جحيمي وناري
ثاني يوم الصبح صادف يوم احد خلصت عطلة نص السنه واليوم اول يوم دوام متفقين وماخذة وعد من علي اكمل دراستي بس بعد الي صار بليله عرسنه ماعرف بعده ع الوعد لو تراجع عنه ..
اكره الشعور من اصير تحت رحمه شخص ..يعني هو يتحكم بمصيري ..
ساعه 6:00 الصبح مبايلي دك منبه البارحه جمعته الكفر والبطاريه واشتغل ووقته ..
طفيته وكعدت غسلت وجهي باوعت علي نايم ع بطنه ..
الحمدلله زينه ومموجوعه ..حاولت احجي مكدرت ..
نزلت اسوي ريوك ..
البيت فارغ وهدوء كولهه نايمه ..حطيت الجاي ع النار وبديت احضر سفرة الريوك ..
طلعت الاجبان والبيض سلگته وحطيت الخبز بالاوفن احميه وحطيت الكوابه طبت خالتي ..
ياا شعجب ..
التفتت الهه ..هزيت راسي وابتسمت ودرت وجهي رجعت احضر باقي الريوك طب علي كال صباح الخير ..
بس التفتت صارت عيني بعينه ..
صديت عنه ..
امه ردت عليه ..صباح النور يمه ..ماكدرت ارد اني يمكن عباله زعلانه وامه ع اكثر عبالهه متعاركين او متزاعلين ..
كملت كولشي ..
كعدنه نتريك تلاثتنه ..امه تباوعلي بخزر ..
ها يمه شنو اليوم عندك دوام الصبح ؟
اي يوم خلصت العطله بعد طلابه ..
رفعت راسي وعيني باوعتله من جاب طاري الدوام يمكن نظرتي بيهه سؤال وفضول هو افتهمه ..
صارت عيني بعينه ..كالي ..
تداومين مو ؟
هزيت راسي اي ..
خالتي كامت تعوج بحلكهه .. كالت ..
لعد والبيت ..اني هم عدي دوام ومعتمده مرتك تطبخ الغده غير تگول تحجي ..
ساكته اني بس منتظرة رد علي ..يحجي ويبرر لو ينطي بيه ويكولي لتداومين اليوم ..
يمه انتي من يمته تطبخين الغده وتروحين للدوام ..اشو ايوته خطيه مرات تجي ركض ركض من دوامهه وتطبخ شي ع السريع ومرات نجيب اكل من برة ..
دنكت وضميت ضحكتي ..فشل امه ..
ظلت تعوج بحلكهه معاجبهه ..
اي اني كبرت وصارت عدي چنه بالبيت غير اعتمد عليهه ..انوبينه هي عليهه تلزم الطبخ من الليل تطبخ او من الصبح تكعود اوكت شو شتسوي ماعرف تدبر نفسهه ..اجي من دوامي الكه الغده جاهز ..
باوعلي مثل الي يگولي سمعتي الحجي ..رد عليهه كاللهه ..
صار يمه تدللين ..
ماراد علي يتطور بعد كلام امه ويمكن تغثني اكثر او توجهلي بعد حجي يسم البدن من الصبح ..
يله جلنار گومي بدلي ..
عفت اكلي وكمت صعدت لغرفتي ابدل ..
اسمع حجي امه بذيالي تگوله ..
دشوفهه شوفهه شلون رافعه الخشم مدري ع شنو من حورهه مايعجبهه ترد ..عيني مو من مستواهه تحجي ويانه ..حته صباح الخير ماكالت ..
علي ..كولش نرفزني اسلوب امي هي من تشد ويه واحد بعد تشد وتعلنهه حرب عالميه نفسيه عليه حتلو ميحجي ولايرد هي هم تلكالهه حجه لعدم رده وتظل تعير بي بالشكل لو التصرفات ماعرف احنه شنو خالقين علمود نتجرأ نعير البشر ع خلقه رب العالمين . 1
بنفس الوقت ماعجبني تصرف جلنار ..حته صباح الخير ماكالت ..
زفرت وعفت اكلي وكمت ..
غسلت وصعدت لغرفتي ابدل ..
لكيت جلنار بالحمام عرفتهه دتبدل ..طلعت لابسه زي جامعي قميص ابيض وتنورة سوده ..
طويله بس مرتبه ع جسمهه بنزاكه ..
تباوعلي وتنصي ..
طبيت بدلت لكيتهه مخليه مكياج ولافه الحجاب ..
هادئه جدا ..بس يعجبني اباوع لنزاگتهه ووجهه ..
خلصنه ..
هايله خلصتي ؟نطلع ؟
هزت راسهه ..اي ..
نزلنه ..صعدت بالسيارة وياي بالصدر ..طلعت ورانه ايوته تركض ..
علاوي علاوي اوگف ..
ها ايو ..
لاتعوفوني ..خطي اليوم ميجي عفيه وصلني وياك ..
انتي خلصتي ؟
اي بس اجيب جنطتي واللفكس ..
يله لعد استعجلي ..
ركضت ايه جابت اللفكس والجنطه ..
صعدت بالسيارة وسلمت عليه
التفتت ع جلنار عيني منهن بالمرايه ..وجلنار همين دارتلهه ..
ها حبي شلون صرتي ؟
عقدت حاجبي ..شنو شلون صرتي ليش هي شبيهه ليكون سولفتلهه شصار بيناتنه ..هزت راسهه جلنار بابتسامه ..
همستلهه ايه كالتلهه ..علي درة ؟
باوعتلهه بالمرايه ل ايه ..عين عليهه وعين ع جلنار بشنو المفروض ادري ؟
جلنار هزت راسهه لا ..
وج عوبه كوليله حته تشوفين طبيب هاي ..
ماعرفت عن شنو تحجي ايه ..
حاولت اعرف بس عبالك يحجون بالالغاز ..
حركت السيارة ..وصلت ايه لكليتهه وبعدين وصلنه اني وجلنار لكليه القانون اني صعدت لمكتبي وجلنار راحت لقاعتهه ..
جلنار ..ماكدرت اسلم ع البنات رغم عطله صارلنه اسبوعين كاعدين بالبيت وممتشاوفين ولا متواصلين وهمين باركلي ع الزواج بس اني جنت احاول احجي بس ماكدرت ارد عليهن بحرف ..
حيل حسيت بالحرج ..
دنيا صديقتي تولت الرد عني وهي متعرف شنو موضوعي بس فهمتني ماكدر احجي ..
تولت الرد عني وكالت للبنات عدهه فلاونزا والتهبت الحبال الصوتيه مالتهه وراح صوتهه ..
جرتني دنيا كعدنه ع صفحه ..ع الستول ..كالتلي ..
سولفي شنو سالفتج ؟
جبت ورقه وقلم وكتبتلهه ..صارت مشكله وماعرف وراهه بعد ماكدرت احجي ..فقدت النطق فجأة ..
سألتني ..رحتي لطبيب ؟
كتبت لا ..
يا لج ليش خاف تبقى وياج هاي الحاله خاف تتأزم اكثر غير تروحين ...
غير تروحين طبيب تشوفين شبيج مابيج ..
اي ان شاء الله بلكي اليوم علي يوديني ..
بدت المحاضرة ..
سلام وكلام وترحيب والقاء محاضرة وبنهايه المحاضرة دناخذ حضور ماكدرت اگول نعم ست موجوده بس رفعت ايدي من صاحوا اسمي ورادت الاستاذة تسجلني غياب لولا دنيا تنط من مكانهه ..هاي ست جلنار موجوده ..
كالتلي لعد ليش متحجين دنيا كالتلهه ست مريضه فلاونزا قويه ومتكدر تحجي ..
الطلاب كاموا يضحكون ..سمعتهم يگولون صارت خرسه وهمه يدرون بيه هستوني تزوجت فكاموا يذبون حجي ..
هيج الزواج يخرس الوحده ويضحكون كولش تضايقت من كلامهم .
بالمحاضرة الثانيه تفاجأت مغيرين استاذ الماده ودخلنه علي ..زوجي ..كأستاذ بديل للاستاذ السابق ..
سلم ودخل عرف نفسه ع الطلاب وتعرف عليهم ووصل السرة اليه ماكدرت اعرف عن نفسي ..
الولد ضحكوا من يمهم لان حاولت اگول اسمي وتلعثمت ..
شعور كولش مو حلو ..
كامت دنيا وهي تعرف علي هو زوجي ..
استاذ ..جلنار مريضه ومتكدر تحجي التهاب قصبات قوي صاير عدهه ..
علي ظل يباوعلي ..بنظراته الف سؤال ..اولهه يستفسر عن سبب عدم نطقي واخرهه ليش مگتيلي ..
حسيته گوة لازم اعصابه ..نصيت ماريد تصير عيني بعينه ..
شرح المحاضرة واحس عيونه عليه محاوطاتني ومراقباتني طول المحاضرة ..
واني هم ع اعصابي ..متضايقه من البسبسه والكلام والاحراج ..
صارت الساعه ب 12:00وشويه خلصت المحاضرة ..
اخذ الحضور وبخزرة رادني اروح وراه للمكتب ..
نظرات خايفه باوعتهه لدنيا طمنتني وكالتلي ..من شنو خايفه روحي احجي وياه قابل انتي شمسويه ..
لميت اوراقي واخذت جنطتي ورحت وراه لمكتبه ..
طبيت للغرفه جان ورة الباب اول مادخلت سد الباب ..
باوعتله ..يتفحصني بنظراته ..شبي صوتج ؟
ليش متكدرين تحجين ؟
طلعت دفتر وقلم وكتبتله ..ماعرف ..
من شوكت صار عندج هيج ؟
كتبتله البارحه ورة ماعفتني وطلعت ..
شلون يعني تحسين بألم يوجعج شي ؟
تقرب مني ..بلعومج يوجعج شي ؟
هزيت راسي لا ..
وليش ماحجيتي ؟
باوعت بعيونه ونصيت ..كتبتله ..ايه اتصلت عليك انت مارديت ..
سكت ماحجه شي ..
بعد عندج محاضرة ؟
هزيت راسي اي ..
لعد انتظرج تخلصين ونطلع سوة ..
اكلتي شي ؟
هزيت راسي لا ..
امشي ناكل شي ..
طلعنه من مكتبه ورحنه للكافتريا ..
شفت دنيا من بعيد ظلت عيني عليهه اريد اروح يمهه ..
ممرتاحه لنظرات الطلاب لان صح همه يدرون اني جنت مخطوبه وتزوجت بس ميعرفون استاذ علي هو نفسه زوجي ..جنت محرجه حيل ..
بس يمكن الحلقه بيد علي اطتهم فكرة انو هو زوجي ..
هو علي شكم مرة من جنه دنشتري اكل انتبه عليه اباوع ع مكان دنيا كالي ..
تريدين تروحين يمهه ؟
هزيت راسي اي ..
اشترالي لفه وعصير ..
وكالي ..روحي يمهه ..دُخلي محاضرة ومن تخلصين يا اما تجيني للمكتب لو تتصلين عليه اجيج اول متخلصين ..
هزيت راسي اي ..
رحت يم دنيا و اكلي وياي ..
كعدت جانت تضحك شارگه الحلگ اشرتلهه شبيج ..
كالت ..هنيالج ولج شلون مداريج استاذ علي ومن عرف ظل متعصب من حجي الولد يگزگز واحسه گوة لازم روحه ..
هي تحجي ومنفعله واني اباوعلهه صفح ودي املخهه ماعرف ليش بس احس علي يخصني ومومن حقهه تجيب طاريه ..
انتبهتلي كالت ..
هاشبيج تغارين لان احجي بزوجج وبطولاته ..
ضربتهه ..شوف هاي البطرانه ..
دكلي اكلي لتروحين توگعين عليه وهم مابيه حيل اشيلج وهم شيخلصنه من استاذ علي ..
تعوج بحلگهه وتمط بالكلمه من تكول استاذ علي ..
اكلت وخلصت ودخلنه محاضرة ماكو شويه وطلعنه دگيت ع علي انطاني رفض واجاني للقسم ..
تمشينه للكراج ..
صعدنه السيارة وعلي ساكت ماحجه ولا كلمه ..
وصلنه للبيت لكينه ايه واصله قبلنه وكاعده تشتغل بالمطبخ تسوي غده اول ماطبينه ابتسمتلي ..
هاحبي شلونج ؟ الله يساعدك علاوي ..
هزيت راسي ..زينه ..علي كللهه ..
ويساعدج ..شمسويه غده ؟
تاجينه وروبه ..
امي هنا ؟
اي بغرفتهه نايمه .
يله لعد ابدل وانزل ..
باوعلي بطرف عينه مثل ديشوفني شاريد اسوي ..
حجت وياي آيه همس ..ها درة بيج علي ؟
هزيت راسي ..اي ..
يله اصعدي بدلي وانزلي ساعساعدي ساعديني ترة ميته جوع ومنتظرتكم ..يله روحي بسرعه عليج الزلاطه واللبن .
ضحكت وهزيت راسي ..اوك ..
علي سبقني من دقايق ..
صعدت ع السريع ابدل لكيته بالحمام ديسبح بسرعه بدلت ونزلت اساعد آيه حضرنه السفرة كعدت خالتي طبت المطبخ ..
ها خاتون اجيتي ..
مجانت قابله لان آيه هي الي اجتي من دوامهه من وقت وطبخت الغده ..
مارديت ع خالتي ..
نزل علي وصبينه اني وايه الغده والتمينه اربعتنه ع السفرة ..
فتحوا موضوع ع الاكل وكعدوا ياكلون ويسولفون واني طول الوكت ساكته واباوع بوجه الي يسولف مرات باهتمام ..احجي بداخلي ..والله النطق نعمه ..بس هم مرات من تسكت تغث المقابل بس السكوت ياذيك الك من كثر الكتمان والضغط النفسي تلفلك حرگه وتتمرض ..
حجت أيه بالمواد ونتائج امتحاناتهه وناجحه لحد
ما خالتي وجهتلي الكلام ..
وانتي عيني اخذتي درجاتج ؟ناجحه راسبه خلي نفتهم أهلج شرطوا علينه الاّ تكملين دراستج ..
مارديت نصيت ع الاكل سويت روحي اكل بس هي تعصبت مني حست بيه حاگرتهه او متجاهلتهه هيج شي ..
ياا شو متردين ..شنو مو من مستواج تحجين وياي وتردين عليه ..
رفعت راسي وعيوني صارت بعيونهه تجمعت الدموع بعيوني ..
اي شنو اخرسيتي ؟
انهضمت بشكل من كلامهه خاصه من كالت اخرسيتي ..اكثر شي كسرني من بعد تجاهل اهلي الي هو هذا فقدان نطقي ..ماردت ابجي ..
جنت اقوي نفسي واردد بداخلي ..لاتبجين ..لاتبجين ..ديربالج تسويهه وتبجين ..
من كالتلي خرسه تذكرت كلام الولد بالكليه اليوم حزت بنفسي ..انقهرت ع نفسي ..
غمضت عيوني بقوة وبلعت ريگ ..
نزلت دموعي لا اراديا ..
علي صاح ..يووووم ..مترحمين بحال البنيه شويه ..
يااا ماصارلهه يومين من اجتي گمت ادافعلهه هاي التستنكف تحجي ويه امك ..هي هاي تاليه تربيتي وتعبي بيك يايمه ..
يوم البنيه مريضه متكدر تحجي ..
عفتهم وگمت من الاكل ..صعدت لغرفتي وعلي بعده يتلاغه ويه امه ..
ماتسمعت ع الكلام الدار بينهم ولاردت اسمع شي بعد يكفيني الي سمعته ..تعبت ..
طبيت لغرفتي بجيت بحرگه ..استحق الي الله ديسويه بيه ..
شويه ودخل علي وجهه احمر وهو عنده عاده من يتعصب يگوم ينفخ شلون من نشوف بالكارتون التنين من ينفث نار بس علي ينفخ الزفير بقوة بحيث تسمع صوت النفخ وعظام وجناته محدده بحيث اكو عصب يتحرك ع طول عظم الفك يظل يصعد وينزل من عصبيته وكأنه گوة صاك ع سنونه ..
يله بدلي آخذج للطبيب اشوف شبيج ..
هزيت راسي ..لا .. واني صجوك ماريد اروح ..
جانت عيوني حمر ووجهي احمر ..مبين عليه باجيه هواي ..
شنو ؟؟شنو ؟؟
ظليت اهز براسي ..ماريد اروح للطبيب هو تعصب اكثر ..
شبيج شبيج مدا افهم عليج ..
جر ورقه وقلم بعصبيه وحطهن بيدي گوة وگالي ..
كتبيلي ..خبلتيني ..كولشي مدا افتهم عليج ..
كتبتله ..ماريد اروح للطبيب ..
لحظات شاف شكاتبه ..
لحظه للي كاتبته ولحظات استغراب اليه ..
ليش ؟ خلي نشوف شنو علتج وليش هيج متكدرين تحجين ..
ظليت اهز براسي ماريد اروح ودموعي بدون جهد تنزل عشرة عشرة وامسح بيهن يرجعن ينزلن ..
كام يصيح عليه ..
شبيج انتي شبيج ؟؟
يعني عاجبج هيج وضعج ..امي تصيحلج الخرسه وبالطالعه والنازله ترزل بيج وبالجامعه يستهزرون بيج ..عاجبتج هاي وضعيتج ؟
احجي ؟
..ها نسيت انتي خرسه متحجين ..
هنا من كال الكلمه ..خرسه ..ضغطه عليه وصياحه وكلامه القاسي وياي انهاريت بجي گمت اناشغ بصوت عالي وگعدت بالكاع ..
لسان حالي يگول ..تعبت رحموني ..كااافي تعبت ..
هو باوعلي مثل المصدوم ..ابتعد عني وسكت ..
ظليت ابجي بسكوت من بعد ماسكت عني .. ظل يفتر بالغرفه يفرك باديه ..
انتظرني اهدأ وابطل بجي ..
مدلي ايده ..ظليت اباوع ع وجهه وع ايده ماتحركت ..سحب ايدي بايده الثانيه وكومني من الكاع ..
يله روحي غسلي وجهج ..
خطيت خطوة تجاه الحمام ووكفت لان كالي ..
غسلي وجهج وبدلي حته نروح للطبيب ..
وكفت لان رجع يلح ع نفس الموضوع ..
دفعني ع كيفه تجاه الحمام ..يله لاتناقشين ..
وجهه مبتسم ..بعيونه نظرة حنيه ..
ركزت بعيونه ثواني ..نظراته قنعتني ..
مشيت اخذت ملابس ورحت للحمام بدلت وطلعت ..كملت لبس الحجاب وباقي الشغلات ..
طلعنه لطبيب اختصاص علي يعرفه ..
وصلنه دخلنه للدكتور وسولفله ع حالتي وظل الدكتور يسألني لشنو متعرضه بالفترة الاخيرة سولفتله رؤوس اقلام عن مرض ابويه المفاجئ واني عروسه فصايرة بيه مثل الهبطه ..
ولان الانسان بالعاده من يتأذى او يصيرله شي يبجي لان البجي يريح ويفرغ الانسان من الهم ويفرغ الطاقه السلبيه اما اني من النوع الكتوم يعني من اضوج من احزن من اتأذه ما ابجي اكتم بداخلي وصايرة بيه مثل عقده ترجمهه جسمي ع هيئه فقدان نطق مؤقت ..
ظل الطبيب يسألني عن حالتي واني اجاوبه كتابه ..
اخير شي كال عدي صدمه نفسيه فترة وتروح بس لازم ابتعد عن اي انفعالات ..
حته دوة ما انطاني لان سألني عن نومي بسهوله انام لو اعاني كتله لاعادي انام بسهوله قليل يصير عدي ارق فكال ماكو داعي لأي علاج لان اكثر العلاجات مسكنه ومنومه واني كتله عندي دراسه ودوام كليه فعلاجي الحقيقي هو الراحه النفسيه والابتعاد عن التوتر والانفعالات ..
رجعنه للبيت ساكتين طول الطريق ..
1
للحكايه بقيه ...
