وانت الذي قد جئت مختلفا

بارت6

#حنين_حاتم
#وانت_الذي_قد_جئت_مختلفا......#بارت6
#غير_محلل_نشر_القصة_بدون_ذكر_اسمي

طبيت لفرعهم اشوف كبالي
قطعة مال حداد مكتوب بيهة اسم ليان واسم ابوهة

لا يا الله ابوهة مات انا لله وإنا اليه راجعون
الله يساعد يزن 
تاريخ الوفاة 30/10/2014
يعني ليوم ثالث
تقربت عليهة قريت عنوان القاعة الي مسوين بيهة الفاتحة
لاوفت سيارتي وتوجهت للعنوان وكلبي معصوور حيل يعني صهيب سواهة ميتة
الله يعين كلبك يزن اختك وابوك مرة وحدة
اكيد ابوهة مات من قهرة عليهة
وصلت للقاعة نزلت وبداخلي رهبة ومستحة من يزن لأن بهيج محنة لمفروض اني اول واحد اكون يمة
اول ماطبيت صار بوجهي صهيب واكف بلباب  يسلم علناس الي تدخل
تقربت يمة مديتلة ايدي وكتلة
البقاء في حياتك الله يجعلهة خاتمة لأحزان
هوة بس يحرك ايدة مانطق ولارد علية بس نضراتة عكستلي انكسار موطبيعي رغم هوة جبل بعنفوانة وجبروتة ومتهزة ريح بس لأنكسار واضح بملامح وجهة
باوعت اكو بصفة واحد كاعد علكرسي ومدنك ركزت بي هاذ يزن
تدنيت علي كعدت بلكاع يم رجلي
اول مااجت عينة علية شمر روحة علية من لكرسي وفرفح
ولك مبين ابوي مات راح سندي وضهري راح بركة البيت راح لجبل الي جنت استند علي لو ردت اوكع

حضنتة ودموعي متزجن وية دموعة بجيت بجي مال سنين دموع ياما خافيهن بسبب كلمة الزلمة عيب يبجي
الي عودنة عليهة ابوي لحد مانملت كلوبنة حصرات بكد مانكابر ونضم بداخلنة
يزن حاضني وجسمة كلة يختض
متت علي ياريت لو بيدي شي اكدر اقدمة الة وامحي هاذ الحزن ولهم من كلبة
ابد مايوم حسيتة صديق طول عمري عادة اخو ويجوز اعز
الوحيد الي حبني من الجوهر مع انو عائلتهم مثقفة وواصلة
بس هوة الوحيد الي ماعيب علية وعلة حجي بأول مرحلة من اجيت من العمارة
ووكتهة صرت حديث الشعبة
او بلأحرى حديث القسم كلة
لوحيد الي ماستهان بية لأن جنت ماعرف البس مثل ولد بغداد
اجة صهيب جاب كرسي حطة بصف كرسي يزن وندسني من جتفي اشرلي علي كلي اكعد
بست يزن من راسة وكعدت علكرسي واني امسح دموعي الي غركن وجهي
صهيب كعد بصفي من لجهة لثانية ومبين وكف وتدنة ليكدام شوية يسلم علناس
صهيب تقرب يمي جان يكلي
مبين ليان ...بعدة مامكمل كتلة
ميتة لتخاف قريت القطعة قبل مااجي
بس ليش هيج سويت صهيب ليش مادبرتلك حجة احسنلك هيج خسرت ابوك

مبين شتحجي انتة ترة ابوي مامات عليهة
لصور وصلن لتلفونة وورة مارحتو انتة وياهة رأسن خابرني يصيح ومفرفح
رحت لكيتة واكع بلمحل ولعمال ملتمين علي اخذتة للمستشفى
طلع عدة جلطة وانسداد بلصمام
ماطول بلمستشفى يوم واحد ولثاني نطاك عمرة
ااااخ ياليان وحق محمد هسة اذا اشوفهة كدامي اكتلهة خلاص ومااتردد لحضة
حياتنة عائلتنة كلهة تدمرت بسببهة

ردت احجيلة سالفة لبوكة لمتهومة بيهة كلت بلكي بمعرفتة يحلهة
بس من شفتة شلون كارهة وحاقد عليهة جريت بوش ونسيت السالفة
ضليت كاعد اقل لساعة وسلمت علة الولد ورجعت للسكن
لطريق كلة افكر بليان وردة فعلهة لو درت بأبوهة ميت ادفع نص عمري وابقة محافض علة هاذ السر ولا اخليهة تدري بي
افضل الموت على انو انقل هيج خبر واشوف ردة فعلهة وهية تتلقة خبر فقدان انسان ممكن يكون بلنسبة الهة الكون كلة
لأن الي يكون بلسجن ويخسر شخص عزيز علي تكتلة لحسرة علي لا حضرت فاتحتة لابجت وفوخت كلبهة
اوووف ياهلبنية شسوت وهيج يصير بيهة
وصلت للسكن
غيرت ملابسي لأن جنت لابس بنطرون ضيك وبدي وذني عد ابوي ممنوع
ركبت سيارتي وتوجهت للعمارة لأن لدنية ضاكت بية حييل ومابية اتاني لباجر اذا ابقة هنا يمكن مايصبح علية لصبح من لتفكير والقهر
لطريق اضلم  وقلة سيارات يمشن بهيج وكت ولجو حلو بارد
اجت ببالي ليان هاي وين تتحمل لسجن وجماعتنة عدهم كل وحدة تدخل سجن يعني موزينة خايف عليهة حييل من لسجن والبي الله اعلم هسة شصاير وياهة
شسوت بروحهة هسة يربي هوة لسجن زلم ماتحملة
ساعة ب11 و40 دقيقة وكفت سيارتي بباب بستانة ونزلت منهة
طبيت للبيت سنطة والكل نايم بس امي بلمطبخ تنكع باكلة حتة ثاني يوم تستوي بساع