#زواجي_مجرد_تضحيه
الحلقة التاسعة عشرا
للكاتبة ملاك.
طلع قصي وانا في لحظه ضاعت كل القوة يالي عندي قعمزت ع الارض وضميت رجليا وقعمزت نبكي ....لحدما طق الباب نضت بسرعه للحمام مسحت دموعي وساويت حوايجي وطلعت
انا: تفضل
وفتح الباب وخش زكرياء
زكرياء: السلام عليكم
انا: وعليكم السلام
زكرياء: اسف جبت في وقت غلط الباين
انا: لالا عادي ولا يهمك
زكرياء: انا جيت ع طلبك امس لما قلتيلي عندك موضوع خاص ومهم
انا: ايه ....عندي موضوع بس حيقعد سر
زكرياء:اها ....يالي هو
انا:تعال نطلعوا في الحديقة احسن هني ممكن يسمعنا حد
زكرياء: اوكي
نزلنا لوطى ....
زكرياء: تفضلي
انا: مسموحلي نسافر بعد الطلاق
زكرياء: ..... كم عمرك انتي
انا19
زكرياء: .....بس انتي حتى للجامعه ماخشيتي
انا: كاسبة سنتين ....ونقرى في معهد عالي...
زكرياء : وسبب السفر
انا: مش لازم تعرفه ...عموما نبي نعرف شن صار في موضوع الورث
زكرياء: كل شي طلبتيه مني جاهز ....يعني اعتبريه محلول من توا ..
انا: شكرا تعبتك معاي ...
زكرياء مع ابتسامه غريبه : ولو ...امتى نتفاهمو في اوراق الطلاق
انا: بما ان اليوم حنحاول مع الدكتور بش نطلع ...خليه بعد بكرا ...
زكرياء: تمام ...عن اذنك توا
انا: اذنك معك ...وشكرا
طلع زكرياء ...وهو يفكر هل يالي يبي يديره صح او لا لانه اول مره يحس بشي مميز ويتبع قلبه
او عقله ...
اما عندي ...
ركبت فوق وشويه وخش الدكتور
الدكتور: السلام عليكم
انا: وعليكم السلام
الدكتور: ها شن حالك اليوم
انا؛احسن الحمد الله ....
الدكتور: الحمد الله ...
انا: معليشي انا نبيك تعطيني خروج اليوم
الدكتور:لازم نطمن عليك قبل
انا: تمام
وبعد كمل الدكتور وقالي ان حالة قلبي كويسه طلب مني نمشي لدكتورة النساء تطمن ع حال الجنين وفعلا هذا يالي صار ...بس مع مفجاءه صغيره حلوه وكانت ..اني حامل ب ولد
طلعت بعدها واتصلت بسراج بنخبره اني خديت خروج ...
سراج: مساء الرطوبه نتعرف ولا مخطوبه
انا: هههه مبردك والله عند سحر
سراج: مرض نبصر انا ...شن حالك اليوم
انا: يمرضك ههه ...الحمد الله احسن ...قتلك
سراج: نعم ..
انا: الدكتور عطاني خروج
سراج: خلاص ربع ساعه ونكون عندك
انا: منور
سراج: بوجودي
انا؛ مبردك ...سلام توا
سراج: ههه سخنيني
انا: كله عند سحر وانت طالق البراده اليوم
سراج: خزي ..سلام توا
واول ماسكرت من سراج رن تلفوني وكان رقم غريب
فتحت الخط ...
انا: الووو
... : ........
انا: الووو من معاي
..... :.......
انا حاولت اكثر من مره ومارد حد فاسكرت الخط
في مكان تاني
كان في شخص مقعمز وشاد نقاله ويضحك
اما عند قصي: وصل تونس ومشي لفندق واول ماخش حاول يرقد بس مقدرش ....قعد يذكر في ذكريتنا مع بعض ...مع انها مش حلوه بس حس براحه لما اذكر انه كنا مع بعض ...بس خلاص شن ينفع الندم توا .. وزي ميقولو الثالته ثابته
جاني سراج وروحت للحوش ...ومر شهر كان عادي جد مجرد الاحداث يالي تصير كانت لقائي مع زكرياء كل فتره وفتره ع خاطر اوراق الطلاق والورثه ولاحظت شوية تصرفات غريبه من زكرياء لما نتلاقو
لعند يوم :....
زكرياء: حاليا اوراق الطلاق كملنها وزي ماطلبتي بعد عرس سراج نبدو في جلسات الطلاق
انا: شكرا ...تعبتك معاي وانت مش ناقصك
زكرياء: منعبش معاك انا
انا تحشمت من كلمته واستغربت: ......
زكرياء: ماتتحشميش ولا تنصدمي لان بصراحه ..
انا حبيتك ...واول ما تطلقي نبي نطلب ايدك للزواج ...انتي المرا يالي حلمت بيها طول عمري ...مش شكلا بس ...لكن شخصيتك الحديده ...تعبري عن المراه القويه مع انه المفروض نقول الطفله احسن
انا: بس انا طالعه من تجربه فاشله وصعب نوثق بشخص من جديد او بالاصح راجل ... ولازم تتبتلي انك تستحق الفرصه يالي بنعطيهالك
زكرياء: ....هذا قرارك وانتي حره ...بس انا موجود وقت ماستحقيتيني كااخ واب وحبيب وزوج وصديق وزميل وغريب وجار واي شي تحبيني نكونه بالنسبه ليك ...
انا: .........
زكرياء:عن اذنك ياطفله .. .هههه
انا: .....
وطلع زكرياء وانا مقعمزه في حالة صدمه ...صح معرفتاش من فتره طويله بس كان حنون معاي هزيت راسي وقلت: انا خيرني بديت نخرط .... ناقصني راجل تاني انا ...اففف عليك غباء مرات نفكر بيه
تسريع الاحداث مرو شهرين ثانيات وانا وقتها خشيت في الشهر الرابع ...واستلمني سراج كل يوم نفيق ونرقد ع كلمة بطه ....اما قصي كل مايكلموه يقول انه شغل وانه احتمال يرجع في سبوع عرس سراج ...والمشكله انه من نهار سافر مايطلع من الفندق وكان يكلم في امه وسراج بس اما انا مااتصل بيا ابدا ....
لعندما فجائني اليوم بتصاله
قصي: الووو
انا: ايوا نسمع فيك
قصي: علاش مترديش من اول مكالمه
انا: تلفوني وانا حره
قصي: استغفر الله ...باه شنوحالك
انا؛من عند ربي بخير
قصي: خيرك....خاطرك بتنكدي
انا:قصي وراس امك فوتني انساني ...اعتبرني متت انتهيت عادي راه
قصي: استغفر الله ...توا انا شن قلت
انا: نقولك شي ...سلام
وسكرت عليه
قصي: الزح سكرت في وجهي
واتصل من جديد
انا سكرت تلفوني وطلعت برا
ع جيت سراج
سراج : هاك كلمي راجلك نفخهم
انا:منبيش فوته
سراج: كلميه راه نفخهم
انا: الصبر ياربي
انا: الوووو
قصي؛ مره تانيه معش تسكري شقفت العفن في وجهي فاههمه
انا: لا وسلام مره تانيه وسكرت في وجهه
سراج؛ شكله مشفره عندك يابنت العم
انا:لالا لكن خوك النفسيه هذا بكل
سراج: هههه مبرك
انا؛ هذا الحق
وتوا تعالوا نشوفوا شن صاير في حياة فاديه
فاديه من تاني شهر بعد الزواج بدت المشاكل بينها وبين حماتها اولا لانها لتوا ماحملت وتاني شي لانها بايره وماكانت تعرف ولاتبي تعرف كيف اطيب و راجلها كان معصب عليها للاخر وفي3شهور هذوا مشت هلبا لحوش هلها حرجانه
يتبع
