جحيمي وناري
گمت فتحت الباب ..
هالنص ساعه اخذت عمر وحيل من حيل وعمر هالرجال من ورة سوالف زعطوطتين يلعبن بشرفهن بجهل ..
اول مافتحت الباب سلموا ودخلوا ..
صارت عيونهم ع همس مكعورة نفسهه بزويه ..
اول ماشافتهم همس علا صوتهه بالبجي ..بعيونهه
نظرات خوووف يمكن ودهه تطب بالحايط او تبلعهه الكاع وتختفي اعرف شعورهه صعب تترقب مصيرك ..سويت الذنب ومنتظر الحكم هيج جانت وضعيتهه ..
باوعتلي جلنار خزرتني الادبسز ..ركضت ع اختهه حضنتهه وصارت همس تبجي بهستيريا ..
جلنار ..احجي شكو شصار حبيبتي ؟
همس ..علي عرف كولشي ..
ضربت ع خدهه ..
جلنار ..منو گاله ولج ؟
همس ..اني ..
جلنار وگعت وهي گاعده بالكاع مثل واحد خرّ وفقد حيله بلحظه ..جنت اراقبهن ..عين عليهن وعين ع ابوهن الي جان عبالك يعرف اكو شي مو زين بالموضوع فرغم عينه ع همس الي جانت تبجي بهستيريا بس ماتقربلهه ..
كعدت الرجال ع الجربايه يرتاح ..
ريگه يابس ..يمكن هالليله موت هالرجال ع ايد هالزعطوطتين ..
انطيته مي شرب كمع ورجعه ..
بنفاذ صبر كالي ..
خير يابه شصاير ..شبيهه جلنار تبجي ؟
انصدمت ..التبجي هي همس ..معقوله حته ابوهن ميفرق بينهن ..او هنه هيج سون حته بالتفاصيل والتصرفات ..يتقصدن لو ببراءة هلكد الشبه بيناتهن ..
لعد لاعتب عليه مافرقت بيناتهن وانطلت عليه لعبتهن ..
سولفتله كولشي ..شنو سوّن جلنار وهمس بالحرف الواحد ..
حسيته مصدوم هادئ زياده عن اللزوم وهنه يتباچن وصوت بجيهن يعلا كلما اتعمق بسرد التفاصيل لابوهن ..
مادافعن عن نفسهن ولاحاولن ينكرن ..
توجه عليهن ابوهن ..سألهن ..
صحيح الكلام الي گاله ؟
محد بيهن دافعت عن نفسهه ..سكوتهن كان كافي وبكائهن هو الجواب الواضح لسؤال ابوهن ..
انهد بيهن ضربهن اذاهن عفته براحته ..هي نار ولازم يطفيهه ..
من صار صوت صريخهن عالي رحتله وخرته عنهن ..
هديته شويه ..
عمي كافي الضرب ميفيد ..صغار وغلطن ..
ياصغار عمي ياصغار البگدهن فاتحه بيت واطفالهه بذيالهه ..
ليش هو العقل بالعمرعمي ..
شراح تسوي انت يابه ؟
مرتي تبقه يمي وانت عمي تاخذ همس ولاتحجي لاخوانهه ترة يكتلوهن ثنينهن .
خله يكتلوهن ..
لا عمي لا ..
يابه انه ممنون منك مافضحت بناتي ولا شهرت بيهن بس راح اخذهن ثنينهن واغسل عاري بيدي ..
صفنت عليه ..هالرجال الجبير هو وشيباته مكسورة عينه نزلن راسه بناته عينه ميحطهه بعيني ..
عندي خوات متزوجات وعندي اخت بعدهي ممزوجه خطرت ع بالي ..الستر ..ربي يستر ع بناتنه ..
جاوبته ..
عمي مرتي تبقه يمي اني اعرف شلون اتصرف وياهه وهمس يمك انت بعد ابوهه وبكيفك شلون تتصرف وياهه وياعمي فكر باختهن الجبيرة مزوجه ترة تتطلك وتروح بالرجلين ومالهه ذنب ..لاتدخل اخوتهن بالموضوع ترة السالفه تكبر ونهايتهه ابد مو خير .
سكت الرجال ..يمكن سمع مني واقتنع ..
جانت جلنار من بين دموعهه تباوعلي بخزر وبحقد ..مبين دتستمع لكلامنه ..
عمي كام وباسني براسي ..
محشوم يابه وماقصرت وفضلك ع راسي من فوگ ..
بست راسه وماعرف بشنو ارد عليه ..اعرفه مكسور وموقفه صعب الله يساعده ع مابلاه ..كتله ..رحم الله والديك عمي ..
اخذ بنته همس وطلع ..
جلنار اقوى من همس ..جانت تبجي ع بجي اختهه همس او يمكن الضرب اذاههبس طلعوا ابوهه واختهه من يمنه سكتت ..
عيونهه نظراتهه تتحداني ..
اعرفهه عنيده ومغرورة وقويه ..
ليش هيج سويت ؟
وجهتلي السؤال بعد فترة هدوء وهي كاعده ع الجربايه ..
التفتت الهه ..
لو ممسوي هيج شنو البديل ؟
اطلگج واخذ اختج ؟لو اطلكج وكلمن يروح لحاله ..وبليله عرسج ..شيگولون عليج ؟ اكيد بيج شي مو تمام لو شفت عليج شي وطلگتج ..تصير قضيه شرف وتنكتلين مو هيج ؟
هه!! عود انت بتصرفك هذا مسوي عليه فضل ؟
صفنت بوجهه ..عيونهه بعيوني ..صلفه عيون ..گمت عليهه ضربتهه راشدي لزمت خدهه مابجت ومانزلت عيونهه من عليه استفزني تصرفهه كتلتهه كتله ملخت شعرهه بيدي ولاتنفست بس ظلت مخليه اديهه ع وجهه مثل الي حمت وجهه ولاصرخت ولادافعت ولا كالت كافي ..
صرت اعصاب ..
تستهزئين حضرتك ؟
ولج راح اشوفج ايام تتمنين لو رايحه ويه وكاتلج ولاباقيه هنا وياي ..
مجانت بس لازمه خدهه وتباوعلي ..
عفتهه ورحت ..هنا عرفت الضرب مراح يجيب نتيجه وياهه ..
رحت للجربايه انطرحت من الجهه الثانيه خليت ايدي ع راسي غطيت عيوني بالي مشغول وبي الف حسبه وتعبان واريد انام وهي لسه متكومه بنهايه الجربايه بطرفها الثاني ..
كامت حسيت بحركتهه وخرت ايدي شفتهه مشت للحمام غسلت وجهه وطلعت ..
السويت بي غرفه نوم وهول وغرفه ثانيه:
بيهه سرير ابو نفر راحتله جلنار ..الجربايه جانت حديد وسبرنكات الجربايه تطلع صوت من واحد ينام عليهه عرفتهه نامت هناك ..
كمت شفتهه وين ولكيتهه مثل متوقعت ..شافتني جانت عيونهه حمر مبينه باجيه ..اي هي من هذا النوع ..قويه كدام المقابل او تتظاهر بالقوة وتاخذ حقهه ومن تكون وحدهه تبجي
بس شافتني صدت للجهه الثانيه انطتني ظهرهه ..
يابه ويطبج مرض ..
رحت قفلت باب السويت واخذت المفتاح كولشي يصير وكولشي اتوقع ماعرف نفسيه هالبشر ولاعندي فكرة شلون تفكر وشلون تتصرف واصلا هي طايشه وتصرفاتهه تصرفات طفله ..
رجعت نمت ع الجربايه ..هذا ملخص ليله عرسي ..هه!! خوش ليله تبشر بخيييير وحياة سعيده مديده ..
غطيت بنوم عميق ..
للصبح كعدت ع دكه تلفوني .. المتصل امي ..
باوعت الساعه 8:30 واحنه المفروض ب 10نفرغ السويت علمود لاينحسب علينه يوم ثاني ..
كمت من فراشي خابرت ع الرسبشن طلبت ريوك لان حييل جوعان البارحه نايم بدون عشا شويه وجابو الريوك ..
اندكت الباب ..
ع دكه الباب كعدت الخاتونه طلعت من الهول گتلهه ..طبي رجعي بين ما افتح الباب ..
طبت رجوعا للهول ..
حطيت الريوك ع الطبله كتلهه ..رتبي الريوك بين ما اسبح ..
رحت سبحت وطلعت لكيت الاكل ع حطيته بعده ع الطبله ..تتجاهلني ..تعاندني ..اعرفهه ..بسيطه ..راسج اليابس تكسيرة ع ايدي ..
كعدت تريكت ماصحتهه ..تولي ..
خلصت اكل ..فتت من يم الهول دا اريد الم غراضي وملابسي وابدل شفتهه مبدله وكاعده ..
رجعت باوعتلهه لابسه بنطرون اسود وقميص هم اسود ..تتعمد ..
هاي عود عليمن لابسه اسود؟
....
ماردت عليه ..تعاند وتتجاهلني ..تريد تفشلني ..
كومي بدلي ملابسج ..لبسي شي مستور ..
شفتهه ماتحركت من مكانهه ..
كلامي ماعيده مرة ثانيه ..
شفتهه زفرت بقوة وكامت ..
دقايق وصرت جاهز ..
القيت نظرة عليهه لابسه فستان محجبات طويل مستور لونه وردي فاتح وبي ورد جويتي والشال بلون الورد طالعه فد شي بس الوجه مبوز ومبينه ضايجه ومخنوگه ..
ماحجيت شي اشرتلهه كامت ..
اخذت الجنطه وباقي الغراض وطلعنه ..قفلنه باب السويت وسلمنه المفتاح لعامل الرسبشن وسيارتي بالكراج مال الفندق ..
صعدت الجنطه والغراض وهي صعدت بالصدر بدون ولاكلمه ..
رجعنه للبيت ..بيت اهلي ..كولهه جانت هناك باستقبالنه ..
امي وابويه واخواتي واخواني وعمامي وعماتي والخالات وولد العمومه كولهه موجوده مجموعين ببيت اهلي ديستقبلونه ..
من نزلنه من السيارة لزمت ايد جلنار وكتلهه ..
وجهج المعبس ماريد اشوفه ماكاتل ابوج اني ..ابتسمي وسلمي وسوالف المزعطه مالتج بطليهن وانو تحاولين تفشليني او تقللين من احترامي كدامي اهلي وكرايبي ادووس راسج برجلي سمعتي ؟.. لو افهمج بعد ..
عصرت ايدهه واصك بسنوني واني احجي وياهه وجنت صاد عنهم مطيهم ظهري واحاجيهه ..
ايدي اذيتهه ..كافي عوفني فهمت ..عليييي ..
وووجع ابتسمي ..اتصور تعرفين تمثلين ..اصلا بارعه ..
لمحتلهه ع الموضوع افتهمت قصدي صدت وجهه عني هديت ايدهه وتلكوني اهلي وكرايبي يباركون ويسلمون وعيني منهه وعليهه شفتهه مبتسمه شويه بس بتكلف بس ارجع واكول هذا طبعهه ..هي مغرورة ورافعه خشمهه مو بيدهه ..
اتفقنه من قبل الزواج نعيش ويه اهلي شكم شهر بين ميخلص بناء بيتي وقتهه ننتقل لبيتنه ..
غرفتي تصير بالطابق الثاني ..كوة خلصت نفسي من السلام والتبريكات صعدنه لغرفتنه ..بعدنه بالباب امي صاحت ..لاتتأخرون ذبوا غراضكم ونزلوا تريكوا ..جاوبتهه ..
صاار يووم ..
الظاهر اهل جلنار جايين من وكت وجايبين الريوك ورايحين قبل لانجي ..تصرف مقصود من عمي ابو جلنار علمود ميتواجه وياي لا هو ولا زوجته ..
اتفهم احساسهم ..حقهم ..فشله ..مكسورة عيونهم ..دخلنه غرفتنه ..
صعدت الغراض ويانه ..شفتهه فتحت الجنطه تريد ترتب الملابس بالكنتور ..
سديت الجنطه بنتر ..باوعتلي بعيون غضبانه تسألني شكووو ؟؟
مو وكت ترتيب هسه ..مو صاحونه ع الريوك ..يله ننزل سمعتي امي شكالت ..
عوجت حلكهه ..ورتبت شالهه ع المرايه وطوخت الحمرة عيني منهه ..گويه هالبنيه ..
ومشت نزلت كدامي ..نزلت وراهه ..
مجموعين كولنه سوة كرايب وحبايب كاعدين بالهول هولنه جبير ويسع الكل ومفروشه سفرة شطولهه كيمر وصمون وعسل وكاهي وانواع الاجبان وجاي وحليب ..
جان لازم اتصرف طبيعي كدام اهلي حته محد يحس بشي لزمتهه من ايدهه وجريتهه كعدتهه يمي بس عبوس وجهه فاضحنه عبالك مغصوبه ..
ضغطت ع ايدهه وصكيت سنوني وهمستلهه بعصبيه ..
ابتسمي لا اخربطلج وجهج ..
باوعتلي بسرعه ..عيونهه رصاصيات وساع محاوطتهن بخط كحل عريض طالعات يدوخن ..
ابتسمت لي مجامله كدامهم ..
كعدت امي يمي من الجهه الثانيه وجانت كل شويه تصد عليه تحاجيني لو تطيني لگمه ..
جنت اقرب الاكل من جلنار لان ماشفتهه اكلت شي گلت يمكن تستحي ومستغربه وناس هواي متعرفهم ..
اما امي ..فتصرفاتهه بحث اخر ..جنت اعرف بيهه متحب جلنار من فترة الخطوبه بس مو لهل درجه ..
صارت تدللني واحنه كاعدين نتريگ وكل شويه تطيني لگمه لو تحجي وياي
