~جيت راجعه من الجامعه منتهيه من التعب لقيت خالتي زينب جارتنا قالت لي بت ساميه مالك صاره وشك كده زي الميت ليك زول قلت ليها صاره من تعب الجامعه وزحمة المواصلات قالت لي هسه كان عرستي ود نفيسه ما كان ارتحتي من الجامعه دي بس قلتي عايزه تقري يلا خمي وصري قلت ليها نفيسه منو الواحده دي بري يا يمه مالي ومال وجع القلب عشان نفيسه تصبحني بدقه واختو تمسيني بدقه بري اخير لي جامعتي دي صره جامعه مضمونه ولا عرسه مهيونه قعدت تضحك قالت لي صدقتي والله قلت ليها بس انتي كان جبتي ليك ولد عسل زيك كده وعرستي لي مش كان اخير من بناتك الـ ما منهم فايده ديل قالت لي هسه بقو ما منهم فايده تدخلو وتمرقو سوا النصل البيت عشان اكلمهم ليك قلت ليها اي والله كلميهم غير مكسبني سيئات وشغالين نقطع في باقي البنات ما عاملين لي حاجه ولأ اقول ليك اول خلي عرس ناس محاسن ينتهي عشان ما بلقي زول اقطع واعلق معاهو غيرهم وبعديها كلميهم اليحاربوني قالت لي بري منك الله يجازي محنك وصلنا البيت ونحن بنتونس قلت ليها اتفضلي قالت لي مستعجله والله امك قبيل لاقيتها دخلت البيت قابلت امي سلمت عليها قلت ليها داخله الغرفه انوم مصدعه ما تصحيني اتحممت ونمت قريب المغرب جات داخله امي صحتني يا بنت يا شجن قومي خلاص كفاك نوم المغرب قرب يأذن .. يا امي انا ما لحقت نومت عشان تصحيني قومي بعدين تاني ما بتقدري تنومي وهسه عليك الله دي غرفة بنت قلت ليها هسه الغرفه دي مالهاقالت لي الهدوم المجدعه في الكرسي دي غالبك تلميها وجزمتك الفي نص الغرفه دي وبعد ده كلو تقولي لي مالها وده غير شنطتك الجادعاها في السرير غايتو الله يصبرني عليك قلت ليها اعمل شنو بجي من الجامعه وما بصدق اصل السرير من التعب وبعدين في وحده عندها بنت زيي بتقول الله يصبرني قالت لي كان جبت ولد بدلك كان اخير لي بس استغفر الله نطيت قعدت في نص السرير قلت ليها والله كان عمل ليك وجع قلب غير يسجر ويسف ويسكر ما منو فايده بس قولي كان تجيبي بنت تاني زيي كده قالت لي انتي بنت واحده معزباني اجيب التانيه تدخلني التجاني الماحي قلت ليها الله يسامحك بس احب اقول ليك سمع اضاني دي نسوان الحله كلهم بقولو اريت شجن لو بنتي ولأ مرت ولدي قاطعتني قالت لي سجمهم والترابه في خشمهم كانو بقولو كده قلت ليها الله يسامحك يا نبع الحنان انا زاتي ماشه لأبوي حبيبي طلعت من الغرفه لقيت ابوي فاتح التلفزيون يحضر في الاخبار قعدته جنبو قال لي اخيرا صحيتي قلت ليهو البسمعكم انت وامي يقول نايمه نوم اهل الكهف قعد يضحك امي جات قعدت قالت لي قومي اتغدي واعملي لينا معاك شاي قلت ليها جيبي من الاخر وقولي لي قومي اعملي الشاي دخلت المطبخ عملت الشاي وجيت قلت ليها اها هسه كان انا ولد الـ كان ح يعمل ليك الشاي منو ابوي قال لي ده كلام شنو قلت ليهو اسأل مرتك قالت لي خلاص بقيت مرتو تاني تعالي شيلي مني قروش وقولي لي ابوي ما اداني ابوي اتخلع قال لي شجن انا ما قاعده اديك مصاريف قعدت اضحك قلت ليهو بتديني بس زيادة الخير خيرين اتلفت علي امي هسه في داعي تفضحيني كده يا نبع الحنان اهاااا تاني ح يقطع عني المصروف ابوي قال لي معقول اقطعو منك انا عندي كم شجن قلت ليهم ربنا يحفظكم لي ويديكم لي طول العمر امي قالت لي ويخليك لينا قلت لامي مافي قرشين بمناسبه الدعوه الحلوه دي ضربتني قال لي بتاعت مصالح قومي من جنبي وعدا اليوم اصبحنا الصباح واتجهزته للجامعه ودي اول سنه لي وكنت فرحانه بيها نظام برلومه وكده كنت مغشوشه فيهاابوي قال لي انتظريني اوصلك قلت ليهو لاااا اصلا انا اتأخرته امي قالت لي ربنا يوفقك قلت ليها دي احلي دعوه بستهم في راسهم وطلعت وكـالعاده واقفه للمواصلات لم رجلي وجعتني والمحاضره باقي ليها نص ساعه وحالتي الماديه ما بتسمح لي اوقف امجاد حالتنا الماديه عااااديه او ممكن تقولو وسط بس الحمد لله ابوي موفر لي كل متطلباتي وكنت بساعدو بـ انو احتياجاتي كلها كانت علي قدر الامكانيات ما من النوع المتطلع البيطلب حاجه صعبة المنال واخيرا وصلت الجامعه والمحاضره شغاله دخلت هديل اشرت لي اقعد جنبها دي اعز صحباتي او اختي الـ ما ولدتها امي قعدت قالت لي اتأخرتي مالك قلت ليها المواصلات زي الزفت بتسأل فيني كده الدكتور شافنا قال لي شجن جايه متأخره وكمان بتتونسي انتي و هديل امشو تمو ونستكم بره قلت ليهو والله ما قاعدين نتونس بس كنا قاطعني قال لي من غير مناقشه يا ريت تطلعو عشان انا اقدر اواصل المحاضر حيوان خلاااص طلعنا بره يعني الليله اليوم باين من اولو قلت لـ هديل ارح الاستراحه ولأ الكافتريا قالت لي انتي جاده خلينا هنا لو حسام شافنا ما بريحنا ...حسام اخوها لـ هديل سنيرنا اكعـب حاجه تكوني انتي واخوك في نفس الجامعه ...#يتبــــع
