يوسف مارموك ابير احزانك.........لو أم البنين الربت اخوانك
لومسك خطر يرحولك فدوه.........ماتربه الأسود إلا ابحضن لبوه
لو أم البنين الربت اخوانك.......لو أم البنين الربت اخوانك
____________________________
ريت الأربعه وياك يحمونك
لاتوكع ابير ولايبيعونك
والرفعة مقامك مايحسدونك
ماتغله الركاب الخاطر اعيونك
هاي أم الأسود الحرة ربتهم ...... مو بس باللبن بالغيرة غذتهم
غذتهم شهامه ومرجله ونخوه ........... ماتربه الأسود إلا ابحضن لبوه
لو أم البنين الربت اخوانك........لو أم البنين الربت اخوانك
______________________________
عافوك ومشوا مرتاح خاطرهم
ليش اتعاتب الماتت ضمايرهم
شوف ابكربله اشكتبت بواترهم
لأجل حسبن تتكطع مناحرهم
يايوسف بريء الذيب من دمك ...... مشكلتك لإن عباس مو يمك
ينطيهم درس عباس بالخوه .......... ماتربه الأسود إلا ابحضن لبوه
لو أم البنين الربت اخوانك..........لو أم البنين الربت اخوانك
_____________________________
رجعوا يم ابوك وقبلوا إيده
كالوله قميصه وبي دم وريده
كلام أم البنين اتكوله وتعيده
اليجي ابغير ابو السجاد ماريده
اريد اصدوركم دون الأخو ساتر ...... يمه مايموت اليحسب الباجر
يستاهل خدرنه اجفوف المروه ......... ماتربه الأسود إلا بحضن لبوه
لو أم البنين الربت اخوانك ........ لو أم البنين الربت اخوانك
_____________________________
اخوتك لو ربوا ابأحضان هالحره
ماشالوا رماد وعافوا الدره
ي يوسف علمت عباس من زغره
حارس زينب وخادم لأبو العتره
يبوس إيد الحسين ويوكف اجلالاً ...... تسمع بس نعم وتدلل وحالاً
عرفهه ابلا حُسين الدنيه ماتسوه ...... ماتربه الأسود إلا بحضن لبوه
لو أم البنين الربت اخوانك ........ لو أم البنين الربت اخوانك
_____________________________
امك ماجوتهه جمرة الفركه
ولاضلت ابدربك تلطم ابحركه
ونين ام البنين ايسكت الوركه
بردت والحنينه تدفه بالملكه
اجت رحمة الموت ابقسوة الغيبه ...... ي يوسف واليضمه الكبر شيجيبه ؟
والعطشت ابنهه اشلون تتروه ؟ .... ماتربه الأسود إلا بحضن لبوه
لو أم البنين الربت اخوانك ....... لو أم البنين الربت اخوانك
_____________________________
ي يوسف والشمل بعد الفراق التم
رد يعكَوب شوفه وراح ذاكه الهم
لجن ام البنين اشكثر تتألم
ما ردو ولدهه رد إبن حذلم
من سمعت ابمقتل صاحب الرايه ...... كالت والنعم ماخيب اربايه
كال الهه ملك ماي النهر كوه ...... ماتربه الأسود إلا بحضن لبوه
لو أم البنين الربت اخوانك ...... لو أم البنين الربت اخوانك
____________________________
تصرخ وين اخوتي رافع ايمينك
ماواحد اجاك ولزم جفينك
لوصاح السبط ها يالأخو وينك!
يسمع اربعة ايصيحون عد عينك
صاحوا اربعتهم كول مولانه ....... خدامك واخوتك دوم تلكانه
واحدهم ابجفه ارماح تتلوه ...... ماتربه الأسود إلا بحضن لبوه
لو أم البنين الربت اخوانك ....... لو أم البنين الربت اخوانك
_____________________________
ما ودوا قميص ويحمل اخباره
بس ودوا اختهم تحمل ابشاره
ابشرج ع الشريعه ايمينه ويساره
والسبعين الف سجدوا البتاره
غاروا اربعتهم والأرض مالت ...... والجابت مثلهم بعد ماجابت
شبه السيل نزلوا والأرض رخوه ....... ماتربه الأسود إلا بحضن لبوه
لو أم البنين الربت اخوانك ........ لو أم البنين الربت اخوانك
أنت تقرأ
كلمات لطميات باسم الكربلائي وغيره من الرواديد ١
Rastgeleكلمات لطميات باسم الكربلائي و غيره من الرواديد اجمل صوت في هذه الدنيا اكتبوا قصيدتكم المفضلة في التعليقات وان شاء الله اكتبهه الكم❤️😊
