جحيمي وناري
خلصنه محاضرات ورجعنه للبيت صعدت بدلت ونزلت اصب غدة وآيه وياي تساعدني وخالتي كالعاده ماتجوز مني ..
ماعرف شتريد بعد مني غدة وطبخت ياله رحت لدوامي ..
اكلت وغسلت مواعين وايه رتبت المطبخ واني صعدت لغرفتي تمددت شويه وبعدين طشرت ملازمي ومحاضراتي ع الجربايه ..
مانتبهت ع الوقت ظليت اگلب بيهن مرت ساعه طب علي ..
اني محتله الجربايه كولهه ..
صار ظله فوگ راسي وهو ظل يباوع يحوص يمكن يريد ينام ع الجربايه ..
گمت الملم بملازمي ..فرغتلهه جانبه من الجربايه سويتله مكان تمدد ..
ظليت اني اقرة محاضرات اليوم ..احس عيونه عليه يراقبني ..ماعرفت شلون اقرة ..
ماحب تأثيرة عليه ..يظل يباوع بصلافه ويوترني ماركز باي شي دا اسويه ..
اخذت ملازمي وكمت كلت انزل اقرة بالحديقه احسلي ..
من كمت رفعلي حاجب ..
هاشنو ضايقتج ؟
ع وين ؟
ابد ممشتهيه ولابخاطري اجاوبه ولا اباوع لوجهه كلما اتذكر الي سواه بيه الصبح مدري شيصير بيه ..
تجاهلته ..
اخذت ملازمي ونزلت للحديقه ..
كعدت ع المرجوحه وكلما اغمض عيوني اتذكره وهو نايم فوگ جسمي ويهمسلي ..ذوبي ..ذوبي ..اتفاعلي وياي ..
ينتفض جسمي ويكزبر جلدي ..اهز راسي احاول اطرد هالافكار من راسي ..
مو وضعيه هاي .. اريد اركز .. اريد اقرة ..اطلع من دماغي .. اطلع كااافي ..
ليس من العدل ان تذهب عني ولاتذهب مني !!!
في مستشفى ....
همس ..اليوم مثل كل يوم عادي رحت لدوامي بحكم اني خلصت معهد صحه فتعينت رأسا بالمستشفى ..
شغلنه محصور بوضع كانولات للمرضى وزرق ابر والعنايه بالمريض ونسويله الطبله مالته او نحضرة للعمليه هيج شي يعني ومرات شغلات كتابيه باصات ما باصات حسب المنصب او العنوان الوظيفي يعني وهو تماما نفس عمل الممرضه ..
اني اختاريت اكون في احتكاك دائم مع المرضى لان احب اساعه الناس واخفف عنهم الالم بالي اكدر عليه ..
ومرات الي يشوف مصايب الناس تهون عليه مصيبته ..شغلي واحتكاكي ويه الناس والمرضى بشكل خاص ساعدني انسه الي مريت بي من شهر واكثر ..
انسه الي سوته بيه اختي ..لا ماكدر احملهه كل المسؤوليه ..المسؤوليه اخليهه ع شماعه غبائي وثولي ..
من حبي نسيت رب العالمين ونسيت الحرام والحمدلله صحيت قبل لا اغط اكثر بالغلط والحرام ..
صح كانت العواقب وخيمه وتأذيت حيل بس لو مكمله لعبتي ويه اختي جان يمكن معايشه لليوم ..واني اطيهم الحق ..كتلي حلال ..
انطردت من اهلي ..خسرت ثقتهم واحترامهم ..مو مكسورة خاطر وجناح لا مكسورة كسر مينجبر ..الوم بنفسي ع كم الثول والغباء العندي ..
شجنت متأمله يعني ..من يعرف علي باللعبه ..يبادلني الحب لان كتله اني الي احبك لو يطلگ اختي ويتزوجني ..وين احنه قابل مسلسل تركي لو هندي ..
انتقل سكني لبيت اختي لان ابويه بعد ميريد يشوفني ولايريدني بالبيت ..
حقه ..فوكاهه تمرض ودخل مستشفى من ورايه ومن ورة اختي ..
جلنار بحث اخر ..حقدت عليهه لان استغلتني ..استغلت طيبتي ..استغلت حبي لعلي ..عرفت بيه مراح اكدر ارفض الهه اي طلب يتعلق بقربي من علي ..
اليوم .. يوم دواام اعتيادي ..جنت بالطوارئ مكاني المعتاد من يبلغونه انو راح تجينه حالات سواء حوادث او انفجار فنتواجد هنا ونصير تحت ايد الطبيب او الطبيبه المسؤوله خاف يحتاجون شي وعموما بعد معاينه الطبيب للمريض وطلب التحليلات اللازمه باقي الشغل احنه نسويه اوتماتيكيا ..
بلغونه بحادث ع الخط السريع سيارة ستاركس بيهه طلاب جامعه والظاهر اقسام داخليه وجايين من اهلهم لكلياتهم لان شجاب الطلاب ع الخط السريع واصلا الخط السريع سايد واحد وخطر وابو الستاركس فاقد السيطرة ع السيارة لان محصور بين سيارتين والسيارة الثانيه تصير عكسه بالاتجاه بالسايد الثاني فضاربهه ..
السيارة الثانيه عاليه ومابيهه بس شخص واحد ..
شويه ووصلت سيارة الاسعاف ..
دخلوا المصابين بيهم 11واحد والسايق والولد الي بالسيارة الثانيه ..اسعفناهم والحمدلله ماكو حالات وفاة اكثرهم كسور ورضوض ..
السايق متأذي دخلناه عمليات ..وسايق السيارة الثانيه العاليه فاقد الوعي .. عندة كسر بايده وجتفه ..
9ولد وبنات 2 الطلاب تحت الملاقبه تتراوح اصابتهم من طفيفه الى متوسطه الحمدلله رب العالمين ستر بس خطيه هي بس الهبطه كافي عليهم ..
الولد الثاني الي بالسيارة العاليه بقه من الصبح للظهر فاقد الوعي ..
لا اسم ولا هويه ولامبايل محد يعرف عنه شي ..
للظهر اجتي الشرطه محققين بالحادث ..
السايق طلع من العمليات بس بعده تحت تاثير البنج ماصحه ..
واحد من الضباط جاب هويه الولد الثاني وتلفونه ..
جنت اني موجوده ..
سمعته يحجي ويه الطبيب ..
الطبيب كاله الولد فاقد الوعي وخليناه تحت المراقبه منكدر نسويله شي هسه بس جبرناله ايده وكتفه ونراقب حالته خاف عنده نزيف داخلي منكدر نتصرف الا بعد مايصحى وهاي من الصبح لسه ماصحى وماكو اي معلومات عنه وعن اهله وشلون نوصللهم
الضابط طلع هويه الولد من جيبه والمبايل وكال لاطبيب ..
لكينه ذني بسيارته ..
بهالاثناء دك مبايل الولد ..
رفعه الضابط حجه ويه الطرف الثاني ..
كاله ..اني الضابط فلان ..صاحب هذا التلفون مسوي حادث من الصبح وهسه هو بالمستشفى الفلاني منو ويايه ؟؟
ماسمعت الطرف الثاني شحجه بس انسد التلفون ..
سمعت اسم الولد اثناء حجيهم ..
حمزة محمد صادق ..
الاسم مو غريب عليه ..
عبالك كلوب وانفتح بعقلي ..تذكرت .. علي محمد صادق ..شلون انسه هالاسم ..معقوله هذا اخوه لو تشابه اسماء ..
اتذكر عنده اخ اسمه حمزة ..
رحت للولد باوعتله جان وجهه مورم .. اكو شبه بي لعلي او يمكن يتهيألي ..ماعرفت الخبر اليقين ..
شسوي ؟؟
ماريد اتصل لجلنار گاطعه علاقتي بيهه رغم رحتلهه لبيت عيالهه بس هاله جبرتني اروح عيب من عيالهه ..
احسن شي اتصل بهاله اشوفهه وهي تتصل بجلنار ..
فعلا اتصلت بهاله وكتلهه صار حادث وصلنه مصاب فاقد الوعي وهيج اسمه شوفي هو نفسه حمى اختج لو مجرد تشابه اسماء ..
هاله ماجذبت خبر اتصلت ع جلنار ..ماردت ..اتصلت ع علي ..اكدلهه الخبر ..هو حمزة اخو علي ..جلنار .. بعدني برة حاولت اقرة ماكدرت ..
شويه وسمعت صوت عالي ..
عبالك وحده دتصيح ..
طبيت جوة ركض لكيت خالتي واكعه وايه وعلي ديصحون بيهه ..
جنت ااشر لايه شبيهه خالتي ..
كالتلي هسه اتصل علينه واحد حمزة من الصبح مسوي حادث وهسه هو فاقد الوعي بالمستشفى ..
ضربت ع حلگي .. هاي المخافي والتايهات ..
خالتي هم تخربطت ..
علي ركض صعد فوك بدل واتصل ع ابوه واخوانه الكبار حيدر وحسين ونزل اخذ امه بالسيارة وشكد لحت عليه ايه تروح وياه ماقبل ..
ظل بالنه يم خالتي وحمزة خاصه منعرف عن حالته شي ..
فرغ البيت علينه وايه ظلت تبجي ..صرت اواسيهه حضنتهه وحاولت اهدأهه .. بس ظلت تبجي ..
....................
بالمستشفى ..
همس .. قرب دوامي يخلص .. بس بقيت قريبه من المريض الاسمه حمزة مااستعاد وعيه ومن ما اتصلت ع هاله الي بدورها اتصلت ع علي واكدلهه الخبر ..
دقايق ولكيت هاله وزوجهه ضرغام بالمستشفى ..
استغربت اهل حمزة لسه ماوصلوا ..
رغم صار تقريبا نص ساعه من بلغوهم ..
من وصلت هاله زوجهه دخل شاف حمزة ماعرف شنو علاقته بحمزة ..
سألت هاله شعجب وصلتوا قبل اهل الولد رغم بلغهم الضابط بحالة ابنهم من زمان ..
كالتلي ..لا ..علي وامه هنا بس بالطوارئ عفناهم ام علي تخربطت ضغطهه صعد من سمعت الخبر ..
سكتت من جابت اسم علي ..غصه بگلبي ..زوج اختي صار وسمعت من هاله زواجهم تم ..لازم ينشال من گلبي وعقلي ..
لعد ضرغام منين يعرف حمزة ؟
هاا مو جانوا جيران من قبل لايشيلون اهل ضرغام لغير منطقه ،حسين و حيدر اخوانهم الكبار اصدقاء ضرغام جانوا وصدفه بزواج جلنار شافهم وتواصل وياهم ورجعت توطدت العلاقه ..
هااا افتهمت ..
ابن الحلال بذكرة ..
حيدر وحسين اجوي ناحيتنه وكدام رجال جبير يمكن هو ابوهم ابو علي ..
اجوي سلموا يعرفون اختي هاله ويمكن عبالهم اني جلنار ..
دخلوا يطمنون ع حمزة وحجوا ويه ضرغام .. اتوقع سألوا ع اخوهم علي وامهم لان هو الي اتصل عليهم شعجب لسه ماوصل فكللهم ضرغام موجود بالطوارئ لان الوالده متخربطه صاعد ضغطهه وشكلولهه مغذي ومدرر بين مينزل الضغط ..
حمزة لسه تحت المراقبه وفاقد الوعي ..
اني خلص دوامي ..
يمكن اكو جان امل بداخلي ماعرف شلون اوصفه ..اعرف هو صار زوج اختي بس جنت اتمنه اشوفه او المحه بس ثواني ..
رحت نزعت صدريتي وعدلت حجابي واخذت جنطتي وطلعت ..
متقصده اطلع من باب الطوارئ بلكي بعده موجود ..
دا اسد الباب والباب جان زجاجي .. وهو وخر البرده جانت يمه سديه امه نايمه عليهه معلكيلهه المغذي ..
يمكن تفاجئ من شافني ..هيج عيوني فسرت النظرة الي انرسمت ع وجهه اول ما لمحني ..
نصيت اني وهو بغباء كام يحرك راسه باتجاهات عشوائيه عود ما شافني ..تمام وصلت ياهمس هو هذا الي جنتي تريدينه ..
سديت الباب وانطيته ظهري ..لزمت صدري جهه كلبي .. فركته ..هالمكان يأذيني يوجعني ..هو لو وجع عضوي وبجسمي جان رحت لطبيب وداويته بس هو شي محد يحس بي ..شي يخنك ..عايشه اني بس معايشه ..مثل ميكولون على قيد الموت ..
عصرته حيل مكان گلبي ..عيني صارت ع الخاويه مال مخلفات الطبيه جان يسحب بيهه عامل النظافه علمود ياخذهه لمكان بعيد ويتلفهه ..
تمنيت اشلع هالگلب واذبه بهالحاويه علمود ينحرگ ويتلف ولا يرجع يدوك لشخص ميستاهلني .. اي ميستاهلني .. عقلي گال كلمته ..عقلي هو الي اريده يحكمني منا وهيج بعد ..
عصرت عيوني ماريد ابجي .. اريد اصير قويه ..ماريد احد يدوسني بعد شناقصني وما انحب ..شناقصني وبسهوله يكسرولي گلبي ..
يمكن ظليت واكفه دقيقتين او تلاثه بس حجم الالم والوجع والهم الحسيت بي يعادل سنه ونص حب لشخص ورة ذاك الباب الزجاجي وورة ذيج البرده ..
شمرت كولشي ورايه من هاللحظه ..
قويت روحي ومشيت خطواتي واني اتنفس هوة الحريه ..
حريتي من حب ضايع ماريده بعد .. استاهل احسن منه ..
كسرت قيودي بايدي ..
ماريد انكسر بعد ولا اريد اصير تحت رحمة بشر بعد ..
للحكايه بقيه ..
