جلنار..خابرت هاله وكالتلي باجر راح تجي وصدفه باچر جمعه فكتلهه معزومه ع غده يمنه كالت لا عيب من عيالج اجيج عصريه ..
هيج اتفقت وياهه وبلغت علي وهو بلغ اهله ..
صار ثاني يوم وتحضرنه ونزلت سويت كيكه وحسيت بالنشاط والحياة دبت بيه فجأة وآيه وياي تساعدني حسيت نفسيتي تغيرت وعلي كولشي احتاح يجيبلي من عصاير من حلويات وشغلات ثانيه .
صعدت لغرفتي بعد الغده سبحت ومكيجت وشسورت ورتبت نفسي ..باوعت لروحي بالمرايه حسيت بالرضى ع شكلي وترتيبي وجمالي ..
صار العصر واجتي هاله هي وزوجهه وهمس ..
علي استقبل زوجهه لهاله ضرغام وخواتي واني وخالتي وايه وحمواتي الاثنين الكبار المزوجات ناديه وتبارك هم جانن موجودات ..
سلمت ع هاله ..هاله انسانه محبوبه وملگه اجتماعيه ومرحه ولسانهه حلو گلبت جو البيت گلاب من اجت وغيرت نفسيتي من كآبه وجو متوتر لفرح وضحك وتحشيش شتان بيني وبينهه كولهه كالت هيج وكولهه حبتهه خاصه حمواتي خوات علي المزوجات ..
من شفت همس كوة سيطرت ع دموعي ..احس بالذنب تجاهه ..
ندمانه ع الي سويته ..اني الي قنعتهه تمشي وياي بالي سويته لان جنت اعرف بيهه تحبه من جان طالب ماستر لان هي دخلت للمعهد قبلي بسنه واني رسبت بالسادس ومن بعدهه دخلت كليه قانون وصرت كدام علي وجانت هي مرحله ثانيه معهد بس دائما تجيني واعرف شنو سبب جيتهه بس هو ابد مانتبهلهه او يمكن شافهه وعباله اني بس مجان يدري احنه توأم ومافرق بينه ..
بوكتهه هو خلص الماستر وتعين استاذ جامعي محاضر ..
حضنتني وباركتلي ببرود وابتعدت ..اني انخرست ..اريد اهمسلهه اسفه مانطقت بولا حرف ..
نظراتهه بانكسار .. يمكن تكرهني ..يمكن مغصوبه ع الجيه ..
جانت متغيرة طريقه معاملتهه اليه ..مالومهه وماعرف شلون اصلح الوضع ..
هاله تعذرت من خالتي وكالتلهه بس ابويه تتحسن وضعيته يعزمونه اهلي عدهم ..
للمغرب هاله وهمس راحن اخذهن ضرغام ..
حسيت بوحشه من بعد روحتهن ..مشتاقه لخواتي وماشبعت منهن ..
اجاني شعور بالكآبه اريد ابجي ..
حضرنه العشه اني وايه وحمواتي ويانه وازواجهن وهوسة جهالهن ..
تعشينه كولنه سوة ..
كان جو البيت حلو ..احب هوسه الجهال ماحب البيت الهادئ الكئيب رغم اني هادئه بطبعي ..
علي ويانه وخالتي هم ..اعرفهه من زمان تكرهني ومتطيقني يمكن تشوفني دون مستوى ابنهه يمكن جانت رايدتله وحده ثانيه كرايب او غريبه وعلي اختارني وفضلني الي ..
ظلت ببالي الحركه الي سواهه من گلي خابري هاله تجيج ..حفظلي مي وجهي گدام اهله خاصة كدام امه حته لحد يحس بشي او يمسني بحجايه ..
واني اصلا حته كلمه شكرا ماكتله ..
حته من سولفت لهاله انو هاي فكرة علي كالت شكد اكابري وحباب ووصتني عليه اداريه واغير معاملتي وياه للاحسن ..
اليوم بالعشه عمي جان موجود واصغر حمويني حمزة الي دائما مسافر ويه ابوه رغم همه دائما ممتواجدين ودائما بسفر حته كل الي بالبيت متعودين ع هالشي بس اليوم لا جانو موجودين وسوولنه جو حلو عمي شخصيته قويه اسلوبه حنين وجهه ضحوك عكس خالتي كولشي بيهه نكدي ..
خلصنه العشه وساعدت البنات بالتنظيف والمواعين ..
صعدت لغرفتي هلكانه من التعب بس رغم هذا جان يوم ممتع وحلو ..
سبحت وبدلت ملابس بهاريه للنوم صعد علي بس باوعلي ودار وجهه ..
ظليت افكر بهمس ونظراتهه اليه ..شعور بالذنب تجاهه ينخر بروحي نخر ..
احسن حل جان انو تاخذهه هاله يمهه الى ان يتحسن الوضع ..
جلنار ..ظل بالي مشغول من يوم تزوجت لسه مسامعه صوت امي يتصل عليهه علي دائما بينهم تواصل بس ابد متقبل تحجي وياي ولاتقبل اجي لبيت اهلي ..
وماعرف شلون راح ترهمهه هاله وتقنع اهلي يسوولي عزيمه زواجي لان فشله من عيالي ..
كل هالامور جنت سرحانه بيهه وافرش بفراشي وافكر ..
جبت الدوشک ورجعت اجيب المخده والبطانيه لگيت الفراش مشيول ..
صفنت مو هستوني جبت فراشي وين راح ..
حاجاني علي ..
كافي بعد ممنوع تنامين جوة ..
اشرلي ع الجربايه ..هذا مكانج ..
ماريد انام ع الجربايه ..مرتاحه بمكاني ..
بلا عناد واسمعي الكلام ..ماعيد الحجي ..
كعدت ع الجربايه تنهدت ..
انت شرايد مني ؟
كل خير ..
من وراك انت ؟.. يجي خير ؟ ماتصور ..
عرفني ع شنو اقصد .. صح جنت ناويه اشكرة ع تصرفه وياي ويمكن يلين اسلوبي وياه بس ماعرف لسه حاقدة عليه ومن يصير كلام بيناتنه احاول بشتى الطرق أأذيه بالكلام او استفزة او اوجهله اهانه اي شي بس المهم اضوجه ويشفى غليلي منه ..
صفن بوجهي ..حاجاني ببرود ..
ترة الي سويته اني ردة فعل للي سويتيه
انتي ..
سكتت بعد مارديت ..
رجعت بطانيتي والمخده لمكانهن وذبيت جسمي ع الجربايه بس قريبه جدا ع طرفهه يعني قريب الحافه ... تغطيت ونمت ..
ثاني يوم الصبح كعدت لكيته نايم ع صفحته وجهه عليه انفاس دافيه تلفح وجهي ..
ركزت بتفاصيل وجهه .. لحيه خفيفه كامله محدده شامه بخده شوارب انف عريض متناسب ويه وجهه عيونه شاگات الوجه كبار مغمض جان ماشفت لونهن عن عن قرب ..شفايف ورديه غامقه ورديه غامقه نزلت عيوني ع تحت حنچه بداية ركبته ..تفاحة آدم تتحرك بوضوح مثل واحد ديبلع ريگه ..يعني كاعد ..بفزع انتقلت عيوني لعيونه بعدهي مغمضه عيونه بس البؤبؤ داخل الجفن يتحرك تأكدت منه گاعد مو نايم ..
رأسا وخرت البطانيه وكمت من فراشي ..
طبيت للحمام غسلت وجهي ومن طلعت شفته بالمرايه بعده مغمض بس وجهه مبتسم ضحوك ..
سوالفه مو ببالي ابد ..يمكن لان كلبي مو يمي كلبي امنته عد انمار ابن عمي .. اي بعدني احبه ..واريد احافظ ع نفسي علموده ..ماريد يتقربلي علي ..اريد يمر شكم شهر واتطلك منه ..
اكيد اذا صرت مطلقه وخطبني ابن عمي .. اهلي مراح يرفضون ..
هيج جنت افكر واحضر بالريوك ..مبتسمه ونفسي مفتوحه للحياة ومزاجي حلو ..
ام علي ..شعجب ؟ كاعده من وكت والضحكه شاگه الحلك ..
رأسا عبست وجهي حته سلامهه من الصبح يغث مدري شبيهه هالمرة وياي ..
جلنار ..ها خالة صباح الخير ..عادي خاله يعني دا اسوي ريوك شكو بيهه ..
ام علي ..اي هيج تعودي كعدي من الصبح يوميه وسويلنه ريوك ..
جلنار ..ان شاء الله خالة ..هو هم هيج لان خلصت العطله منا وهيج راح ابدي اداوم ..
كامت تعوج بحلكهه وتكولي ..ايييه دوام ..
سويت الجاي وحضرت الكوابه والشكر والجبن وسلگت بيض ورتبت السفرة ع ميز مال اكل بالمطبخ ..
اني عادتي من احضر الكوابه ع العدد احط شكر الهن كولهن والي يريد يصب جاي شوكت ميعجبه يصب بالنسبه اليه ضفت حليب لان احب جاي حليب ..
واسوي لفة جبن واصب لنفسي وآكل ..
جنت دا اصب جاي اليه شلت عيني لكيت علي بباب المطبخ ..
ظل يباوعلي نصيت اكمل صب الجاي خاف انجوي ..تقدم ناحيتنه ..
صباح الخير ..
اني وخالتي .. صباح النور ..
جلنار ..تتريك ؟
علي ..اي صبيلي ..
صبيتله جاي ..
خاله اصبلج ؟
اي اي لعد شمنتظرة ..
صبيت لخاله وكعدت اتريك ..شويه وبزت الجاي خالتي اني بصراحه فزيت من ردة فعلهه ردت اشرگ حته حرارة الجاي وحليب الي جنت اشربهن لفحت شفتي ولساني انجويت ..
خالتي ..من ثول اي والله ..شنو هذا جاي لو عسل ..مو عندي سكر شنو تريدين تموتيني .
باوعت لعلي ردت اشوف ردة فعله جان صافن عاكد حاجبه يباوع لامه من شافني انتبهتله نصه ع الاكل كمل ريوگه ..
صح انهضمت وانحرجت من صياح امه عليه وغلطهه بس الحمدلله مابجيت ..
كتلهه ..اعتذر منج خاله مادري بيج عدج سكر ..
كمت من السفرة انسدت نفسي ..
خالتي ..ها وين ؟
جلنار ..شبعت خاله الحمدلله .
خالتي ..تتزعل الخاتونه ..مو عاجبهه ..هي بس هاي ظلت ..
اني طلعت من المطبخ ..
علي ..شفت امي شلون عاملت جلنار ..كرهت الطريقه التي عاملتهه بيهه وبدون سبب يعني هي البنيه مقاصده شي ولاتدري امي عدهه سكر قابل متعمده ..
جلنار باوعتلي نظرة فهمتهه ..مثل ساعدني .. بس نصيت ع اكلي ..مااطي بامي كدامهه وتتقوة ..سكتت .. هي كامت كالت شبعانه واعرفهه غير اللكمتين ما اكلت ..
يوم ليش دتعاملين البنيه هيج ؟
فاهيه واني ماطيق الفاهيات ..
فاهيه علميهه ..موهيج تفشليهه وتصيحين عليهه ..
وانت شدعواك واني شحاجيتهه وهيج انت ضجت ..ماصارلهه شهر يمك وهيج غيرتك ع امك ..
اهوووو ..بدينه ..يابه لافزعت الهه ولا غيرتني ..بس اسلوبج ابد محلو وياهه ..
اووي عيني اذيت.
مشاعرهه ..متكولي منين جبتهه اليه ..
ضجت حيل ..امي هذا طبعهه ..مايعجبهه العجب ..بس نفسهه وبس ..حته زوجات اخوتي شردتهن بليله ظلمه وقليل يجونه اخواني ومرات يجون بدون عوائلهم من وراهه لان مو بس تسوي مشاكل ويه زوجاتهم متحب هوسه اطفالهم ..
رجعت صعدت فوك لغرفتي ..
طبيت لكيت جلنار فاتحه الكنتور وترتب بالملابس ..
مريت من يمهه كتلهه ..
افوت اسبح الكاج محضرة ملابسي ..
ذبت البيدهه وراحت جابتلي خاولي وملابس اخذتهن ودخلت الحمام سبحت وطلعت ..
لكيتهه محضرتلي ملابس طلعه وكاعده ع الجربايه ..شويه شويه دتتعود ع طبعي ..
كعدت قريب عليهه انشف بشعري ..
حسيت عدهه حجايه وياي ومتردده تكولهه ..
التفتت الهه ..صارت عيني بعينهه ..كولي شعندج ؟
ماعندي شي بس ردت اكولك شكرا .
ع شنو ؟
لان خليتني اخابر هاله حته تجيني البارحه .
هااا اي سهله ..
كامت لزمتهه من ايدهه وكعدتهه ..
رفعت راسهه وعيونهه عليه ..
العصر حضري نفسج ..نطلع ..
وين ؟
كدام اهلي نكول تروحين تشوفين ابوج .
الضحكه ترست وجهه ..
صدوك حتوديني لاهلي اشوف بابا ؟
لا امج متقبل ..نروح اي مكان شكم ساعه ونكول رحتي شفتي ابوج واتطمنتي عليه ..
رجع وجهه العبوس ..
لاتضوجين ..كولشي اله حل ..
كامت النكديه ورجعت ترتب بكنتورهه ..
بدلت ملابسي كتلهه ..
اروح اشوف العمال وين وصلوا بالبناء ..
باوعتلي ونظرات عيونهه حزينه بس بكبرياء ..متريد تبينلي هي مهتمه ومتريد تبين ضعفهه وانكسارهه ..كولشي صار من ايدهه ..
كالتلي الله وياك ..
طلعت ..
العصر بدلنه وطلعنه سوة ..جانت جلنار مضايقه وضايجه ..
اخذتهه للكورنيش صفيت السيارة هناك وظلينه كاعدين داخلهه ..ساكتين ونتفرج ع الناس الجايه والرايحه والعشاق ..
اخذت تلفوني ونزلت ..اتصلت ع ام جلنار حجيت وياهه وطلبيت منهه تحجي ويه جلنار لان محتاجتهه ..احسهه مكسورة ومتدمرة ع فراك اهلهه ..
يمكن هاي افضل عقوبه صارت الهه انو اهلهه نبذوهه ..
بعد محاولات قبلت ..رجعت صعدت بالسيارة واطيت الفون لجلنار ..كتلهه ..
امج تريد تحجي وياج
فتحت عيونهه متفاجئه ..
صدوك علي ؟
هزيت راسي اي ..
اخذت الفون مني وكالت برجفه وتمتمه ..
الوو ..
هلو ماما شلونج ؟
هذا كل الي گدرت تگوله جلنار ..
ع طول باقي المكالمه امهه ظلت ترزل بيهه وتحجي عليهه وتغلط ..
اشوفهه بس ساكته مترد وكوة تبلع ريکهه والدموع تجمعت بعيونهه بس رمشت جرت الدموع الجانت محبوسه بسكوت تمسح دمعه بسرعه خطف تنزل الثانيه بهدوء ..
جان لازم تتحمل هالكلام وهالرزاله ..هالمواجهه ..
سدته امهه بوجهه بدون ولاكلمه وداع ..
رجعتلي الفون وهي تنشف دموعهه عبالهه ماشفتهه من بجت لان صاده وجهه ع الجامه القريبه منهه بس عيونهه حمرر ..
ورة فترة قصيرة من المكالمه ساد السكوت كسرته بكلامي ..
انتي ليش هيج سويتي ؟
باوعتلي بشبح نظرة متفاجئه من سؤالي يمكن ماتوقعته مني ..
جاوبتني بثقه ..
لان ماريدك وغصبوني عليك ..
صفنت بوجهه ..الصلافه الي شايلتهه مموجوده عد بشر ..
انت ليش دتساعدني ؟ ليش متطلكني ؟
سكتت ماعندي جواب ..
ظليت اباوع كدامي للفراغ مو لشي معين .. يمكن سرحت ..
دگ فونهه ..طلعته بلهفه يمكن عبالهه امهه رجعت اتصلت بيهه ..
شفت الاسم مكتوب أنمار ..سوته صامت وكلبته وضمته ..
منو هذا ؟
ابن عمي ..
شيريد منج ؟
ديباركلي اكو غيرهه ..
وليش مرديتي ؟
مالي مزاج بعدين ..
تمام ..نرجع للبيت ؟
كيفك ..
شغلت السيارة واخذت عشه ورجعنه للبيت ..
جنت افكر بالطريق انو عطلة نصف السنه خلصت ومن باجر راح ابلش دوام الصبح بالجامعه تدريسي والعصر بالمكتب .. وماعرف جلنار تداوم لو لا ..
طبيت للبيت ماكو احد بس آيه ..امي كالعاده رايحه لبيت خالتي ماخذهه ابويه ..
صعدت جلنار فوك تبدل ملابسهه عيني منهه ..
تلفونهه بيدهه وشاك ابن عمهه هو نفسه الي جانت تحبه اتصل عليهه ..
انزعجت حيل اذا اكو احتماليه انو جلنار كذبت عليه ..
صعدت وماخليتهه تحس بخطواتي ..
صرت ورة الباب ..مو من عادتي اتسمع ولاثوبي ولاعمري سويتهه بس وكفت ورة الباب واتسمعت ..
دك فونهه مرة ثانيه ..
هالمرة ردت ..
الوو ..
شلونج جلنار ؟
زينه الحمدلله .
مبروك .
جلنار ..لحظات سكوت قاتله ..عبالك الدنيا فرتني فر ماحسيت اني بوعيي ..
ماعرف شنو احساسي بالضبط من سمعت صوت انمار ..
جاوبته ببرود عكس الي بداخلي تجاهه والنيران الي تسعر بكلبي ..
الله يبارك بيك ..
سكت واني هم سكتت ..
ماعندي كلام ولاعندي قدرة ع الكلام انربط لساني وماعرف ليش متصل عليه ..
سمعت صوت تنهيده زفرهه بقوة ..
خابرتچ علمود اگلچ ابريني الذمه ..
استغربت كلامه ..
ع شنو ابريك الذمه ؟
بعدين تعرفين ..بس ابريني الذمه ..
تمام ..محتاج شي مني بعد ؟
ها ..تروحين ؟
اي ماگدر اطول وياك ..صرت مررة متزوجه .
من كلت هالكلام احس روحي دجيت نفسي بسجينه قبل لا ادج السجينه بي ..
انفتحت عليه باب الغرفه ..علي ..
للحكايه بقيه ..
