لأني احببت

11

#ﻷني_احببت.tt
》》》البارت11《《《
بليل طلعنا كلنه نور ماعنده سيارة اجرنا تكسي ورحنه مطعم سياحي يجنن بابا كان يجيبنه من كننا صغار
نور أشترانه موطه مشكله بالشعريه وبعدها أخذ شيرين يم الشلال بقينا اني وضيّ كل شويه تنطيني تعليمات
وشلون أتصرف من يجون الخطابه وكلام سخيف ومصيرج تتزوجين وتصيرين عروس
أني بالي مو يمها أصلا عيني على المناظر والجو شكد حلو 
كل مكان بي ذكريات من الماضي
تعشينه وورة العشه رحنا لمدينة الألعاب يربي شكد بيها ذكريات حلوة من آخر مرة رحت والتقيت بحبيبي سلطان
وحصرني بدولاب الهوة وخلاني عشقته وتعلقت بي غمضت عيوني
يالله ..
تمنيت أشوفه بعد مرة
نور كان مشغول ويه شيرين وضيّ
واني اتمشى وراهم لمحت من بعيد الولد اللي كان ويه سلطان من صعد ويانه بدولاب الهوة ماادري شصار بيه خفت مااعرف كلت خاف يفضحني لو يجي يحاجيني نور صعّد شيرين بالسيارات المتحركة وصعد ويه ضيّ اني أتسحبت ورحت جهة الولد كان واكف يم محلات العصاير والمثلجات وكفت بصفه وسويت نفسي أريد اشتري سلمت عليه عرفني أبتسم ..
كتله بهمس اني صديقه سلطان
كال اعرف اهلا وسهلا
فدوة اني ويه اهلي هسة ماريد مشاكل
هز برأسه أي بس ..
شنو بس ؟
سلطان هنا .. يعني يدري بيج أنتي هنا ؟
لزمت قلبي ح يوكف
درت وجهي كتله بهمس الله يخليك لاتكله
كلي ماشي
عفته ورجعت لمكاني ركض وأملخ بخدودي يربي شجابه سلطان هنا !
على أساس ماعنده صاحبات وعايش على حبي وحدي ويامن جاي هنا !
وإذا شافني مخليه مكياج ومبدله كنت لابسه ثوب ربع ردن سماءي وبي ورد ملون ومخليه كحل ومكياج خفيف وشعري حالته ومنزله كذله يعني مغيره بشكلي وصايره مختلفه عن آخر مرة شافني ....
بقيت أرجف من راسي لرجليه
رجعت لكيتهم بعدهم نور اشرلي اصعد
ابتسمت وكتله لا ماريد
تظاهرت بالتعب والنعاس حتى نرجع
خفت كلش لايشوفني سلطان
شيرين كالت ماا اريد أصعد كل الالعاب وتتوسل بنور ضيّ كالت اني اروح للمغاسل كتلهم راح انتظرتكم بالحديقه
رحت وقلبي ينبض يمكن الف نبضه بالثانيه كعدت بكراسي اكو رفعت راسي شفت سلطان من بعيد !
يربي دنكت وسويت نفسي دا أعدل حذاءي
اجت ضيّ تنافت كالت تعبت بعد ما اكدر خلي نور يرجعنه وينه
هاا ... ماادري
هاي شبيج لونج مخطوف !
ماادري معدتي توجعني
هاا يالا لعد اروح اصيحه لنور
عافتني وراحت كمت وراهه اعتقد سلطان شافني !
مشيت سريع وصلت يمها أمشي
بقه يراقبني من بعيد
كلت هالمجنون اكيد ح يجي ويسوي كارثه
نور وشيرين أجوي وطلعنه سوة وحاولت مااباوع جهة سلطان
اجرنا تكسي وصعدنه من سديت باب السياره آمنت ..
يربي دخيلك الحمد والشكر الك ادري بسلطان عاشقني ومجنون وجان سوالي مشكله هسة وفضحني
لزمت صدري وفتحت الجامه
بقيت أتنفس حيل وصورته لسلطان حبيبي ببالي كان لابس قميص ازرك وبنطرون كابوي يجنن يربي شكد مشتاقتله
تجيت وبقيت سارحه وأفكر بي مانتبهت لكلام شيرين وضي ونور اللي كانوا فرحانين ومتونسين وطول الطريق يتناقشون
من وصلنه تعبنه كلش نور كلي شلونها النزهة الليله !
هاا .. حلوة نور حبيبي اشكرك أهم شي شيرين تونست باسني وصعد لغرفته بقيت صاحيه وافكر بسلطان مكدرت انام مثل كل ليله مرت عليه بفراقه
الصبح عرفت من ضيّ الخطابه اليوم العصر يجون وطلبت مني اسبح وابدل واخلي مكياج كنت خايفه
دعيت ربي يصير شئ اللي يغير سالفه الزواج هذا ماريد اتزوج وماريد احد غير سلطان حبيبي
اتمنى هو يجي يخطبني
ياربي .....
...حسرات تحسرت
واحس الدنيا ضاقت عليه
شيرين مكانت فرحانه ابد كل شويه تكلي راح تعوفيني ناديه وتريد تبجي
أتمنى لو بيدي ماعوف بيت بابا وماعوفها لشيرين نهائيا
فكرت اهرب من البيت بس خفت من يكول سلطان يتحملني ويجوز ضيّ تسويلي فضيحه ..
للعصر نور جاب صندوق عصير وكيك وضيّ علمتني بس يكعدون ورة عشر دقايق أروح للمطبخ أجيب العصير وأقدمه
كنت متوترة وخايفه وضيّ تخابر كل شويه وتبسبس وتضحك
نور لبس قاط أسود وطلع يجنن كأنما هو العريس وشيرين بقت بالغرفة ماقبلت تطلع منها اني كملت لبس نفنوف شيفون اصفر قصير جابته ضيّ وطوك اصفر وفتحت شعري واني طويله و جسمي مخصر تغير شكلي وطلعت مختلفه عن قبل شكد تمنيت يشوفني سلطان بهاالبس والاناقه يمكن جان بعد مايسميني ابو ندى
الله شكد مشتاقه لسوالفه وشقاه وزعله لو حضنه وانفاسه ياويلي على حبه وغرامه ...
اندكت الباب نور فتحها واستقبلهم اثنين نسوان ورجال كبير بالعمر وولد شاب شكله مقبول لابس قميص سماءي وبنطرون اسود دخلوا اني بالمطبخ كنت بس شفتهم كلهم وركزت بشكل الولد انتظرت يكعدون واروح اقدم العصير
مكدرت اطلع بقيت بمكاني وادعو ربي يصير اي شي ويطلعون ومااعجبهم
ربع ساعة واجت ضيّ تتدفع بيه
جريت ايدها كتلها ابوس ايدج ماريد اتزوج دبريها الله يوفقج
خزرتني وبقت تعض بشفافها وتكلي سود الله وجهج والله اخلي نور يذبحج اذا ماطلعتي ..
سلمت امري لله واخذت نفس وشلت الصينية وطلعت للصاله ...

يتبع