#جحيمي_وناري
علي ..عيونهه حمر اباوعلهه ماكو شقه بهذا الموضوع ..ساكته والدموع تصب عشرة عشرة ..
ظليت صافن أريد استوعب كلامهه ..
تذكرت الشامه بإيدهه أتذكرت اللهفه والتفاعل مرة والبرود مرة ثانيه بكل لقاء وبكل مرة انفردت بيهه بجلنار او همس ماعرف ياهيه بيهن اني جنت وياهه بأثناء فترة الخطوبه ..
حته من اتصل يجيني نفس الصوت ولافد طلعتلي همس كوله تطلع جلنار او هيج جنت اظن بس مرة عن مرة يتغير عليه اسلوب الكلام مرة مطيعه وحنينه وحالمه ومرة عنيده ومستفزة ..
شگد نكرت احساسي بأن اكو شي غلط بالموضوع وشگد غالطت نفسي وگلت البنيه مابيهه شي مجرد بعدهي صغيرة ومزاجيه وتتدلل عليه وهالطبع البيهه حتلو اكرههبس اني احبهه وواثق بنفسي حبي الهه راح يكدر يغيرهه لصالحي وللاحسن وياي .
بديت استوعب العبارة ..اني مو جلنار ..اني همس ..
گمت من فوكاهه واني صاير نار غضب ..عيوني صارن براسي ..
نترت بيهه ..گومي ستري نفسج..
كامت كعدت ع حيلهه تلفلفت بالجرجف ..
التفتت عليهه جريتهه من شعرهه بقوة لزمت ايدي تحاول تخفف لزمتي لشعرهه ..
احجي كولشي ..انتي منو ؟
اني همس ..
آني المن شفت بالكليه والمن خطبت ؟
جلنار .. هي طالبه بكليه القانون وهي الي تداوم وياك وانت شفتهه وخطبتهه .
ليييش ..ليش هيج سويتن ؟
صرخت بوجهه وبعدني لازم راسهه من شعرهه .احجي فهميني لييييش ؟؟
اختي جلنار خطبهه ابن
عمي وهي تريده وهو هم رايدهه ومرة اخويه جانت حامل وزعلانه عد اهلهه وابويه رفض لان بنت اخوه تجاوزت ع امي ورفضت تعتذرلهه ..
مافهمت شدخل مرة اخوج بالنص وابوج يرفض ابن اخوه ؟
مو مرة اخويه هي بنت عمي يعني اخته للولد ..
كملي ..
صارت مشاكل وجلنار دگت رجل الا تريد ابن عمي وابويه واخواني دروا وحطوهه وكتلوهه ..
وانت اجيت خطبتهه .. عناد بعمي وابنه وغصبن ما ع خشم جلنار وافقوا بيم حته بدون سؤال بسرعه ردولك الموافقه ..
ورة الخطوبه كالت جلنار متريدك ماطايقتك وقنعتني اطلعلك بكل مرة جنت تجي بيهه لبيتنه تريد تشوف جلنار او تطلع وياهه ولان اني وياهه توأم متماثل طمنتني گالت مراح تلاحظ شي مختلف انت لان ماكو فرق بيناتنه بالشكل ..
قنعتج ؟!!!
هزت راسهه اي ..
كفختهه ع راسهه بالخاولي جان قريب يمي وتفلت بوجهه ..
باوعتلهه باستهزاء ..
شكد غبيه انتي ..
كامت تبجي بحرگه ..ومن بين بجيهه تحجي ..
اني مو غبيه بس حبيتك ..
صفنت بوجهه ..
اي لتباوعلي هيج حبيتك ..
انتن لعبتن عليه ..
ولأن حبيتك كملت هاللعبه ويه اختي ..ماكدرت اگولك ..شكد حاولت بس ماكدرت ..تأنيب الضمير نهشني نهش اذاني ..
وشخلاج تحجين هسه ؟شنو فجأة صحى ضميرج ؟
لا ..الحرام ..صحاني ..من بديت تتقربلي ماكدرت اخليك تكمل ..
استهزأت بيهه مامصدك ولا كلمه من الي گالته بخصوص صحوة ضميرهه ..
هه !!
صرت نار كبرا ..من عقلي شوي شوي بدة يستوعب ..رجال شكدني شكبرني محامي ولازم قضايا وزلم مشوربه تحسبلي الف حساب وصرت اعرف البشر المقابيلي من نظرة عيونهم من رجفة شفافهم يحجي الصدوك لو يكذب ..برئ لو مذنب .. وع اخر وكت تجي زعطوطه هي واختهه لاكامن ولاكعدن ذاك اليوم صارن يضحكن عليه ..
نااار متطفه بضربهه رغم هي تحجي وتبجي وتجاوب ع اسئلتي بدون لف ودوران بس ملخت شعرهه بيدي ..
شياطين تتطافر كدامي ..افكار ابليس ميعرفلهه درب تدور بعقلي ..
يجي ببالي اغتصبهه هسه والعب بشرفهه واروح اذبهه ع اهلهه واگول مو بنيه وما اكتفي بهيج وبس لاااا افضح الثانيه جحيم ونار (جلنار) وافضح لعبتهن واگول اختهه اعترفت عليهه واخلي الصبح ميصبح عليهن ينكتلن ذبح بساعتهن غسل عار وبيد ابوهن واخوتهن ..
باوعتلهه واني مشمئز منهه ..
صكيت سنوني وحجيت ..
الي عقدت عليهه محكمه وسيد منو بيجن ؟
جلنار ..
هينه جلنار ..هينه بس اصبريلي ..
هالمرة صدكتهه لان هي كالت تحبني ومع ذلك من سألتهه منو زوجتي شرعا وقانونا كالت جلنار مو هي .. ويمكن صدوگ الحرام ومخافة رب العالمين هو الي رجعهه لعقلهه ووعيهه ..
لزمت تلفوني وبنيتي اتصل بابوهن شوف شلون يتصرف وياهن ..
باوعتلي همس بخوف ..
علي شراح تسوي ؟
شتتوقعين يعني ؟
اتصل ع ابوج ..يشوفله صرفه ويه بناته ..
ركضت عليه وركعت يم رجليه تريد تبوسهن دفرتهه ببطنهه ..
كوومي .. وخري من يمي ..
الله يخليك ابوس رجلك لاتفضحنه ..
كل ذنبي اني حبيتك ..اختي مارادتك ..
اذا اكو رب مال غباء فهوة انتي ..معقوله ولج اكو هيج بنات مثلج هلگد ثوله وغبيه لالالا ممعقوله والله انتي تجاوزتي كل الخطوط ..
وج انتي شسويتي بنفسج ..
نصيت عليهه جانت جوة رجليه قريبه عليه لزمتهه من شعرهه واعت بي وهي لازمه ايدي وتبجي ..
ولج شسويتي ولج هذا لعب بالشرف ..لعبتن بشرفجن ..
صرت اكفخ براسهه واحجي بدون وعي ..
تدرين اكدر هسه اخذج واذبج ع اهلج واكولهم مو بنيه وافضح ذيج الادبسز الثانيه وياج ..
وهي ابد مدافعت عن نفسهه ضربتهه لحد ماتعبت ..
الله يخليك لاتخابر ابويه عفيه لاتگوله ..
لعد شتريدين شنو الاسويه ؟
اختج الادبسز هي زوجتي ومال اعوفهه هيج بدون مابرد كلبي منهه گطنه وطلعيهه من اذنج ..
شسوي يعني ..ابدلج بيهه بدون ما احد يدري وينتهي الموضوع ؟؟
عبالج سهله هي ..بابا انتن لعبتن بشرفجن ..هذا عداد عمرج وعمرهه ..
لو اطلگهه واتزوجج لان هه ..طلعتي انتي الي تحبيني ..لو ماشاء الله اجمع بين الاختين واتزوجج انتي همين ع الواهس ..
ظلت تبجي ماتعرف بشنوتجاوبني بجيهه بندم وحرگه واني اعصابي فاايرة ..
وج زعطوطات ثنين يضحكن عليه ..اااااخ بس ااااخ عضيت اصبع ايدي السبابه بقوة اكتم غيظي وغضبي .. وتريديني استر عليجن واسكت ؟!
دفعتهه وكعت بالكاع ..
كومي البسي شي استري نفسج لعبتي نفسي ..
اخذت التلفون بدون تردد واني نار نار جهنم بصدري ماتطفه شمااضرب شما اعصب دتزيد مدا تقل ..
خابرت ابوهه ..دگه ..دگتين ..بالثالثه رد ..
حاولت استجمع قواي واهدئ نبرة صوتي بس الموضوع واضح ويقلق بليله عرسي اتصل ع ابو زوجتي ع شنو ابشرة مثلا انو بنته طلعت بنت بنوت لااا السالفه اكيد بيهه ان ..
الو ..
الو ..ها عمي شلونك ..
هلا عمي ..خيرك يابه متصل عليه بهل وكت بيكم شي جلنار بيهه شي ؟
مابينه شي عمي ولاصاير شي ..بس عمي اني طالبك بشغله ..
كول يابه انت تامر ..
لا استغفر الله ميأمر عليك ظالم ..
بدون هوسه وبدون ما الولد يعرفون تجيب المحروسه ج .. همس وياك وتجون للفندق الاحنه بي .. بلا امرا عليك عمي ..
ليش يابه شصاير ؟
بداخلي اعرف وگعت گلبه للرجال بكلامي هذا وبطلبي بجيتهم هو وبنته ..
عمي جيب همس وتعال وتعرف شنو الصاير ..
زتيت هالجمله بسرعه وماعرف شنو ردة الفعل عليهه ..
ماشي يابه ماشي احنه جايين ..
ودعته وسديت التلفون منه باوعت وين هالحقيرة راحت لگيتهه متكورة بزويه الغرفه مقرفصه لامه رجليهه لجسمهه ومخليه راسهه بين رجليهه وتبجي ..
نص ساعه واندگت الباب ..
گمت فتحتهه .....؟؟
للحكايه بقيه ..
