احتواء أنثى

البارت 12

البارت 12

#احتواء_انثى

استمر نفس النظام مايقبل خط الا هو يأخذنه ومايحجي وياي ابد ولا يطلب مني شي

ويوم جنه منتظريه اتأخر واكفين اني وزهراء اجه طالب من شعبتنه اسمه زهير

_شلونجن بنات بس عادي تنطني تلخيص البارحه ماداومت

ردت زهراء

_ماعندي ماكتبته بس روز كتبته

_روز عادي اخذة باجر ارجعه الج

_اي عادي اتفضل وابتسمت اله راح هو ومانشوف الا سراج واكف ومجتف ايديه وقريب من السيارة

_يا عمو

_استلمي هو بدون شي يريد عركه لازم اليوم من نرجع اسمع رزاله وابجي

_عادي كليله اخذ تلخيص

صعدنه وهو وجهة مايتفسر من ورة الاعصاب والجكاير يبوي ماتخلص رجعنه للبيت نزلنه وهو بس طب ضل يصيح

_يعني شلون بيج كل مااسكتين فترة لازم يجي يوم اتلفين اعصابي

اجه اخوه حيدر الجبير

_شبيكم توكم طبيتوا

واجت مرة احمد كلهم اجتمعوا والحجيه فاتحه باب الغرفه وتحجي شكو

_لج انتي شلون ابطلج

ردت زهراء
_عمو ماصار شي

رد عليها_زهراء لا تدخلين شعليج

_شنو ماتحملتي ماكو احد تحجين وياه وتبتسمين اله طكت روحج وبعدين رجعتي لطريق الي اجيتي منه اشتاقيتي لسوالف الزلم وياج

_اني مصدومه من كلامه وبس ابجي .....انت ليش ماتفهم هذا طالب ويانه وراد تلخيص وزهراء موجوده

هو بسرعه ركض عليه راد يضربني ولزموه اخوانه

_لج منو المايفهم اليوم اكسر راسج

_دومك تريد تكسر راسي كسرة يله حتى اخلص

_لج شو لسانج طولان عوفوني خل اربيها

اجه السيد وصاح عليهم

_شكو اجي هنا ارتاح تتعاركون شكو باوع عليه وسالني

_شبيج يابه

_طالب ويانه طلب تلخيص لان غايب وزهراء اعتذرت منه لان ماكاتبه واخذ الدفتر مني والله بس هذا وزهراء موجوده

_اي جدو صح ماسوت شي

باوع السيد على سراج

_شبيك كالب وجهك اعصاب ماكو شي زميلها وطلب شكو مكبرها يعني نحط البنيه بسجن حتى ترتاح

_اي بعد طلعوا عينها وبالاخير تسوي شي

عافنه وطلع ضليت ابجي والكل رجع لمكانه

صعدت فوك شوي واجاني متيم

_لا تبجين

_هههه حاضر

رجعنه نفس وضع لا احجي وياه ولا حتى اشوفه بس وكت من يأخذنه والطلاب محد احجي وياه واي احد يطلب شي اعتذر منه واروح

بالطريق سراج بس خانكنه بالجكاير واني يجيني فضول اباوع عليه تفتر تفتر عيني وارجع اباوع عليه وهو ساكت حلو شكله ومعانيه بس من يصير عصبي ويعيط اضوج منه

دائما اكعد يم العلويه وتحجي الي عن طفوله سراج شلون جان وكح ولسان واطلع صور اله

مااعرف شنو فضول اضل يمها واسمع حجيها من تحجي عنه واضل اضحك وافرح من تحجي بس اتحجج اروح يمها حتى اسمعها تحجي عن حياته

وشلون تكول الي حنون

_لا تشوفينه هيج عصبي اذا حب احد يدلله ويصير حنون وياه ومايقبل احد يتقربله يعني اذا حبج من حظج

_وين يحبني علويه هو ماطايقني بعدين عوفيه هيج احسن اني مرتاحه

_دضلي هيج فاهيه وبس تبجين ماتعرفين تكسبيه

عفت العلويه وكمت انوب تكول يدلل من يحب وحنون فات من يمي ضليت اباوع عليه وعلى طوله وجسمه وشكله ولبسه شلون مرتب وكعد يم اخوانه ويسولف ضليت صافنه عليه

انوب بس باوع عليه كمزت وشردت

بالدوام بس افكر بيه ومن يودينه ويأخذنه اباوع عليه من المرايه واكثر من مرة يلكفني اباوع وادير وجهي

هسة شكول على العلويه خلته ابالي وافكر بيه واني ثوله شكو افكر اذا هو عصبي وبس يهين بيه ...واني صافنه اجت زهراء

جانت بغرفته واجت الي جايبه ملابسه كالت اغسليهن اخذتهن منها حتى اغسلهن صار فضول اشم بملابسه قربت قميصه وشميته ريحته تجنن

اباوع على الملابس واكول وين الوصخ بيهن شو ريحتهن تجنن وماكو اي وصخ لعد شو اني الا انكع بالدشداشه لو يوكع شي يله ابدل احجي ويه روحي ومااحس الا فات من يمي

جمدت اني وشمرت روحي على الغساله حتى اغطي ملابسه ومايشوفهن ضليت ممدده على الغساله وهو بس يباوع مصدوم من تصرفي هز ايده ومشه

ضليت اباوع عليه واضحك ....يا كبر شكو اضحك لج اذكري هذا يهين بيج عوفي شكو تفكرين

خلصت ملابسه وانطيتهن لزهراء تصعدهن
..............
خلصت المرحله الاولى والامتحانات والتعب وكعدنه بس نريد عطله

واني تفكيري ضل بس بسراج شكو افكر بيه ....ياربي شكول على العلويه من خلته براسي

كاعدين جوة الكل مجتمعين بالصاله الولد والاحفاد والنسوان الي يلعب دومنه والي يلعب بلي والي ملتهي بالموبايل والنسوان جاي وضحك والعلويه هم كاعده طلعناها من الغرفه

واني كاعده ومتيم بحظني ونسولف اني وزهراء وبنات عمها وياها شوي ونزل سراج يأشر ......

❤❤❤❤❤
#امونشا
#باندا
رأيكم❤
صوتوا☻