البارت 24
جحيمي وناري
بقلمي ملاك الصمت 4
همس .. من اني وصغيرة تعلمت جلنار تصير هي محط الاهتمام .. انجح بتفوق اني وهي تسرق الانتباه لان مجابت درجات عاليه مثلي وتبقى تبجي الى ان يجيبولهه هديه لان خاطرهه مكسور من درجاتهه ودوم العذر المدرسات شادات وياي ومن احجي واتعارك اني المتميزة اني الاستاهل الهديه يسكتوني انتي العاقله اختج خطيه ..
من نسوي وكاحه اني اترزل وهي تگلبهه مناحه ع اساس اني عورتهه ويحيرون شلون يسكتوهه ..
كبرنه واني تعلمت ..صرت اعلم نفسي اني اكبر من هديتهم لجلنار من تنجح نجاح عادي واني انجح بتفوق .. اني اكبر من انو اسوي مشكله ويه جلنار ع شي تاافه .. اني اكبر من ان اعارك علمود اهتمام من اهلي الي ..
وهي جانت محط الانظار .. رغم توأم متماثل وامي جانت تلبسنه نفس اللبس وتسويلنه نفس تسريحات الشعر ونفس القراصات بس هي تتعمد تختلف عني .. تتعمد تضيف شي ع مظهرهه يختلف عني خاصه اشياء ماعندي .. حته يكولون جلنار احلى وارتب جلنار كذا ..
يمكن احد يسمع كلامي يكول عليه شكد تافهه بس اني جنت بعمر صغير وداخله عمر مراهقه وماعندي هموم ومسؤوليات بالحياة غير ذني السوالف الي يمكن تشوفوهن تافهات بس عندي جانن شي جبير .. يحز بنفسي .. انوجدن بمراحل حياتي .. انوجدن بمراحل تكوين شخصيتي لذلك صرت انطوائيه انعزاليه اكره الاختلاط الاجتماعي خجوله جدا ماعندي خبرة ولا رأي حاسم بالناس رغم عمري وصل 22سنه بس كلام او فعل يجيبني وفعل يوديني .. ماعندي قدرة اميز الناس تضمرلي خير او شر عديمه الخبرة صرت واثق بالناس بسرعه وهذا اكبر خطأ بشخصيتي ..
استمرت جلنار بحربهه النفسيه وياي الى ان وصلنه سادس اعدادي ..
جانت حته بصديقاتي تحاربني .. اني اشوفهه حرب يمكن اتحسس يمكن تصرفاتهه عفويه وممقصوده بس اني جنت اشوفهه مقصوده ..
بالسادس اعدادي اني طلعت وقدمت معهد صحه ولا عادت السادس ..
وبالسنه الثانيه معهد وهي مرحله اولى كليه وهم معافتني بحالي رغم شهادتهه بكالوريوس يعني تحصيلهه احسن من تحصيلي ..
جانت تتعمد تاخذني وياهه للكليه وتتعمد تستعرض جمالهه كدام صديقاتهه مثل واحد يگللهم شوفو رغم احنه توأم بس اني احلا ..
فرقهه عني الخيط ماشي بوجهه والمكياج واني لا جنت استحي احف او احط مكياج مو اهلي مانعيني من هالشي بس اني اشوفهه عيب ..
تعلمت البس الكلام واغلس .. يمكن هذا اسلوبي وسكوتي هو الي اطاهه المجال تتجاوز بالتصرفات بس هي دائما تستخدم الحيله واللواته ماعرف اشرح بس من اعاتبهه ع كلام اوتصرف تطلعني اني الغلطانه وماعرف اجادلهه لذلك اسكت وتطلع هي ام الراهي وتزعل ع اساس هي خايفه عليه وتحبلي الخير واني ماقدرت كل هذا وتسويلهه زعله واضطر اصالحهه لان تبقه اختي وماعندي احد غيرهه بالبيت لان هاله تزوجت من زمان واكبر منعدنه بهواي ..
جنت اكره خضوعي الهه ..
تجاوزت كولشي بدر من اختي .. لان تعودت ..
اكو ذكريات ماحب اتطرقلهه .. احب انساهه .. لذلك ماراح اسمح لذاكرتي تمر عليهه ..
اخير شي ربي عوضني بشاب بي كل المواصفات الي تتمناهن بنت مقبله ع زواج ..حمزة ..
شفته اول مرة جان مسوي حادث وانطلب مني اهتم بي لان جنت اشتغل بالمستشفى الي جابوه الهه وخاطر من خاطر وعيب من عيال اختي ماقوم بالواجب ويه ابنهم ..
من اول ماوكعت عينه عليه صار يحوم ورايه .. كونه اخو علي ابد مرتاحيت للنيه والنظرات تجاهي ..
كل الي سويته كالعاده تجاهلت وغلست ومانطيت مجال .. طلع من المستشفى حمزة وهو مماخذ مني لاحق ولاباطل والحمدلله ارتاحيت من هالسالفه او تهيألي ..
بعد اسابيع وتحديدا بعزيمه جلنار بعد العرس شفته مرة ثانيه ..
مافك عني ياخه لا بكلام ولابنظرات عرفت عنده نيه تجاهي ..
بيومهه اخواني عرفوا باللي حاولت انساه واتكتم عليه وتقدم حمزة لخطبتي ..
كل اسباب القبول والموافقه توفرت لحمزة من خطبني وكل ظروف الغصب والاجبار توفرت لاهلي علمود يغصبوني اوافق .. لشدة ضعفي محد سألني عن رأيي بزواجي وتمت الموافقه ..
جهازي والنيشان كولشي من احسنه رغم مبين ام حمزة مموافقه بس انجبرت مثلي ..
حمزة شخصيته مرحه اجتماعي يحشش يضحك جرئ ..
من قبل لا اصير حلاله يتغزل ..
حببني بي كوة عليه ..
يكولون القشه التي قصمت ظهر البعير .. لا حمزة صار القشه الي نقذتني من ظلم اهلي وجبروت اخواني ..
انخطبنه وعقدنه وكل يوم احبه اكثر من الي قبله بسبب كلامه وافعاله واهتمامه بيه بس ابد مابينتله هالشي ..
تجاه كل كلمه حب منه يقابلهه برود مني ..
تجاه كل اهتمام منه اقابله بتجاهل مني ..
ماعرف ليش هيج دااتصرف .. دا احب شخصيته ودا احب اهتمامه بيه .. افعاله كولهه كلامه غزله كولهه تدل ع حبه بس اني ليش ممتجاوبه ومطيه الاذن الطرشه ..
اول مرة اني اصير محل اهتمام شخص معين .. اول مرة تركيزة عليه اني وبس .. اهتمامه الي وبس ..
كلما دا احاول احبه ديبعدني عنه شعوري بالذنب تجاهه ..
احس بالذنب لان دا ابني حياتي ع كذبه ..
يمكن لو الماضي الي ما اتجرأ افكر بي حصل ويه شخص ثاني غير علي يمكن بوقتهه ماكو تأنيب ضمير يمكن اقنع نفسي انو هذا ماضي ومو من حق حمزة يحاسبني ع الماضي بس الماضي يتضمن علي .. اخوه لحمزة ..
بقرارة نفسي اعرف التصرف الصحيح هو ان احجي لحمزة كولشي وهو يقرر مصيرنه .. النه مستقبل نكمل سوة لو كلمن يشوف طريقه ؟؟جنت بالدوام اتصل عليه حمزة ..
هلاو هموستي ..
ابتسمت .. هلو حمزة شلونك ..
تمام انتي شلونج ؟
بخير ..
انتي وين ؟
شويه واطلع من الدوام ..
شكد شويه يعني ؟
هيج فد ربع ساعه .. ليش دتسأل ؟
ماكو شي بس عازمج ع الغده .. ماريد اعتراض اتصلت بعمي واستأذنت منه ..
حمزة ..شوكت تبطل ذني سوالفك ؟
ياسوالف ؟
دتحرجني ترة .. 5
طلبنه اكل ع ذوقه ..
اكلنه بهدوء ..
ظلينه نسولف شويه عن احلامنه ..
من هسه اكولج ترة اني احب الاطفال فبالقليل بالقليل اريد نص درزن اطفال ..
خجلني الكلام بهالموضوع ..
ههههههه يمه .. هواي ترة نص درزن ..
لا مو هواي ..
بس اني مناويه اترك وظيفتي بعد الزواج ..
ومنو كال اريدج تتركيهه .. اصلا منطقتنه انترست حضانات ..
ستتهم نحطهم بالحضانه واوصلج لدوامج واروح اني ع شغلي ..
هههههههه محسب حساب لكولشي ..
اي حته ميصيرلج عذر .. ولا تخافين اني اساعدج نربي سوة ونتعب عليهم سوة ..
صفنت عليه .. وع كلامه وحنيته وشلون يحجي ويخطط ويسولف شكم طفل يريد ..
حمزة هديه من السما اليه ربي يديمهه عليه ..
دمعت عيوني محبيت يشوفني هيج ..
گتله ربي لايحرمني منك ..
حمزة ممكن طلب ؟
أمريني ..
ليش متفكر جديا انو نستقل ببيت وحدنه اول منتزوج ؟
حسيته انصدم شويه من طلبي ..
هذا طلب لو شرط للزواج ؟
لا اني كتلك ليش متفكر بالموضوع ..
شنو السبب الخلاج تطرحين هيج موضوع ؟ليش ماطلبتي من البدايه ..
لتزعل مني بس السبب واضح ..
عرف قصدي هو .. عرفني اقصد امهه متتعاشر وبكلامي المح للي صار ويه اختي جلنار من جوة راس والدته ..
حسيته ضاج ..
السبب الرئيسي الي خلاني اطرح هالموضوع هسه انو ماعندي قدرة اعيش ويه علي كزوجه لاخو علي واني انكشفت اله وببيت واحد ..
صعبه عليه مو لان احبه مبقه من ذاك الحب شي بس صعبه لان احس بالذنب تجاه حمزة .. احس نفسي خاينه رغم ماعندي اي مشاعر حب تجاه علي ..
سرحت بعيد بتفكيري ورجعني للواقع صوت حمزة ..
وين صافن الحلو ؟
ماكو شي ..
شنو رأيك بالموضوع ؟
اي موضوع ؟
گلبت عيوني بعدم رضى ..
انو نستقل ببيت لوحدنه ..
لا ماتوقع ..
ليش ؟؟فكر ..
لامترهم ..
بالعكس ليش مترهم .. خوب الواحد يشتري راحة باله ..
مو كتلج مترهم .. يعني اخويه الاكبر مني لسه مطالع ومشاكله ويه امه وصلت لحد انتي تعرفينه وماطلع ليش اني اطلع مثلا ..
وتعتقد هالتفكير صح .. يعني شنو سوة فلان لازم احنه نسوي مثله ؟
زين واذا فلان اخطأ لازم اكرر خطأة اني ؟؟
همس احترمي !! اول مرة اسمعج تحجين بهالاسلوب ..
دنكت ضجت من نفسي .. لان اسلوبي جان هجومي وهمجي حسيته ..
رفعت راسي باوعتله ..
عندك شي بعد ؟
لا .. كومي اوديج للبيت ..
بدون ماتنفس بحرف واحد اخذت جنطتي وكمت والدمعه متغرغرة بعيني مستقرة بس ارمش توكع ..
هو دفع الحساب واتوجه للسيارة واني امشي وراه ..
نزلت دمعتي مسحتهه بسرعه ماردت احد يشوفني ..
صعدت بالسيارة درت وجهي ع الجامه ..
لو ع الجامه لو مدنكه عيني ابد مارفعتهه عليه ولاشفته بعد ..
شلت عيني ليكدام ..
انتبهت قريب منوصل هذا طريق اهلي ..
بدون ماباوعله گتله .. ماروح لاهلي وديني لبيت هاله ..
هو سمع هيج لو هو كام يفور ويتبدة ..
غير الطريق لطريق بيت اختي ..
وصلنه ببابهم ..
حجه ..
عود شنو هاي دتسوين عناد وياي ؟
شنو المناسبه اعاندك .. ماعندي هيج حركات ..
لعد شيسموهه هاي من خليتيني اوصلج لبيت اختج ..
لان اني ساكنه هنا ..
فتح عيونه ..
اي مثل مكتلك .. اخويه وزوجته حاربوني واهلي ناس مرضى وميحبون المشاكل واخذتني اختي يمهه ..
دبرت هالكذبه هاي لان مليت من طلبه لاتروحين لبيت هاله او قللي الروحات لبيت اختج .. طكيتهه وياه ..
بس بعده ممقتنع ..
الي اعرفه مرة اخوج طردتوهه لبيت اهلهه ..
المهم .. اني ساكنه هنا .. بعد لاتتعب نفسك وتطلب اقلل روحاتي لبيت اختي ..
مع ذلك انتي ع ذمتي صرتي ومااقبل تبقين ببيت اختج وزوجهه رجال غريب عنج ..
حجابي كامل كدامه ..
ميهمني .. ماطولج ع ذمتي ترجعين تعيشين ببيت اهلج واذا استمرت اذيه اخوج او زوجته الج نعجل بزواجنه وبيج خير وتدللين ..
فتحت عيوني ع وسعهن ..
شنوووو نعجل بزواجنه ليش ..
لعد من باجر ترجعين ..
ماارجع حمزة ..
تعانديني ؟
انت متعرف الوضع شلون صاير .. ماكدر ارجع لبيت اهلي ..
ليش شنو صاير غير الي گلتيه اليه ؟
حمزة رجاءا لتجبرني ..
كلامي ماثنيه ..
واذا مرجعت ؟
مراح يصير خير ..
ظليت اباوع عليه ردت اشوف شي بعيونه كلامه وإصراره جديات لو شقة مباوعلي ابد ..
يباوع ليكدام ولازم ستيرن السيارة حيل بثنين ايديه ومن كثر مصاير عصبي وكاتم شرايينه الي بايده بارزه والمفاصل صايرة بيضه من كثر مضاغط عليهم وشاد نفسه ..
وهسه تفضلي نزلي عندي شغل ..
ظليت لحظات اريد ارد عليه رد يخليني اتشفه بي بس معرفت ارد سكتت ولبست جنطتي ونزلت ركعت باب سيارته وطبيت للبيت ..
5
للحكايه بقيه ..
