#ﻷني_احببت.tt
》》》البارت29《《《
انا اشتاگيت الك واهتزّت الــــــروح*
وينك يا ضوه عيــــــــوني وحبيبي "
الصخر حن وسمعني وگالّي شبيك*
عجيبه شلون ماتسمع نحيبــــي "
احس نار اني بيه وتاكل الــــــــروح*
وبس حــــــضـــنك يطفّيلي لهيبي"
الف دكتور جابــــــــــــــوا ماتداويت*
لان قفلتهه وبس انتـــــــه طـبـيـبـي "
***
لقاءنه كان جدا ساخن ..
الرجفه بعدهي بجسمي والكلام أختفى وحبيت لهفته ولمساته
انفاسه الحاره
ماباسني بس بقه يلمس بخدودي وبشعري ويشمني وعيونه تدمع
لفيت أيديّه على ركبته بقوه وبقيت أشمه ..
تمنيته يبوسني ..
ماادري ليش أمتنع ..
يمكن لأن توقع أني مرتبطه لو بباله فد شي ثاني
بعدها كتله بهمس سلطان أريد مي
كعدني على الكرسي وكلي لحظه هسة
راح جابلي بطل مي فتحته وشربته كله وبعدني أرجف
كعد يمي وبس يعاين ببوجهي شاف أيدي
شبيها ايدج ناديه !
ماكو شئ البارحه أنجويت بالفرن
يالله ... صدك تحجين !
كام جاب شاش وقطن سحبها خلاها بحضنه وبده يعقم بيها وينظف الحرق
وأني مليّت عيني منه وماحاسه بالألم بالعكس مرتاحه بشكل مينوصف
كلي ..تأخرتي يالا جيتي
ناديه ... تدرين من أول يوم دخلت للجامعة نشرت أشاعه عن أسمي الكامل ومعلومات كلت ح توصلج بسرعه وأشتريت رقم جديد وخليته بالعماده ووصيتهم ينطوا لأي واحد يسأل عني
شمدريك ح توصل الأخبار اللي ؟
ناديه اكيد توصلج عن طريق شيرين
شلون عرفت شيرين ؟
ضحك وكام رجع الغراض وغسل ايديه ونشفهم ورجع كعد يمي خله رأسي بحضنه ياويلي دكم القميص مفتوحه وصدره يجنن دافي وبي عطر مميز
بقيت أمسح بخدي بصدره وكعت جنطتي من حضني مهتميت تعلقت بياخه قميصه وهو دا يكمل كلامه
..
ناديه رجعت للعراق قبل شهرين على أساس أصفي أملاكنه
بعت بيتنه وبعدها ظليت أدور عليج
كل يوم اوكف بمكاننه القديم راس الشارع تمنيت اشوفج ماطلعتي من البيت خفت اسأل عنج
صدفه شفت شيرين نزلت من سيارة الجامعه راقبتها عرفت بيها بكليه الطب أستغليت الفرصه قدمت أوراقي بما أنني طبيب جراحه وباطنيه واخذت محاضرات هناك على أمل اوصلج عن طريق شيرين
سلطان شلون عرفت هي هاي شيرين اختي !
ناديه تشبهج وأني شايفها من كانت صغيرة
معقولة شيرين تشبهني !
تشبهج بس صوتها مو صوت أبو ندى وضحك ..
وخرت راسي من حضنه الدافي
أبتسمت .. على فكره انته هم صاير صوتك صوت ابو ندى
لزم ايديه اثنينهم
ناديه حبيبتي اني بعد كم يوم راجع تعالي وياي .. انتي بعدج تحبيبني مو ناديه !
سلطان مستحيل ..مااكدر ..
ليش ..!
هواي احداث صارت وراك
لاتكليلي تزوجتي !
لو كنت متزوجه وعندي اطفال جان شسويت !
شفته انخطف لونه وكام كعد بعيد عني
تحسر ..
ناديه انتي متزوجه ؟
اول جاوبني سلطان ..
ماادري ناديه
حسب رغبتج انتي تريدني !
اذا متريديني وداعتج ارجع وبعد متشوفيني
بديت اتنفس بصعوبة غمضت عيوني
اجتني عصره قويه بظهري لزمت خاصرتي
ناديه شبيج !
شنو يوجعج ؟
ناااديه !
سسسلطان جيبلي بعد مي فتحت جنطتي طلعت الدوه
جابلي مي وصرخ من شاف الكبسول بيدي شنو هذا !!
اخذه مني وقراه
ناديه شنو هذا طلع كل الدوه اللي بجنطتي حتى موبايلي ومكياجي تتطشرن بالكاع
سلطان فدوة خليني اخذ العلاج وبعدين افهمك
ناديه هذا علاج فشل كلوي !
شنو بيج فهميني ؟
صرخت ااااي
شالني مددني على السرير ونزعني السترة والبوت والجواريب وغطاني ببطانيه
وراح جاب أبره يمكن مااعرف شنو
لزمت طرف السرير حديد وصرخت من الألم ح موت سلطان انطيني العلاج
رخي ايدج لاتخافين
شد ايدي بحبل بلاستك وضربني ابره بالوريد
سلطان شنو هاي !
شدا تسوي !
لاتخافين بس أسترخي لو نسيتي اني طبيب
ثواني وحسيت بفرق ارتخيت ونعست
رجع غطاني لزمت ايده اشرتله تعال احضنني تمدد يمي وباسني براسي
شنو هاي ناديه رجعت اخذج وياي الكاج مسكربه !
وداعتك فجرني أنتحاري اسمه سلطان عبد الرحيم
حضنني حيل وبقه يضحك
آآه ..
وتاليها ويه هالحب ولج سنين معذبتني
تتدنيت يمه وهمست خليني على صدرك حبيبي ماادري غفيت شويه
كعدت على صوت موبايلي يدك
انتجيت وسلطان كاعد بعيد عني ويفرك بيديه وضايج اشرتله انطيني الموبايل
عدلت نفسي
سألته ببيش الساعة شكثر نمت ؟
كلي ردي ناديه صارله ساعه يدك الموبايل اكيد قلقين عليج
لكيت مكالمات شيرين وراغب وضيّ
اتصلت بشيرين طمنتها
كتلها لاتقلقين حبيبتي شويه واجي عندي شغل من ارجع افهمج وطمنني ضيّ
سلطان عيونه بيها حزن وخوف
رجعت اتصلت براغب
صرخ ببوجهي ليش متردين !
على كيفك شبيك عندي شغل والموبايل صامت
بقه يعاتبني
شبيك ياعيني أهده بليل نتفاهم ماشي !
سلطان يتحسر حسرات مو طبيعيه حسرة وره حسرة
كتله ولو ضوجتك اليوم بالمي بس ممكن تجيبلي بعد واشكرك على المسكن نفعتني الابره ارتاحيت
كمت اخذت السترة وجنطتي ولبست الجواريب والبوت اخذت المي منه شربت بعده ساكت
شكرا سلطان اني رايحه
لحظه ..
ناديه خليني اوصلج
لا سلطان ماكو داعي استأجر تكسي وحدي دا اطلع
لزم ايدي ... ناديه ..
راغب زوجج ؟؟
أبتسمت وحضنته بكل قوتي
ياربي ليش هيج أكو حواجز بين العشاق
اقتربت من شفايفه رجع لورة ماباسني دفعني وفشلني ... كلي روحي ناديه
دار وجهه
طلعت من غرفته كوه أمشي
يمكن بدون قلب ..
لا مو يمكن وإنما أكيد تركت قلبي كله هالمره عنده
الجو صار بارد كلش ومغيم يمكن ح تمطر صعدت بالتكسي ورجعت للبيت
وصيت شيرين وضيّ يسوون عشه خاص راغب ح يجي يتعشه ونور كان بالدوام
كنت مقرره اكللهم على سلطان بس كنت كلش خايفه
زين فرح وظل يهووس يحبه لراغب
دخلت للحمام ونزعت ملابسي مليت البانيو مي دافي وغطست بي استرخيت يالله ...
لو نجتمع أني وسلطان هنا ..
شيصير !!
غمضت عيوني وبقيت أتذكر كل لحضه صارت اليوم وكل همسه ولمسه وكل كلمه من سلطاني حبيبي ...
عشق صباي وريحة الحب الأول
يتبع....
