جحيمي وناري
بقلمي ملاك الصمت 8
همس .. ورة ماطلع حمزة لشغله كملت نومتي للساعه عشرة اكثر اقل مادري .. حميت الجاي وتريكت .. لملمت وصارلي شكم يوم بهالشقه ردت انظفهه ..
دورت سوالف تنظيف مالكيت صح اكو منظفات بالحمام بس فرچه ماسحه ماكو ..
ظليت كاعده اتفرج تلفزيون الى ان انفتحت الباب .. حمزة ..
اول مادخل باوعلي .. باوعت لروحي يبوو بالقميص بس ..
تعاي تعاي وين شارده ..
يمكن عباله راح افوت للغرفه واقفل الباب ع نفسي بس اني جان قصدي ابدل ملابسي .. صاحني رجعتله ..
نعم ..
الله ينعم عليج .. مو ردتي مسواگ ..
ظليت اشيل وياه العلاليك انقلهن للمطبخ .. الدجاج والسمج منظف وكبل حطيتهن بالمجمده والباقي فواكه ومخضر ..
ترة محتاجه بعد شغلات ..
باوعلي .. مثل شنو ناقصج .. نگلتلج السوگ كوله ..
ماقصدي اكل .. المطبخ ناقص هواي شغلات كدورة وطاوات ومواعين وبوادي وخواشيك هاي من غير المواد الغذائيه ..
اي نجيبهن بس اصبريلي الشقه جديده واني توني سكنت بيهه غير الاثاث كولشي مامجهز ..
كتبيلي الظروريات بورقه حته اجيبهن العصر ..
اروح وياك ..
لامتروحين شعدج رايحه ..
مليت من الحبسه .. وهماتين اريد ارجع لدوامي ..
دوامج اخذتلج اجازة مرضيه 14يوم ترتاحين بيهن ..
هاي شوكت ..
من اول يوم مداومتي بي ..
ابتسمت ..زين ..
بس خليني اروح والله اتكأب من الحبسه ووحدي ممتعلمه ..
تتعلمين .. بس اكتبيلي الضروريات اجيبهن ..
ماعندي قلم وورقه ..
من فوك الثلاجه جر دفتر الصغير مال ملاحظات ونهايه الاوراق لاصقه بحيث اكتب شمحتاجه والصقهه ع باب الثلاجه وهو من يتواجد بالمطبخ يعرف اني محتاجه فلان شغله ويروح يجيبهه ع فرغته ..
اخذت القلم ودونت .. ملح شكر تمن انواع البهارات لان كولش اعشق البهارات يمكن اكثر من عشر انواع بهارات كتبتله ..
طيته القائمه صفن عليهه ..
خومناسيه شي ..
كالهه باستهزاء ..
من اتذكر اكتبلك ..
لصق الورقه ع باب الثلاجه ..
سألته شتريد غده ..
لاتطبخين شي .. جايب لفات كص دجاج تحبينه مو ..
ابتسمت مشتهيتهن ..
لملمت ع السريع باقي المسواك واخذت لفة واطيته لفه ..
لعد شعجب جاي من وكت ..
رحت تسوكت والمكتب مخليه بيد العمال .. عود العصر اروح اشوفهم ..
صدوك جيبلنه وياك ماسحه وادوات تنظيف ..
ليش ..
اريد انظف البيت غير ..
معليج بالتنظيف اكو عامله اني متفق وياهه تجيني يوم بالاسبوع وبعدين البيت نظيف منو يوصخ قابل ..
سكتت ظلينه كاعدين كلمن ع كرسيه بالمطبخ وكلمن بيده لفته ..
بلع ريگ وسألني ..
عرفتي جنس الطفل ؟
تفاجأت من سؤاله ..
كتله .. لاء ..
لعد شوكت ..
بمراجعتي الجايه اخذ سونار ان شاء الله ..
تمام ..
ماجبتلي ملابس ..
اي راح من بالي ..بلكي العصر امر ..
عبالك غربه .. واحد عن الثاني ..سكتنه ..
مانمت الظهر لان هواي نايمه وكاعده متأخرة .. ظليت ارتب بالكنتور وحمزة نايم بالهول ..
ماحتاجيت هواي وكت لان هو اصلا مرتب غراضه وملابسه فبس صفطت ملابس البيت ..
ماعندي شي شسوي اطلع شغل لنفسي من جوة الكاع ..
خابرتني ايه واني اصلا تواصلي وياهه منقطع .. اول وحده باركتلي ع الرجعه وحته هاله اختي اتصلت واني بوكتهه تهربت من التفاصيل ..
جنه دنحجي وجانت فرحانه ..كتلهه خيرج ..
كالت انخطبت .. فرحتلهه لان هي جانت فرحانه فتوقعته ولد وياهه بالجامعه تحبه ورايدته ..
كتلهه منو كالت احزري كتلهه اعرفه كالت اي والله هي الصدفه الشافني بيهه جانت عن طريقج ..
شلون يعني ..مافهمت ..
كل ظني هي تحجي عن مصطفى اخويه .. خفت ..
تالي كالت عصام .. ههههههه اي ابن عمتي عصام ..
ماحجيت شي بس فرحتلهه ..
كالت ماكو شي رسمي لسه بس دز امه واخته ..
هلاهلا .. وليش اني مادري بهذا الحجي وشوكت اجوي ..
البارحه العصر .. شمدريني قابل اشتم کفى ايدي اني ..
وشبيج هيج فرحانه ..
مابيه غير انخطبت وفرحانه لعد قابل ابجي ..
تريدينه يعني ..
من اول ماشفته عجبني هههههه
لا يا لوتيه .. واني اكول عليج فقيرة طلعتي حاطه عينج ع الولد ..
هههههههه لا والله لان نيتي صافيه هيج الله دزلياه ..
هههههه يله حبيبتي الله ينطيج ع كد نيتج .. اذا بيهه صالح ان شاء الله تصير القسمه ..
اي بابا اخذ معلومات عن اهله وديسألون عليه ..
عليمن تسألون عليه اني اطيج السي في مالته ..
محامي وعمرة يمكن 26سنه وعنده مكتب محاماة ويصير ابن عمتي هالواحد لامه وعنده اخت وحده الي هي زينه مرة اخويه محمد ولاتخافين بيتهه وحيدهه وحبابه وابوهم زوج عمتي متوفي من سنين بس همه متمكنين ..
جنت احجي واضحك ويمكن ع صوتي كعد حمزة .. يباوعلي شلون مندمجه وشلون اضحك .. من سياقالكلام عرف هاي ايه ماغيرهه ..
بدل وهو كل شويه ارفع راسي اشوفه يباوعلي ..
اخير شي كمل وطلع ..
كلت لايه .. هذا اخوج صاير عقدة هم حابسني بالبيت وهم كالب وجهه عليه لان كاعده اخابر واضحك وممهتمه ماعرف شيريد ..
صدوك حابسج ..
اي والله دوامي ميخليني اروح يكول اخذ
اخذتلج اجازة مرضيه اسبوعين وميقبل اروح لاهلي ..
ياشتروحين لاهلج صارلج شكم شهر يمهم ماشبعتي ..
لعد محبوسه وين اروح يعني ..
تعالي يمنه ..
لاعيني لا .. توني صرت حامل اخاف ع روحي وخالتي يمكن متحلفتلي هسه ..
هههههههههه اي والله بس تدردم ومشاكلهه ويه جلنار واصله للستار ..
ياا .. هم علمود الشغل ..
اي كولشي تسوي جلنار ميعجبهه وحملهه متعبهه ..
هم الله يساعدهه امي واعرفهه متتعاشر هنه خواتي هجن منعدهه ..
....
ظلينه هواي نحجي انقهرت ع جلنار لان واصله بحملهه للشهر الثامن نهايته وهم شغل وهم دراسه وهم تعب الحمل ومشاكل خالتي المتخلص عبالك انكتب عليهه هذا هو عذابهه ..
لليل رجع حمزة جايب جنطة ملابس اليه وباقي المسواك الي كتبته اله ..
رحت گلبت بالملابس هذني ملابسي الي بغرفتي ببيت عيالي اشتاقيتلهن هههههه واكثرهن لو مشلحات لو گصاف لان سمنانه يعني لبسي الزين والمستور اخذته وياي لاهلي والي جابه حمزة اكثرهن جديدات لو مدشنتهن مرة ..
شلتهن وظليت ارتب بيهن ردتلي قطعه شويه مستورة وواسعه لكيت دشداشه نوم قماشهه بارد يخبل طويله للحجل بس الصدر كيبور ومابي بطانه يعني فضيحه والردانات مخروطه ونازله ع الزند لونهه كريمي لبستهه وصفطت الباقي بالكنتور اخذتلي خانتين منه ..
طلعت للمطبخ فتحت العلاكه مال البهارات عطت الريحه تخبل ..
حته حمزة اجه للمطبخ عباله طابخه شي گلي هاي شنو الريحه ضحكت گتله هاي البهارات الجبتلياهه ..
ظليت ارتب بيهه بخانات الكاونتر بعلب صغيرة ..
حمزة مجايب عشه ..
حميت اللفات مالات الظهر لان جايب هواي وبقه منهن وعدنه تمن ومرگه هم حميتهن وسويت زلاطه وصحتله يتعشى هو اجى ركض ..
كالي شوكت طبختي منو جابلج ..
كتله كوله من اكلنه جان بالثلاجه وحميته ..
علساس شويه واطلع اجيب عشى ..
ماكو داعي هواي عدنه اكل ..
تعشينه وحجيت وياه ..
سمعت جايين ناس ع ايه ديخطبوهه ..
هو ابتسم .. كالتلج يعني ..
بس ابتسامته مو سببهه انو اخته انخطبت ..لا بس لان الخطبهه عصام وهو. لحد هسه عباله اني اكازرة لو احاول اغثه من گتله عصام خطبني بس هسه من بعدماعصام خطب ايه عود يعني جذبتي انكشفت كدامه .. هيج حسبهه هو .. لذلك سكتت وماعلقت بعد ع الموضوع خليه يفهمهه مثل ميحب ..
راح تسألون عليه ؟
اكيد طبعا ليش شكم آيه عدنه ..
ان شاء الله خير ..
تعرفين شي عنه ؟
لا حباب الولد ماعنده زايده ناقصه ومتعين ..
هاا..
كملنه اكل شلت ولملمت ..
منا وبدت بطني توجعني ..
طبيت للغرفه وقفلت الباب ..
التقلصات زادت عليه ظليت اتوجع والوج وافتر بالغرفه ..
ظليت ساعات احاول انام ماكدرت اخذت علاجي ومافاد ..
گلت اسبح بمي دافي بلكي اصير احسن ..
فتحت القفل والباب مديت راسي الساعه ب 11ونص وحمزة نايم ..
دخلت للحمام سبحت بمي دافي رغم صيف بس ردت ارتاح لان حيل متأذايه ..
طلعت من الحمام وظليت افتر بالبيت .. بين الهول والمطبخ ..
خابرت امي سولفتلهه كالتلي افور يانسون واشرب المي مالته ع صوت الطكطكه مالتي كعد حمزة ..
هاي دتسوين ..
افور يانسون ..
ليش ..
عندي الم ببطني ..
رأسا فتح عيونه النعاس بيهن ..
راح تجيبين ..
ضحكت .. لا بيش طالبني .. بس عندي تقلصات ..
هاا واليانسون يفيد ..
اي خابرت ماما كالت فوريه واشربي ..
خطيه وخابرتيهه هسه اكيد ظل بالهه ..
لا كالت التقلصات عاديه ..
هاا .. ترة علاجج يمكن بي ابر مال تقلصات كال الصيدلاني عند الحاجه ..
لاحمزة ابر شنو هيه اشرب اليانسون واصير زينه ..
ههههههه طفله ..
رجع للهول واني فورت يانسون وبردته وشربت ..
جان فاتح التلفزيون يباوع فلم اجنبي ..
كعدت يمه ..
شنو دتباوع ..
فلم .. حلو .. تعالي تفرجي بلكي تنسين بطنج شويه ..
صدوك كعدت اتفرج وياه ..
شو دقايق وغفيت ..عدنه بيت نحجي بي ..
متسمعني ببيتنه ..
مو گلتي البارحه فاهمتني وعرفتي احتاج وكت وصبر ..
وكت وصبر نبتعد ..
ليش مو سوة ؟
لاني شفتك .. شفتك باضعف حالاتك وماستحملت كلامك فلازم ابتعد عنك ..
مو اعتذرت .. مو گلنه اسفين ..
سكتت مجاوبته ..
لمعت عيونه مثل الي دمع .. بعدين ضحك گالي ..
ترستي المطبخ بهارات وهسه جايه تكوليلي اروح ..
هههههههه غير احب البهارات ..
گالي .. واني احبج ..
مااعت روحي ..
ههههههههه منو موعهه لروحج ..
يمعود خلصوا دمي صيح الممرضه ..
نهض من يمي كام صاح الممرضه اجتي شالته .. مااخذوا مني بس نص بطل دم .. دخت من ردت اكوم لزمني حمزة سندني وجابلي بسكت وعصير اكلتهن واني كاعده بمكاني شويه وكدرت اكوم ..
رجعنه لي يم غرفه العمليات ..
حمزة حاچه علي كاله ليش هيج صار بالبنيه انت مأذيهه ..
لا والله هي وكعت من الدرج ..
من الصبح علي .. شو هاي واكفه ..
انت تعرف امي ماتاركتهه بحالهه ..
من الصبح عركه علمود الغده جلنار ماطابخه تعبانه امتحانات وتعب الحمل وماتحملت ..
صحت بيهه تصعد تبدل ولا ترادد امي ..
صعدت لنهايه الدرج ونفسهن الي صعدتهن رجعت انكلبت عليهن ماعرف شصار محد شافهه بس سمعت العيطه مالتهه ..
ان شاء الله تكوم بالسلامه ..
چان حمزة يحجي ببرود وعلي الله يعينه ع الي صار بزوجته ..
ظلينه واكفين ننتظر جواب حته من كالوا طلعوا الطفله وخلوهه بالخدج محد اله واهس يروح يشوفهه كولنه بالنه يم جلنار ..
مرت ساعه طلعت الطبيبه كالت النزيف مدا يوكف ولازم نشيل الرحم لان متأذي حيل ..ولازم زوجهه يوقع ع مسؤوليته ..
امي گامت تلطم ع وجهه حجت عليهه الطبيبه ..
حجيه ليش تفاولين ع البنيه .. خلي زوجهه يوقع ..
من ينشال الرحم يعني بعد ماكو اطفال هذا الي فكرنه بي كولنه ..
توهه ولدت طفله وراح تبقه وحيده هالطفله لااخ ولا اخت ..
علي بدون تفكير باي شي ثاني واي مصلحه شخصيه عدا انقاذ حياة زوجته ومن بعد ماوضحتله الطبيبه انو بقاء الرحم يعني بقاء النزيف فوقع رأسا ..
رجعت دخلت الطبيبه ..
ساعه ثانيه مرت واحنه ننتظر ع اعصابنه ..
ماكدرت ابقه وحمزة ابد ماعافني جنت اكعد واخلي راسي ع جتفه لان ادوخ واتعب من الوكفه والحر والتقلصات رجعت عليه ..
شاورته انو التقلصات رجعتلي گالي خلي نشوف طبيبه كتله بعدين اتطمن ع جلنار اول ..
بالفعل وقفوا النزيف بس شنو الثمن .. جلنار خسرت حقهه بالامومه لطفل ثاني .. الحمدلله ع كل حال ..
اهم شي تستعيد صحتهه ..
طلعوهه لغرفه خاصه بين ميفكهه البنج .. حالتهه مستقرة النزيف متوقف ..
وراهه اخذني حمزة للطبيبه جيكتني وانطتني نفس علاجي الي اخذه وهم ابر عند الحاجه ورجعت انتظر جلنار تصحى ونتطمن عليهه اكثر ..
للظهر جان الممر متروس حبايب من الطرفين حته مرة عمي ام حمزة اجتي ولا كأنه مسويه شي عمي جابهه وحمويني حيدر وحسين وزوجاتهم ..
رحت اني وحمزة شفنه الطفله ..
ابويه كبر بأذنهه وابوهه همين ..
الطفله جلدهه عبالك شفاف شرايينهه مبينات وضعيفه وصغير حجمهه حته نخاف نشيلهه خاف نأذيهه فحصهه طبيب اطفال وسألناه ليش هيج جلدهه وبنيتهه كال لان مولوده قبل وقتهه يعني بالثامن وراح تعاني من مغص اول اشهر بسبب عدم اكتمال الزغابات الي بامعائهه و كتبلهه نوع خاص من الحليب للحالات الي مثلهه لازم يشربو الهه ويراجعو اذا ماوالم الحليب الطفله ..
الظهر كولش بدت جلنار تستعيد وعيهه وبدت تهذي واخويه
محمد گام يصورهه .. حته وهي تحت تأثير البنج تتعارك .. كولهه كامت تضحك بس ضحكتنه بكسرة وهضيمه شلون راح يكلولهه بسبب النزيف شالوا الرحم ..
استعادت وعيهه .. وبدت تسأل ع طفلتهه .. الطبيبه اجتي تتفقدهه وامي طلبت من الطبيبه هي الي تشرحلهه وضعيتهه وهي الي تكوللهه هيج خبر ..
اني تعبت وردت اشرد من ردة فعل جلنار ..
حمزة افتهم عليه واخذني للحديقه وجابلي لفات وجاي اليه واله ..
جانت نظراتنه تحجي كلام بيناتنه محد يفهمهه غيرنه ..
تعبانه حبيبي ..؟
اوديج للبيت ..
هزيت راسي لا ماريد اروح ..
لاتخافين ماحبسج بعد توبه .. ماجنت اعرف عصفورتي تحب الحريه هيج ..
ضحكت ..
منو عصفورتك ..
انتي ماكو غيرج ..
خلي نرجع خطيه خلي نشوفهم خبروهه لو لا ..
رجعت لكيت جلنار تصرخ وتبجي وعلي حاضنهه ويهدي بيهه .. عرفت الطبيبه مخبرتهه بالموضوع ..
هاله واكفه بباب الغرفه اشرتلي روحي حضني اختج محتاجتج انتي بالذات مافهمت قصد كلامهه بس شافتني طبيت جلنار كامت تباوعلي وعيونهه متروسه دموع ونظرة تترجاني اتقرب عليهه ..
اقتربت مابخلت عليهه بالحضن الحنين للاخت رغم كولشي صار ..
بس حضنتهه شهكت بجي وجلبت بقميصي حيل مثل الطفله وظلت تكولي ..
سامحيني همس سامحيني والله هاي حوبتج .. سامحيني اذيتج هواي ..
نزلت دموعي وياهه وحضنتهه اقوى وسكتتهه .. اشششش لاتحجين شي مسامحتج انتي اختي توأمي شعندي غيرج ..
ظلت فترة بحضني الى ان ارتاحت ..
كتلهه انتي فرغتي حملج وخلصتي اني بعدني .. وخري جعصتيني ..
ابتسمت من بين دموعهه وابتعدت عني ..
كمت رجعت يم هاله .. تقرب عليه حمزة .. لزم ايدي شبكت اصابيعي باصابيعه ..
باسني بگصتي .. شكد احس بالفخر لاني زوجة هالانسان وشكد احس اني محظوظه بحمزة وشكد احبه ..
امي دخلت جابت الطفله لسه ممسميهه وممتفقين ع اسم الهه والاقتراحات هواي اسماء قمر فجر امي رادتهه بتول هواي اسماء سوينه قرعه طلع اسم قمر وسميناهه قمر ..
شلت قمر بين اديه من بعد مارضعتهه امهه .. شعور مينوصف .. كائن حييييل صغير تخاف خاف حركه اصابيعك ع جسمه تأذيه .. يتنفس ويفتح عيونه وايده تلزم اصبعك كل قوته ..
بالفطرة حبيتهه .. باوعت لحمزة هايم بيه وبالطفله .. ويمكن يضرب صفنات ع طفلنه من راح يجي .. اعرفه بشنو يفكر ..
جلنار بهذيج الليله والليله البعدهه باتت بالمستشفى وعلي ابو قمر وياهه وامي وخالتي ..
ومن رادوا يطلعوهه من المستشفى تعاركت ويه علي الا تروح لبيت اهلي يداروهه هناك وشرطت عليه ماترجع الا وهو فاتحلهه بيتهم الجديد شلون يمعوده البيت عدلي بدلي بعده ماكامل البيت كالت ميخصني حتلو طابق واحد بس تعوف البيدك وتكمل نواقص البيت وتأثثه وتجهزة .. من بيت اهلي ع بيتي بس يخلص اربعين قمورة ..
بعد جلنار ودگت رجل ع شغله .. عرمه وعنيده وهو. يعرف عناد مرته ..
اما اني فبذيج الليله ماالتزمت بوعدي لنفسي ولا طاوعت عقلي ورجعت لاهلي .. طاوعت گلبي ومافاركت حبيبي رجعت وياه لبيتنه ونمت بحضنه ليلتهه ..
صح يمكن بالاسابيع هو ممتقربلي بس عذاب حبه واني بقربه افضلي بالف مرة من عذاب شوگي اله وهو بعيد عني ومن ليلتهه ماتفاركنه طول العمر ..
وراهه ب 4اشهر تقريبا او اكثر شويه جبت توم ولد سميناهم احمد وامجد ..
بيومهه حمزة ظل يفر باذاناته لان هو صح يدري بيه ولد بس اني ابد مگلتله توم .. وراثه التوم بالعائله صارت من نصيبي بعد ماطفرت منهه جلنار ..
صح انظلمت هواي بس ربي عوضني بحمزة .. اختصار لمعنى الرجوله حمزة ..رغم كولشي صار ماانطي بي ولا ابدله .. احبه اعشقه .. واشوف حبي بعيونه ..
انتهى .....
مهما يطول الظلم لازم نهايه النفق المظلم اكو نور وامل لاتيأسون من رحمة رب العالمين ع ساعه تفرج ..
هاي رسالتي بالقصه لان صح القصه من الخيال بس العبره حقيقيه من الواقع ..
باقي العبر براحتكم استخلصوهه من بين السطور ..
احبكم في الله
انتهت قصتنا الجميله اتمنى القصه نالت اعجابكم تحياتي للجميع وانتظروني في قصه جديده أخرى
