كلمات لطميات باسم الكربلائي وغيره من الرواديد ١

٣١.مهلاً بنات النبي

مهلاً بنات النبي...إلمن تخيطن عبي
ما زال أشم الهوه...أرفض حديث السبي

أعرف بالعبي...ما تحمل سبي...خيطتن خيم عباية
بالخيمة القصد...تحمي من الجلد...من عين التصد حماية
زينب هالعمل...بيه نبرة زعل...بيه لمحت عتب كفاية
ما عندجن أمل...لا ظل محتمل...قررتن غداً سبايه
وسفه دمعجن يهل...و آنا بعدني عدل
هذا بيميني اللوه...أرفض حديث السبي

زينب تستعد...و اتروح و ترد...تمشي و تلتفت إليه
عاشت واقعة...اجفوف امقطعه...يم شاطي النهر رمية
و تقول الصدق...باجر نفترق...خيمة تحترق عليه
يمي اتجمعن...مدري اشضيعن...بس يتباوعن لديه
خل نصبر و ننتظر...ميهمنه غير الستر
منا لباجر سوه...أرفض حديث السبي

تحجنها بنحب...منهي التنسلب...منهي الينضرب متنها
أدوار اتقسمت...كل وحدة خذت...دور و هيئة حزنها
ليش أم الطفل...حست بالفعل...باجر ينجتل إبنها
اتفقن نسه...باجر بالمسه...زينب حارسها أظنها
مسرح سبايه شفت...و آنا عدل ما متت
يا ربي قلبي انجوه...أرفض حديث السبي

صح المسألة...صعبة و مذهلة...لا ما ينحمل أساها
مشغول الفكر...و اعله أم الخدر...لو باجر شمر إجاها
أعرف مو شهم...ظالم ينتقم...سوطه و بالشتم ولاها
و اشلون أحتمل...أفعال النذل...لو صح عالهزل سباها
يا رب عله العلقمي...اعيوني خل تنعمي
من زغري و القل هوه...أرفض حديث السبي

اهواية اتحملت...عاد اتدخلت...و آنا غايتي السلامة
باجر يبتدي...حجي المعتدي...بالله اتجاهلن كلامه
من تتهاجمن...حيل اتلاحمن...لا تتفرقن أمامه
صيرن فذ جسم...محد يقتحم...خلن بالوسط يتامه
حتماً غداً ينتصر...دمع الخدر عالشمر
و آنا اعله هالمستوه...أرفض حديث السبي

و الممشة نسق...ما كو مفترق...متن اعله المتن سويه
حته اليقتحم...بيجن ينصدم...ما يقدر يصل رقية
زينب حاولي...خوية اتحملي...نظرات العدو أذية
و الممشة بحذر...لا وحده اتعثر...هذي يالحرم وصية
امشن مشي منتظم...و اتحزمن بالعلم
حد الما يموت الضوه...أرفض حديث السبي

لو باجر صبح...و حسين انذبح...لحد تعتني تنظره
عندي مشكلة...زينب توصله...وي جيت الشمر تحضره
يتربع عله...صدره و يسله...ليش من القفه ينحره
أعظم فاجعة...من اتباوعه...و اخيول العده اعله صدره
زينب يجيها الفزع...بكعب الرمح تندفع
و هنا يضيع الدوه...أرفض حديث السبي

ها يم الحزن...قلبي مطمئن...يبقه مرتفع علمنه
خل يتعذبن...خل يتسلبن...لبوات الشرف حرمنه
مهما نعتبر...مهما نصتبر...سبي العايلة يهمنه
و احنه ابلا نفس...لو واحد لمس...ناقة بت علي هضمنه
لو اختي مسها الخطر...راسي انتبه و اعتذر
درب المسير انطوه...أرفض حديث السبي