#ﻷني_احببت.tt
》》》البارت10《《《
بقيت تحت رحمة الملعونه ضيّ
تتحكم بيه وتهددني وقت مايعجبها
بعد ماسيطرت تماما على نور الدين وسمّمت افكاره وعاملني بقسوة وضربني لأجلها وماسمع مني ولا انطاني فرصه ادافع عن نفسي واشرحله اللي صار بالضبط ..
ضيّ شرطت عليه اوافق على زواج واحد جايبته هيه مااعرفه منو !
واترك الدراسه
وقنعّت نور الدين بذولي الناس الغربه جايين على أساس يخطبوني بخلال كم يوم ..
جابتلي ملابس مستعمله منها ومكياج وسشورت شعري وخلتلي مكياج وبدت تهتم بيه ونور يتسوك أحسن مسواك وفواكه
واني أطبخ ومرات هيه تساعدني
مرن يومين على آخر مرة شفت سلطان بالشارع وعدته اخابر واحجيله اللي صار بس مكدرت
قلبي مليان ألم وشوق ومشتاقتله كلش
بس مجبورة اتحمل الوضع وابتعد عنه ..
بقيت محتاره باختي شيرين
شلون ح يكون مصيرها
وشلون اعوفها واروح من بيت بابا وعند منو !
العام الدراسي الجديد باقيله ايام ويبدي وعلى اساس اداوم باعداديه مرحله رابعه حتى انشغلت وماسجلت بالمدرسة الجديدة
بليل تعشينه ونور فرحان وكل شويه يحضن ضيّ ويبوسها كدامنه ولايخجل
شيرين متدري بالدنيا ولا بمصيري شنو واني هم ماحجيتلها بعدها صغيره وماريد احملها المسؤولية اللي حملتها أني من كنت بعمرها
عمري 8 سنوات من ماتت ماما وحملت ضيم وقهر وسهر ..
كملنه عشه نور طلب من ضيّ تغسل المواعين وتسويله جاي
استغربت وكلتله من عيوني حبيبي تأمرني أمر باسته وخزرتني وكامت للمطبخ
كننا كاعدين بالصالة على التلفزيون شيرين غفت على القنفه شالها نور للغرفه لحكته سد باب الغرفه وجرني من ايدي
حضنني وبقه يمسد بشعري بجيت وحسيت براحه وبرغبه اصرخ
كلي اششش
باسني برأسي
سامحيني ناديه لأن كنت عصبي و ..
لا نور انته سامحني اني أسفه
ابتسم ... اني اعرف اختي ناديه شجاعه وقويه وراح ترفع رأسي كدام الناس الغربه واذا حسيتي بيهم لمجرد احساس ميفيدوج وميناسبوج كولي
كنت مدنكه رفع رأسي
ابقي رافعه راسج للأبد عرفتي ؟
لاتدنكين واللي يذلج اكص رأسه
مسحت دموعي ماشي حبيبي هزيت برأسي وحسيت بأمان فقدته من زمان ..
كتله بس عندي طلب منك واحد واذا متنفذه مراح اوافق على الزواج
استغرب ..
شنو طلبج ناديه !
بلعت ريكي وكتله
نور .... ارجوك .... شيرين امانه عندك ماريد مصيرها مثل مصيري يصير
اريدها تكمل دراستها وتعيش الحياه اللي ماعشتها اني وانت لاتقصر بمصاريفها
رجع حضنني وضحك خوفتيني ناديه
هو هم طلب هذا انتي توصيني بشيرين
اي نور أوصيك بشيرين مسح دموعي
ماشي اوعدج اهتم بيها أكثر وعندي مفاجأة الكم انتي وياها باجر نتعشى بالمنتجع يم الشلال وننروح لمدينة الألعاب شنو رايج !
هزيت برأسي وتضاهرت بالفرحه اللي مالها طعم وماعاد الها مكان بداخلي
بس فتح الباب طلعت ضيّ ببوجهه
الظاهر تتصنت ابتسمت وكالت حبيبي تأخرت الجاي ح يبرد وجرته وبعدهي تخنزر عليه وراحت ..
كعدت على السرير انهد حيلي شوقي لسلطان يزداد وخوفي من مصيري الجاي
مااعرف شضامتلي الدنيا
وخايفه من هذا اللي اختارته ضيّ وتريد تخلص مني حتى يخلالها البيت وتأخذ راحتها وحدهه !
الليل كله اتكلب مكدرت انام
طلعت للصاله كلت اخابر على سلطان اكيد متخبل عليه هاي اذا ماطلع يوكفلي كل يوم ينتظرني برأس الشارع
تسللت ببطء الساعه بال 12 دكيت الرقم رد سلطان وصوته مبحوح
حجيت بهمس
سلطان !
رد بحسره .... اااه منج .. حرام عليج دمرتي لسلطان
أسفه ..
شنو فايدته للأسف مايفيدني اذا توعدين وتخلفين
سلطان حباب صدكني مااكدر لا اشوفك ولا اخابرك بعد ضروفي كلش صعبه
ناديه قبل يومين من تلاكينه وعدتيني تخابريني وتفهميني شنو سالفتج
اني احبج وتعلقت بيج وماريدج تعوفيني افتهمتي مو بكيفج تعوفيني الا اذا ...
الا اذا شنو ؟ سلطان لخاطر الله مافيدك شوف غيري و ..
ناديه حرام عليج هيه لعب السالفه هذا حب تعرفين يعني شنو حب ؟
اسمع سلطان راح اسده للخط مااكدر احجي بعد
خاف يحسون بيه
ناديه لحظه لاتروحين ..
يربي قلبي يوجعني من كلامك سلطان ارحمني
ناديه كولي احبك خليني اسمعها منج واصبر على فراقج
ظل يتحسر ويتوسل بيه
فطر قلبي
بجيت ... كتله سلطان حبيبي احبك وسديت السماعة ورحت فصلت الواير خفت يرجع يدك ويحسّون
رحت لسريري تلفلفت وبجيت
بندت من البجي وبقيت الوم بنفسي لأن حبيته وورطته وياي
اذيته وراح اعوفه غصب
الألم اللي أحسه بداخلي موتني ..
الصبح كعدت عيوني مورمه من البجي غسلت وجهي وكالعاده التهيت بشغل البيت والغده للعصر نور طلب مني اتحضر على موعدنا اللي وعدني بي البارحه
ضيّ خلتلي كحل ومكياج خفيف ورتبت شعري وكل شويه تكلي ديري بالج لاتعاينين منا منا صيري مؤدبه ومطيعه حتى ترفعين راسنه كدام الخطابه
بداخلي اتمنى اصرخ وافضحها هيه واختها ضمياء اللي ورطتني وعرفتني على سلطان وخلتني اعشقه لو سوالفها المكسرة ويه سعد
تحملت تعليماتها وسكتت غصب ..
يتبع...
