي ناديه اخذج لغرفتج ترتاحين وتاخذين العلاج
لزمت ايدها وكوه حجيت
سامحيني ضيّ انا أسفه ..
يمكن تستغربين ليش سألتج هسة بعد كل هالسنين
ضحكت بسخريه من نفسي واعترفت الها بمختصر عن سلطان ماكلت كلشي بس حسيت بالعبء خف عليه تعبت وأني سنين ضامه هالاسرار ..
يمكن كلت ح تفهمني هيه أكثر من غيرها لان خانت نور ومرت بتجربه حب بس أني اختلف عنها
اني ماخنت راغب وتجربتي ويه سلطان تجربه طاهره وشريفه وصادقه لهذا رب العالمين رجع جمع بيننا بعد أكثر من 12 سنه
بقت ضيّ تبجي وأنصدمت من كلامي وتأثرت لدرجه حضنتني وحسيت بيها حنّت عليه وتأثرت
.. أحتاجيت لحضنها وطلبت منها تساعدني وتتدبرلي حلّ
سوتلي شوربه وكلتني وبلعت الادويه ونمت للعصر لكيت رساله من سلطان أني راجع لإيران اتمنى تتصلين بيه لهناك وتخليني أتابع حالتج الصحيه
وكاتبلي رقم جديد حفظته بالجهاز
لفيت جسمي بمشمر صوف وطلعت بالحديقه دكيت رقم سلطان
رد وصوته مخنوك كلش
سلطان اتمنى أشوفك قبل ...
أني هم اريد اشوفج بس ..
بس شنو ؟
ماريد اسويلج مشاكل
تحسر ... صحتج شلونها ؟
سلطان لاتروح فدوه
ناديه مو أني اللي آخذ مرة من حضن زوجها ..
خليني بس اساعدج باللي اكدرله واتابع صحتج ..
سلطان ...اني ..
سمعت صوت نور قريب مني .. سديت الإتصال
تمنيت اشوفه قبل ... يمكن قبل مااموت ..
وتمنيت اكوله اني ممتزوجه ومااكدر ارتبط بغيره ..
**
بغيابك حبيبي إشلون أصبّر الرّوح *
يا حال إليظل على حالي من تروح* جرحك بالكلب داويته بس ما طاب* وبطاري السّفر زيدت قلبي إجروح*
ما أنساك لو سافرت عشر إسنين* وشوكت ما تردّ باب القلب مفتوح *
كلتلّك هذا ما مسموح النّفس أنت الأشمّه ولو تروح شلون شلون تريد أعيش إنّي بلياك جسد بلا روح /*
....
طلبت من نور يأخذني للدكتور دا أحس بألم وممرتاحه غيرت ملابسي أخذني للعياده
سويت سونار وتحاليل جديدة
الدكتور كال هاي الكلى التالفه لازم نستأصلها اذا بقت يومين تسوي تسمم بالجسم
حولني للطوارئ وسجلي على عمليه مستعجله وتحضرت على أساس أسوي العمليه وكنت خايفه ...خايفه أموت ومتنجح العمليه وأخسر اللي حبيتهم وافارقهم للأبد ...
...
يتبع ..
