البارت 29
جحيمي وناري
ملاك الصمت
جلنار .. اليوم يجون العرسان من شهر عسلهم وخالتي مسويه عشه ع شرفهم لان يجون العصر متأخر ..
الشغل والكرب بده من الصبح .. اني وايه نركض ركض .. خطيه اغلب شغل التنظيف ع ايه لان اني ماكدر ..حملي متعب وصلت بحملي 14اسبوع يعني تقريبا 3اشهر ونص .. بدة كروش صغير يبين ..
الشغله الي تخلص ب 5دقايق اني اسويهه بنص ساعه لان ع طول احس بثكل وحركتي بطيئه ..
احس ظهري انفصم نصين حييل گام يأذيني ..
زوجات حمويني مقبلت يجن لان اطفالهن مدارس وبدت امتحانات المدارس الابتدائيه وخواتهم المزوجات بغير محافظه يعني بعيدات وميجن يعني كولهه صارت براسي وراس آيه ..
كملت شغلي ..
صعدت لغرفتي علمود اسبح وابدل وارتب نفسي شويه ..
علي مموجود راح للمكتب يفتحه ساعه ساعتين ويرجع ميتأخر ..
اول مدخلت غرفتي لكيتهه هوسه ملابس رغم علي مرتب بس ماعرف شبي ويايه هذا هم حظي ..
رتبت غرفتي ..
كعدت ارتاح ع الجربايه .. من الالم بعد ماكدر ادنك نزلت دموعي ..
ظليت سانده اديه ع الجربايه ودموعي تنزل .. مهضومه ومتأذايه .. خالتي رجعت تحجي وتغلط وميعجبهه شغلي وتزيد عليه بالشغل خاصه من علي مموجود ..
هرموناتي دتتحكم بيه كمت اكره الطبخ بس مجبورة عليه اي شي اني اطبخه بس احط لگمه بحلگي منه واتذكر اني طابخته كبل اذبه ..
وعلي صرت ماحب يتقربلي يجيني شعور بالغثيان خاصه من يبوسني رغم هو نظيف وريحته طيبه وحته ميدخن بس اني السبب بالحمل مالتي ..
حته من يتقربلي امنعه يبوسني اوياخذ راحته .. كرهت شي اسمه لعاب ..
هو لحد الان متفهم .. لان شايفني قبل شلون جنت وياه ومن صرت حامل شلون اختلف الوضع ومقدر وضعيتي بس اعرفه ديضوج وديكتم بس شنو بيدي اسويه اله ..
ومن يكثر الصد للرجال شي ابد موزين ..
سمعت صوت خطوات ع الدرج اكيد علاوي مسحت دموعي وابتسمت اول مفتح الباب صارت ابتسامتي بوجهه ..
سلام عليكم ..
وعليكم السلام ..هلو حبيبي الله يساعدك ..
باسني براسي ورجع ليورة ..
عقد حواجبه ..
شبيج ؟باجيه ؟
لا حبيبي ..
شبيهن عيونج شو حمر ..
مابيه شي .. تعبانه شويه ..
من شنو تعبانه ..
من الشغل .. نفسيتي هم تعبانه ..
دمعت عيوني ..
جلنار شكو ..
ماكو شي بس وديني لاهلي شكم يوم ارتاح ورجعني ..
ماكو شكم يوم يم اهلج ممنوع ..
لعد وديني لهاله .. اختي تداريني ..
واني وين رحت حبيبي واختج تداريج ..
علي انت ياخذك الصبح يجيبك الليل يابالجامعه يا بالمكتب وينك عني بحالي قابل .. رجعنه مثل اول خليني اروح لبيت اختي ارتاحلي يومين ورجعني ..
هو شصاير حبي ؟
امك رجعت مثل اول واكثر شغل وغلط وصياح وكولشي ميعجبهه ويوم بعد يوم اني دا اتعب .. والله مدا اتدلل بس اني ماكدر اشتغل شغل ثكيل وحته الطبخ فوك راسي واني نفسي تلعب من الطبخ الاطبخه شكو شي اكله واتذكر اني طابخته رأسا اذبه ..
كمت ابجي .. حرام عليكم والله ظهري انكسر من الشغل ..
هسه ليش تبجين ياعيني ..
لان انت محاس بيه ..
صعد رجليه ع الجربايه يريد يخليني اتمدد كتله ..
وخرر ماريد .. اريد اكوم اسبح ريحتي كولهه زفر وتگلاه وعركانه صارلي نص ساعه كاعده اريد اكوم مابيه حيل ..
تعالي اني اسبحج ..
وخر علي انت سوالفك كولهه هيج .. حته بهاي تدور مصلحتك ..
فهم قصدي وضاج من كلامي واني ماعرف شدا احجي فتحت جبهه حته ويه علي .. هو صح مدللني ويهتم بيه بس اغلب وقته لشغله ومن يجي تعبان ينام وعود من بعدهه يتفرغلي ..
كومي اسبحي معليه بيج خاف عبالج رايد شي منج من كتلج اني اسبحج ..
مو قصدي حبيبي ..
مارد علية ..
بس تنهد وكعد بصفي ع الجربايه ..
ميلت راسي ع جتفه باوعلي بطرف عينه ..
ها هسه منو يتحارش ؟
لاتضوج بداعتي والله احبك ..
ماضجت ..
والله مبين ضجت ..
شويه ..
بسته بخده ..
مو كلنه لتتحارشين ..
ضضحكت .. ماراحت الشويه ..؟
حضنيي من جتفي ..
بعده ظهرج يأذيج ؟
من سمع صوتك هدأ عليه الالم ..
امممممم لعد كومي نسبح العرسان ع وصول ..
وغمزلي عرفت قصده رأسا ..
هااا هااا شگلنه ..شلون يحجي ويطلعني غلطانه وفكرت بي غلط وخلاني احس بتأنيب الضمير واصالحه ..
ههههههههههههههه .. اكو وحده زوجهه يكللهه خلي اسبحج ترفض هيج عرض ..
اي اني ..
بهاللحظه شالني من الفراش وهو يكولي ..
دنشوف منو يرفض ..
نزلني علي ..
اسكتي يمعوده لتسمعج امي وتكول ابني ديغتصب المرة ..
ههههههههه وانت صدوك هيج دتسوي ..
آآآخ اوفيييش ..
ولج شو صاير ثكيله ..
غير النونو ..
نونو توة 3اشهر يعني بعده بگدالحمصايه وانتي كرشتي ..
هاا يعني كرشت اني .. نزلني
لاحبيبتي منيلج انتي كرش اصلا ..
شكد لوتي ..
مصلحتي يمج شلون ماصير لوتي ..
ههههههههه وتعترف ..
سبحنه سوة وبالحمام حاول يتقربلي وكأني مو حامل ودخلت بنوبة تقيأ لحد ماصار وجهي اصفرمثل الليمونه ..
ماكو شي مااستفرغته وصلت لمرحله حسيت امعائي راح تطلع ..
علي يحاول يساعدني واني ماقبل اريده يبتعد لان خاف نفسه تلعب منو يتمنو يتحمل هيج ..
بس هو ماسمع مني ..
كعدت بالكاع مهدود حيلي وجهي اصفر احس روحي طلعت مو بس استفرغت ..
دخت وضغطي نزل ..
تقرب مني علي غسلي وجهي واديه واني كاعده واخذ خاولي نشفني ولبسني وهو لبس ع السريع شورت وفانيله ..
نظراته بيهه ذنب ..
لف شعري بخاولي وگومني .. شالني وطلعني ..
خلاني ع الجربايه تمددت وخله مخاديد عاليه جوة رجليه لان گتله دايخه وضغطي نزل ..
عدنه ثلاجه بالغرفه وبيهه لبن ولان ضغطي دائما ينزل من صرت حامل لحد هسه فالملح والاشياء المالحه دوم وياي ..
سوالي اللبن بگلاص وحطلي ملح زايد عليه وشربته ..
حسيت صرت شويه احسن وشعور الدوخه راح ..
تمدد يمي علي ..
كالي .. اني اسف ..
حبيبي ..
تقربت منه وحضنته صار راسي ع جتفه وهو هم حضني وقربني اله ..
گتله .. شفت والله مدا ادلل عليك ..
هذا مو حمل هذا غضب ..
لعد شسوي قابل بيدي ..
محجيت شي حبيبتي ..
اممممم ..
اليوم العرسان يجون ..
اي اعرف لعد الكرب والهوسه من الصبح لسه علمود من .. غير علمود العرسان ..
لعد شو محد اجه يعاونكم ؟
منو تقصد ؟
نسوان اخوتي ..
يكولن اطفالهن عدهم امتحانات ميكدرن يجن من الصبح عود يجن تالي وكت ..
هم زين ..
حبيبي اني بعد مانزل ..
صد عليه ..
ليش ؟؟
والله ظهري متكسر ..ترة موحمل اصعد وانزل درج ماكدر ..
عاد بس نزلي سلمي ع العرسان من يجون .. عيب ترة ..
اي اوك انزل اسلم وبعد معليه ..
شدوا روسكم ياگرعان ..
عرفته يقصد ع امه ..
كتله .. الله بعظمته يرحم هي مترحم لييييش .. ارحموا من في الارض يرحمكم من في السماء ..
ادري حبيبي ادري ..
تمددنه شويه علاوي غفه خطيه تعبان يمكن منايم الظهر .. كمت من يمه بهدوء خليته ينام لان هو مو مثلي يبدل ويتجهز بسرعه اني شويه بطيئه خاصه المكياج اتمكيج بفهاوة ع كيفي ..
بدلت فستان وردي ع بنفسجي فيزون صح حار بس هو الدارج يصير حصر من الصدر والباقي جرس مو كولش عريض لذلك حملي والكروش الصغيرون مبين شويه ..
حطيت مكياج ودا الف بالشال كعدت علاوي حته يكوم ..
سحلته سحل من الفراش كام غسل وبدل وجان ديمشط واني بعدني اعدل بالشال ..
دراني عليه ..
شو تعاي يمي ..
تقربت ..
اخذ الدنابيس مني خلاهن بين شفايفه عدلي الشال طبكه من الحافه شويه وقسمه بالنص وحطلياه ع راسي حطلي قارصه صغيرونه واخذ طرف الشال الايمن لفه ع الجهه اليسرة وحطاه دنبوس واخذ الطرف الثاني مال الشال ولفه ع الجهه اليمنه وحطله دنبوس لاخ من فوك صار شكل الشال وكأنه نص دائرة وشعري شويه طالع يرادلي كب ..
گلي كملت ..
انداريت للمرايه مطيته ظهري وهو ورايه ..
باوعت حلوة اللفه مال الشال ..
هاي شنووو منين متعلمهه ..
عدلت ياخة قميصه ورفع راسه بانفه ..
لعد شعبالج .. اضبط منج ..
تخصرت له ..
منو معلمك هااا اعترف من. معلمتك ..؟
هههههه محد والله ..
اخذ ايدي المتخصرة بيهه وباسهه ..
لاتلغمط عليه الموضوع ..
شو انتي طالعه حلوة حبيبتي ..
ها علي !!
وداعتج من النت شفتهه فديو بنيه بلوگر ناشرتهه ..
هاااا
فديت الي تغار ..
يله ننزل ..
اذا كملتي يله ..
اي كملت ..
نزلنه سوة ..
لكيت زوجات حمويني موجودات وجهالهن وياهن وحموديني الكبار همين وعمي موجود ..
سلمت عليهم نفر نفر وگعدت ..
اباوع هوسه الجهال .. يبوو راح كل تعبي وتنظيفي .. مو علساس عدهم امتحانات شجابهم ..
مرت نص ساعه واحس راسي صار طبل من هوسه الجهال صح احب اللمه لان البيت هدوء بس هم مو هيج يعني امهاتهم كاعدات يسولفن ولايصيحن بيهن ولا عبالك اكو هوسه وصوت ويتراگضون منا ومناك ..
شويه ونسمع صوت زفة هورن سيارة .. حيدر هو الي راح يجيبهم من المطار ..
وصلوا العرسان ..
طلعنه الهم كولنه استقبلناهم بالهلاهل والجكليت ..
سلمنه عليهم وباركنالهم وگعدنه كولنه بالصاله گعدوا يسولفون ع السفرة مالتهم ..
طبعا حمزة هو الي يسولف لان همس خجوله وقليلة الكلام ..
صارت گعدتهه يمي .. حسيت باحساسهه تحس نفسهه غريبه بنصهم ..
رغم حمزة كل شويه يحاول يشركهه بالحديث بس هي تجاوب بكلمه كلمتين وتسكت ..
صح جنت كاعده يمهه بس ابد ملتفتت عليه ..
اخير شي انسحبن البنات للمطبخ حمزة شاور همس كامت وياهن عرفتهن راحن للمطبخ وراح يبدون يحضرون بالعشه ..شاورت علي ..
حبيبي شد راسك ..
ضحك افتهم قصدي ..
گلي .. حبيبتي اني مو اگرع ..
همستله .. احبك .. سويلي لفه عود من تصعد ..
تكلفج ترة ..
جاهزة حبيبي .. بس ها حسب كبر اللفه ..
هههههههه صايرة ام بطن ..
هههههه لان انت حتسويهه عقلي ميفكر اني طبخت فأكلهه بدون ماذبهه ..
عقلج هذا نغل ..
لاتحجي ع عقلي ..
ماشي روحي يله ..
ها تريد تخلص مني ؟
لا بس كولهه فلتت للمطبخ بس انتي باقيه وامي عينهه عليج تخزر بيج ..
لاعفيه .. افلت بريشاتي احسلي .. باي حبيبي ..
ضحكلي وكمت ..
صعدت كبل لغرفتي ..
نزعت شالي وتمددت فتحت التلفزيون ظليت اكلب استقريت ع فلم عربي تابعته من النص شو شويه وغفيت ..
محسيت ال 5
الاّ ع علي وهو يفتح الباب ..
ها حبيبي ..
صح النوم .. شنو جنتي نايمه ؟
اي ..
خلصتوا العشه ..؟
ياعشه حبيبتي الساعه دعش ونص ..
يااا هلگد نمت اني ..
يمكن لان تعبانه ..
اكو احد جوة ؟
لا كولهه رجعت لبيوتهه والعرسان طبوا غرفتهم ..
ضحكتله .. وانت حبيبي ؟
واني يابعد عمري تسحبت للمطبخ مثل الحرامي وسويت لمرتي ام كرش لفه لان خطيه نامت بدون عشه واكيد هسه جوعانه ..
اي والله حبيبي جوعانه ..
كعدت ع حيلي ..
اخذت اللفه منه ..
حته بعدج بهدومج ..
اي حبيبي اول معفتك وصعدت بس ذبيت روحي ع الجربايه نمت ..
اخذت اول عضه من اللفه ومديتله ايدي البيهه اللفه علمود يعض العضه الثانيه ..
لاحبيبتي شبعان اكلي انتي ..
اممممم ظليت اتدلع .. لاتردني .. ميرد الكريم الا البخيل ..
ههههههه هاي عود دتحرمصيلي صرتي كريمه وطلعت اني بخيل ؟
هو منو سوالج اللفه اصلا .. شودجيبيهه ..
جرهه من ايدي اخذهه واخذ عضه شكبرهه منهه ..
لالا حبيبي عفيه والله جوعانه .. حباب شجاك ..
بعد ايده البيهه اللفه عني .. كالي ..
منو الكريم ؟
انت والله انت ..
ومنو البخيل ؟
اني اني ..
شوف شوف .. تستقتلين علمود لفه ..
دجيبهه حباب ..
اخر مرة .. لتسويهه بعد ..
والله بعد ماسويهه ..
طاني اللفه واكلتهه بسرعه خاف يرجع بكلامه وهو كام يبدل ملابسه ويباوعلي مبتسم لان دا اكل بسرعه ..
لتغصين ع كيفج ..
هزيت راسي اي وحلگي متروس اكل ..
خلصت لفتي اجه علي يمي لابس بس الشورت والفانيله ..
هاا شنو تسويلي اغراءات ..
ياريت لو تفيد خاف تذبين اللفه بوجهي ..
كمت ذبيت ملابسي وبدلت ملابس نوم ..
اجيت بحضنه ع الجربايه جان لازم مبايله ممنتبهلي ..
كتله .. صار شي جوة .. خالتي هم حجت عصبت ..
رد عليه بدون ميوخر عينه من مبايله ..
اي اكيد وباجر تكملهه عليج من الصبح ..
يوووه .. شوكت يخلص بناء بيتنه ..واخلص ..
حبيبي اصبري .. خليته بيد مهندس ثاني ..حته يستعجلي بالبناء ..
اي خوش ..
باله مو يمي اضوج من هيج حاله كون من احجي ينتبهلي ..
جريت المبايل من ايده بسرعه وخفه وسديته ..
هاي ليييش .. مو چنه نحجي ويه العالم ..
ماكو عالم تحجي وياهه غيري .. هذا وقتي اني .. حصتي بيك ..
يابه فديت الي يدور حصته ..
باسني بشفتي بوسه خفيفه ميكدر يسوي شي اكثر لان خاف اذب الاكل بوجهه .. هههههه شكد حباب ..
ترة نعسان ..
واني شبعانه نوم ..
غمض عيونه يريد ينام ..
عليييي لاتنام وتعوفني وحدي ..
حبيبي والله تعبان ..
طيني مبايلك العب كلاش بالقريه مالتك ..
بس مو تخلصين فلوسي ..
هههههههه تحصل كومه فلوس حبيبي واذا خلصتهن ..
امري لاالله ..
اخذت جهازة وكعدت العب كلاش ..
يمكن للساعه 2 ياله نمت .. 14
للحكايه بقيه ..
