طلعوني من غرفة العمليات وانا لسه في غيبوبه ما واعيه بالحصل وركبو لي درب الدكتور جا ماري قال لـ حسام تعال معاي المكتب دقيقه حسام لحق الدكتور اتكلم معاهو وجا راجع امي قالت ليهو دايرك لييه شجن بتي عندها شنو حالتها خطره يعني 😢 قال ليها بعد الشر عليها ما عندها حاجه قالت ليهو طيب وشك مالو مخطوف كده قال ليها من الخلعه بعد نص ساعه فتحت عيوني لقيت هديل قاعده جنب راسي وتبكي قلت ليها هدول حبيبتي انا كويسه بطلي بكا جات حضنتني حسام جا قال ليها هديل براحه عليها بعدها جوني خالتو نوره وامي سلمو علي في راسي وخدي وحسام جا قعد جنبي في السرير قلت ليهو بصوت رايح من التعب حسام عطشانه خالتو نوره قالت ليهو امشي جيب ليها مويه عاين للساعه قال ليها الدكتور قال ما تشرب قبل ساعه مرت نص ساعه وفضل نص ساعه قال لي اصبري شويه وانا ريق ابلعو ما عندي قلت ليهو ما قااادره 😭 قال لي طيب دقيقه طلع جاب مويه وجا بقي يبل اصبعو ويمررو يرطب بيهو شفايفي قلت ليهو حسام انا حلقي الناشف ما شفايفي اديني جغمه واحده بس قال لي شجن استحملي قربتي فضل 20 دقيقه هزيت ليهو راسي لااااا عايزه اشيل منو باقة المويه زحاها مني قال لي شجن كده ح تضري روحك طيب دقيقه شال الطرحه حقتي طلع غسلها بمويه وجا قال لي ح اغطي بيها وشي بترطب عليك حبه وفعلا ختاها في وشي امي قالت ليهو بس كده مع المكيف بجيها التهاب قال ليها ان شاء الله ما بجيها بس كده بتساعدها في العطش لم الهواء يدخل ليها بالطرحه بتحس برطوبه وفعلا والله ساعدتني كتير وكل ما الطرحت تنشف حسام بشيلها يبلها لحدي ما الساعه تمت بعد شربت المويه يا دوووب وعيت وبديت اسأل من الحصل كلهم قالو لي دي من الوقعه جيت اقعد في السرير حسام جا سندني وهديل ختت المخدات ورا ضهري قلت ليهو حسام قال لي حياتو لحسام قلت ليهو الدم داك كان شنو طيب 😢 قال لي جرح صغير واتعالج ما تاخدي في بالك ارتاحي وهديل فضلت قاعده معاي وتونس فيني
بعد مسافه حسام قال لينا الحمد لله انتي وهديل ما كنتو قاعدين معاي في بيت واحد كان صدعتو بي بالونسه حقتكم دي هديل قالت ليهو والله نحن لو في زينا تاني اتنين كان السودان اتعدل قال ليها بالله اها وانتي يا شجن ما عايزه تردي وتقولي لي حيوان ابتسمت ليهو جا زح المخدات من ورا قال لي بعد ده ارقدي قلت ليهو لا عايزه اقعد قال لي كفايه كده قعدتي كتير رقدته خالتو نوره قالت راجعه البيت حسام قال لي ح اوصلهم واجي مسافه خالتي ساميه قاعده معاك قلت ليهو تمام خالتو نوره ودعتي وقالت لي بجيك راجعه بكره 😘 قلت ليها تمام بعد طلعو امي جات قعدت جنبي قلت ليها انا عندي شنو بالظبط سكتت قلت ليها انا عارفه وما شافعه عشان تغشوني وتقولو لي من الوقعه عندي مرض كعب قالت لي تبري من المرض الكعب قلت ليها لو ما كده طيب كلميني والله برضى بالقضاء والقدر قالت لي والله كنت حامل بس ربنا ما كتب ليهو يعيش طبعا اتأثرت ودموعي نزلت بس ما لدرجه اني اتصدم وانهار احتمال عشان في بدايتو وما لحقت اتعلق بيهو قالت لي ربنا ح يعوضك ان شاء الله خلي ايمانك قوي قلت ليها ونعم بالله
