احتواء أنثى

البارت السابع

البارت السابع

#احتواء_انثى

جنت اكول هاي هي ادمرت حياتي ودراستي بس الله عوضني بهالناس ساعدوني وخلوني اكمل

دائما اقرة وزهراء تقربت مني لان اقرة وياها واثنينه بنفس الصف

تعرفون فترة السادس بس هم وقلق تعدي الاشهر بسرعه بسرعه

يادوب الحك انام واقرة ماكو وقت ضاله بالغرفه ومااحب انزل وازعجهم

صح قربوني منهم بس رغم هذا احس نفسي غريبه

مصروفي جان عند العلويه.....السيد ينطيها وهي تنطيني او توديهن بيد زهراء

بالبدايه جنت ارفض بس بعدين اتقبلت هالشي

بفترة دراستي ريحانه ماجنت اشوفها لان تعبت وتمرضت بس اطمن عليها واشوفها شمحتاجه وارجع لغرفتي

كعدنه عطله السادس حتى نقرة خصصنه جدول اني وزهراء

بس جانوا بقلق وتوتر بسبب ريحانه تأزمت حالتها ومايعرفون شبيها

ضلوا يركضون بيها وهي ماكو مايفيد واني اضل ابجي عليها

لان جانت قريبه مني ومن يطلع زوجها للشغل اروح يمها اغسل الها وابدل الها واغسل لابنها واضل شايلته واسوي الها اكل جنت كلش اهتم بيها وهي تبجي من اشوفني

وتكول عوفيني روحي اقري مابقى شي للامتحانات

ماتكدر توكف بس تكوم توكع وتتخربط ومنعوا الحركه منها

ضلت مقعده اشهر وماعرفوا شنو علتها وهي حالها من اسواء للاسواء

مرة كاعده ارتب بغرفتها وانضف بيها وشلت متيم والاعب بيه وطب سراج بس شافني صاح

_شكاعد تسوين بغرفتي

_جنت اغسل لريحانه

_لا انوب شايله ابني جيبي ولا تتقربين منه او من مرتي فاهمه ....صاح يله اطلعي برة

طلعت بسرعه ابجي ....يزمخ بيه ويطردني ليش هيج وياي كارهني

ومامسويه اله شي كله بسبب ابوي الناس عبالها اني مو زينه ...على شنو انقهر منه اروح اقرة احسن

ضليت احتار بريحانه وبدراستي واروح اساعدها وقبل لا يجي زوجها اشرد حتى لا يعيط واضل اقرة بوكت وجوده

متيم تعود عليه اذا يجوع او يغير حفاظه يجي الي لان امه ماتكدر تتحرك ولان اني مهتمه بيه يجي الي

ويضل يصيح اوزة حفاثه اوزه عمينه ....عود روز حفاظه وروز اكل يريد

غيرت اله الحفاظه ووكلته والكل منتبه شلون اهتم بيه وبريحانه وفوكاها دراستي هلكت فدنوب

جنت كاعده يم ريحانه...جانت نايمه وكعدت طلبت مني

_فدوة روز طلعي هدوم سراج هسة يجي