#جحيمي_وناري*
خلصنه الريوك وهي تقريبا ما اكلت شي بقيتهه كاعدع يمي هادئه عبوسه ولاتحجي بس تجاوب من يتوجه الهه سؤال ..
شفت آيه اصغر خواتي تحاول تتقربلهه وتحجي وياهه وتضحكهه بس هي ابد قافله والبوز متر ليكدام ..
كولهه لاحظت وتسألني مرتك شبيهه اجاوبهم تستغرب وتستحي ولسه مماخذه ع الجو ..بس امي جان عدهه تفسير ثاني للموضوع ..
جلنار ..خلصنه ريوك صعدت لغرفتي دخت من الهوسه والصوت وماعرف احد ولسه ماعرف شنو مصيري وشراح يصير بحياتي ..
نزغت شالي خنكني وتمددت بملابسي ع الجربايه ..
دگت عليه الباب اخته آيه ..بنيه بعمري كولش حبابه
..
تفضل ..
دخلت لي للغرفه ..
محتاجه شي حبيبتي ؟
لالا تسلمين ..
جلنار شبيج ؟ احد ضوجج ؟
ابتسمت حرجني سؤالهه ..
لا والله محد مضوجني ..بس تعبانه منايمه هواي البارحه ..
شفتهه ابتسمت عبالهه صاير شي ..
هههههه
شنو ؟
اي غير عرسان ..
لا مو تغير عليه المكان فما كدرت انام ..
هاا ..
واشتاقيت لاهلي ..
سهله هاي ..بس يروحون الكرايب خلي علاوي يوديج تشوفيهم هو ترة كولش حباب بس عصبي حيل ..
اي اي ..
يله اخليج ترتاحين ..
تسلمين ..
يمكن آيه هي الانسانه الوحيده الحسستني بشويه راحه ..
من طلعت غمضت عيوني وغفيت ماحسيت ولا ادري شكد وقت غفيته بس حسيت ع صوت الباب ينفتح ..علي دخل ..
بوعلي وصد وجهه عني ..
كعدت ع حيلي ..يمكن متضايق لان نمت واكو خطار جوة بس ابد بالي مو يمهم ولايم هوستهم وعرسهم ..
بالي يم اهلي شصار ويه هموسه اكيد ابويه شبعهه كتل وظليت حايرة اخواني دروا باللي صار لو لاء ..
طلعت فوني دكيت ع همس جهازهه مغلق من الصبح لسه مغلق وامي مترد ..
صاحوا لعلي طلع من من الغرفه ..
اتصلت ع اختي هاله ..
الو ..
الو ..هلو هلوله صباح الخير ..
منين يجي الخير يمعزايه ..
گلبي انقبض ..يعني اختي عرفت بالموضوع ..
ولج شمصخمه انتي واختج ؟
ظليت ساكته ..نزلت دموعي ..ندمانه لان نزلت راس ابويه ..
ظلت تحجي هواي عليه وترزل بيه واني ساكته بس استمع دموعي امسح دمعه تنزل الثانيه ..
هاله شصار ..اخواني دروا ؟
لااء ..بس امي وهي سولفتلي ..
لو دروا اخواني غير يذبحوجن ..
وهمس ؟
همس اكلت الكتل والتكفخ من ابويه وامي عنج وعنهه ..
شهكت ولطمت حلگي ..
ولج ادبسز لعد شعبالج هي هينه ..ابويه جنزهه من الكتل گوة وخرناهه من جوة ايد ابويه اني وامي ..هم زين جانوا اخوانج راجعين كلمن لبيته وحته حسام جان ماخذ مرته وطالع والاّ لصرتي علچ بحلگ نسوانهم وشلونهن هنه مو كرايب عگارب ابد ميحبن المشاكل ..
جلنار انتي وياي ؟
جنت ساكته بس اسمعلهه وعيوني تصب دموع ..
تمتمت ..اي اي موجوده ..اسمعج كملي ..
باعي هاي امي ديطلعلهه انتظار دتتصل بيه ..
احاجيهه وارجع اخابرج ماشي ؟
اوك ..
سديته منهه وبكلبي كلت الله يستر خاف صاير شي خاف اخواني دروا وسووا شي لهمس ..لزمت كلبي ومنتظرة هاله ترجع تتصل عليه ..
دقايق ورجعت اتصلت عليه هاله ..
الو..
هاخير شصاير ؟ كولي بسرعه ..
وج ابويه متخربط ..صاعد ضغطه وناقلينه للمستشفى ..
شهكت وصميت حلكي حيييل ..
اويلي شراح يخلصهه ..شلون راح تصفه ..ياربي سترك ..
ناقليه الصبح للمستشفى ..
راح احاجي علي يجيبني ..
لاااا ابد ..امج شددت عليه حتلو تعرفين بابوج متخربط متجين ..كافي عليه قهر البارحه مو انوبينه تزيديهه عليه ..
لعد شلون بالي يمه ..
بالج يمه ؟ ولج ادبسز شكلتي لروحج من سويتي بي هيج بالله ذيچ ثوله وتتقشمر بحجايتين بس انتي ..اووف منج اعرف هذا كوله تخطيطج ومن جوة راسج ..
هاله الله يخليج مو وكت كلامج ولومج اليه هسه ..البيه كافيني وزايد ..
من ايدج خيتي من ايدج ..
هاله بروح منو غالي عندج اعتقيني ..ترة لومج وكلامج بسمار ويدوگ براسي ..
اسمعيني زين .. لاتتصرفين من وحدج ولاتسوين شي ..
وابويه ؟
اني اخابرج واطمنج عليه ..
يله هسه روحي ..اني اروح ابدل واخلي ضرغام يوديني للمستشفى ومن ارجع اخابرج واطمنج عليه ..
لااا اتصلي عليه وانتي بالمستشفى اول متحصلين خبر .
ماشي روحي هسه ..باي ..
الله وياج ..
سديته منهه ..دخل علي ..مسحت دموعي بسرعه .. باوعلي وصد ..اخذ مبايله ورجع طلع ..
علي ..صاحولي جنت بالغرفه ..امي كالت ديتصلون عليك كتلهه منو كالت ام جلنار ..استغربت ..بس متوقع هالاتصال ..يمكن تحجي وياي يمكن توصيني ع شي او تتعذر ..
طبيت للغرفه .. اول مطبيت جلنار ذبت التلفون ومسحت دموعهه ..عيونهه حمر ..انعصر كلبي عليهه عرفت صاير شي ..
اخذت تلفوني وطلعت برة اخابرهه خاف صاير شي ماردتهه تسمع او يمكن تدري شصاير وهذا سبب دموعهه احتمال ..
طلعت بالحديقه اتصلت عليه ام جلنار نبرة صوتهه منحرجه مني .. وتتعذر ..كالتلي ابو جلنار متخربط اليوم الصبح صاعد ضغطه وناقليه للمستشفى ..عرفت سبب دموع جلنار ..وطلبت مني حتلو عرفت جلنار بالموضوع وتحت اي ظرف ميجيبهه بهل فترة لاللبيت ولا للمستشفى ..ابوهه تعبان من وراهه ..تفهمت الموضوع ونهيت المكالمه ويه خالتي ..
رجعت صعدت لغرفتي طبيت ..
كعدتقصص فقط:
يه تنهدت ..
ليش جنتي تبجين ؟
ماكو شي ..
ماخبرتني باي شي ..سكتت عنهه عفتهه براحتهه ..يمكن قاهرني انكسارهه ..البارحه شكد ضربتهه وشكد قسيت وتباوعلي بصلافه عينهه بعيني تتحداني بس اليوم لا ..بس ارجع واكول تستاهل كولشي صار من ايدهه ولسه ماعرف شلون راح اعاقبهه ع الي سوته ..
شويه وصاحونه ع الغده ..
نزلنه سوة تغدينه ..بس كآبتهه والعبوس زادن ..صارت عبالك سرحانه بغير عالم صافنه متحجي ..
الزم ايدهه واكعدهه يمي تمشي ورايه بهدوء ..الي اكوله تنفذة فجأة تحولت الى خرسه ومطيعه ..خوفني وضعهه ..
اقرب منهه الاكل تبعده صافنه لازمه الخاشوكه بس ماحطت لكمه بحلكهه ..
الكل انتبه عليهه وامي تدري ابوهه مريض بالمستشفى لذلك عاذرتهه وعاذرة وضعهه وصفناتهه وكالت لكرايبنه متضايقه العروس ع وضعيه ابوهه الصحيه ..
رجعت امهه اتصلت بيه العصر كالت طلعوه نزلوله ضغطه وصار احسن وطلع لبيته وخبرت جلنار والظاهر اختهه هاله مخبرتهه بطلعته لان بس خبرتهه كالت اعرف ..
لليل بيتنه فرغ من الكرايب والحبايب ..
طشوا كلمن راح لبيته ..
تعشينه وصعدنه لغرفتنه ..
اني نمت ع الجربايه وهي فرشت فراش بالكاع واخذت مخده وبطانيه ونامت ..
مرت الايام ..ابو جلنار تحسنت صحته واني دائما ع اتصال بام جلنار وماكو شي خطير ع صحة ابوهم ..
كدام اهلي احاول اداري واقرب جلنار يمي بس هي فاصله ..كلامهه قليل واكلهه قليل ..قويه وتكابر مو هاي الانسانه العاشرتهه خلال فترة الخطوبه مدا اعرف البيهه ضعف لو قوة ..مدا اكدر اتوصل للطريقه الي تفكر بيهه ..
خلال هالايام امي ابد مفكت ياخه منهه ..دائما تسمعهه كلام عن وجهه العبوس ..جانت تكوللهه ..ابوح وطلع من المستشفى والحمدلله مابي شي شنو هالعبوس اضحكي شويه شنو مزوجيج ابنه غصب ؟؟
بالنسبه اليه 3ايام كعدت بيهن بالبيت ع اساس عود عريس ومن بعدهه صرت اطلع العصر لمكتبي عندي قضايا وموكلين محتاجيني قضاياهم معلگه يعني شغل متلتل والصبح ماعندي دوام بالجامعه لان عطله نص السنه ومن اطلع جنت احاول اوصي اختي ايوته تدير بالهه ع جلنار وتسولفلي شيصير بالتفاصيل خاصه ويه امي وتصعد تبقهه يمهه يسولفن سوة او خاف تحتاج شي وتستحي تكول هنه ثنينهن تقريبا نفس العمر ومتفاهمات جنت من ارجع من شغلي اسألهه تكولي دتتجاوب وياهه ويسولفن سوة بالساعات ..يعني مابيهه شي ودترتاح لآيه ..
علي .. طول هالايام اني ع اتصال بامهه ولحد هسه متقبل جلنار تجي لبيتهم تشوف ابوهه لان هو رافض يشوفهه والام تخاف ع زوجهه لايرتفع ضغطه من جديد وتنتكس حالته حته همس مابقوهه بالبيت اخذتهه هاله يمهه لان بيتهه وحدهه ومناك تداوم لان همس مخلصه معهد صحه وهالسنه تعينت موظفه بالمستشفى ..
امي بدت تحفر وتصيد بالمي العكر مثل ميكولون ..كامت تسأل اسئله ماعندي الهه جواب ..ليش اهل جلنار مااجوي بسبعه بنتهم رغم مسوينه سبعه بس حتلو اهل البنيه يزورون بتهم بيوم السبعه كتلهه مشغولين بابوهم المريض ..
سؤالهه الثاني زين ليش جلنار متروح تشوف ابوهه مو طلعت سبعتهه شنو هالبرود العدهه مو خبصتنه اسبوع هي مطنكرة لان ابوهه مريض وميصير تطلع لان عروس .
جانت امهه تطلب مني ماجيبهه حتلو لحت عليه وتوسلت بيه ماعرف بالضبط شصاير بس اسؤا شي ممكن يصير هو انو اخوانهه يدرون ..
جنت اتحجج كدام امي انو امهه متقبل اطلعهه قبل السبعه تكول عيب البنيه تزور اهلهه قبل لايعزموهه عزيمه عرسهه ..
زين طلعت السبعه ليش اهلهه معزموهه ..سؤال لاخ لامي وجنت اتهرب من الجواب ..
جنت بين نارين نار امي واسئلتهه ومحاولاتهه علمود تلزم شي ع جلنار لان هي شاكه بشي وتلمحلي ع شغلتنه وتسألني كملت لو لا واكوللهه كولشي تمام بس ممبين مقتنعه ..
ونار ام جلنار الي يمكن تصرفهه هذا انو تمنع جلنار تجي لبيت اهلهه يمكن دتحميهه من شي ممكن يصير اذا راحت ..
بالفترة الي صرت اروح بيهه لشغلي بالمكتب صرت احتاج غسل ملابسي وتحضير ملابسي لطلعاتي ..كوي وترتيب وهالسوالف ..
جنت اكلف آيه وامي متقبل تكول مو صارت عندك مرة اتحجج واكوللهه لساتهه عروس فترة وتتعلم بس هي متتقبل هالشي تكولي شلون تتعلم وانت معتمد ع اختك ..
واني بصراحه طلبت من جلنار شكم مرة تحضرلي شي البسه وتكويلي فلان قميص اجي ماالكاهه محضرة شي اسألهه ليش تكول نسيت ماعرف جذب صدوك عناد ..عفتهه مواكفه الدنيا عليهه ولا احتاجهه مليت اداري خاطرهه واتحمل مزاجياتهه واسئله امي المستمرة ..ممجبور اغطي بعد ..
صار يومين من طلعت السبعه فتت لغرفتي ..
سلام عليكم ..
باوعتلي بطرف عينهه ..
هلو ..
خابري اختج هالة خلي تجي لهنا ..
الجمله مالتي ثارت اهتمامهه ..
ليش شصاير ؟
مصاير شي ..
لعد ليش تريد اختي تجي لهنا ؟
احفظلج مي وجهج گدام اهلي ..ولو متستاهلين بس ماريد احد يحجي او يحس ع شي خاصه امي بس تريد عليج لزمه ..
واني شمسويتهه امك علمود هيج تعاملني ..
مو موضوعنه .. سوي الكتلج عليه ..
ماشي راح اخابرهه واخليهه تجيني ..
حاولي تخليهه باجر تجي ..
اوك ..
