يانجمه لوشفتني الگمر يم النهر روحيله
زينبكم ابليل السفر شبعت قهر واحچيله
هذا انته ياوجه الصبح
لو هذا گلبي اعله الرمح
لوهذا گلبي اعله الرمح
********
اخذوني عميه اعله الهزل * ماادري وين المسره
انه ادري اخوي اشگد وفي * عنده الوفه اعله الفطره
يعرفني بس قائد خدر * ماصير قائد اسره
شيريد چفين ويجي * اخذيله يمنه ويـسره
گوليله وديله هوه
انطي ضوه ويرجعلي
تسگي دمعتي من الظمه
انطي دمـه ويـفزعلي
اعتب بعد لو ينجرح * لو هذا گلبي اعله الرمح
لوهذا گلبي اعله الرمح
____________________________
عباس چان امن الزغر * يحچيلي عل عاشگته
ويحبها وتحبها ابرغم * ما شافها وشايفته
من يلتقي وياها ابشرط * من يمها ويعوف إخته
والصدفة صارت والتقوا * راعي الوفه ومشرعته
گوليله شوگ المشرعه
ماگطعه گطعني
يالغافي بأحضان النهر
آنه السهر ضيعني
وجروحي عاشرهن ملح * لو هذا گلبي اعله الرمح
لوهذا گلبي اعله الرمح
____________________________
گلت الها شيگول انتظر * لو هاي هيه اتيسر
گالت لي حماي الضعن * مگطوعه إديه والمنحر
گلت الها اعرفه ابـ نـخوتي * ميت وما يتعذر
گالت لي عرگت غيرته * ماي الفرات أتبخر
مو گال مهلا عالسبي
بنت النبي اشتتمهل
جابـو الهـودج وانتهت
واخته اركبت عالمحمل
ما أشرح ايطول الشرح * لو هذا گلبي اعله الرمح
لوهذا گلبي اعله الرمح
____________________________
گوليله وي وادم غرب * مشيتها زينب كلفه
غطي الخيال ابرايتك * شافته اعيون الصلفه
واطفالك احبال السبي * توجع واديهم ترفه
يا حره مثلي امچتفه * ماتدري وين المنفه
حاچيتي وين انطي الوجه
وين انتبه مادري
چم طفل يبچي من الظمه
من معصمه الدم يجري
والليل بغيابك وكح * لو هذا گلبي اعله الرمح
لوهذا گلبي اعله الرمح
____________________________
حاچيت راسه اعله الرمح * خجلان ماجاوبني
يانجمه حاچيلي الجسد * بلكي الجسد يسمعني
ليش من اباوع للسمه * ابرمحه الشمر يدفعني
يدريني إذا شفت الگمر * عباس أشوفك يعني
تمنيت اشوفه ولوحلم
بس المهم احچيله
وابچيله من عيني نهر
واعتب دهر واشكيله
اسمع نبض گلبه السمح * لو هذا گلبي اعله الرمح
لوهذا گلبي اعله الرمح
____________________________
معقوله اصيحه ومايرد * احتاج إله ومايفزع
عباس اذا أصيحن يجي * گبل الصده مايرجع
انه اگطع ابروحي اعتقد * بس هوه لا مايگطع
گل هذا بيه وما دره * معناها أخويه امگطع
سلميلي عالغالي بعد
هذا الوعد يانجمه
واشكيله جرح ال بالگلب
و بيا ذنب يلچمه
گوليله مثلك ما يصح * لو هذا گلبي اعله الرمح
لوهذا گلبي اعله الرمح
____________________________
امشي وعلى الله وعالصبر * والراي راي الهزل
تعثر واطيح اعله الدرب * ويـسبني شامت واقبـل
ماخاف واني الـ بالظعن * بعد الكفيل اتكفل
يانجمه مو سهله الشمس * بالليل من تتوسل
راح ادخل ابزودي القصر
راح انتصر وبزودك
واتبهى گدام الشمر
ابقه افتخر بزنودك
ماعندي وياهم صلح * لو هذا گلبي اعله الرمح
لوهذا گلبي اعله الرمح
____________________________
كلمات الشاعر احمـد الذهبـي
أنت تقرأ
كلمات لطميات باسم الكربلائي وغيره من الرواديد ١
Ngẫu nhiênكلمات لطميات باسم الكربلائي و غيره من الرواديد اجمل صوت في هذه الدنيا اكتبوا قصيدتكم المفضلة في التعليقات وان شاء الله اكتبهه الكم❤️😊
